Ahooleli wi Ekukhuleke Muhuwo

VARIYARI va muteko awe veelaponi yavathi, Yesu aahooniherya okhala “mukukhula aphaama.” (Yoh. 10:11) Vaavaa onneiye mucici wa achu omucharaka, “aamoriwano ikharari, vawi waahaleela ni ohipwachiwa, ntoko ipucepuche ihirino mukukhula.” (Mat. 9:36) Petro ni arummwa akina yaahihuseryavo echu vooloca sa wuukhuwa wawe woosivela. Yesu aari oohiyana ni akukhula oowoka a nloko na Isarayeli, yaawo yahaathokororya muhuwo ophiyerya ipucepuche omwalamwala ni ohooseya omunepani! (Ezek. 34:7, 8) Yootakiherya yaphaama ya Yesu ya ohusiha ni okhapelela ipucepuche, ophiyerya oveleela okumi awe wa seiyo, yaahaahusiha arummwa mukhalelo wa waakhaviherya yaale yaarino nroromelo omukookela Yehova, “mukukhula ni muhooleli a okumi [aya].”—1 Ped. 2:25.

² Ekwaha emoha alocaka ni Petro, Yesu aahiceenyerya ochuneya waya olyiha ni okukhula ipucepuche. (Yoh. 21:15-17) Moohikhwa minikwa Petro aahiceenyeryeya mwa yeela nave ohoolo waya aahaaceenyerya atokweene a muloko woopacerya Weekristu: “Mukukhule muloko wa Muluku, yoowo ori mwa nyuwo, muthokororyaka phaama. Ohiya mookhinyererihiwa, mweerekeno moolakelela ntoko Muluku onakhweleiye. Muheerekeno wi muwerye wiiphwanyeryavo echu, nto ni murima woothene. Muhiiseere pwiya a yaawo munnyereriwaanyu, nto mukhale yootakiherya wa muloko.” (1 Ped. 5:1-3) Masu a Petro annaphariheleyatho wa ahooleli a mmilokoni sa olelo. Emutakiheryaka Yesu, atokweene annarumeela mwawiiveleela nave anniilipiserya okhala yootakiherya ya muhuwo, ehoolelaka muteko wa Yehova.—Ahe. 13:7.

³ Nnaphwanela waathamalela ahooleli yaala a mmulokoni athanliwe ni munepa. Miphurelo nnaakhelaahu orweela wa okhapelela waya ti sincipale. Ntoko yootakiherya, ahooleli annavaha nlipiho nave annampwacha muchu ti muchu a mmulokoni. Esumana ti esumana, awo annahoolela mithukumano mwamvai, mummo nroromelo na oothene nnalipihiwaaya. (Aro. 12:8) Wiilipiserya waya okhapelela muhuwo orweela wa ichu sawoopiha, ntoko achu oonanara murima, enneeriha wi nikhapeleleye. (Isa. 32:2; Tito 1:9-11) Ohoolela waya mmuteko woolaleerya onnanceenyerya otitelela olaleerya michaka yaphaama mwamvai mweeri ti mweeri. (Ahe. 13:15-17) Moorweela wa “samahala” seiya sa achu, Yehova onnavahererya nlipiho mmilokoni.—Éfe. 4:8, 11, 12.

⁴ Wi eroromele wi muloko onnakhapeleliwa moophwanelela, alopwana athanliwe orumeela ntoko ahooleli, anaphwanela okhalano mikhalelo siri soochuneya sinaphwanyeya mu Masu a Muluku. Pahiru wakhala wi annaphwanelela onanwerya olociwa wi awo athanliwe moorweela wa munepa waweela. (Saw. 20:28) Oloca eparipari, malakiheryo a mu Soorempwa wa ahooleli Eekristu tavasulu, woona wi okhala muhooleli murici mutokotoko. Nto malakiheryo tahi a vasuluxa ophiyerya ohaakhwaniheryiwa ni alopwana Eekristu yaawo anamusivela Yehova nave ari ooreheryeya ophariheliwa ni yoowo. Enaphwanela okhala yawooneya wa oothene wi ahooleli, achu yaawo anapharihela ikano sa Piipiliya mu saweereya sa okumi aya wa nihiku nnihiku.

⁵ Murummwa Paulo aahiloca mikhalelo siri soochuneya sa mu Soorempwa ntakhara ahooleli mu ekaarata awe yoopacerya wa Timoteo ni ekaarata awe wa Tito. Mu 1 Timóteo 3:1-7, ninnaalakhanya: “Muchu aachunaka muteko woohoolela muloko, onakhwela muteko waphaama. Muhooleli onnaphwanela okhala oocicimiheya, mulopwana a muthiyana mmoha, awiikhapelela, awiisuumaaliha, oomaala, oowaakhela aleco ni oowerya ohusiha. Ahikhale muchu onahapaliwa, oowali, amaraapwa, nto ooleva. Ahikhale oochunasha muhakhu. Ahooleleke phaama echoko awe; anamwane awe ekhale awiiwelela ni ophwanelela woothene. Muchu ohinawerya weeciha echoko awe anii awerye hayi othokororya muloko wa Muluku? Ahikhale muKristu ahiihanoru wi ahimorele woothorihiwani ntoko musaserya wa nthowa na wiirumiha. Onnaphwanela tho wi amalapo emweereleke onamoona waphaama wi ahimorele mmurohoni ni muraakho wa musaserya.”

⁶ Paulo aahirepa: “Nthowa nene koohiyenraaka mu Kereti, ti nawi wookolole ichu seiyo ihanle ni waathanlela atokweene, muceche ni muceche, ntoko koorummaaka. Mutokweene ahikhaleno nthowa. Akhale mulopwana a muthiyana mmoha, orino anamwane oororomela, oohisomeliwa ni elavilavi nari ohiiwelela. Onaphwanela wi muhooleli ahikhaleno nthowa oreiye ntoko mulipa ookhapelela sa Muluku. Ahikhale awiisinnuwiha, awaakuva onanariwa, onahapaliwa, oowali, nari awaavyavya muhakhu. Nto akhale oowakhela aleco, ooreera murima, oocicimiheya, awookololowa, aweela murima, ni awiihiiha. Akhale tho awaakeleela masu oororomeleya ntoko ohusihiweiye, wi aweryeke waalipiherya achu mmahusiheryo ookumi ni waavaanyiha yaawo anavaanya.”—Tito 1:5-9.

⁷ Naamwi mikhalelo siri soochuneya sa mu Soorempwa wa ahooleli ikhalaka ntoko wi ti soovila, alopwana Eekristu hanaphwanela oceecheya waavya okhala muhooleli. Vaavaa awo anooniheryaaya mikhalelo saphaama Seekristu vooloca sa ohoolela, awo annaaceenyerya akina mmulokoni opaka emohamoha. Paulo aahirepa wi “samahala” sa achu ntoko seiyo ivahereryiwe “wi yaareherye aweela murima ophara muteko awe, wi mwiili wa Kristu otikitheryeye, ophiyerya oothene hiyo niphwannye omoha wa nroromelo, nimusuwenle mwaana a Muluku wi nikhale muchu awaakhwanela, ntoko mphimo wawaakhwana wa Kristu.”—Éfe. 4:8, 12, 13.

⁸ Ahooleli tahi maponkwe naari alopwana ahiihaanoru. Opwaha yeeyo, awo achu arino mavyakelo mu okumi Weekristu, aakhalano masuwelelo mancipale a Piipiliya, anniiwexexa phaama Soorempwa, nave annasivela Muloko. Awo aakhalano olipa murima wa waakiha ni owookolola anamacheka, ekhapelelaka ipucepuche orweela wa echu vyakala yaahaala onanariha. (Isa. 32:2) Oohoolela aasuweliwa ni anna oothene a mmulokoni ntoko alopwana awiichwelavo omunepani, anuukhuwa ni muhuwo wa Muluku.

⁹ Yaale arino ophwanelela wa okhala ahooleli, annooniherya miruku soophara muteko mu ikumi saya. Wakhala wi oothela, muhooleli onaphwanela ochariha malakiheryo Eekristu vooloca sa othela moorweela wa, okhala mulopwana a muthiyana mmoha ni weeciha echoko awe mmukhalelo waphaama. Wakhala wi muhooleli ookhalano anamwane oororomela, yaawo ari awiiwelela ni ophwanelela woothene ni oohisomeliwa ni elavilavi naari ohiiwelela, muloko onanwerya omuroromela, omwaacamela wi emveke ekano mmukhalelo wa weeciha echoko ni okumi Weekristu. Muhooleli tho toocicimiheya nave ahikhaleno nthowa, nave akhaleno onamoona waphaama ophiyeryatho ni amalapo. Ahiphwanyeryiwe meecelo oohiphwanelela wa yoowo wi ahinyemulihe muloko. Owo ahikhale muchu olakiwe hiihaanoru nthowa na yoocheka etokotoko. Akina a mmulokoni annaceenyeryeya ochariha yootakiherya awe yaphaama ni okhala oohakalala eroromelaka wi okumi aya woomunepani ori wookhapeleleya ntakhara okhapelela wawe.—1 Kor. 11:1; 16:15, 16.

¹⁰ Alopwana ntoko yaala oophwanelela annawerya orumeela muloko Weekristu moolikana ni atokweene yaale a Isarayeli yaawo analociwa ntoko “amiruku oosuwela ni oosuwanyeya.” (Malam. 1:13) Tahi wi atokweene Eekristu toophaameya, nto asuweliwe mmulokoni ni ochu anakhalaayawo ntoko aphaama ni alopwana anamoova Muluku yaawo mu elukuluku yincipale anooniherya wi anneeciha ikumi saya mwawiiwanana ni malakiheryo oomuluku. Ohikhalano waya nthowa onnaweeriha okhala ootaphuwa oloca vamiithoni va muloko.—Aro. 3:23.

¹¹ Alopwana oophwanelela othanliwa ntoko ahooleli annooniherya wiikhapelela mu sookhovelela ni waakhaliha waya akina. Awo haniisona okhala a vasuluxa. Moohiyana, mukhalelo aya wa okumi onasuwanyeya moorweela wa okhala oophimelela ni awiihiiha. Ophimelelaya waya onooniheryeya mu ichu ntoko olya, owurya, othata, wiichuuwa ni ochekulela. Awo anakhala oophimeleleya mu opharihela soowurya wi ehisuweliwe ntoko achu oowuryaxa naari okhala oohapaliwa. Yaawo muupuwelo aya ovoloweliwe ni soowurya, annaakuvela oyeleela wiihiiha nave hanawerya ovareryela soochuna soomunepani vooloca sa muloko.

¹² Ovareryela muloko onachuneya wi mulopwana akhale oomaala. Mikhalelo sawe saphaama sinoonihereya mu ophwaneliwa wawe, owannyawe, ni mmiteko sawe sa nihiku nnihiku. Owo onnasepa okhala ooporora; owo onnoona yeeyo eri yookhweleya nave onnapaka ichu mwawiiwanana. Owo onnachariha malakiheryo oomuluku.

¹³ Muhooleli onaphwanela okhala ooleva. Owo onaphwanela okhala ooreheryeya olapa ni akina a nikhuuru na atokweene mwawiiwanana. Owo onaphwanela wiivareryela mwaneene ni ohaavirela akina mmirukuni. Ntoko muchu ooleva, muhooleli tahi muchu oolipa mmoonelo awe, uupuwelaka wi moonelo awe ti wavasuluxa opwaha wa atokweene akina. Akina ananwerya okhalano mikhalelo naari mavyakelo aphaama yaawo owo ohireiyeno. Mutokweene onnooniherya oleva vaavaa sooloca sawe sinathipeleyaaya mu Soorempwa nave aniilipixerya ochariha yootakiherya ya Yesu Kristu. (Fil. 2:2-8) Mutokweene tahi amaraapwa naari oowali nto onnaacicimiha akina, awoonaka okhala a vasulu. Owo haniisinnuwiha, anyesereryaka wi mukhalelo awe naari moonelo awe weemereryiwe. Owo hanaakuva onanariwa, nto onakhala a murecele mu waakhaliha wawe akina.

¹⁴ Emohamoha, ori oophwanelela orumeela ntoko muhooleli mmulokoni tawiisuumaaliha. Ela enataphulela wi owo onakhala oomaaleleya, hanaakuvela othoriha. Owo onniiwexexa phaama malakiheryo a Yehova ni ophariheleya waya. Muchu yoowo oniisuumaaliha onnaakhela ekano ni ohoolela. Tahi nawiisootherye.

¹⁵ Paulo aahimuupuxerya Tito wi muhooleli akhale ooreera murima. Owo onaphwanela okhala awookololowa, ni aweela murima. Mikhalelo seiha sinooniheryeya mu waakhaliha wawe akina ni othipeleya wawe wa yeeyo eri yawookololowa ni yaphaama. Owo ori oothipeleya mu omoova wawe Yehova ni opharelela malakiheryo eekhaikhai. Owo onnakhapelela ichu sawiiphini. Owotho toowaakhela aleco, ori ootaphuwa ovaha ichu sawe wi saakhaviherye akina.—Saw. 20:33-35.

¹⁶ Wi arumeele moophwanelela, muhooleli onaphwanela okhala oowerya ohusiha. Mwawiiwanana ni masu a Paulo wa Tito, muhooleli onaphwanela okhala “awaakeelela masu oororomeleya ntoko ohusihiweiye, wi aweryeke waalipiherya achu mmahusiheryo ookumi ni waavaanyiha yaawo anavaanya.” (Tito 1:9) Owo ori ooreheryeya waalikhela mwaha, ovaha sawooniherya, ovootha soohookololowa ni opharihela Soorempwa mmukhalelo yoowo onaalekecha akina ni olipiha nroromelo naya. Muhooleli onnooniherya mavyakelo yaawo a ohusiha mu elukuluku yaweemereryeya naari yooheemereryeya. (2 Tim. 4:2) Owo onnapixa murima wi awookolole mwaphaama yaale anahesa naari anakhalano minikwa ni waaceenyerya opaka miteko saphaama inathipeleya mu nroromelo. Akhala oophwanelela ohusiha veeri va achu ancipale naari achu vakhaani yawooniherya wi muhooleli ookhalano soovekeya seiya sookhweleya.

¹⁷ Ti woochuneya atokweene okhalano mvai mmuteko woolaleerya. Ela enaphwanela okhala yawooneya wa yaawo wi annamuchariha vakhiviru khiviru Yesu, yoowo oona muteko woolaleerya okhala woochuneya. Yesu aahithokororya soochuna sa oohuserya awe, aakhaviheryaka okhala anamichaka aphaama. (Mar. 1:38; Luka 8:1) Yoolakelela ya atokweene ya omaliha elukuluku aya mmuteko woolaleerya moohipwacha waaceliwa waya, ennaceenyerya muloko woothene okhalano mvai mmohamoha. Nave vaavaa atokweene analaleeryaaya vamoha ni aveemusini vaya hiiha ntoko ni anna akina mmulokoni, yookhumelela enakhala ‘olipihana.’—Aro. 1:11, 12.

¹⁸ Soothene seiya inakhala ntoko wi murici mutokweene onaweheryiwa wa yoowo onarumeela ntoko muhooleli. Mweeparipari, tahi wi mutokweene onnaakhwaniherya moophaameya malakiheryo avasulu a Piipiliya, nto ahikhale mutokweene a mmulokoni onaphwanela oyeleela mikhalelo seiha ophiyerya wooneya ntoko yoohesa etokweene. Atokweene akina akhweya aakhalano mikhalelo saphaama, eniiha akina eri aphaamaxa mmakupa makina. Yookhumelela ti yawi oothene a nikhuuru na atokweene anahaala okhalano mikhalelo saphaama seiyo siri soochuneya wi ehooleleke mwaphaama muloko wa Muluku.

¹⁹ Vaavaa atokweene ntoko nikhuuru anamuthanlaaya munna ntoko oohoolela anaphwanela okhalano mmuupuweloni masu a murummwa Paulo: “Kinii wa nyuwo oothene: Ahikhalevo anii iisuupuweleleke meekheiye opwaha mwemmo onaphwaneleiye; nto uupuweleleke mwa wiisuwela ntoko Muluku omukawela wawe nroromelo mmoha ni mmoha.” (Aro. 12:3) Mutokweene ti mutokweene onaphwanela wiisoonaka okhala mukhaani. Haavo onaphwanela “wiseera amirukusha” vaavaa anathokororyaaya ophwanelela wa akina. (Ekle. 7:16) Erino mmuupuweloni mikhalelo siri soochuneya sa mu Soorempwa vooloca sa ahooleli, nikhuuru na atokweene nnaphwanela woona wa munna onathokororyiwa waakhanle wi onnakhwaniherya malakiheryo yaawo. Yoonaka tho ohiphaameya wa achu ni osepa okhala a nthalu ni anawiisootherye, atokweene anahaala omweemererya munna mmukhalelo enooniherya ncicimiho noophwanelela ntakhara malakiheryo eekhaikhai a Yehova nave eri yaphaama wa muloko. Awo annapaka nivekelo vaavaa anamuthokororyaaya munna ti munna othoonyiwe wi avahiwe murici ni ochariha ohoolela wa munepa waweela wa Muluku. Ola ori murici mutokweene aryaayano, nave anaphwanela weerano mwawiiwanana ni olopola wa Paulo: ‘Ohaakuva omukuherya muchu mata.’—1 Tim. 5:21, 22.

²⁰ Alopwana athanliwe annavaha sawooniherya wi anahooleliwa ni munepa waweela, nave annooniherya sawiima sa munepa muukumini mwaya. Paulo ooloca ichu thanu naxexe sa sawiima sa munepa ntoko “osivela, ohakalala, murecele, ovilela, oreera murima, saphaama, ororomeleya, opisha murima ni wiisuumaaliha.” (Gal. 5:22, 23) Ahooleli ntoko yaala, annawiichuuwiha anna ni okhaviherya muloko okhala wawiiwanana ekhwaaniheryaka muteko waweela. Meecelo aya a okumi ni sawiima sa wiilipixerya waya sinnooniherya wi athanliwe moorweela wa munepa waweela.—Saw. 20:28.

²¹ Ti yoochuneya atokweene olapa vamoha wi yaaceererye murecele mmulokoni. Awo akhweya aakhalano makhalelo oohiyana, nto annakhapelela wiiwanana wa nikhuuru, moorweela wa owiriyanana mwancicimiho, naamwi eheemereryaka echu eri yoothene ya mwaha anathokororyaaya. Wakhala wi mwaha honavuhana ni malakiheryo a Piipiliya, mmoha ti mmoha onaphwanela okhala ooreheryeya okhaviherya yoolakelela yookuchula ya nikhuuru na atokweene. Yoowo ohinuumelela moonelo awe onooniherya wi onahooleliwa ni “miruku inarwa wirimu,” ori ‘murecele, ni oleva.’ (Tiy. 3:17, 18) Haavo mutokweene onaphwanela wuupuwela wi tavasuluxa waapwaha akina, nave ahikhale mutokweene oni eererye waavootha akina. Atokweene annalapa vamoha ni Yehova vaavaa aniiwananaaya ntoko nikhuuru wi ekhaviherye muloko.—1 Kor., Ekap. 12; Kol. 2:19.

²² Alopwana Eekristu awiichwelavo annaphwanela waavya okhala ahooleli. (1 Tim. 3:1) Nto, orumeela ntoko mutokweene onachuneya olapa ni wiilipiserya. Ela enataphulela wiivaha okhaviherya soothowa sa anna ni arokora, othokororya soochuna saya soomunepani. Waavya okhala muhooleli enataphulela ochariha vakhiviru khiviru mikhalelo siri soochuneya inaphwanyeya Mpiipiliyani.

²³ Munna orumeenle moororomeleya mu elukuluku yincipale akhweya onamukhalano makacamiho a ereca naari nanceeche. Akhweya nthowa na wuuluvala, owo haweryaka waakhwaniherya mirici sawe ntoko oohoolela. Naamwi hiiha, owo onaphwanela ocicimihiwaka ni wooniwa ntoko mutokweene elukuluku onarumeeleiye. Honachuneya ohiya murici nthowa na mikhalelo sawe. Owo nlelo onnaphwanela ocicimiha wiili yoowo onavahiwa atokweene yaawo anarumeela moowetha wi ekukhuleke muhuwo.

²⁴ Nto wakhala wi munna onnoona wi waahaala okhala waphaama ohiya murici nthowa na otorokeya wa mikhalelo sawe seiyo inamuhiiha orumeela, onanwerya weerano. (1 Ped. 5:2) Owo nlelo onaphwanela ocicimihiwaka. Owo onanwerya opaka ichu sincipale saphaama mmulokoni, naamwi ahikhalakano makupa yaawo atokweene anakhalaayano.

²⁵ Atokweene annathokororya mirici soohiyanahiyana mmulokoni. Onnakhalavo muhooleli a nikhuuru na atokweene, namarepa a vamulokoni, ooweherya a muteko, mulipa aweeciha Yoohuserya ya Mulipeleli, ni muhooleli a Okumi ni Muteko Ahu Weekristu. Atokweene ancipale, anarumeela ntoko ahooleli a makhuuru a olaleerya. Atokweene anarumeela mmakupa yaawo mu elukuluku yoohaalakhanyeya. Vanonto, wakhala wi munna oothaama, hanaakhwaniherya mirici sawe nthowa na makacamiho a ekumi, naari ooyeleela mirici nthowa na ohaakhwaniherya malakiheryo a mu Soorempwa, mutokweene mukina onnathanliwa wi ahooleleke murici yoowo. Mmiloko seiyo oriwo ahooleli vakhaani, akhweya onamukhala woochuneya wi mutokweene ahooleleke mirici soohiyanahiyana ophiyerya anna akina ethanliwe orumeela ntoko atokweene.

²⁶ Muhooleli a nikhuuru na atokweene onarumeela ntoko muhooleli a muthukumano wa nikhuuru na atokweene. Mwawiihiiha, mwawiiyeviha owo onnalapa ni atokweene akina ethokororyaka muloko wa Muluku. (Aro. 12:10; 1 Ped. 5:2, 3) Owo onaphwanela okhala namarehererya aphaama ni ookhwaanela wi ahooleleke mwawaakuveya.—Aro. 12:8.

²⁷ Namarepa a vamulokoni onathokororya soorepela sa muloko ni waaleela atokweene soolokoha soochuneya. Wakhala woochuneya, mutokweene mukina naari murummwa oorumeela ori ookhwaanela onanwerya othanliwa wi amukhaviheryeke.

²⁸ Marehereryo a muteko woolaleerya ni nyaha sikina inahooleliwa ni ooweherya a muteko. Owo onnapaka marehereryo a osekurya makhuuru oothene a olaleerya omakuchuwelo wa esumana ekwaha emoha vamweerini, mwawiihiiha owo onnawerya osekurya makhuuru oohiyana. Mmiloko mikhaani irino makhuuru vakhaani a muteko woolaleerya, owo onanwerya osekurya nikhuuru ti nikhuuru ikwaha piili vayaakhani. Variyari va osekurya wawe, owo onahaala weeciha mithukumano sa muteko woolaleerya, olapa vamoha nnikhuuru, ni waakhaviherya alaleeryi opaka sooxekurya ni soohuserya sa Piipiliya.

²⁹ Murici mmoha wawooneya mmulokoni ori orumeela ntoko ooweherya a nikhuuru na olaleerya. Murici awe onaphitaanyerya (1) ovarerya oya vahoolo wa muchu ti muchu ori mu nikhuuru na muteko woolaleerya; (2) omukhaviherya mmoha ti mmoha mu nikhuuru ophiya moohihiyererya ni osiveliwa olaleerya; ni (3) waakhaviherya ni waavyakiha arummwa oorumeela mu nikhuuru waavya ni ophwanelela mirici mmulokoni. Nikhuuru na atokweene ninnalakelela omwaavya yoowo ori ooreheryeya okhwaaniherya ichu soothene sa mirici seiya.

³⁰ Wa nthowa na mukhalelo wa muteko owo, ooweherya a nikhuuru na olaleerya onaphwanela okhala mutokweene wakhala wooweryeya. Vakina vaya murummwa oorumeela oophwanelela onanwerya orumeela ophiyerya mutokweene athanliwe. Murummwa oorumeela onalapa mmuteko yoola oniichaniwa murummwa a nikhuuru na olaleerya, woona wi hanarumeela ntoko muhooleli mmulokoni. Moohiyana, owo onalapa ahooleliwaka ni atokweene wi aakhwaniherye murici awe.

³¹ Echu yookhweleyaxa wa muteko wa oohoolela a nikhuuru na olaleerya, ori ohoolela muteko woolaleerya. Ohicompa, mvai ni ohakalala onooniheryeiye enahaala waaceenyerya anna a mu nikhuuru nawe. Woona wi alaleeryi annathamalela nceenyeryo ni nikhaviheryo nnarweela mu okhala vamoha, yaahaala okhala yaphaama othanla nihiku nri noophwanelela wa oothene. (Luka 10:1-16) Oohoolela onaphwanela ororomela wi wookhalavo mukuma wawaakhwanela. Wiiliwiili owo toni eeciheke mithukumano sa muteko woolaleerya ni waarehererya alaleeryi ntakhara nihiku nenle na muteko. Wakhala wi owo hawerya oyawo, owo onaphwanela opaka marehereryo ni mutokweene mukina, murummwa oorumeela naari mulaleeryi oophwanelela wi apharelele mirici seiya wi alaleeryi ekhaleno ohoolela anachunaaya.

³² Oohoolela a nikhuuru na olaleerya onaphwanela opaka marehereryo woosiilo ene ntakhara osekurya wa ooweherya a muteko, aaleelaka sa osekurya ni oloca miphurelo saya. Vaavaa oothene a mu nikhuuru anasuwelaaya sa marehereryo, awo ananwerya okhaviherya moohakalala.

³³ Nikhuuru ti nikhuuru nnakhalano alaleeryi vakhaani. Eyo enneeriha wi oohoolela a nikhuuru awerye waasuwela oothene a nikhuuru nawe. Ntoko mukukhula oosivela, owo onnooniherya ompwacha mmoha ti mmoha. Owo onneererya ovaha nikhaviheryo ni nceenyeryo ntakhara muteko woolaleerya ni okhaviherya mithukumano sa muloko. Owo tho onniilipixerya opaka echu vyakala eri yoochuneya wi amukhaviherye mmoha ti mmoha okhala oolipa omunepani. Yaale aniiceliwa naari ooceecheya anahaala okhaviheryeya moorweela wa oxekuryiwa. Masu oolipiha naari ekano enanwerya waavolowela akina waavya ikari mmulokoni ni okhala nikhaviheryo ntokweene wa annaya. Wiilipixerya wa oohoolela a nikhuuru onaphwanela waakhaviherya oothene a nikhuuru nawe. Ntoko mutokweene ni mukukhula, owo onnaapwacha moosivela oothene a mmulokoni nave ori ooreheryeya omukhaviherya yoole onachuna nikhaviheryo.—Saw. 20:17, 28.

³⁴ Murici mmoha wa oohoolela a nikhuuru na olaleerya ori okhaviherya okusa soolokoherya sa muteko woolaleerya sa anna a nikhuuru nawe. Soolokoherya iho onavahereryiwa namarepa a vamulokoni. Mulaleeryi ti mulaleeryi onanwerya omukhaviherya oohoolela a nikhuuru moorweela wa oveleela yoolokoherya awe ya muteko woolaleerya mwawaakuveya. Eyo enamweeriwano moorweela wa ovahererya yoolokoherya awe wa oohoolela a nikhuuru na olaleerya omakuchuwelo wa mweeri ti mweeri naari moorweela wa ohela mu ekaaxa ya ohelamo soolokoherya sa muteko woolaleerya eri mu Empa ya Omwene.

³⁵ Sookhalavo miteko mikina seiyo inapakiwa ni Nikhuuru na Muteko wa Muloko, nenlo orimomo muhooleli a nikhuuru na atokweene, namarepa a vamulokoni, ni ooweherya a muteko. Ntoko yootakiherya, nikhuuru na muteko ninneemererya ophariheliwa Empa ya Omwene ntakhara othela ni makhwelo nave nookhalano murici wa waathanlela alaleeryi nikhuuru na muteko woolaleerya. Nikhuuru nnotho ninneemererya ipetisau sa opiyoneero wookilaatheya ni wookhaviherya ni ikina sa muteko. Nikhuuru na muteko nnalapa ni ohoolela wa nikhuuru na atokweene.

³⁶ Mirici sooluluwanya sa anna yaala—vamoha ni yaale anahoolela Yoohuserya ya Mulipeleli, oohoolela a Okumi ni Muteko ahu Weekristu, ni akina yaawo anapaka makupa a nikhuuru na atokweene—sinarweela ofiliyale.

³⁷ Nikhuuru na atokweene na muloko ti muloko ninnathukumana veelukuluku aya wi nthokororye miyaha siniiwanana ni oya vahoolo woomunepani wa muloko. Mu waaceererya muthukumano wa atokweene onapakiwa variyari va osekurya wa oowerya a ekulucu, muthukumano wa atokweene onnapakiwa miyeeri miraru omanle osekurya ti osekurya wa ooweherya a ekulucu. Vakina vaya atokweene ananwerya othukumana elukuluku vyakala wakhala wi mikhalelo sinneemererya weerano yeeyo.

³⁸ Ahooleli achu oohiphaameya; naamwi hiiha oothene mmulokoni annaceenyeryiwa owiiwelela yaawo nthowa nawi awo marehereryo a Yehova. Owo onahaala waathoriha ahooleli nthowa na saweera saya. Awo anamweemelela yene ni olamulelo awe woomuluku. Yoorepa ya Ahebri 13:17 ennaloca: “Muwiiweleleke ahooleli anyu nave muwemereryeke yaawo. Ti yaawo anaweherya okumi anyu ewaakhulelakaani. Muwiiweleleke wi muteko aya okhale woohakalaliha ohiya wawiikhupanyerya. Yiikhupanyeryaka, nyuwo hamunaphuravo echu.” Hiiha ntoko Yehova onaphariheleiye munepa waweela wi amuthanle mulopwana, Yehova onahaala opharihela munepa mmohamoha wi amviihevo mulopwana wi ahirumeele ntoko muhooleli wakhala wi onnahesa wooniherya sawiima sa munepa nave meecelo a okumi awe annavuhana ni mikhalelo siri soochuneya sa mu Soorempwa.

³⁹ Apwanne hannathamalela muteko woolucuwa ni yootakiherya yaphaama ya ahooleli a mmulokoni? Arepelaka muloko wo Tesalonika, Paulo aahaaceenyerya anna: “Asinnihu ninnoovekaani wi muwonelekemo yaawo anoolapelaani ni anoohoolelaani mwa Apwiya, enoolopolaani tho. Mwaacicimihekesha moosivela wa nthowa na muteko anapharaaya.” (1 Tes. 5:12, 13) Muteko mutokweene wa ahooleli a mmulokoni onneeriha wi omulapela wahu Muluku okhale wookhweya ni woohakalaliha. Navetho, mu ekaarata awe yoopacerya wa Timoteo, Paulo aahiloca sa meerelo yaawo achu a mmulokoni yaaphwanelaaya wooniherya ntakhara ahooleli, alocaka: “Atokweene anahoolela phaama muloko annaphwanela ocicimihiwa wiili, shashasha yaawo anuukhuwa mmasu ni mahusiheryo.”—1 Tim. 5:17.

⁴⁰ Ikwaha ikina, atokweene akina annathanliwa orumeela mu Makhuuru Anaaxekurya Areca. Akina anarumeela mu Makhuuru Aniiwanana ni Exipitali ni osekurya ixipitali ni matotore wi yaaceenyerye otitelela ni ovuwiha oloola wa Anamoona a Yehova nihiphariheliwaka nikhami. Ahooleli akina annawerya oyano vahoolo soothowa sa Omwene moorweela wa okhaviherya oteka ni orehererya Ipa sa Omwene ni Ipa sa muthukumano wa ekulucu naari orumeela ntoko anna a Makhuuru a Muthukumano wa Muceche. Muteko mutokweene wa anna yaala ni wiiveleela waya mmukhalelo yoola, annathamaleliwa ni marehereryo oothene. Mwawiihiiha, ‘ninnaacicimiha achu si yaala.’—Fil. 2:29.

⁴¹ Nikhuuru Noolamulela ninnapaka marehereryo a waathanla atokweene aweemereryiwa wi erumeele ntoko ooweherya a ikulucu. Efiliyale ennaathanlela miloko anaphwanelaaya osekuryaka seiyo inapaka makupa a ikulucu saya, vayaakhani ikwaha piili. Ikwaha ikina annaaxekurya mapiyoneero mu ikulucu soovalaanyeya. Awo annapaka marehereryo aya ni oleela muloko ehaakumve ophiya elukuluku wi oxekurya waya okhale wamphurelo.

⁴² Muhooleli a nikhuuru na atokweene onnapaka marehereryo wi oxekurya okhale woolipiha omunepani wa oothene. (Aro. 1:11, 12) Vaavaa onaakheleiye yoolokoha ya oxekuryiwa, ni sooleeliherya vooloca sa soothowa sa ooweherya a ekulucu ni mwaariye (wakhala wi oothela), muhooleli a nikhuuru na atokweene vamoha ni anna ancipale anahaala opaka marehereryo a omuhayiha ni ovahererya ichu ikina soochuneya. Owo onaphwanela osuwela wi oothene, ophitaanyerya ooweherya a ekulucu aaleeliwa sa marehereryo yaala.

⁴³ Ooweherya a ekulucu onahaala ochekula ni muhooleli a nikhuuru na atokweene vooloca sa marehereryo a mithukumano, ophitaanyerya mithukumano sa muteko woolaleerya. Marehereryo ala anahaala opakiwa mwawiiwanana ni sooleeliherya sa ooweherya a ekulucu ni ohoolela onarweela ofiliyale. Oothene anaphwanela oleeliwa woosiilo ene vooloca sa elukuluku nnipuro na mithukumano ni muloko, ni mapiyoneero, nave wa atokweene ni arummwa oorumeela, hiiha ntoko elukuluku nnipuro na mithukumano sa muteko woolaleerya.

⁴⁴ Nanaawiili othana, ooweherya a ekulucu onnavarerya Soorepela sa Alaleeryi a Vamulokoni, soorepela sa achu anaphiya mmithukumano, soorepela vooloca sa ikulucu ni soorepela sa ikhorowa. Ela enahaala omukhaviherya osuwela soothowa sa muloko ni mukhalelo wa waakhaviherya yaale anakhapelela soorepela seiya. Muhooleli a nikhuuru na atokweene, onaphwanela opaka marehereryo wi ooweherya a ekulucu aakhele soorepela iho woosiilo ene.

⁴⁵ Variyari va osekurya, ooweherya a ekulucu onnakhalano elukuluku ya oloca ni anna vamoha ni arokora oothene aweryaru—mmithukumano, mmuteko woolaleerya, elukuluku ya olya, ni ilukuluku ikina. Mwawaaceererya, owo onnathukumana ni atokweene ni arummwa oorumeela alocaka sa ikano soorweela mu Soorempwa, sooleeliherya, ni nceenyeryo nenlo nnahaala waakhaviherya oyano vahoolo mirici saya wi ekukhule muhuwo anakhapelelaaya. (Masi. 27:23; Saw. 20:26-32; 1 Tim. 4:11-16) Owotho onnathukumana ni mapiyoneero wi aalipihe mmuteko aya ni omukhaviherya mmoha ti mmoha vooloca sa nikacamiho vyakala owo akhweya onahooleleiye mmuteko awe.

⁴⁶ Wakhala wi sookhalavo miyaha mikina onakhweleyavo nikhaviheryo, ooweherya a ekulucu onahaala weerano wakhala wooweryeya variyari va esumana. Wakhala wi miyaha iho hasimanle variyari va esumana, owo onahaala waakhaviherya atokweene naari mmoha ti mmoha wi etholathole ohoolela wa Soorempwa onaphariheleya. Wakhala wi ninnakhweleya nikhaviheryo na efiliyale, owo vamoha ni atokweene anahaala orepela mwaha owo ofiliyale.

⁴⁷ Elukuluku onaxekuryeiye muloko, ooweherya a ekulucu onnaphwanyeya mmithukumano moohihiyererya. Akhweya iho inamutorokeya voovira wa elukuluku mwawiiwanana ni ohoolela onarweela ofiliyale. Owo onahaala operekha miyaha irino yoolakelela ya oceenyerya, ohusiha ni olipiha muloko. Owo onniilipiserya waaceererya omusivela Yehova, Yesu Kristu ni marehereryo.

⁴⁸ Yoolakelela emoha ya osekurya wa ooweherya a ekulucu ori oceenyerya mvai mmuteko woolaleerya ni ovahererya sooleeliherya soophara muteko. Ancipale mmulokoni ananwerya opaka matorokelo mmiteko saya wi ewerye okhaviherya muteko woolaleerya esumana yeeyo, akhweya moorweela wa wiirehererya okhala piyoneero ookhaviherya variyari va mweeri wa osekurya wawe. Oothene yaale anachuna olapa ni yene naari mwaariye ananwerya wiivaha. Echu ekina enahaala okhala phaama ori omukusa ooweherya a ekulucu naari mwaariye mu soohuserya sa Piipiliya ni sooxekurya. Wiilipiserya wanyu okhaviherya moomalela esumana yeeyo ti woothamaleleya.—Masi. 27:17.

⁴⁹ Eyaakha ti eyaakha, mithukumano miili sa ekulucu sinnareheryiwa mu ekulucu ti ekulucu. Ooweherya a ekulucu torino murici wa opaka marehereryo a muthukumano wa ekulucu mu ilukuluku seiyo. Ooweherya a ekulucu onnamuthanla muhooleli a muthukumano wa ekulucu ni mukhaviheryi a muhooleli a muthukumano. Awo analapa vakhivirukhiviru ni yene wi epakeye marehereryo a muthukumano wa ekulucu. Eyo enahaala omweeriha ooweherya a ekulucu ovareryela phaama yoochariha ya muthukumano wa ekulucu. Ooweherya a ekulucu onnaathanla tho alopwana akina wi ehooleleke itepartamentu soohiyana hiyana. Owotho onnarehererya ekupweete ya sooveleela sa ekulucu wamala muthukumano ti muthukumano wa ekulucu. Vayaakhani, muthukumano mmoha wa ekulucu onahaala okhalavo aweemelela efiliyale yoowo oni akhale namaloca ooxekurya. Wa nthowa na orakamela naari oyeva wa nipuro na muthukumano wa ekulucu, ikulucu ikina sinnakawanyiwa mmakhuuru nave muthukumano wa ekulucu onnapakiwa mmakhuuru yaawo.

⁵⁰ Ooweherya a ekulucu onaveleela mwaneene yoolokoherya awe ya muteko woolaleerya ofiliyale omakuchuwelo wa mweeri ti mweeri. Wakhala wi sinnachuneya ikhorowa wi saakhwaniheryiwe soothowa—ntoko sa opaka mukwaha, yoolya, mpuro ni ichu ikina inakhweleya wi ayeno vahoolo muteko awe—nave wi iho hisaakhwaniheryiwe ni muloko yoowo onarumeeleiyewo, owo onaphwanela orepela iho ofiliyale. Ooweherya aweeceeca annaroromela wi wakhala wi awo annahela soochuna sa Omwene wa Yehova va nipuro noopacerya, soothowa soomwiilini inahaala okhwaaniheryiwa, hiiha ntoko Yesu aalaihenryeiye. (Luka 12:31) Muloko onahaala osuwela ochuneya waya wooniherya oowaakhela aleco wa atokweene yaala awiiveleela anaarumeela yaawo.—3 Yoh. 5-8.

⁵¹ Mu efiliyale ti efiliyale ya Anamoona a Yehova orukurerya elapo, anna araru naari awaaca awiichwelavo omunepani annarumeela ntoko Nikhuuru na Efiliyale yaawo anahoolela muteko woolaleerya mu elapo naari ilapo seiyo anakhaviheryaaya. Mmoha a nikhuuru onarumeela ntoko muhooleli a Nikhuuru na Efiliyale.

⁵² Yaale anarumeela mu Nikhuuru na Efiliyale annathokororya nyaha sa miloko soothene mu ikulucu sa efiliyale. Annahoolela muteko woolaleerya michaka yaphaama ya Omwene orukurerya ekulucu ya efiliyale aya nave annaroromela wi miloko ni ikulucu sinnavahiwa ohoolela woophwanelela wa soothowa sa muteko woolaleerya. Nikhuuru na Efiliyale ninnaakhaviheryatho mamisiyonaariyo ni mapiyoneero avameekhaaya, ookilaatheya, ni ookhaviherya. Wakhalavo muthukumano wa ekulucu ni wa muceche, nikhuuru ninnapaka marehereryo ni waathanla anamaloca wi “soothene sereyeke moophwanelela ni mwa weereranyeya.”—1 Kor. 14:40.

⁵³ Mu ilapo ikina Nikhuuru nikina ninnathanliwa nenlo nnahooleliwa ni Nikhuuru na Efiliyale na elapo ekina. Eyo enneeriha okhalavo wiiwanana mmuteko yoowo Nikhuuru nlo nnarumeelaayawo. Nno ninnakhapelela nyaha mu miteko so Peteli ni ikupweete, orehererya ikaarata ni soorepela, nave ikwaha sincipale ovareryela muteko woolaleerya. Nikhuuru nna nniiwanana ni Nikhuuru na Efiliyale nivareryelaka oya vahoolo wa soochuna sa Omwene.

⁵⁴ Nikhuuru Noolamulela tinnaathanla anna yaawo anarumeela mu Nikhuuru na Efiliyale ni makhuuru makina.

⁵⁵ Veelukuluku aya, annapakiwa marehereryo ni Nikhuuru Noolamulela wi ekhalevo anna oophwanelela osekurya ifiliyale orukurerya elapo. Munna onarumeela mmuteko yoola onasuweliwa ntoko aweemelela o nipuro ntokweene na anamoona a Yehova. Muteko awe woopacerya, ori olipiha emusi yo Peteli ni okhaviherya Nikhuuru na Efiliyale ni makacamiho naari makoho anakhumelela mmukhalelo wa oyano vahoolo muteko woolaleerya ni waapaka oohuserya. Munna yoola onnathukumana ni ooweherya aweeceeca athanliwe, ikwaha ikina onnathukumana ni mamisiyonaariyo yaawo anarumeela mmuteko woolaleerya. Vaavaa oneereiyeno hiiha, owo onnaloca ni yaawo sa makacamiho ni soothowa saya, ovahererya nceenyeryo noophwanelela vooloca sa muteko aya wookhweleya, olaleerya Omwene ni waapaka oohuserya.

⁵⁶ Aweemelela o nipuro ntokweene na anamoona a Yehova onnachuna osuwela yeeyo yaakhwaniheryiwe mmuteko woolaleerya Omwene, ni miteko mikina miloko inapakaaya. Elukuluku yeemererya, owotho onanwerya osekurya ikupweete sootaphulela. Vaavaa aweemelela o nipuro ntokweene na anamoona a Yehova onaxekuryeiye efiliyale, owotho onnaloca sa marehereryo mmukhalelo wa waaceererya muteko wa olaleerya Omwene.

⁵⁷ Ninnaphura vancipale orweela wa muteko wakuru ni woosivela alopwana awiichwelavo Eekristu anapakaaya. Vaavaa nnatitelelaahu owiiwelela yaale athanliwe okhaviherya okukhula muhuwo, ninnakhala awiiwanana ni Muru wa muloko, Kristu Yesu. (1 Kor. 16:15-18; Éfe. 1:22, 23) Ntoko yookhumelela, munepa wa Muluku onnavolowela mmilokoni orukurerya elapo, nave Masu a Muluku anakhala yoohoolela ya muteko onapakiwa elapo yoothene.—Sal. 119:105.