Ebangedi ya Mareka
3 Jesu o ile a tsena sinagogeng gape, gomme go be go na le monna yo a bego a omeletše seatla.+ 2 Bafarasei ba be ba mo tsepeletše go bona ge e ba a tla fodiša monna yoo ka Sabatha, e le gore ba tle ba mo phare ka molato. 3 Ke moka a re go monna yoo wa seatla se se omeletšego: “Ema o tle mo gare ga holo.” 4 Ke moka a re go bona: “Ke dilo dife tšeo molao o di dumeletšego gore di dirwe ka Sabatha? Na ke tše dibotse goba ke tše mpe? Na ke go phološa bophelo bja motho goba ke go bo fediša?”+ Eupša ba se mo arabe. 5 Ka morago ga go ba lebelela a galefile, a kwešitšwe bohloko kudu ke gore ga ba na kwelobohloko dipelong tša bona,+ a re go monna yoo: “Otlolla seatla sa gago.” Ke moka monna yoo a otlolla seatla sa gagwe gomme sa fola. 6 Ge Bafarasei ba bona seo ba ile ba napa ba sepela, ba thoma go mo logela maanomabe ba na le balatedi ba Heroda,+ e le gore ba tle ba mmolaye.
7 Eupša Jesu le barutiwa ba gagwe ba ile ba ya lewatleng gomme lešaba le legolo leo le tšwago Galelia le Judea le ile la mo šala morago.+ 8 Le gona lešaba le legolo leo le tšwago Jerusalema, Idumea le go tšwa ka bohlabela bja Jorodane le go dikologa Tiro le Sidone, le ile la tla go yena ge le be le ekwa ka dilo tše dintši tšeo a bego a di dira. 9 Ke moka o ile a botša barutiwa ba gagwe gore ba mo nyakele sekepe se senyenyane e le gore lešaba le se ke la mo pitlaganya. 10 Ka ge a be a fodišitše batho ba bantši, batho ka moka bao ba bego ba babja kudu ba be ba mo kgobokanela ka ge ba be ba nyaka go mo kgwatha.+ 11 Le meoya e mebe+ ge e be e mmona e be e khunama pele ga gagwe e goeletša, e re: “O Morwa wa Modimo.”+ 12 Eupša o be a dula a e botša tsebe-go-kwa gore e se ke ya botša batho ka yena.+
13 O ile a namela thaba, a bitša bao a bego a ba nyaka+ gomme ba tla go yena.+ 14 O ile a kgetha banna ba 12 gomme a ba bitša baapostola, banna bao ba be ba tlo sepela le yena ebile o be a tlo ba roma gore ba ye go bolela ditaba tše dibotse. 15 O be a tlo ba fa le maatla a go raka matemona.+
16 Banna ba 12+ bao a ba kgethilego e be e le Simone, yoo a ilego a mo fa leina a re ke Petro,+ 17 Jakobo morwa wa Tsebedeo le Johane morwarrago Jakobo (bona o ile a ba fa leina a re ke Boaneregese, yeo e bolelago gore “Barwa ba Modumo”),+ 18 Andrea, Filipi, Baratholomeo, Mateo, Thomase, Jakobo morwa wa Alifeose, Thadeo, Simone wa Mokananaya,* 19 le Judase Isikariote yo ka morago a ilego a mo rekiša.
Ke moka a tsena ka ntlong. 20 Le gona moo lešaba le ile la kgobokana, moo Jesu le barutiwa ba gagwe ba ilego ba hloka le nako ya go ja. 21 Eupša ge ba gabo ba ekwa ka se, ba tšwela ka ntle gore ba yo mo swara, ka ge ba be ba re: “O a gafa.”+ 22 Le gona ditsebi tša molao tša tla di etšwa Jerusalema gomme tša re: “O na le Beletsebubu* ebile o raka matemona ka maatla a mmuši wa matemona.”+ 23 Ka gona, ka morago ga gore a di bitše o ile a bolela le tšona ka dipapišo, a re: “Sathane a ka raka Sathane bjang? 24 Ge mmušo o arogana ka bowona, o tlo wa.+ 25 Ge e ba lapa le ka arogana ka bolona, le tlo thubega. 26 Le gona, ge e ba Sathane a itwantšha gomme mmušo wa gagwe wa arogana,* a ka se kgone go ema a tiile, eupša e tla napa ya ba bofelo bja gagwe. 27 Ge e le gabotse, ga go na motho yo a ka tsenago ka ntlong ya monna yo maatla gomme a tšea thoto ya gagwe a se a thoma pele ka go mo tlema. Ge a tlemile monna yoo, ke gona a ka kgonago go tšea thoto ya ka ntlong ya gagwe. 28 Ke le botša nnete ge ke re, batho ba tla lebalelwa mohuta o mongwe le o mongwe wa sebe seo ba se dirago le dipolelo tšeo di kwešago bohloko ka moka tšeo ba di bolelago. 29 Eupša mang le mang yo a rogakago moya o mokgethwa, a ka se tsoge a lebaletšwe+ eupša o na le molato wa sebe seo se ka se tsogego se lebaletšwe.”*+ 30 O boletše se ka ge ba be ba re: “O na le letemona.”+
31 Bjale mmagwe le banababo+ ba tla, ke moka ge ba eme ka ntle, ba kgopela motho yo mongwe gore a ba biletše Jesu.+ 32 Ge lešaba le be le dutše go mo dikologa o ile a botšwa gore: “Mmago le banabeno ba ka ntle ba a go nyaka.”+ 33 Eupša ge a araba a re: “Mma le banabešo ke bomang?” 34 Ke moka a lebelela batho bao ba bego ba dutše go mo dikologa, a re: “Mma le banabešo šeba!+ 35 Mang le mang yo a dirago seo Modimo a se ratago, ke yena e lego ngwanešo le kgaetšedi ya ka le mma.”+