Kgaolo 24
Molaetša o Bose le o Galakago
Pono 6—Kutollo 10:1–11:19
Taba: Pono ya lengwalwana; diphihlelo tša tempele; go letšwa ga phalafala ya bošupa
Nako ya phethagatšo: Go tloga ka go bewa ga Jesu sedulong sa bogoši ka 1914 go fihla masetlapelong a magolo
1, 2. (a) Madimabe a bobedi a ile a feleletša ka’ng, gomme ke neng mo go tla thwego madimabe a a fedile? (b) Johane bjale o bona mang a fologa legodimong?
MADIMABE a bobedi e bile a senyago kudu. A otlile Bojakane le baetapele ba bjona, yona “karolo ya boraro ya batho” bao ba pepentšhitšwego e le ba hwilego moyeng. (Kutollo 9:15) Johane ka morago ga se o swanetše go ba a ile a rata go tseba seo madimabe a boraro a tlago go se tliša. Eupša ema go se nene! Madimabe a bobedi ga se a hlwa a fela, e bile a ka se ke a fela go ba go fihla re fihla ntlheng e bolelwago go Kutollo 11:14. Johane pele ga mo, o tla bona go fetoga ga ditiragalo tšeo yena ka noši a nago le karolo e mafolofolo go tšona. Se se thoma ka pono e boifišago kudu:
2 “Ka bona morongwa yo mongwe yo matla a fologa legodimong a tšhepile ka leru, molalatladi o le hlogong ya gagwe, sefahlego sa gagwe se le bjalo ka letšatši gomme maoto a gagwe a le bjalo ka dikokwane tša mollo.”—Kutollo 10:1.
3. (a) “Morongwa . . . yo matla” ke mang? (b) Ke’ng seo se bolelwago ke molalatladi wo o lego hlogong ya gagwe?
3 ‘Morongwa yo yo matla’ ke mang? Go molaleng gore ke Jesu Kriste yo a tagafaditšwego yo a lego modirong o mongwe. O apere leru leo le mo šireleditšego, leo le re gopotšago mantšu a Johane a pejana ka Jesu ge a be a re: “Bonang! O tla ka maru, gomme mahlo ka moka a tla mmona, le bao ba mo hlabilego.” (Kutollo 1:7; bapiša le Mateo 17:2-5.) Molalatladi wo o lego hlogong ya gagwe o re gopotša pono ya Johane ya pejana ya sedulo sa bogoši sa Jehofa gotee le “molalatladi o swanago le emeralede ka ponagalo.” (Kutollo 4:3; bapiša le Hesekiele 1:28.) Molalatladi woo o be o bontšha boiketlo le khutšo tšeo di dikologilego sedulo sa bogoši sa Modimo. Ka tsela e swanago, molalatladi wo wo o lego hlogong ya morongwa o be o tla mo hlaola e le motseta yo a kgethegilego wa khutšo, yena ‘Kgoši ya Khutšo’ ya Jehofa e boletšwego e sa le pele.—Jesaya 9:5, 6.
4. Ke’ng seo se bontšhwago (a) ke go ba ga sefahlego sa morongwa yo matla se se “bjalo ka letšatši”? (b) ke go ba ga maoto a morongwa “bjalo ka dikokwane tša mollo”?
4 Sefahlego sa morongwa yo matla se be se le “bjalo ka letšatši.” Johane mathomong ge a be a bona Jesu tempeleng ya Modimo, o boletše gore sefahlego sa Jesu se be se “etša letšatši ge le phadima ka matla a lona.” (Kutollo 1:16) Jesu ka ge e le “’tšatši la tokô,” o phadima a e-na le phodišo diphegong tša gagwe bakeng sa go hola batho bao ba boifago leina la Jehofa. (Maleaki 4:2) Ga se feela sefahlego, eupša le maoto a morongwa yo a taga “bjalo ka dikokwane tša mollo.” Mokgwa wa gagwe wa go ema o tiilego ke wa Motho yo Jehofa a mo neilego “matla ka moka legodimong le lefaseng.”—Mateo 28:18; Kutollo 1:14, 15.
5. Johane o bona’ng ka seatleng sa morongwa yo matla?
5 Johane o tšwela pele go bona se se latelago: “Ka seatleng sa gagwe o be a e-na le lengwalo la go phuthwa le lenyenyane le le butšwego. A gata ka lenao la gagwe le letona lewatleng, gomme lenao la gagwe le letshadi a gata ka lona lefaseng.” (Kutollo 10:2) Na ke lengwalo le lengwe la go phuthwa? Ee, eupša mo nakong ye ga se la tswalelwa. Re ka lebelela gotee le Johane go bona ditaba tše dingwe tše di kgahlišago tšeo di tla tlogago di utollwa. Lega go le bjalo, re thoma ka go newa thulaganyo ya seo se tlago go latela.
6. (a) Ke ka baka la’ng e le mo go swanetšego gore maoto a Jesu a gatile lefase le lewatle? (b) Psalme 8:5-8 e ile ya phethega neng ka botlalo?
6 Anke re boeleng tlhalosong ya Jesu. Maoto a gagwe a tukago mollo a gatile lefase le lewatle, tšeo mo nakong ye a di laolago ka botlalo. Go bjalo ka ge go boletšwe psalmeng ya boporofeta: “O [Jehofa] mo [Jesu] hlaeditše ka xonyane a se bê Modimo; wa mo hlama ka borêna le letaxô; wa mmušiša medirô ya ’atla tša xaxo; tšohle O di bea ka tlase xa ’naô tša xaxwe. Dinku le dikxomo ka moka xa tšôna, le tšôna ’phôôfôlô tša naxeng, Le dinonyana tša xodimo, le dihlapi tša lewatlê, tše di thalakanyaxo mawatlê ka mebila.” (Psalme 8:5-8; bona gape le Baheberu 2:5-9.) Psalme ye e ile ya phethega ka botlalo ka 1914 ge Jesu a be a bewa sedulong sa bogoši e le Kgoši ya Mmušo wa Modimo, gomme nako ya bofelo e thoma. Ka gona, seo Johane a se bonago ponong ye se ile sa šoma go tloga ngwageng woo.—Psalme 110:1-6; Ditiro 2:34-36; Daniele 12:4.
Medumo e Šupago
7. Morongwa yo matla o goeletša ka mokgwa ofe, gomme go goeletša moo ga gagwe go bolela’ng?
7 Go naganišiša ga Johane ka morongwa yo yo matla go tsenwa gare ke morongwa ka noši: “A [morongwa] goeletša ka lentšu le le hlabošago go etša ge tau e rora. Ge a goeletša, medumo e šupago ya kwatša mantšu a yona.” (Kutollo 10:3) Mokgoši o bjalo o matla o be o tla tanya šedi ya Johane, wa tiiša gore Jesu ruri ke yena “Tau ya moloko wa Juda.” (Kutollo 5:5) Johane le gona o be a tla ela hloko gore Jehofa le yena ka dinako tše dingwe o bolelwa a “rora” goba a bopa. Go rora ga Jehofa go tsebiša ka mokgwa wa boporofeta go kgobokanywa gape ga Isiraele ya moya, le go tla ga “’tšatši la Morêna” le le senyago. (Hosea 11:10; Joele 3:14, 16; Amosi 1:2; 3:7, 8) Ka gona, go molaleng gore go rora mo go swanago le ga tau ga morongwa yo yo matla go bolelela pele ditiragalo tše swanago tše dikgolo bakeng sa lewatle le lefase. Go laletša medumo e šupago gore e bolele.
8. ‘Mantšu a medumo e šupago’ ke’ng?
8 Johane nakong ya pele o ile a kwa medumo e tšwago sedulong sa bogoši sa Jehofa. (Kutollo 4:5) Morago kua mehleng ya Dafida, modumo wa kgonthe ka dinako tše dingwe o be o bolelwa e le “lentšu la Jehofa.” (Psalme 29:3, PK) Nakong ya ge Jehofa a be a bolela ka mo go kwagalago morero wa gagwe wa go tagafatša leina la gagwe mehleng ya bodiredi bja lefaseng bja Jesu, go ba bantši go ile gwa kwagala eka ke go duma ga legodimo. (Johane 12:28, 29) Ka gona, go a kwagala go phetha ka gore ‘mantšu a medumo e šupago’ ke go bolela ga Jehofa ka noši merero ya gagwe. Taba ya gore go be go e-na le medumo e “šupago,” e bolela go felela ga seo Johane a se kwelego.
9. Lentšu le le tšwago legodimong le laela’ng?
9 Eupša theetša! Go kwagala lentšu le lengwe. Le tliša taelo yeo e swanetšego go bonala e makatša go Johane: “Bjale ge medumo e šupago e bolela, ke ge ke loketše go ngwala; eupša ka kwa lentšu le le tšwago legodimong le re: ‘Tiiša ka seka dilo tše medumo e šupago e di boletšego, o se ke wa di ngwala.’” (Kutollo 10:4) Johane o swanetše go ba a be a fišegela go kwa le go ngwala melaetša yeo e dumago, go fo swana le ge sehlopha sa Johane lehono se letetše Jehofa ka mafolofolo gore a utolle merero ya gagwe gore e ngwalwe pukung. Dikutollo tše bjalo di tla fela nakong ya Jehofa e beilwego.—Luka 12:42; bona gape le Daniele 12:8, 9.
Go Phethega ga Sephiri se Sekgethwa
10. Morongwa yo matla o ena ka mang, gona o ena mabapi le tsebišo efe?
10 Jehofa mo nakong ye, o na le thomo e nngwe bakeng sa Johane. Ka morago ga ge medumo e šupago e dumile, morongwa yo matla o bolela gape: “Morongwa yo ke mmonego a eme lewatleng le lefaseng a emišetša letsogo la gagwe le letona legodimong, a ena ka Yo a phelago go iša mehleng ya neng le neng, yo a bopilego legodimo le dilo tše di lego go lona le lefase le dilo tše di lego go lona le lewatle le dilo tše di lego go lona, a re: ‘Go ka se hlwe go e-ba le tiego.’” (Kutollo 10:5, 6) Morongwa yo matla o ena ka mang? Jesu yo a tagafaditšwego ga a ene ka yena ka noši, eupša o ena ka Matla a magolo go feta ohle, e lego Jehofa, Mmopi yo a sa hwego wa magodimo le lefase. (Jesaya 45:12, 18) Ka keno ye, morongwa o kgonthišetša Johane gore go ka se hlwe go sa ba le go diega ka lehlakoreng la Modimo.
11, 12. (a) Go bolelwa’ng ka gore “go ka se hlwe go e-ba le tiego”? (b) Ke’ng seo se fihlišwago bofelong?
11 Lentšu la Segerika mo le le fetoletšwego e le “lebaka” ke khroʹnos, leo ge e le gabotse le bolelago “nako.” Ka gona ba bangwe ba ile ba nagana gore polelo ye ya morongwa e swanetše go fetolelwa ka gore: “Go ka se hlwe go sa ba le nako,” go le bjalo ka ge eka nako ka ge re e tseba e tla fela. Eupša lentšu khroʹnos mo le dirišwa ka ntle le lebopi-kgetho. Ka gona, ga le bolele nako ka kakaretšo, eupša go e-na le moo, le bolela “nako” (“a time”) goba “lebaka la nako” (“a period of time”). Ka mantšu a mangwe, Jehofa a ka se ke a hlwa a dumelela lebaka le lengwe la nako (goba go diega). Lediri la Segerika le le tšerwego go khroʹnos le dirišwa gape go Baheberu 10:37, moo Paulo a tsopolago Habakuku 2:3, 4, gomme a ngwalago gore “yo a tlago . . . a ka se diege.”
12 Mantšu ao a rego “go ka se hlwe go e-ba le tiego,” ke ao a ipiletšago gakaakang go sehlopha se se tšofalago sa Johane lehono! Ke ka tsela efe mo go se nago tiego? Johane o a re botša: “Eupša matšatšing a go kwala ga lentšu la morongwa wa bošupa, ge a le kgaufsi le go letša phalafala ya gagwe, sephiri se sekgethwa sa Modimo go ya ka ditaba tše dibotse tšeo a di tsebišitšego bahlanka ba gagwe, e lego baporofeta, ruri se phethagaditšwe.” (Kutollo 10:7) Nako ya Jehofa ya gore a fihliše sephiri sa gagwe se sekgethwa seremong sa sona se se kgahlišago le ka katlego e kgolo, e fihlile!
13. Sephiri se sekgethwa sa Modimo ke’ng?
13 Sephiri se se sekgethwa ke’ng? Se akaretša peu yeo e ilego ya holofetšwa la pele kua Edene, yeo e ipontšhitšego ka mo go kgethegilego e le Jesu Kriste. (Genesi 3:15; 1 Timotheo 3:16) Le gona se sepedišana le go tsebja ga mosadi yo Peu e tšwago go yena. (Jesaya 54:1; Bagalatia 4:26-28) Go tšwela pele, se akaretša ditho tšeo e lego karolo ya bobedi tša sehlopha sa peu gotee le Mmušo wo Peu e bušago go wona. (Luka 8:10; Baefeso 3:3-9; Bakolose 1:26, 27; 2:2; Kutollo 1:5, 6) Ditaba tše dibotse tše di lego mabapi le Mmušo wo o kgethegilego wa legodimo di swanetše go bolelwa lefaseng ka moka mo nakong ya bofelo.—Mateo 24:14.
14. Ke ka baka la’ng madimabe a boraro a gokaganywa le Mmušo wa Modimo?
14 Ruri, tše ke ditaba tše dibotse kudu. Lega go le bjalo, madimabe a boraro a gokaganywa le Mmušo go Kutollo 11:14, 15. Ka baka la’ng? Ka gobane go batho bao ba ratago tshepedišo ya Sathane ya dilo, go bolelwa ga ditaba tše dibotse tša gore sephiri se sekgethwa sa Modimo se phethilwe, e lego gore Mmušo wa Modimo wa Mesia o gona, ruri ke ditaba tše di nyamišago. (Bapiša le 2 Bakorinthe 2:16.) Di bolela gore thulaganyo ya lefase yeo ba e ratago kudu, e kgaufsi le go fedišwa. Mantšu a medumo e šupago ao a rwelego ditemošo tše bjalo tše di tšhošago tše bogale, a thoma go ba ao a lego molaleng le a kwagalago ge go batamela letšatši le legolo la Jehofa la tefetšo.—Tsefanya 1:14-18.
Lengwalo le le Butšwego
15. Lentšu le le tšwago legodimong le morongwa yo matla ba botša Johane eng, gomme ke’ng seo se diregago go Johane?
15 Ge Johane a sa letetše go letšwa ga phalafala ye ya bošupa le go phethwa ga sephiri se sekgethwa sa Modimo, o newa kabelo e nngwe: “Lentšu leo ke le kwelego le e-tšwa legodimong le bolela le nna gape le re: ‘E-ya o tšee lengwalo la go phuthwa le le butšwego leo le lego seatleng sa morongwa yo a emego lewatleng le lefaseng.’ Ka ya go morongwa gomme ka mmotša gore a mphe lengwalo la go phuthwa le lenyenyane. A re go nna: ‘Le tšee o le je gomme le tla dira gore teng ya gago e galake, eupša ka ganong ga gago le tla ba bose go etša dinose.’ Ka tšea lengwalo la go phuthwa le lenyenyane seatleng sa morongwa ka le ja, gomme ka ganong ga-ka le be le le bose go etša dinose; eupša ge ke šetše ke le jele, teng ya-ka ya galaka. Ba re go nna: ‘O swanetše go porofeta gape mabapi le merafo le ditšhaba le maleme le dikgoši tše dintši.’”—Kutollo 10:8-11.
16. (a) Moporofeta Hesekiele o ile a ba le phihlelo e swanago le ya Johane bjang? (b) Ke ka baka la’ng lengwalwana le ile la ba bose go Johane, eupša ke ka baka la’ng le ile la galaka ge le šilwa?
16 Phihlelo ya Johane ke yeo e swanago le yela ya moporofeta Hesekiele nakong ya ge a be a le bothopša lefaseng la Babilona. Le yena o ile a laelwa gore a je lengwalo leo le bego le le bose molomong wa gagwe. Eupša ge le tletše mpeng ya gagwe, le ile la mo dira gore a tlamege go bolela dilo tše galakago go ntlo ya Isiraele ya lerabele. (Hesekiele 2:8–3:15) Lengwalo le le butšwego leo Jesu Kriste yo a tagafaditšwego a le neago Johane, le lona ke molaetša wa Modimo. Johane o swanetše go bolela ka “merafo le ditšhaba le maleme le dikgoši tše dintši.” Go ja lengwalo le ke mo go bose go yena, ka gobane le tšwa go Modimo. (Bapiša le Psalme 119:103; Jeremia 15:15, 16.) Eupša o hwetša e le le le galakago ge le šilwa teng ga gagwe, ka gobane ke leo le bolelago dilo tše e sego tše bose go batho ba marabele, go etša ge go be go le bjalo ka Hesekiele.—Psalme 145:20.
17. (a) Ke bomang bao ba botšago Johane gore a porofete “gape,” gomme se se bolela’ng? (b) Ponagalo ye e matla yeo e bonwego ke Johane e be e swanetše go phethagatšwa neng?
17 Batho bao ba botšago Johane gore a porofete gape, ka ntle le pelaelo ke Jehofa Modimo le Jesu Kriste. Johane gaešita le ge a be a leleketšwe sehlakahlakeng sa Patimo, fela o be a šetše a porofetile malebana le merafo, ditšhaba, maleme le dikgoši ka tsebišo yeo e bego e ngwadilwe pukung ya Kutollo. Lentšu “gape” le bolela gore o swanetše go ngwala le go phatlalatša tsebišo e šetšego yeo e ngwadilwego pukung ya Kutollo. Eupša gopola, Johane mo ge e le gabotse o tšea karolo ponong ya boporofeta. Ge e le gabotse, seo a se ngwalago ke boporofeta bjo bo tlago go phethega ka morago ga 1914 ge morongwa yo matla a ema ka go tlaralala lefaseng le lewatleng. Ka gona, ponagalo ye e matla e bolela’ng go sehlopha sa Johane lehono?
Lengwalwana Mehleng Yeno
18. Mathomong a letšatši la Morena, ke kgahlego efe yeo sehlopha sa Johane se ilego sa e bontšha pukung ya Kutollo?
18 Seo Johane a se bonago se swantšhetša kudu phihlelo ya sehlopha sa Johane mathomong a letšatši la Morena. Go kwešiša ga bona merero ya Jehofa go akaretša le seo se tlišitšwego ke medumo e šupago, go be go sa felela ka nako yeo. Lega go le bjalo, ba be ba kgahlišwa kudu ke Kutollo, gomme Charles Taze Russell o be a ile a hlalosa dikarolo tše dintši tša yona nakong ya ge a be a sa phela. Dipuku tše dintši tša gagwe di ile tša kgoboketšwa le go gatišwa pukung e bitšwago The Finished Mystery, ka morago ga lehu la gagwe ka 1916. Lega go le bjalo, puku ye ge nako e dutše e tšwela pele e ile ya ipontšha e le yeo e sa kgotsofatšego ge e le ka go hlaloswa ga Kutollo. Mašaledi a bana babo Kriste a ile a swanelwa ke go letela ka nako e telele bakeng sa go kwešiša ka mo go nepagetšego pego yeo e buduletšwego, go fihlela ge dipono di thoma go phethega.
19. (a) Sehlopha sa Johane se ile sa dirišwa bjang ke Jehofa Modimo gaešita le pele ga ge mantšu a medumo e šupago a be a ka gatišwa ka botlalo? (b) Sehlopha sa Johane se ile sa newa neng lengwalwana le le butšwego, gomme se se be se bolela’ng go sona?
19 Lega go le bjalo, ka go swana le Johane ba ile ba dirišwa ke Jehofa gaešita le pele ga ge mantšu a medumo e šupago a be a ka gatišwa ka botlalo. Ba be ba dirile boboledi ka mafolofolo ka nywaga e 40 pele ga 1914, gomme ba be ba katanetše go dula ba le mafolofolo nakong ya ntwa ya pele ya lefase. Ba be ba ipontšhitše go ba batho bao ge morena a fihla, a ba hweditšego ba nea ba ntlo ya gagwe dijo ka nako e swanetšego. (Mateo 24:45-47) Ka gona, ke bona bao ka 1919 ba ilego ba newa lengwalwana le le butšwego, ke gore, molaetša o sa pepetletšego gore ba o botše batho. Ka go swana le Hesekiele, ba be ba e-na le molaetša bakeng sa phuthego e sa botegego, e lego Bojakane bjo bo ipolelago gore bo hlankela Modimo, mola ge e le gabotse bo sa mo hlankele. Ka go swana le Johane, ba be ba swanetše go bolela kudu malebana le “merafo le ditšhaba le maleme le dikgoši tše dintši.”
20. Go ja ga Johane lengwalo go be go swantšhetša’ng?
20 Go ja ga Johane lengwalo go be go swantšhetša gore bana babo Jesu ba amogetše kabelo ye. E ile ya ba karolo ya bona go fihlela moo ba ilego ba tswalanywa le karolo ye ya Lentšu le le buduletšwego la Modimo, gomme ba fepša ke lona. Eupša seo ba ilego ba swanelwa ke go se bolela se be se rwele mantšu a dikahlolo tša Jehofa ao a bego a se bose bathong ba bantši. Ge e le gabotse, se be se akareditše dikotlo tše boletšwego e sa le pele go Kutollo kgaolo 8. Lega go le bjalo, go be go le bose go Bakriste ba ba botegago go tseba dikahlolo tšeo le go lemoga gore ba be ba dirišwa gape ke Jehofa tabeng ya go di bolela.—Psalme 19:9, 10.
21. (a) Molaetša wa lengwalwana o bile bjang o bose le go lešaba le legolo? (b) Ke ka baka la’ng ditaba tše dibotse e le tše mpe go baganetši?
21 Molaetša wa lengwalo le ge nako e dutše e tšwela pele, o ile wa ba bose le go “lešaba le legolo . . . le le tšwago ditšhabeng tšohle le melokong yohle le merafong yohle le malemeng ohle” leo le ilego la hwetšwa le lla ka baka la dilo tše mpe tšeo le bonego di dirwa Bojakaneng. (Kutollo 7:9; Hesekiele 9:4) Le lona le bolela ditaba tše tše dibotse ka mafolofolo, le diriša mantšu a bose le a botho go hlalosa tokišetšo ya Jehofa e makatšago bakeng sa Bakriste ba swanago le dinku. (Psalme 37:11, 29; Bakolose 4:6) Eupša tše ke ditaba tše mpe go baganetši. Ka baka la’ng? Di bolela gore tshepedišo ye ba e botilego, yeo mo gongwe e ka bago e bile e ba tlišeditše kgotsofalo ya nakwana, e swanetše go fela. Go bona, ditaba tše dibotse di bolela kahlolo ya lehu.—Bafilipi 1:27, 28; bapiša le Doiteronomio 28:15; 2 Bakorinthe 2:15, 16.
[Diswantšho go letlakala 160]
Sehlopha sa Johane le bagwera ba sona ba bolela molaetša o bose le o galakago bathong ka moka