Kutollo Yeo e Utolletšwego Johane

1 Dilo tše ke tšeo Jesu Kriste a di utollotšego. Modimo o file Jesu+ dilo tše gore a bontšhe bahlanka ba gagwe+ dilo tšeo di tlago go direga e se kgale. Ka gona Jesu o ile a romela morongwa wa gagwe go Johane yoo e lego mohlanka wa Modimo* gore a mmotše dilo tšeo di swantšhetšago dilo tšeo di tlago go direga.+ 2 Johane o file bohlatse ka dilo tšeo Modimo a di boletšego le ka dilo ka moka tšeo Jesu Kriste a di boletšego,* e lego dilo ka moka tšeo a di bonego. 3 Go thaba yo a balago mantšu a boporofeta bjo ka lentšu le le kwagalago ebile go thaba bao ba kwago mantšu a boporofeta bjo le bao ba dirago dilo tšeo di ngwadilwego go bjona,+ ka gobane nako yeo e beilwego e batametše.

4 Nna Johane ke ngwalela diphuthego tše šupago+ tše di lego diprofenseng tša Asia ke re:

Eka le ka ba le botho bjo bogolo bja Modimo le khutšo tšeo di tšwago go “Yo a lego gona, yo a bego a le gona le yo a tlago,”+ le tšeo di tšwago go meoya e šupago+ yeo e lego pele ga setulo sa gagwe sa bogoši, 5 le tšeo di tšwago go Jesu Kriste yoo e lego “Hlatse e Botegago,”+ yena “motho wa mathomo wa go tsošwa bahung”+ ebile e le “Mmuši wa dikgoši ka moka tša lefase.”+

Yena yoo a re ratago,+ a re lokolotšego dibeng tša rena ka madi a gagwe+ 6 a re dira gore re be dikgoši+ le baperisita+ ba Modimo wa gagwe yoo e bilego e le Tatagwe. A a tumišwe gomme a be le maatla go ya go ile. Amene.

7 Bonang! O tla ka maru+ gomme batho ka moka go akaretša le bao ba mo hlabilego ba tla mmona. Le gona meloko ka moka ya lefase e tla itshetla dihuba ka baka la gagwe.+ Ee, ruri se se tla direga. Amene.

8 Jehofa* Modimo o re: “Ke nna Alfa le Omega,*+ yo a lego gona, yo a bego a le gona le yo a tlago, yena Ramatlaohle.”+

9 Nna Johane ngwanabo lena, yo a tlaišegago go swana le lena+ ebile a tlago go buša gotee le lena+ gotee le go kgotlelela+ ka gobane ke le molatedi wa Jesu,+ ke be ke išitšwe bothopša sehlakahlakeng sa Patimo ka baka la go bolela ka Modimo le go nea bohlatse ka Jesu. 10 Moya o mokgethwa o dirile gore ke tle letšatšing la Morena. Ke ile ka kwa motho yo mongwe a le ka morago ga ka gomme a goelela ka lentšu leo le kwagalago go swana le phalafala, 11 a re: “Seo o se bonago se ngwale lengwalong la go phuthwa gomme o se romele diphuthegong tše šupago, e lego ya Efeso,+ ya Simirina,+ ya Peregamo,+ ya Thiathira,+ ya Sarede,+ ya Filadelefia+ le ya Laoditsea.”+

12 Ke ile ka retologa gore ke bone yoo a bego a bolela le nna gomme ge ke retologa ke ile ka bona dihlomelamabone tše šupago tša gauta.+ 13 Gare ga dihlomelamabone tšeo go be go eme motho yo a swanago le morwa wa motho,+ a apere seaparo se setelele seo se bego se fihla dinaong tša gagwe ebile a apere lepanta la gauta sehubeng sa gagwe. 14 Go oketša moo, meriri ya hlogo ya gagwe e be e le e mešweu go swana le boya bjo bošweu ebile e swana le kapoko gomme mahlo a gagwe a be a swana le kgabo ya mollo,+ 15 dinao tša gagwe di be di swana le koporo yeo e sego ya tswakwa le selo+ ge e tološwa sebešong gomme lentšu la gagwe le be le swana le modumo wa meetse a mantši. 16 O be a swere dinaledi tše šupago+ ka seatleng sa gagwe sa letsogo le letona, molomong wa gagwe go etšwa sabola e telele ya magale a mabedi+ gomme sefahlego sa gagwe se be se swana le letšatši ge le phadima ka maatla a lona ka moka.+ 17 Ge ke mmona ke ile ka wela fase maotong a gagwe ke le bjalo ka mohu.

Ke moka yena a bea seatla sa gagwe sa letsogo le letona godimo ga ka a re: “O se ke wa tšhoga. Ke nna wa Mathomo+ le wa Mafelelo,+ 18 ke nna yo a phelago,+ nkile ka hwa,+ eupša gona bjale ke phela go ya go ile+ ebile ke na le dinotlelo tšeo di lokollago batho lehung le Lebitleng.*+ 19 Ka gona ngwala dilo tšeo o di bonego, dilo tšeo di lego gona le dilo tše di tlago go direga ka morago ga tše. 20 Dinaledi tše šupago tšeo o di bonego ka letsogong la ka le letona le dihlomelamabone tše šupago tša gauta ke sephiri se sekgwethwa. Dinaledi tše šupago di emela barongwa bao ba lego diphuthegong tše šupago gomme dihlomelamabone tše šupago tšona di emela diphuthego tše šupago.+