Kgaolo 6

Go Utolla Sephiri se Sekgethwa

1. Re swanetše go arabela bjang seswantšhong sa letago seo se begilwego go Kutollo 1:10-17?

PONO ya Jesu yo a phagamšitšwego ke e boifišago e le ka kgonthe! Ka ntle le pelaelo, ge e ba re be re le babogedi moo gotee le moapostola Johane, ruri le rena nkabe re ile ra tšhošwa kudu ke letago leo le legolo gomme ra wela fase go etša ge a ile a dira. (Kutollo 1:10-17) Pono ye e di fetago tšohle yeo e buduletšwego e bolokilwe gore e tle e re kgothaletše go gata mogato lehono. Le rena ka go swana le Johane, re swanetše go bontšha tebogo ka boikokobetšo bakeng sa dilo ka moka tše pono e di bolelago. Eka ka mehla re ka ba le tlhompho ya borapedi bakeng sa boemo bja Jesu e le Kgoši e beilwego sedulong sa bogoši, Moperisita yo Mogolo le Moahlodi.—Bafilipi 2:5-11.

“Wa Pele le wa Mafelelo”

2. (a) Jesu o itšweletša ka sereto sefe? (b) Ke’ng seo Jehofa a se bolelago ge a re: “Ke Nna wa mathômô, ké Nna wa mafêlô”? (c) Sereto sa Jesu sa “wa Pele le wa Mafelelo,” se dira gore go hlokomelwe eng?

² Lega go le bjalo, go boifa ga rena ga se gwa swanela go bulela poifo e sa swanelago sebaka. Jesu o ile a kgothatša Johane, go etša ge moapostola a tšwela pele ka go anega. “A bea seatla sa gagwe sa le letona godimo ga-ka a re: ‘O se ke wa boifa. Ke nna wa Pele le wa Mafelelo, le yo a phelago.’” (Kutollo 1:17b, 18a) Go Jesaya 44:6, Jehofa o hlalosa ka tshwanelo boemo bja gagwe ka noši e le yena Modimo yo matla-ohle a nnoši, gomme o re: “Ké Nna wa mathômô, ké Nna wa mafêlô; xa xo Modimo xe e se Nna.”a Ge Jesu a ipolela ka sereto sa “wa Pele le wa Mafelelo,” ga a ipolele gore o lekana le Jehofa, Mmopi yo Mogolo. O diriša sereto seo a se neilwego ka tshwanelo ke Modimo. Jehofa go Jesaya o be a bolela ka boemo bja Gagwe bja moswana-noši e le Modimo wa therešo. Ke Modimo wa neng le neng gomme ka ntle le yena ruri ga go na Modimo. (1 Timotheo 1:17) Go Kutollo, Jesu o bolela ka sereto sa gagwe seo a se neilwego, gomme o dira gore go elwe hloko tsogo ya gagwe ya moswana-noši.

3. (a) Ke ka tsela efe mo Jesu e bego e le “wa Pele le wa Mafelelo”? (b) Go ba ga Jesu le “dinotlelo tša lehu le Hadese” go bolela’ng?

³ Jesu ruri e be e le motho “wa Pele” yo a ilego a tsošetšwa bophelong bja moya bjo bo se nago lehu. (Bakolose 1:18) Go feta moo, ke “wa Mafelelo” go ba yo a tsošitšwego ke Jehofa ka noši. Ka gona, e ba “yo a phelago . . . [wa go] phela go iša mehleng ya neng le neng.” O thabela go se hwe. Tabeng ye, o swana le Tatagwe yo a sa hwego, yo a bitšwago “Modimo yo a phelago.” (Kutollo 7:2; Psalme 42:2) Jesu ka noši ke “tsogo le bophelo” bakeng sa batho ba bangwe ka moka. (Johane 11:25) Ka go dumelelana le se, o re go Johane: “Nkile ka hwa, eupša bona! ke phela go iša mehleng ya neng le neng, gomme ke na le dinotlelo tša lehu le Hadese.” (Kutollo 1:18b) Jehofa o mo neile matla a go tsoša bahu. Ke ka lebaka leo Jesu a ka bolelago gore o na le dinotlelo tša go notlolla dikgoro bakeng sa bao ba tlemilwego ke lehu le Hadese (lebitla).—Bapiša le Mateo 16:18.

4. Ke taelo efe yeo Jesu a e boeletšago, gomme bakeng sa go hola bomang?

⁴ Jesu mo o boeletša taelo ya gagwe ya gore pono e ngwalwe, gomme o re go Johane: “Ngwala dilo tše o di bonego, dilo tše di lego gona le dilo tše di tlago go direga ka morago ga tše.” (Kutollo 1:19) Ke dilo dife tše di thabišago tšeo Johane a sa dutšego a tla di tsebatša gore di tle di re rute?

Dinaledi le Dihlomapone

5. Jesu o hlalosa bjang “dinaledi tše šupago” le “dihlomapone tše šupago”?

⁵ Johane o bone Jesu a le gare ga dihlomapone tše šupago tša gauta, gomme a swere dinaledi tše šupago ka seatla sa gagwe se setona. (Kutollo 1:12, 13, 16) Jesu bjale o hlalosa se: “Ge e le ka sephiri se sekgethwa sa dinaledi tše šupago tše o di bonego seatleng sa-ka sa le letona le sa dihlomapone tše šupago tša gauta ke se: Dinaledi tše šupago di bolela barongwa ba diphuthego tše šupago, gomme dihlomapone tše šupago di bolela diphuthego tše šupago.”—Kutollo 1:20.

6. Ke’ng seo se emelwago ke dinaledi tše šupago, gomme ke ka baka la’ng melaetša e ile ya išwa go tšona ka mo go kgethegilego?

⁶ “Dinaledi” ke “barongwa ba diphuthego tše šupago.” Dinaledi go Kutollo ka dinako tše dingwe di swantšhetša barongwa ba kgonthe, eupša Jesu ruri o be a ka se ke a diriša mongwadi wa motho gore a ngwalele dibopiwa tše di sa bonagalego tša moya. Ka gona, “dinaledi” e swanetše go ba balebeledi goba bagolo bao e lego batho ba lego diphuthegong, bao ba lebelelwago e le batseta ba Jesu.b Melaetša e išwa go dinaledi, ka gobane ke tšona di ikarabelago ka go hlokomela mohlape wa Jehofa.—Ditiro 20:28.

7. (a) Ke’ng seo se bontšhago gore go bolela ga Jesu le morongwa o tee feela phuthegong e nngwe le e nngwe ga go bolele gore phuthego e nngwe le e nngwe e na le mogolo o tee feela? (b) Ge e le gabotse, ke bomang bao ba emelwago ke dinaledi tše šupago tše di lego seatleng se setona sa Jesu?

⁷ Ka ge Jesu a bolela le “morongwa” o tee feela phuthegong e nngwe le e nngwe, ruri na se se bolela gore phuthego e nngwe le e nngwe e na le mogolo o tee feela? Aowa. Gaešita le mehleng ya Paulo, phuthego ya Efeso e be e e-na le bagolo ba bantši, e sego mogolo o tee feela. (Kutollo 2:1; Ditiro 20:17) Ka gona mehleng ya Johane ge melaetša e be e romelwa dinaleding tše šupago gore e balelwe diphuthego (go akaretša ya Efeso), dinaledi di swanetše go ba di be di emela bohle bao ba bego ba hlankela dihlopheng tša bagolo phuthegong ya Jehofa e tloditšwego. Ka mokgwa o swanago, balebeledi lehono ba balela diphuthego tša gabo bona mangwalo ao ba a amogetšego a e-tšwa go Sehlopha se Bušago, seo se dirilwego ka balebeledi ba tloditšwego bao ba hlankelago tlase ga bohlogo bja Jesu. Dihlopha tša bagolo tša diphuthego di swanetše go kgonthiša gore keletšo ya Jesu e latelwa ke diphuthego tša gabo bona. Ge e le gabotse, keletšo ye ke e holago go bohle bao ba kopanelago diphuthegong, e sego feela go bagolo.—Bona Kutollo 2:11a.

8. Ke’ng seo se bontšhwago ke go ba ga bagolo ka seatleng se setona sa Jesu?

⁸ Ka ge Jesu e le Hlogo ya phuthego, gona bagolo ba bolelwa ka mo go swanetšego gore ba ka seatleng sa gagwe se setona, ke gore, ba laolwa le go hlahlwa ke yena. (Bakolose 1:18) Yena ke Modiši yo Mogolo, gomme bona ke badiši ba ka tlase ga gagwe.—1 Petro 5:2-4.

9. (a) Dihlomapone tše šupago di be di emela’ng, gomme ke ka baka la’ng dihlomapone e le seka se se swanetšego? (b) Pono mo gongwe e be e tla gopotša moapostola Johane eng?

⁹ Dihlomapone tše šupago ke diphuthego tše šupago tšeo Johane a di ngwalelago puku ya Kutollo: Ya Efeso, Simirina, Peregamo, Thiathira, Sarede, Filadelefia le ya Laoditsea. Ke ka baka la’ng diphuthego di swantšhwa le dihlomapone? Ke ka gobane Bakriste, go sa šetšwe ge e ba e le motho ka o tee goba e le sehlopha sa bona bjalo ka diphuthego, ruri ba dira gore ‘seetša sa bona se bonegele batho’ lefaseng le le apešitšwego ke lefsifsi. (Mateo 5:14-16) Go oketša seo, dihlomapone di be di le gare ga thoto ya tempele ya Solomone. Go bitša diphuthego dihlomapone ruri go be go tla gopotša Johane gore ka tsela ya go swantšhetša, phuthego e nngwe le e nngwe ya lefelong leo ya batlotšwa ke “tempele ya Modimo,” e lego lefelo leo moya wa Modimo o dulago go lona. (1 Bakorinthe 3:16) Go feta moo, go selo seo se swantšhetšwago ke thulaganyo ya tempele ya Bajuda, ditho tša phuthego ya batlotšwa di hlankela e le “boperisita bja bogoši” thulaganyong ya tempele e kgolo ya moya ya Jehofa yeo go yona Jesu e lego Moperisita yo Mogolo, le moo Jehofa ka noši a dulago gona Sekgethwa-kgethweng sa legodimo.—1 Petro 2:4, 5, 9; Baheberu 3:1; 6:20; 9:9-14, 24.

Bohlanogi bjo Bogolo

10. Go ile gwa direga’ng go tshepedišo ya Sejuda le go bathekgi ba yona ba ba sa itsholego ka 70 C.E.?

¹⁰ Ge Johane a be a ngwala Kutollo, Bokriste bo be bo šetše bo e-na le nywaga e 60. Bo be bo fetile nywageng e 40 ya kganetšo e sa kgaotšego e tšwago Bojudeng mathomong. Tshepedišo ya Sejuda e ile ya otlwa o šoro ka 70 C.E., nakong ya ge Bajuda ba ba sa itsholego ba be ba lahlegelwa ke go tsebja ga bona e le setšhaba gotee le go lahlegelwa ke seo go bona se bego se fetogile modingwana, e lego tempele ya kua Jerusalema.

11. Ke ka baka la’ng go be go le nakong bakeng sa Modiši yo Mogolo go lemoša diphuthego ka maemo ao a bego a tšwelela?

¹¹ Lega go le bjalo, moapostola Paulo o be a boletše e sa le pele gore go be go tla ba le bohlanogi gare ga Bakriste ba tloditšwego, gomme melaetša ya Jesu e bontšha gore botšofading bja Johane bohlanogi bo be bo šetše bo tšwelela. Johane e be e le wa mafelelo wa bao e bego e le mapheko boikemišetšong bjo ka moka bja Sathane bja go senya peu ya mosadi. (2 Bathesalonika 2:3-12; 2 Petro 2:1-3; 2 Johane 7-11) Ka gona e be e le nako e swanetšego bakeng sa Modiši yo Mogolo wa Jehofa gore a ngwalele bagolo diphuthegong, a ba lemoša ka maemo a tšwelelago le go kgothatša batho ba dipelo tše di lokilego gore ba emele go loka ka go tia.

12. (a) Bohlanogi bo ile bja gola bjang makgolong a nywaga a ka morago ga mehla ya Johane? (b) Bojakane bo thomile go ba gona bjang?

¹² Ga re tsebe kamoo diphuthego di ilego tša arabela ka gona melaetšeng ya Jesu ka 96 C.E. Eupša re tseba gore bohlanogi bo ile bja gola ka lebelo ka morago ga lehu la Johane. “Bakriste” ba ile ba lesa go diriša leina la Jehofa gomme sebakeng sa lona ba ngwala “Morena” goba “Modimo” mengwalong ya Beibele. Thuto ya maaka ya Boraro botee e be e šetše e šwahletše diphuthegong lekgolong la bone la nywaga. Ka yona nako yeo, kgopolo ya moya o sa hwego e ile ya amogelwa. Mafelelong, Mmušiši wa Roma e lego Constantine o ile a amogela bodumedi bja “Bokriste” semmušo, gomme se se ile sa lebiša go tšweletšweng ga Bojakane, moo Kereke le Mmušo di ilego tša kopana gore di tle di buše ka nywaga e sekete. Go be go le bonolo go fetoga “Mokriste” wa mohuta o mofsa. Ditšhaba ka moka di ile tša fetoša ditumelo tša tšona tša pele tša boheitene gore di dumelelane le tša bodumedi bjo. Ba bantši ba baetapele Bojakaneng ba ile ba ba babuši ba šoro ba tša dipolitiki bao ba gapeletšago dikgopolo tša bona tša bohlanogi ka go diriša tšhoša.

13. Go sa šetšwe temošo ya Jesu malebana le go ikaga dihlotswana, ke tsela efe yeo Bakriste ba hlanogago ba ilego ba e tšea?

¹³ Mantšu a Jesu go diphuthego tše šupago a ile a hlokomologwa e le ka kgonthe ke Bakriste ba bahlanogi. Jesu o be a lemošitše Baefeso gore ba dule leratong leo ba bego ba e-na le lona pele. (Kutollo 2:4) Lega go le bjalo, ditho tša Bojakane ka ge di be di se sa hlwa di kopantšwe ke lerato la go rata Jehofa, di ile tša lwa dintwa tše sehlogo gomme tša tlaišana o šoro. (1 Johane 4:20) Jesu o be a lemošitše phuthego ya Peregamo malebana le go ikaga dihlotswana. Fela dihlotswana di ile tša tšwelela gaešita le lekgolong la bobedi la nywaga, gomme Bojakane lehono bo na le dikete-kete tša dihlotswana le madumedi ao a sa kwanego.—Kutollo 2:15.

14. (a) Gaešita le ge Jesu a be a ile a lemoša malebana le go ba bao ba hwilego moyeng, ke tsela efe yeo bao ba ipolelago gore ke Bakriste ba ilego ba e tšea? (b) Ke ka ditsela dife mo bao ba ipolelago gore ke Bakriste ba ilego ba palelwa ke go kwa temošo ya Jesu malebana le borapedi bja medimo ya diswantšho le boitshwaro bjo bo gobogilego?

¹⁴ Jesu o be a lemošitše phuthego ya Sarede malebana le go ba yeo e hwilego moyeng. (Kutollo 3:1) Ka go swana le bao ba lego Sarede, bao ba ipolelago gore ke Bakriste ba ile ba lebala gatee-tee mediro ya Bokriste gomme kapejana ba fetišetša modiro o bohlokwa kudu wa boboledi go sehlopha se senyenyane sa baruti bao ba lefelelwago. Jesu o be a lemošitše phuthego ya Thiathira malebana le borapedi bja medimo ya diswantšho le bootswa. (Kutollo 2:20) Lega go le bjalo, Bojakane bo ile bja dumelelela phatlalatša go dirišwa ga diswantšho, gotee le go godiša botšhaba le go rata dilo tše di bonagalago, e lego mekgwa e khutilego kudu ya borapedi bja medimo ya diswantšho. Le ge boitshwaro bjo bo gobogilego ka dinako tše dingwe bo nyatšwa, fela ke bjo bo kgotleletšwego ka mehla ka gohle.

15. Mantšu a Jesu go diphuthego tše šupago a utolla’ng mabapi le madumedi a Bojakane, gomme ke’ng seo baruti ba Bojakane ba ipontšhitšego ba le sona?

¹⁵ Ka gona, mantšu a Jesu go diphuthego tše šupago a utolla go palelwa ga kgonthe ga dikereke ka moka tša Bojakane ke go ka ba batho ba kgethegilego ba Jehofa. Ruri, baruti ba Bojakane e bile ditho tše di tumilego kudu tša peu ya Sathane. Moapostola Paulo ge a bolela ka ba e le “motho wa go hloka molao,” o boletše e sa le pele gore ‘go ba gona ga bona ke ka baka la go šoma ga Sathane ka modiro o mongwe le o mongwe o matla le dipontšho le dika tša bofora le ka bofora bjo bongwe le bjo bongwe bjo bo sa lokago.’—2 Bathesalonika 2:9, 10.

16. (a) Baetapele ba Bojakane ba ile ba bontšha lehloyo le le kgethegilego go bomang? (b) Ke’ng seo se ilego sa direga Bojakaneng nakong ya Mehla ya Magareng? (c) Na bohlanogi bja Protestanta goba Mpshafatšo bo ile bja fetola ditsela tša bohlanogi tša Bojakane?

¹⁶ Gaešita le ge ba ipolela gore ke badiši ba mohlape wa Modimo, baetapele ba Bojakane ba bodumedi le ba e sego ba bodumedi ba ile ba bontšha lehloyo le le kgethegilego go mang le mang yo a lekago go kgothaletša go balwa ga Beibele, goba mang le mang yo a pepentšhago mediro ya bona yeo e sego ya Mangwalo. John Hus le mofetoledi wa Beibele William Tyndale, ba ile ba tlaišwa gomme ba bolaelwa tumelo. Nakong ya Mehla ya Magareng ya lefsifsi, pušo ya bohlanogi e ile ya fihla tlhoreng ya yona ka go tšweletšwa ga Lekgotla la Dikotlo tša Bahlanogi la Katholika le sehlogo. Mang le mang yo a bego a ganetša dithuto goba taolo ya kereke o be a hlokofatšwa ka go se gaugelwe, gomme dikete-kete tše di sa balegego tša bao ba bitšwago bahlanogi di ile tša bolawa goba tša tšhungwa ka mollo dikoteng. Ka gona, Sathane o ile a ikemišetša go tiiša gore peu le ge e le efe ya therešo ya mokgatlo wo o swanago le mosadi wa Modimo e be e tla pšhatlwa gatee-tee. Nakong ya ge bohlanogi bja Protestanta goba Mpshafatšo bo tšwelela (go tloga ka 1517 go ya pele), tše dintši tša dikereke tša Protestanta di ile tša bontšha moya o swanago wa go se kgotlelele. Le tšona di ile tša ba le molato wa madi ka go bolaya bao ba bego ba ikemišeditše go botegela Modimo le Kriste. Ruri, “madi a bakgethwa” a ile a tšhollwa ka bolokologi!—Kutollo 16:6; bapiša le Mateo 23:33-36.

Peu e Tšwela Pele e le Gona

17. (a) Seswantšho sa Jesu sa korong le mefoka se ile sa bolela’ng e sa le pele? (b) Ke’ng seo se diregilego ka 1918 gomme sa feleletša ka go lahlwa ga eng le go bewa ga eng?

¹⁷ Jesu seswantšhong sa gagwe sa korong le mefoka o boletše e sa le pele ka nako ya lefsifsi yeo e bego e tla ba gona ge Bojakane bo dutše bo buša gohle. Lega go le bjalo, nywaga-kgolong ka moka ya bohlanogi, go be go tla ba le Bakriste bao ba swanago le korong, bona batlotšwa ba kgonthe. (Mateo 13:24-29, 36-43) Ka gona, nakong ya ge letšatši la Morena le be le hlaba ka October 1914, go be go sa dutše go e-na le Bakriste ba therešo lefaseng. (Kutollo 1:10) Go bonala Jehofa a ile a tla tempeleng ya gagwe ya moya bakeng sa go tla go ahlola mo e ka bago ka nywaga e meraro le seripa ka morago, ka 1918, a e-na le Jesu e le “motseta wa kxwêranô.” (Maleaki 3:1; Mateo 13:47-50) E be e le nako ya Morena ya go lahlela ruri Bakriste ba maaka le go bea ‘mohlanka yo a botegago le wa temogo, gore a hlokomele dilo tša gagwe ka moka.’—Mateo 7:22, 23; 24:45-47.

18. Ke “nako” efe e ilego ya tla ka 1914, gomme e be e le nako ya gore mohlanka a dire’ng?

¹⁸ Le gona e be e le nako bakeng sa mohlanka yo gore a hlokomele ka mo go kgethegilego dilo tšeo di ngwadilwego melaetšeng ya Jesu e išwago diphuthegong tše šupago, go etša ge re bona go seo se ngwadilwego go yona. Ka mohlala, Jesu o bolela ka go tla ga gagwe go tla go ahlola diphuthego ka kahlolo yeo e thomilego ka 1918. (Kutollo 2:5, 16, 22, 23; 3:3) O bolela ka go šireletša phuthego ya Filadelefia “nakong ya moleko wo o tlelago lefase ka moka le go agilwego go lona.” (Kutollo 3:10, 11) ‘Nako ye ya moleko’ e fihlile gotee le go hlaba ga letšatši la Morena ka 1914, leo ka morago ga lona Bakriste ba ilego ba lekwa ge e le ka go botegela ga bona Mmušo o hlomilwego wa Modimo.—Bapiša le Mateo 24:3, 9-13.

19. (a) Diphuthego tše šupago di swantšhetša’ng lehono? (b) Ke bomang bao ba tlilego ka bontši go Bakriste ba tloditšwego, gomme ke ka baka la’ng keletšo ya Jesu le maemo ao a a hlalosago di šoma le go ba? (c) Re swanetše go lebelela bjang melaetša ya Jesu go diphuthego tše šupago tša lekgolo la pele la nywaga?

¹⁹ Ka gona, mantšu a Jesu go diphuthego a bile le go dirišwa ga wona mo gogolo ga e sa le go tloga ka 1914. Tabeng ye, diphuthego tše šupago di swantšhetša diphuthego ka moka tša Bakriste ba tloditšwego nakong ya letšatši la Morena. Go oketša moo, nakong ya nywaga e fetilego e 70 le go feta moo, Bakriste ba tloditšwego bao ba bego ba swantšhetšwa ke Johane ba okeditšwe ke palo e kgolo ya badumedi bao kholofelo ya bona e lego go phela ka mo go sa felego Paradeiseng mo lefaseng. Keletšo ya Jesu Kriste yo a tagafaditšwego le maemo ao a a hweditšego diphuthegong tše šupago ge a be a di hlahloba, di dirišwa ka mo go swanago go ba, ka ge go e-na le tsela e tee feela ya go lekanya go loka le go botega ga bahlanka ba Jehofa ka moka. (Ekisodo 12:49; Bakolose 3:11) Ka gona, melaetša ya Jesu go diphuthego tše šupago tša lekgolo la pele la nywaga tša Asia Minor, ga se feela ditaba tše di kgahlišago tša histori. E bolela bophelo goba lehu go yo mongwe le yo mongwe wa rena. Ka gona, anke re theetšeng mantšu a Jesu ka kelohloko.

[Mengwalo ya ka tlase]

[Lepokisi go letlakala 32]

Nako ya go Leka le go Ahlola

Jesu o ile a kolobetšwa le go tlotšwa e le Kgoši e Kgethilwego Nokeng ya Jorodane mo e ka bago ka October 29 C.E. Nywaga e meraro le seripa ka morago ka 33 C.E., o ile a tla tempeleng ya Jerusalema gomme a leleka bao ba bego ba e dira lewa la bahlakodi. Go bonala go diregile se se swanago le se lebakeng la nako la nywaga e meraro le seripa, go tloga go beweng ga Jesu sedulong sa bogoši magodimong ka October 1914 go fihla ge a e-tla go hlahloba bao ba ipolelago gore ke Bakriste ge kahlolo e thoma ka ngwako wa Modimo. (Mateo 21:12, 13; 1 Petro 4:17) Modiro wa Mmušo wa batho ba Jehofa o ile wa ganetšwa kudu mathomong a 1918. E be e le nako ya go lekwa lefaseng ka bophara gomme bao ba bego ba boifa ba ile ba hlokolwa. Ka May 1918, baruti ba Bojakane ba ile ba hlohleletša go golegwa ga baemedi ba Mokgatlo wa Watch Tower, eupša dikgweding tše senyane ka morago ba ba ile ba lokollwa. Ka morago, ditatofatšo tša maaka tšeo ba bego ba pharilwe ka tšona di ile tša tlošwa. Go tloga ka 1919, mokgatlo wa batho ba Modimo wo o bego o lekilwe le go hlwekišwa, o ile wa tšwela pele ka mafolofolo go bolela Mmušo wa Jehofa ka Kriste Jesu e le kholofelo feela ya batho.—Maleaki 3:1-3.

Ge Jesu a be a thoma go hlahloba ga gagwe ka 1918, baruti ba Bojakane ka ntle le pelaelo ba ile ba amogela kahlolo e šoro. Ga se feela gore ba ile ba tlaiša batho ba Modimo, eupša ba ile ba ithweša le ka molato o mogolo wa madi ka go thuša ditšhaba tšeo di bego di e-lwa nakong ya ntwa ya pele ya lefase. (Kutollo 18:21, 24) Baruti bao ka nako yeo ba ile ba bea kholofelo ya bona Kgweranong ya Ditšhaba yeo e bego e dirilwe ke batho. Bojakane gotee le mmušo ka moka wa lefase wa bodumedi bja maaka, bo ile bja se sa hlwa bo amogelwa ke Modimo ka mo go feletšego ka 1919.

[Mmapa go letlakala 28, 29]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

EFESO

SIMIRINA

PEREGAMO

THIATHIRA

SAREDE

FILADELEFIA

LAODITSEA

[Diswantšho go letlakala 31]

Bodumedi bja Bojakane bo ithwešitše molato o mogolo wa tšhollo ya madi ka go tlaiša le go bolaya bao ba ilego ba fetolela, ba bala goba gaešita le go ba le Beibele