Lengwalo la Jakobo
5 Bjale theetšang lena bahumi, llang le be le tsetle ka baka la dilo tše bohloko tšeo di tlago go le tlela.+ 2 Mahumo a lena a bodile, gomme diaparo tša lena di jelwe ke mohlwa.*+ 3 Gauta le silifera ya lena di rusitše, gomme ruse ya tšona e tla ba bohlatse bja gore le na le molato ebile e tla le ja. Dilo tšeo le di bolokilego di tla swana le mollo matšatšing a mafelelo.+ 4 Batho bao ba bego ba šoma go buna mašemo a lena ba a lla ka ge le ganne go ba patela, gomme Jehofa* wa madira o kwele sello sa bona sa ge ba kgopela thušo.+ 5 Le be le dutše manobonobong ebile le duletše go ipshina ka menate ya lefase. Dipelo tša lena di swana le diphoofolo tšeo di nontšheditšwego letšatši la ge di eya go hlabiwa.+ 6 Le ahlotše motho yo a lokilego la ba la mmolaya. Na ga a* le lwantšhe?
7 Bjale banabešo, le se ke la fela pelo go fihlela nakong ya go ba gona ga Morena.+ Molemi o dula a letile dienywa tše bohlokwa tša lefase a sa fele pelo go fihla go etla pula ya mathomo le pula ya morago.+ 8 Le lena le se ke la fela pelo,+ matlafatšang dipelo tša lena ka gobane nako ya gore Morena a be gona e batametše.+
9 Banabešo, le se ke la ngongoregelana e le gore le se ke la ahlolwa.+ Tsebang gore Moahlodi o eme pele ga mojako. 10 Banabešo, ekišang mohlala wa baporofeta bao ba ilego ba bolela ka leina la Jehofa.+ Le ge ba ile ba tlaišwa ka ditsela tše dintši+ ba ile ba kgotlelela ba sa fele pelo.+ 11 Batho bao ba kgotleletšego ke bona re rego ba thabile.+ Le kwele gore Jobo o ile a kgotlelela,+ ebile le kwele kamoo Jehofa a ilego a mo šegofatša ka gona.+ Le bona gabotse gore Jehofa ke Modimo yo a nago le kwelobohloko kudu le kgaugelo.+
12 Bjale banabešo, selo sa bohlokwa le go feta ke gore le tlogeleng go ena, e ka ba ka legodimo goba ka lefase goba ka selo le ge e le sefe se sengwe. Ge e ba le re le tlo dira selo, le se dire, gomme ge e ba le re le ka se dire selo, le se ke la se dira,*+ e le gore Modimo a se ke a le ahlola.
13 Na go na le motho yo a nago le mathata gare ga lena? A a tšwele pele a rapela.+ Na go na le motho yo a thabilego? A a opele dipsalme tša go tumiša Modimo.+ 14 Na go na le motho yo a babjago gare ga lena? A a bitše bagolo+ ba phuthego ba mo rapelele, ba mo tlotše ka makhura+ ka leina la Jehofa. 15 Thapelo yeo e rapelwago ka tumelo e tla dira gore motho yo a babjago a fole, gomme Jehofa o tla mo thuša gore a be le maatla gape. Le gona ge e ba a dirile dibe, Modimo o tla mo lebalela.
16 Ka gona, ipoboleng dibe tša lena+ le lokologile gomme le rapelelaneng gore le fole. Thapelo yeo e tšwago pelong ya moloki e na le maatla ebile e a šoma.+ 17 Eliya e be e no ba motho wa go swana le rena, eupša o ile a rapela ka go tšwa pelong gore pula e se ke ya na, gomme ya se ke ya na mo nageng ka mengwaga e meraro le dikgwedi tše tshelelago.+ 18 Ka morago o ile a rapela gape gomme pula ya na go tšwa legodimong, ke moka naga ya tšweletša dienywa.+
19 Banabešo, ge e ba motho yo mongwe mo go lena a arošwa tumelong ya nnete gomme yo mongwe a mo thuša gore a boe, 20 le tsebe gore motho yo a ka thušago modiradibe yoo gore a tlogele dilo tše mpe tšeo a bego a di dira,+ o tla phološa bophelo bja motho yoo, gomme Modimo o tla swarela modiradibe yoo dibe tša gagwe tše dintši.+