Kutollo Yeo e Utolletšwego Johane
10 Ke ile ka bona morongwa yo mongwe yo a nago le maatla a theoga legodimong a itatile ka leru, molalatladi o le hlogong ya gagwe, sefahlego sa gagwe se le bjalo ka letšatši+ gomme maoto a gagwe a le bjalo ka diphilara tša mollo. 2 O be a swere lengwalo le lenyenyane la go phuthwa leo le butšwego, a gatile lewatle ka leoto la gagwe le letona gomme a gatile lefase ka le letshadi. 3 O be a goeletša ka lentšu le le kwagalago bjalo ka ge eka ke tau e rorago.+ Ge a goeletša, go ile gwa kwala mantšu a medumo e šupago ya magadima.+
4 Ge medumo yeo e bolela, ke be ke itokišeleditše go ngwala, eupša ka kwa lentšu le le tšwago legodimong+ le re: “Dilo tše medumo yeo e šupago e di boletšego di boloke e le sephiri, ebile o se ke wa di ngwala.” 5 Morongwa yo ke mmonego a gatile lewatle le lefase, o ile a emišetša letsogo la gagwe le letona legodimong, 6 a ena ka Modimo yo a phelago go ya go ile,+ yo a bopilego legodimo le dilo tšeo di lego go lona le lefase le dilo tšeo di lego go lona le lewatle le dilo tšeo di lego ka gare ga lona,+ a re: “Nako ya go leta e fedile. 7 Eupša matšatšing a ge morongwa wa bošupa+ a le kgauswi le go letša phalafala ya gagwe,+ sephiri se sekgethwa+ sa Modimo se tlo phethagala. Tše ke ditaba tše dibotse tšeo a di boditšego baporofeta+ bao e lego bahlanka ba gagwe.”
8 Ka kwa lentšu le etšwa legodimong+ le bolela le nna gape le re: “Eya o tšee lengwalo la go phuthwa le le butšwego leo le swerwego ke morongwa yo a gatilego lewatle le lefase.”+ 9 Ke ile ka ya go morongwa gomme ka mmotša gore a mphe lengwalo le lenyenyane la go phuthwa. Yena a re go nna: “Le tšee o le je+ gomme le tla dira gore ka mpeng ya gago go be bohloko, eupša ka ganong ga gago le tla ba bose go swana le todi ya dinose.” 10 Ke ile ka tšea lengwalo leo la go phuthwa leo le bego le swerwe ke morongwa ka le ja,+ gomme ka ganong ga ka le be le le bose go etša todi ya dinose,+ eupša ge ke šetše ke le jele, ka mpeng ya ka go ile gwa ba bohloko. 11 Ka botšwa gore: “O swanetše go porofeta gape ka merafo, ditšhaba, batho ba go bolela maleme a go fapafapana le ka dikgoši tše dintši.”