Bakolose

3 Ge e ba le phedišitšwe le Kriste,+ gona tšwelang pele le nyaka dilo tša legodimong, moo Kriste a dutšego gona ka letsogong le letona la Modimo.+ 2 Dulang le nagana ka dilo tša legodimong,+ e sego tša lefaseng.+ 3 Ka gobane le hwile gomme bophelo bja lena bo utilwe go Kriste go ya ka thato ya Modimo. 4 Ge Kriste, yena yo a neago bophelo*+ a bonagatša maatla a gagwe, gona le lena le tla bonagala gore le na le letago+ la go swana le la gagwe.

5 Ka gona tlošang* ka mo go feletšego kganyogo yeo e lego mebeleng ya lena+ e lego boitshwaro bjo bobe bja tša thobalano,* go dira dilo tša go se hlweke, kganyogo e sa laolegego ya go nyaka go ba le thobalano,+ go nagana dilo tše mpe le megabaru. Ka gore go ba le megabaru go swana le go rapela medimo ya diswantšho. 6 Ka gobane Modimo o tlo galefela batho bao ba dirago dilo tšeo. 7 Le lena le be le dira dilo tše ge le be le phela go swana le bona.+ 8 Go na le mekgwa e mengwe yeo le yona le swanetšego go e lahlela kgole kudu le lena, e lego go galefa, go kwata, go dira dilo tše mpe,+ go bolela dilo tše di kwešago bohloko+ le go bolela dilo tša go leša dihlong.+ 9 Le se ke la forana.+ Hlobolang semelo sa kgale+ le be le tlogele dilo tšeo di sepedišanago le semelo seo tšeo le bego le di dira, 10 gomme le apare semelo se seswa go ya ka tsebo e nepagetšego ya therešo,+ yeo e tšwago go Modimo le yeo e thušago motho gore a be le dika tša go swana le tša Modimo.+ 11 Tseleng ye e mpsha ya go phela ga go na phapano magareng ga Mogerika* le Mojuda, motho yo a bolotšego le yo a sa bollago, motho yo a tšwago nageng e nngwe le Mosithe,* mohlanka le motho yo a lokologilego, eupša Kriste o re kopanya ka moka gomme ra ba selo setee.+

12 Ka gona ka ge Modimo a le kgethile, ebile le le bana ba gagwe ba bakgethwa+ le bao a ba ratago kudu,+ bontšhang* lerato, lešoko, botho, boikokobetšo,+ boleta+ le go se fele pelo.+ 13 Tšwelang pele le kgotlelelana gomme le lebalelana ka pelo ka moka,*+ le ge e ba le na le lebaka le le kwagalago la go kgopišega.+ Go no swana le ge Jehofa* a le lebaletše ka pelo ka moka, le lena le lebalelaneng ka pelo ka moka.+ 14 Eupša sa bohlokwa kudu ke gore le be le lerato+ ka gobane lerato ke lona le dirago gore batho ba be le botee.+

15 Le gona anke le duleng le na le khutšo ya Kriste dipelong tša lena,+ ka gobane Modimo o le biditše gore le be mmele o tee ebile le be le khutšo gomme le dule le leboga. 16 Anke dithuto tša Kriste di dule di le dipelong tša lena gomme le tla ba bohlale. Tšwelang pele le rutana le go kgothatšana ka dipsalme,+ ka dikopelo tša go tumiša Modimo le dikopelo tša borapedi tša go mo leboga. Le dule le opelela Jehofa ka dipelong tša lena.+ 17 Dilo ka moka tšeo le di dirago le tšeo le di bolelago, le di direng leineng la Morena Jesu le leboga Modimo Tate le diriša leina la Jesu.+

18 Lena basadi, ikokobeletšeng banna+ ba lena ka ge Morena a nyaka le dira bjalo. 19 Lena banna, tšwelang pele le rata basadi+ ba lena gomme le se ke la ba galefela kudu.*+ 20 Lena bana, dulang le ekwa batswadi ba lena+ ka gobane ge le dira bjalo le kgahliša Morena. 21 Lena botate, le se ke la kwatiša* bana ba lena+ e le gore ba se nyame. 22 Lena bao le šomago, dulang le ekwa bao le ba šomelago,+ e sego feela ge ba le lebeletše e le gore le kgahliše batho, eupša le ba kweng ka dipelo tša lena ka moka ka ge le hlompha Jehofa. 23 Selo le ge e le sefe seo le se dirago, le se direng ka pelo ka moka le ka maatla ka moka bjalo ka ge eka le se direla Jehofa,+ e sego batho. 24 Ka gobane le a tseba gore Jehofa ke yena a tlago go le nea moputso wo a le tshepišitšego wona.+ Itshwareng ka tsela yeo e bontšhago gore le makgoba a Kriste Mong wa rena. 25 Ka gobane motho yo a dirago dilo tše mpe, o tlo otlwa ka baka la dilo tše mpe tšeo a di dirilego,+ ka gore Modimo o tlo ahlola batho ka moka ka ntle le go kgetholla.+