MWAHA WA EKAAPA | MULUKU ONOONA HAI IKHOCO?

Muluku Onoona Hai Ikhoco?

Mwaahaala waakhula hai nikoho nenla? Achu ancipale anuupuwela wi Muluku onnasiveliwa ni ikhoco. Anuupuwela hiiha elocaka wi Muluku aahaalamulela akapuro awe akhalai wi ewane; Piipiliya onneemererya yeeyo. Akina aasuwela wi Yesu Mwaana a Muluku aahaahusiha oomuchara awe waasivela amwiicani aya. (Mateu 5:43, 44) Mwawiihiiha, awo anuupuwela wi moonelo wa Muluku vooloca sa ikhoco wootorokeya, nave wi olelo haneemererya ikhoco.

Munuupuwela hai? Apwanne Muluku onnasiveliwa ni ikhoco? Wakhala wi ti hiiha, makupa taani a owanawana owo onakhaviheryeiye? Ophwanya maakhulo a makoho yaala enahaala ovolowela moonelo anyu vooloca sa ikhoco. Ntoko yootakiherya, wakhala wi mohoona wi Muluku onnakhaviherya makupa makina a ikhoco yaawo tho munakhaviheryaanyu, mwaahaala osiveliwa musuwelaka wi munahaala ovootha. Moohiyana, mwaahaala woona hai waakhanle wi moosuwela wi Muluku onakhaviherya nikhuuru nikina na ekhoco noohiyana ni nikhuuru nanyu? Moohikhwa minikwa mwaahaala ochuna otoroka.

Yookhalavo echu yoochuneya osuwela. Osuwela mukhalelo Muluku onooneiye ikhoco enahaala ovolowela moonelo anyu vooloca sa Muluku. Waakhanle wi moohooxeya ni ekhoco, chiryene munnachuna osuwela naakhulo na nikoho nla: Apwanne Muluku onnasiveliwa naari tonatannya ikhoco seiyo sinakumiherya ohooxeya, naari wi hanapwacha ohooxeya wa achu?

Munahaala otikhina naakhulo na Piipiliya nenlo nri noohiyana ni moonelo wa achu. Ovinyerya khalai ophiyerya olelo, moonelo wa Muluku vooloca sa ikhoco hotoroken’ye. Hankooni nthokororye yeeyo Piipiliya onaloceiye sa mukhalelo Muluku ooneiye ikhoco khalai ni mu nsana noopacerya vaavaa Yesu aareiye veelaponi ya vathi. Ela enahaala onikhaviherya osuwela moonelo wa Muluku wa mutano vooloca sa ikhoco ni osuwela waakhanle wi ikhoco inahaala okhala omwaahiyu.