CHILAYIJO 39
Mabonelo Anota Mwali Ilopa
Ilopa lilokosha kasa. Apana unhu angalalama esina ilopa. SoMbumbi wedu, Mwali unelulamilo lyokutibuja kuti ilopa lingashingiswa chini. Mwali unotini nozwelopa? Tokwelela kulilya na kana kulibiga mumbili monhu? Akale ungachita chini chishalujo chibhodo penyaya yeyi?
1. Jehova unolibona chini ilopa?
Jehova wakabuja banamati babe bantolo kuti: “Bupenyu bwechibumbwa chose bwimo mulopa lyacho.” (Umpilo 17:14) Kuna Jehova ilopa linomilila bupenyu. Sezwo bupenyu chilichipo chilokosha chinova kuna Mwali nebo ilopa lilokosha kasa.
2. Jehova unojibisa kushingiswa kupi kwelopa?
Kusanu kwaba negubungano lyamaKristo Jehova wakabuja banonamata kuti besilye ilopa. (Balani Matangisilo 9:4 naUmpilo 17:10.) Wakoopama undawu yoyu mushule mokubumbwa kwegubungano lyamaKristo eshingisa igota lyabatungamilili kuti “beleke . . . ilopa.”—Balani Mishingo 15:28, 29.
Zunovani kuleka ilopa? Kana dokotela akakubuja kuti uleke busukwa, unova wasiya kunwa. Koga ungalya na chikafu chinabusukwa kana kuta zokubhayiwa munchinga? Azutota. Nokudalo, undawu waMwali wokuti tileke ilopa unova kuti atitokwelela kunwa kana kulya inyama yemhuka isijabhuda ilopa. Akale atitokwelela kulya zumwe zukafu zwabigwa ilopa.
Zunowini nokushingisa ilopa pakulapwa? Jimwe nzila jokulapwa ajitokwendelana nondawu waMwali. Zunoshanganisila kubigwa ilopa lililyose kana kuti zubabi zwalo zukulwana—red cells, white cells, platelets, neplasma. Jimwe inzila jokulapwa ajina undawu ulonanga. Sonkwejaniso, jimwe inzila jokulapa jinoshingisa tubabi tutukutuku tozubabi zukulwana zwelopa. Jimwe inzila jokulapa jinoshingisa ilopa lilyo omene. Inzila jose yeji jisilonanga, umwe nomwe unokwelela kuzutila chishalujo.a—BaGalatiya 6:5.
FUNDA ZUNJI
Tokoloja kuti ungashaluja chini inzila yokulapwa nayo kana kungomuka inyaya yokuda kushingiswa kwelopa.
3. Ita zushalujo zokulapwa zunoshantisa Jehova
Ungashaluja chini inzila jokulapwa jinokwendelana namabonelo aMwali? Yebani iVIDIYO, akale kwejisani nokukosha kokushingisa zunu zunotobela.
Namatila buchenjevu.—Jemusi 1:5.
Penyengula zumiso zweBhayibhili akale kuti zunoshinga chini.—Zwichimbe 13:16.
Pota kuti inzila jipi jinoshingiswa kwawunogala.
Shala inzila jawunobona kuti awudi kuti jishingiswe kunawi.
Ita chishalujo chichakusiya ulinehana ilochena.—Mishingo 24:16.b
Ziba yozu akuna unokwelela kukutila chishalujo—penyaya jinoda ihana iyo—angaba undume, unkaji, unkulwana wegubungano kana kuti unokulayija iBhayibhili.—BaRoma 14:12.
Kwala pasi zwawunobashala.
4. BaSumikiji baJehova banoda kulapwa nenzila imbodo kasa
Tokwanisa kuwhilila undawu waMwali nozwelopa nokulapwa nenzila imbuyanana tisinoshingisa ilopa. Yebani iVIDIYO.
Balani Titosi 3:2, akale kwejisani nombuzo yoyu:
Tokwelela kubhatisana akale kuzuninipisa kana tilebeleka nabanolapa?
Zwatisinovuma |
UnKristo zwaanozushalujila |
|---|---|
A. Iplasma |
Tubabi tweplasma |
B. Mawhite cells |
Tubabi twamawhite cells |
C. Maplatelets |
Tubabi twamaplatelets |
D. Mared cells |
Tubabi twamared cells |
5. Panokwelela kushingiswa tubabi twelopa
Ilopa linazubabi zukulwana zuna zunoshanganisila—mared cells, mawhite cells, maplatelets neplasma. Zubabi yozu zunatubabi tutukutuku twelopa.c Tubabi tutukutuku ndito tunoshingiswa pakuta miti inolwisana namalwaji kana kuti inomisa kubhuda kwelopa.
Kana ilinyaya yotubabi tutukutuku twelopa, unKristo umwe nomwe unokwelela kuzushalujila zukwendelana nehana iye ilolobejwa neBhayibhili. Bamwe bangashaluja kulamba kushingisa tubabi tutukutuku twelopa kana belapwa. Bamwe ihana jabo jinobavumila kushingisa tubabi tutukutuku.
Kana uta chishalujo yeyesesa nozombuzo yoyu:
Ndingombawunulila chini dokotela chizatu changu chokuvuma kana kulamba kushingisa tubabi tutukutuku twelopa?
UMWE ANGABHUZA KUTI: “Zubi na kubigwa ilopa?”
Iwi unotini?
INI ZWAWAFUNDA
Jehova aadi kuti tishingise ilopa zusilizo.
Kubwilulula
Neni Jehova ekoshesa ilopa?
Tozuziba chini kuti undawu waMwali unoti tisishingise ilopa unoshingabo penyaya yokubigwa ilopa?
Ungata chini zushalujo zubhodo penyaya yokulapwa ushingisa ilopa?
PAMIJA PANA ZWAWAWANA
Ndizupi zwawunokwelela kuyeya nozwazwo kana ushaluja inzila yokulapwa ushingisa ilopa lilyo omene?
“Imibuzo Ebuzwa Ngabafundi” (INqabayokulinda, October 15, 2000)
Ndizupi zwawunokwelela kuyeya nozwazwo kana ushaluja kuvuma kana kusovuma kushingisa tubabi tutukutuku twelopa?
“Imibuzo Ebuzwa Ngabafundi” (INqabayokulinda, June 15, 2004)
Ini zwakata kuti umwe dokotela evume mabonelo aJehova penyaya yelopa?
“Sengiwuzwisisa Umthetho KaNkulunkulu Omayelana Legazi” (Vukani!, December 8, 2003)
Funda kuti bakulwana bamomumaKomiti Okushinga Nozubhadela banobabhancha chini banakwayina nabakazwaji babo.
a Linga Chilayijo 35, “Zwatingate Kuti Tite Zushalujo Zubuya.”
b Linga namba 5 panoti, “Kana Peda Kushingiswa Tubabi Tutukutuku Twelopa”; Mawhi Okumapejelejo 3, “Jimwe Inzila Jokulapwa Jinoshingisa Ilopa.” akale Inkonzo Yethu YoMbuso yaNovember 2006 peji 3-6.
c Madokotela banobona zubabi zukulwana zwelopa sotubabi tutukutuku. Ndizo ukwelela kubhawunulila dokotela uwo kuti neni usinovuma kubigwa ilopa lililyose kana kuti mared cells, mawhite cells, maplatelets neplasma.