Petro wa Bobedi
2 Ka gona go ile gwa ba le baporofeta ba maaka gare ga batho ba Modimo go swana le ge go tla ba le barutiši ba maaka gare ga lena.+ Ba tla dira gore go be le dihlotswana ka sephiring tšeo di tlago go senya tumelo ya lena, ebile ba hlanogela mong wa bona yo a ba rekilego+ gomme ba tla fedišwa ka pela ka baka la go dira seo. 2 Go feta moo, ba bantši ba tla itshwara gampe ba sa jewe ke dihlong*+ gomme ka baka la seo batho ba tla bolela gampe ka tsela ya Modimo.+ 3 Le gona ka ge ba na le megabaru ba tlo ikhola ka lena ka go le botša maaka. Eupša kahlolo ya bona yeo Modimo a boletšego kgale+ gore e tla ba tlela e ka se diege. Ruri ba tla fedišwa.+
4 Ka nnete, Modimo ga se a ka a tlogela go otla barongwa bao ba ilego ba dira sebe,+ eupša o ile a ba lahlela Tatarase,*+ a ba tlema ka diketane a ba lahlela meleteng ya leswiswi le lesoleso gore ba tle ba ahlolwe.+ 5 Le gona ga se a ka a tlogela go otla lefase+ la mehleng ya Noa eupša o ile a phološa Noa yo a bego a bolela ditaba tše di lokilego+ le batho ba bangwe ba šupago+ ge a be a tliša Meetsefula lefaseng la batho ba go se hlomphe Modimo.+ 6 Ebile o ile a otla motse wa Sodoma le wa Gomora, ka go e fiša ka mo go feletšego go fihlela go šala melora feela.+ O ile a beela batho bao ba sa hlomphego Modimo mohlala wa dilo tšeo di tlago go tla.+ 7 Le gona o ile a phološa Lota+ yo a lokilego, yo a bego a gateletšegile kudu ka baka la batho ba go hloka molao bao ba itshwerego gampe ba sa jewe ke dihlong. 8 Nakong ya ge monna yo yo a lokilego a be a phela gare ga batho bao ba dirago dilo tše mpe, o ile a bona tsela yeo ba phelago ka yona le go kwa dilo tšeo ba di bolelago gomme se se ile sa mo kweša bohloko kudu letšatši le letšatši. 9 Jehofa* o tseba go phološa batho bao ba mo hlankelago ka dipelo ka moka ge ba wetšwe ke moleko,+ le gona o tseba go beela ka thoko batho bao ba dirago dilo tše mpe gore ba tle ba fedišwe letšatšing la kahlolo,+ 10 kudukudu bao ba nyakago go ba le thobalano le batho ba bangwe e le gore ba ba šilafatše,+ le bao ba nyatšago bao ba neilwego maatla a go laola ba bangwe.+
Ba beta pelo ebile ba itirela boithatelo. Ga ba tšhabe go bolela gampe ka bao Modimo a ba hlomphago. 11 Gaešita le ge Barongwa ba ba feta ka maatla, ga ba bee barutiši bao ba maaka molato ebile ga ba ba roge ka ge ba hlompha Jehofa.+ 12 Eupša batho ba bao ba swanago le diphoofolo tše di hlokago tlhaologanyo tšeo di dirago dilo di laolwa ke tlhago le tšeo di tswaletšwego go swarwa le go bolawa, ba bolela gampe ka dilo tšeo ba sa di tsebego.+ Ba tla fedišwa ka baka la dilo tše mpe tšeo ba di dirago, 13 ba otlwa ka baka la ditiro tša bona tše mpe.
Ba ipshina ka go phelela menate+ gaešita le mosegare wa sekgalela. Ba swana le dipatso le ditšhila tšeo di lego mo go lena. Ge ba keteka menyanya le lena ba kgahlwa ke go lahletša ba bangwe ka dithuto tša maaka.+ 14 Ba na le kganyogo e maatla ya go dira bohlotlolo,*+ ga ba kgone go tlogela go dira sebe ebile ba goketša bao ba sa tšwago ba tia tumelong. Ke dikonokono tša megabaru. Ke bana bao ba rogakilwego. 15 Ba ile ba arošwa ka gobane ba ile ba tlogela go sepela tseleng ya nnete. Ba ile ba latela tsela ya Bileama+ morwa wa Beoro, yo a ilego a dira selo se sebe ka ge a be a tloga a nyaka go hwetša moputso.+ 16 Eupša o ile a kgalemelwa ka baka la ge a ile a tshela molao.+ Tonki yeo e sa kgonego go bolela e ile ya bolela ka lentšu la motho gomme ya thibela moporofeta yo gore a se ke a dira dilo tša bošilo.+
17 Batho ba ba swana le didiba tšeo di se nago meetse le kgodi yeo e tšewago ke ledimo le le šoro, gomme ba letetšwe ke leswiswi le lesoleso.+ 18 Ba bolela dilo tšeo di kwagalago di le bohlokwa eupša di se na mohola, ba itshwara gampe ba sa jewe ke dihlong gomme ba dira gore batho ba boele ba be le dikganyogo tše mpe.+ Ba ba goketša go dira dilo tše mpe tšeo ba sa tšwago go tlogela go di dira.+ 19 Barutiši ba ba maaka ba ba tshepiša tokologo, eupša bona ka bobona ke makgoba a go dira dilo tše mpe.+ Ge e ba motho a fenywa ke selo le ge e le sefe, ke lekgoba la selo seo.+ 20 Ge e ba ba tlogetše go dira ditšhila tša lefase+ ka ge ba thušwa ke go tseba nnete ka Morena le Mophološi Jesu Kriste, eupša ba boela ba dira dilo tšeo ebile tša ba laola, gona ba feteletše go feta mathomong.+ 21 Go be go tla ba kaone kudu gore ba se ke ba tseba tsela ya nnete yeo ba bego ba sepela go yona go e na le gore ka morago ga gore ba e tsebe, ba aroge go yona ka go tlogela molao wa Modimo wo a bego a ba neile wona.+ 22 Seo se ba diragaletšego se bontšha gabotse gore seema se sengwe se bolela nnete ge se re: “Mpša e boetše mahlatšeng a yona gomme kolobe yeo e bego e hlapišitšwe e boetše e pshikologa lerageng gape.”+