Halöwö Zinenge
16 Ofeta Waulo ba Derebe hegöi ba Lisitera. So ba daʼö samösa nifahaʼö sotöi Timoteo. Inania niha Yahudi si faduhu tödö, hizaʼi amania niha Yunani. 2 Sökhi duria Dimoteo wangombakha ndra talifusö ba Lisitera hegöi ba Ikoniu. 3 Imane Faulo wa omasi ia na fao khönia Dimoteo. Iʼohe ia Faulo ba ifasunaʼö börö ndra niha Yahudi ba daʼö, laʼila wa niha Yunani namania. 4 Lafasui mbanua andrö, ba lafaʼema gangetula ndra sinenge hegöi ira satua sokubaloi si so ba Yeruzalema enaʼö lafalua ira talifusö. 5 Börö daʼö, itugu aro wamati mbanua niha Keriso ba monönö waʼatora ero maʼökhö.
6 Aefa daʼö, latöröi mbanua Werigia hegöi Galatia, börö me lö itehe khöra eheha niʼamoniʼö wamaʼema taromali ba Provinsi Asia. 7 Me larugi Misia, laforege weʼamöi ba Mbitinia, hizaʼi lö itehe khöra eheha Yesu. 8 Börö daʼö, lataluʼi Misia ba larugi Deroa. 9 Bongi daʼö, alua khö Waulo gangilata: So samösa niha Makedonia zangandrö tolo mozizio ia imane, ”Aeʼe ba Makedonia, tologa.” 10 Lö ara me no alua khönia gangilata andrö, maʼodödögö weʼamöi ba Makedonia, mahalö gangetula wa no ikaoni ndraʼaga Lowalangi enaʼö mafaʼema duria somuso dödö ba daʼö khöra.
11 Moroi ba Deroa moloyo ndraʼaga ba Zamotarake, ba mahemolunia möiga ba Neafoli. 12 Moroi ba daʼö, numalö ndraʼaga ba Wilifi, banua Romawi* si tehöngö si so ba Makedonia, toröi ndraʼaga ba daʼö mato hauga hari. 13 Me luo Sabato, möiga baero ba mbawa göli ba zinga nungo nidanö, mawalinga so nahia wangandrö ba daʼö. Modadao ndraʼaga ba mabörögö fahuhuo khö ndra alawe si no owulo ba daʼö. 14 Samösa ndra alawe sotöi Lidia moroi ba mbanua Diatira, samawa nukha si ungu laʼa-laʼa* samosumange Lowalangi. Ifondrondrongo niwaʼöma ba ibokai dödönia Yehowa ba wanemaʼö fehede Waulo. 15 Me no labayagö ia idanö faoma ösi nomonia, iʼandrö khöma, ”Na mimane tödömi mamati ndraʼo khö Yehowa, miʼaeʼe ba miförö ba nomogu.” Iforege wangumaʼö khöma enaʼö fao ndraʼaga khönia.
16 Samuza inötö me möi ndraʼaga ba nahia wangandrö, falukhaga samösa zawuyu ira alawe nifakao malaʼika si lö sökhi. Ebua sibai hare zokhö yaʼia börö me mamaʼeleʼö ia. 17 Lö ibato ira alawe andre woloʼö yaʼaga hegöi Faulo. Muʼao ia imane, ”Enoni Lowalangi Fondrege Zalawa ndra niha daʼa, ba laturiaigö khömi lala wangorifi.” 18 Ero maʼökhö ifalua zimane daʼö, irege aföli Waulo ba gafuriata ba imane khö malaʼika si lö sökhi andrö, ”Ba döi Yesu Keriso, uwaʼö khöu heta ndraʼugö khönia!” Iʼanemaiʼö möi baero malaʼika si lö sökhi andrö.
19 Me laʼila sokhö yaʼia wa lö saʼae mohare ira moroi khönia, laraʼu Waulo faoma Sila lasöbi ira ba fasa ba laʼohe föna ndra samatörö. 20 Laʼohe Waulo hegöi Sila khö ndra sohalöwö ba gödo zanguhuku ba lamane, ”Lakalirukö mbanuada ira niha daʼa, niha Yahudi ira, 21 ba lafahaʼö zi lö toʼölö si lö fatema ba dödöda ba si tebai tafalua, börö me niha Romawi ita.” 22 Fao göi niha sato ba woʼuduni yaʼira, ba lasika nukha zi darua andrö ira sohalöwö ba gödo zanguhuku ba lafarou niha wamözi yaʼira faoma siʼo. 23 Me no aefa laböbözi, labeʼe ira ba gurunga, ba lafataro zanaro enaʼö lahaogö wozago yaʼira. 24 Börö fareta daʼö, ibeʼe ira ba gurunga tanö bakha, ifakaloʼö gahera.
25 Mato talu mbongi, mangandrö ba manunö Waulo hegöi Sila ba wanuno Lowalangi, ba larongo daʼö ösi gurunga tanö böʼö. 26 Ba zi lö mudöna-döna, alua ndruru danö sabölö-bölö irege modögö wondrasi gurunga andrö. Iʼanemaiʼö teboka mbawandruhö gurunga ba aefa rate ba danga niha gurunga. 27 Me tokea zanaro ba iʼila no teboka mbawandruhö gurunga, isöbi wöda edöna ibunu ia, iwalinga no ahori moloi fefu niha gurunga. 28 Hizaʼi muʼao Waulo, ”Böi bunuʼö! Ahori so ndraʼaga ba daʼa!” 29 Iʼandrö wandru sozago gurunga andrö ba fagohi ia weʼamöi bakha wamalukhaisi Faulo faoma Sila, ituhi danö si fao fanizi-nizi. 30 Iʼohe ira baero imane, ”He Pa, hadia nifaluagu enaʼö teʼorifi ndraʼo?” 31 Latema linia, ”Faduhusi tödö Zoʼaya Yesu, enaʼö teʼorifi ndraʼugö hegöi ösi nomou.” 32 Aefa daʼö latutunö khönia hegöi ba nösi nomonia daromali Yehowa. 33 Ba zi bongi daʼö, iʼohe ira ba idalu-daluni zokhora. Lö lataha-taha labayagö ira idanö sambua omo. 34 Iʼohe ira ba nomonia ibeʼe göra ba omuso dödöra yaʼira si sambua omo börö me no faduhu dödönia khö Lowalangi iadaʼa.
35 Me no moluo, lafatenge ngoni-ngoni ira sohalöwö ba gödo zanguhuku lamane, ”Miʼefasi ndra niha daʼö.” 36 Ifaʼema wehede andrö sozago gurunga khö Waulo, ”No lafatenge ngoni-ngoni ira sohalöwö ba gödo zanguhuku enaʼö laʼefasi ami. Börö daʼö miʼae baero ba miʼofanö, yaʼohahau dödömi.” 37 Hizaʼi imane Faulo, ”Laböbözi ndraʼaga föna niha sato, lö fanofu, hewaʼae niha Romawi ndraʼaga ba labeʼega ba gurunga. Iadaʼa lalau zi lö hede-hede ba lafofanö manö ndraʼaga? Tebai zimane daʼö! Akha möi ira ba daʼa ba lafasao ndraʼaga baero.” 38 Börö daʼö, lafatunö khö ndra sohalöwö ba gödo zanguhuku. Me larongo wa niha Romawi zi darua andrö, ifuli ataʼu ira. 39 Tohare zohalöwö ba gödo zanguhuku ba laʼandrö waʼebolo dödöra. Aefa daʼö lafasao ira baero ba laʼandrö khöra enaʼö mofanö ira laröi mbanua andrö. 40 Hizaʼi, me no aefa ira ba gurunga, möi ira ba nomo Lidia. Me falukha ira ndra talifusöda, lafarou dödö, aefa daʼö mofanö ira.