Amiravo—Muri Ooreheryeya wi Mpatisiwe?

“Eparipari tani wa nyuwo akhwelaka oteka mutxhontxo ahipatxerya okirati wi asuwele ikorowa onayeiye oyeha ni upuwele ariki awerye omalihano?”—LUKA 14:28.

MACIPO: 120, 64

TIHEENI MUHUSENRYAANYU?

Wiichwelavo tiheeni, nave Taniyeli oonihenrye hai mukhalelo yoola?

Onii oloce hai wakhala wi yoolakelela ya opatisiwa enarweela mmurimani mwaa?

Wiiveleela tiheeni, nave oniiwanana hai ni opatiso?

1, 2. (a) Tiheeni enaavaha ohakalala akapuro a Muluku olelo? (b) Asitiithi ni atokweene enii yaakhaviherya hai amiravo wiiwexexa yootaphulela ya opatiso?

“KOHOOSUWELA weyaano opacerya oyariwa waa,” aaloca mutokweene wa Kristopa a iyaakha 12 sa oyariwa, “nave kiri oohakalala kiiwalaaka wi onachuna opatisiwa. Kinachuna wookoha, ‘Ntakhara heeni onachunaawe opatisiwa?’” Mutokweene yoola aakhalano mathowa aphaama a omukoha. Eyo ennanivaha ohakalala otokweene owoona macikhwi macikhweene a amiravo anapatisiwa eyaakha ti eyaaka. (Eklesiyaste 12:1) Nyenya asitiithi ari Akiristu ni atokweene mmulokoni annachuna osuwela waakhanle wi amiravo aapaka yoolakelela aya nave ahiiwexexa yeeyo enataphulela opatisiwa.

² Mpiipiliyani, noohuserya wi wiiveleela ni opatiso onnapaka makupa oopacerya a okumi muvyaani wa Mukiristu. Okumi yoowo muvyaani onnaruuha mareeliho mancipale orweela wa Yehova nyenya tho wiikariwa orweela wa Satana. (Masiposipo 10:22; 1 Pedro 5:8) Ti nthowa nene asitiithi ari Akiristu anaphwanelaaya wiivaha elukuluku wi yaahusihe anamwane aya yeeyo enataphulela okhala oohuserya a Yesu. Waakhala wi amiravo asitiithi aya tahi Akiristu, atokweene mmulokoni anahaala waakhaviherya moosivela wi yiiwexexe yeeyo enataphulela wiiveleela ni opatiso. (Mwaalakhanye Luka 14:27-30.) Hiiha ntoko onachuneyaaya wiireherya wi etekiwe empa, amiravo anaphwanela wiirehererya ehaakumve opatisiwa nave weerano hiiha enamwaakhaviherya omurumeela Yehova mwawaakhwanela ophiyerya “womaliheryani.” (Mateu 24:13) Tiheeni enahaala waakhaviherya amiravo omurumeela Yehova okhala wookhala? Hankooni noone.

 3. (a) Masu a Yesu ni a Petro ananihusiha eheeni vooloca sa okhweleya wa opatiso? (Mateu 28:19, 20; 1 Pedro 3:21) (b) Makoho taani nnahaalaahu othokororya, nave ntakhara heeni?

³ Weyaano wa mmiravo onachuna opatisiwa? Waakhanle wi ti hiiha, eyo yoolakelela yaphaama! Eyo ekari etokweene opatisiwa ntoko mmoha a Anamoona a Yehova. Ti yeeyo Akiristu anaphwanelaaya opaka, nave owo mukhalelo wookhweleya wa yaale anahaala ovuluxiwa variyari va ekoi etokotoko. (Mateu 28:19, 20; 1 Pedro 3:21) Vaavaa onapatisiwaawe, onooniherya wi woopaka nlakano na omurumeela Yehova okhala wookhala. Weyaano chiryene onnachuna okhapelela nlakano nlo, mwawiihiiha nikoho nnacharela nnahaala wookhaviherya woona waakhanle wi ori ooreheryeya ntakhara opatiso: (1) Kohiichwelavo wi kipake yoolakelela? (2) Kookhalano nchuno na weerano yeela? (3) Kinniiwexexa yootaphulela ya wiiveleela wa Yehova? Hankooni nthokororye makoho yaala.

VAAVAA ONAKHALAAWE AWIICHWELAVO

4, 5. (a) Ntakhara heeni opatisiwa tahi pahiru wa achu atokweene? (b) Enataphulela eheeni okhala Mukiristu awiichwelavo?

⁴ Piipiliya hanaloca wi yaale ari atokweene naari arino iyaakha sammoori tanaphwanela opatisiwa. Ninnaalakhanya mu Masiposipo 20:11: “Mmiravo, onisoneiha ni metxelo awe; ni merelo awe, atxhu othene annasuwela àri aphama.” Naamwi mwaana onanwerya wiiwexexa yeeyo enataphulela weera yaphaama nave aveleele okumi awe wa Mpatuxa. Mwawiihiiha, opatiso mukhalelo wookhweleya ni woophwanelela wa mmiravo iichwenlevo nave oniiveleela wa Yehova.—Masiposipo 20:7.

⁵ Enataphulela eheeni okhala awiichwelavo? Wiichwelavo wiiliwiili honaahiwa iyaakha naari wunnuwa wa mwiili. Mukiristu awiichwelavo onniiwexexa ohiyaniha yeeyo eri yaphaama ni yoonanara nave onnapaka matorokelo yaawo anahaala omukhaviherya olipiha onthamwene awe ni Muluku. (Ahebri 5:14) Mwawiihiiha hanaakuvela ohuwelihiwa wi apake yoonanara. Nave honachuneya wi wiiliwiili muchu amuleele weera yeeyo eri yaphaama. Enaweheryiwa wi mmiravo yoowo onachuna opatisiwa onahaala opaka yeeyo eri yaphaama naamwi asitiithi awe naari achu akina ehiri vakhiviru vawe.—Mulikanyihe ni Filipi 2:12.

6, 7. (a) Mutharihe makacamiho Taniyeli aakumanneiyeno vaavaa aareiye o Paapulu. (b) Taniyeli oonihenrye hai wi aari awiichwelavo?

⁶ Apwanne mmiravo chiryene onanwerya wooniherya mukhalelo yoola wa wiichwelavo? Muthokororye yootakiherya ya Taniyeli. Akhweya aari mmiravo vaavaa akusiweiye oya o Paapulu. Moohilekela, Taniyeli aakhala variyari va achu yaahiiwelela malamulo a Muluku. Nyenya hankooni nthokororye vakhivirukhiviru mukhalelo wa Taniyeli. Owo aakhalihiwa ntoko muchu avamekheiye o Paapulu. Aari variyari va amiravo a vakhaani yaawo yaathanliwe wi emurumeeleke Mwene. (Daniyeli 1:3-5, 13) Enakhala wi Taniyeli aakhalano muteko waphaama o Paapulu yoowo eereiye ahikhaleno o Isarayeli.

⁷ Mmiravo Taniyeli onne hai? Apwanne aaheemererya wi achu o Paapulu etoroke mukhalelo awe naari oceecheiha nroromelo nawe? Hooye! Piipiliya onaloca wi vaavaa aareiye o Paapulu, Taniyeli “hatxhunne orava mwikho,” owo aaphwanela okhala ocai wa echu eri yoothene yiiwanana ni malapelo atheru. (Daniyeli 1:8) Eyo yaahooniherya wiichwa weeparipari!

 8. Tiheeni onahuseryaawe orweela wa yootakiherya ya Taniyeli?

⁸ Tiheeni onahuseryaawe orweela wa yootakiherya ya Taniyeli? Mmiravo awiichwelavo onahaala otitelela ochariha soororomela sawe, naamwi mu ilukuluku sookacamiha. Hanahaala okhala ntoko namanriya, yoowo ontoroka mwiili mwawiiwanana ni mapuro oreiyevo. Hanakhala nthamwene a Muluku o Empa ya Omwene nyenya tho nthamwene a elapo o exikola. Opwaha yeeyo onahaala okhala oororomeleya naamwi akumanaka ni makacamiho.—Mwaalakhanye Éfeso 4:14, 15.

9, 10. (a) Mphurelo taani onakhumelela vaavaa mmiravo onuupuweleleiye yeeyo enreiye nroromelo nawe neehiwaaya? (b) Opatiso onataphulela eheeni?

⁹ Mweeparipari, haavo ori oophaameya. Amiravo ophitaanyerya achu atokweene mu ilukuluku ikina annahesa. (Eklesiyaste 7:20) Nyenya wakhala wi onnachuna opatisiwa, yaahaala okhala yamiruku osuwela waakhanle wi woolakelela wiiwelela malamulo a Yehova. Wiikohe, ‘Kinnamwiiwelela Yehova elukuluku yoothene?’ Wuupuwele yeeyo wenraawe ekwaha yookuchula vaavaa nroromelo naa neehiwaaya. Apwanne waawerya olakelela yeeyo yaari yaphaama wi opake? Ntoko Taniyeli, apwanne ookhala ooceenyenrye opharihela osuwela waa mu elapo yeela ya Satana? Sookhumelela ichu ntoko seiya, apwanne onanwerya osuwela yeeyo eri yookhwela ya Yehova?—Éfeso 5:17.

¹⁰ Ntakhara heeni ti wookhweleya osuwela maakhulo a makoho yaala? Nthowa nawi anahaala wookhaviherya osuwela wi opatiso mwaha mutokweene. Opatiso onnawooniherya akina wi weyaano woopaka nlakano nookhweleya wa Yehova. Onnamuroromeliha wi onahaala omusivela ni omurumeela ni murima woothene okhala wookhala. (Marko 12:30) Muchu oothene onapatisiwa onaphwanela otitelela okhapelela nlakano nawe wa Yehova.—Mwaalakhanye Eklesiyaste 5:4, 5.

APWANNE EYO YOOCHUNA AA?

11, 12. (a) Muchu onachuna opatisiwa onaphwanela osuwela eheeni? (b) Tiheeni enahaala wookhaviherya okhalano moonelo wa Yehova vooloca sa opatiso?

¹¹ Piipiliya onaloca wi achu oothene a Yehova, ophitaanyerya amiravo “enarwa-yiveléla” wa yoowo wi emurumeele. (Salumu 110:3, NN) Mwawiihiiha muchu onachuna opatisiwa onaphwanela osuwela wi eyo yoochunaawe. Onamuchuneya waalikhela yoochuna aa mweephole, xaxaxa wakhala wi ophuiwe mu eparipari.

¹² Vaavaa wunnuwaawe akhweya woowoona achu epatisiwaka, ophitaanyerya asinthamwene ni asinna aa. Nyenya okhaleno ephoole wi ohisoone wi onnaphwanela opatisiwa nthowa nawi wookhalano iyaakha soophwanelela naari wi akina annapatisiwa. Vano onii osuwele hai wi onnoona opatiso hiiha ntoko Yehova? Omalihe elukuluku wuupuwelelaka ntakhara heeni opatiso ti wookhweleyaxa. Onahaala ophwanya mathowa aphaama mmwaha yoola ni onacharela.

13. Onii owerye hai oloca waakhanle wi yoolakelela ya opatisiwa enarweela mmurimani mwaa?

¹³ Mukhalelo mmoha onaphwanelaawe oloca waakhanle wi yoolakelela ya opatisiwa enarweela mmurimani mwaa ori waalikhela mavekelo aa. Ikwaha hai onavekelaawe wa Yehova? Apwanne mavekelo aa tooluluwanya? Maakhulo a makoho yaala anamooniherya mukhalelo oryaaya onthamwene aa ni Yehova. (Salumu 25:4) Ikwaha sincipale Yehova onnavahererya maakhulo a mavekelo ahu Mpiipiliyani. Mukhalelo mukina onaphwanelaawe oloca waakhanle wi chiryene onnachuna omwaacamela Yehova ni omurumeela orweela mmurima ori waalikhela marehereryo aa a ohuserya. (Yosuwa 1:8) Wiikohe: ‘Kinnamuhuserya Piipiliya moohihiyererya? Kinniilipixerya opaka makupa mmalapelo ahu a echoko?’ Maakhulo a makoho yaala anahaala wookhaviherya osuwela waakhanle wi yoolakelela ya opatisiwa yoochuna aa.

YOOTAPHULELA YA WIIVELEELA

14. Mutharihe ohiyana orivovo variyari va wiiveleela ni opatiso.

¹⁴ Amiravo akina akhweya hanasuwela ohiyana orivovo variyari va wiiveleela ni opatiso. Akina ananwerya oloca wi aaveleela okumi aya wa Yehova nyenya hari awaakhwanela wi epatisiwe. Apwanne eyo ti yooweryeya chiryene? Wiiveleela nivekelo na omuleela Yehova wi weyaano woopaka nlakano na omurumeela okhala wookhala. Vaavaa onapatisiwaawe, onnooniherya wa akina wi wohiiveleela wa Yehova. Mwawiihiiha, ohaakumve opatisiwa, onaphwanela wiiwexexa yeeyo enataphulela wiiveleela wa Muluku.

15. Wiiveleela onataphulela eheeni?

¹⁵ Vaavaa onaveleelaawe okumi aa wa Yehova, onamuleela wi vano weyaano ti awawe. Onamuroromeliha wi omurumeela enahaala okhala echu yookhweleyaxa mu okumi aa. (Mwaalakhanye Mateu 16:24.) Nlakano nenlo wa Muluku mwaha mutokweene! (Mateu 5:33) Mwawiihiiha onii wooniherye hai wi woosuwela wi vano okumi aa ti wa Yehova?—Aroma 14:8.

16, 17. (a) Mphwanaphwanihe yeeyo enataphulela wiikhooca muchu mukhateiye. (b) Muchu oniiveleela tiheeni onaloceiye chiryene?

¹⁶ Hankooni nthokororye yootakiherya emoha. Mwaanyiherye wi nthamwene ohoovahaani ekaaro. Owo onnoovahereryaani ipaaxo sa ekaaro nave onnaloca: “Ekaaro ti yawinyu.” Voocharela nthamwene anyu onnaloca: “Ixaavi inahaala okhala ni miyo. Kinahaala weecihaka ekaaro, ohiya nyuwaano.” Mwaahaala woona hai vooloca sa yoovaha yeeyo? Mwaahaala omoona hai nthamwene yoowo oovanheeni ekaaro?

¹⁷ Vaavaa muchu onaveleeleiye okumi awe wa Yehova, owo onaloca wa Muluku: “Kohoovahaani okumi aka. Miyaano kawinyu.” Yehova onaweherya wi muchu owo akhwaaniherye nlakano nawe. Hanka wakhala wi muchu owo oopacerya ohimwiiwelela Yehova moorweela wa omwaakamela muchu ohinamurumeela Muluku? Naari wakhala wi muchu owo oheemererya muteko yoowo ohinamvaha elukuluku ya olaleerya naari ophwanyeya mmithukumano wiiliwiili? Mmukhalelo yoowo muchu owo haahaala okhapelela nlakano nawe wa Yehova. Waahaala okhala ntoko okuha ixaavi sa ekaaro. Vaavaa nnaveleelaahu okumi ahu wa Yehova, nnaloca wa yoowo nriki, “Okumi aka ti wawinyu, tahi waka.” Mwa yeeyo, elukuluku yoothene nnahaala opaka yeeyo Yehova onachuneiye naamwi ohiri hiiha nnachunelaahu. Hankooni nimutakiherye Yesu yoowo aalonce: “Ntakhara nkikhurun’we osulu wi kere okhwela waka, nto okhwela wa yowo okirumme.”—Yohani 6:38.

18, 19. (a) Masu a Rose ni Kristopa anooniherya hai wi opatiso onnaruuha mareeliho? (b) Onoona hai vooloca sa ekari ya opatiso?

¹⁸ Mweevelevelo, opatiso mwaha mutokweene. Eyo ekari etokweene wiiveleela wa Yehova ni opatisiwa. Amiravo yaawo anamusivela Yehova nave aniiwexexa yootaphulela ya wiiveleela haanoovelela ovelela ikumi saya wa Muluku ni opatisiwa. Awo hanakhalano ekeerelani nthowa na yoolakelela aya. Mmiravo opatisiwe nsina nawe Rose ooloca: “Miyaano kinnamusivela Yehova, nave nkaahaala okhala oohakalala keeraka echu ekina ohiya omurumeela owo. Hiyaavo yaari yookhweleya mu okumi aka opwaha yoolakelela aka ya opatisiwa.”

¹⁹ Nave hanka vooloca sa Kristopa, oromoliwe woopaceryani wa mwaha? Onne hai vooloca sa yoolakelela awe ya opatisiwa vaavaa areiyeno iyaakha 12 sa oyariwa? Owo olonce wi ori oohakalala nthowa na opaka yoolakelela yeeyo. Aapacerya orumeela ntoko piyoneero a elukuluku yoothene vaavaa areiyeno iyaakha 17 sa oyariwa, nave arino iyaakha 18 aakhala murummwa oorumeela. Olelo onarumeela o Peteli. Owo ooloca: “Opatisiwa yaari yoolakelela yaphaama. Kookhalano okumi woohakalaliha mmuteko wa Yehova ni mmarehereryo awe.” Wakhala wi onnachuna opatisiwa, onii wiirehererye hai? Mwaha onacharela onahaala waakhula nikoho nla.

[Ekaaxa va epaaxina 12]

MASU ATHARIHIWE

Mukiristu awiichwelavo: Mukiristu awiichwelavo onniiwexexa ohiyaniha yeeyo eri yaphaama ni yoonanara nave onnapaka matorokelo yaawo anahaala omukhaviherya olipiha onthamwene awe ni Muluku