Kgaolo 2

Jesu Kriste, Hlatse e Botegago

KA NYWAGA e ka bago 4 000, lelokelelo le letelele la dihlatse tša pele ga mehla ya Bokriste le ile la nea bohlatse bja lona. Eupja dikgang tšeo di akaretšago bogoši bja Modimo le potego ya bahlanka ba gagwe di be di se tša hlwa di arabja. Bjale go ile gwa fihla nako ya gore “peu” e holofeditšwego ya bogoši, e lego Mesia, e tšwelele lefaseng.—Gen. 3:15.

Go barwa ba gagwe ka moka ba dimilione ba moya, Jehofa o ile a kgetha mang bakeng sa kabelo ye? Ka moka ga bona ba be ba bone se se diregilego Edene gomme ka ntle le pelaelo ba lemoga dikgang tšeo di tsošitšwego tša legohle. Eupja ke mang yo a bego a fišegela kudu go tloša tatofatšo leineng la Jehofa le go phagamiša bogoši bja gagwe? Ke mang yo a bego a tla nea karabo ya makgaola-kgang tlhohlong ya Sathane ya gore ga go na yo a bego a tla kgomarela go botegela ga gagwe bogoši bja Modimo a le ka tlase ga teko? Yo Jehofa a mo kgethilego e be e le Leitšibulo la gagwe, Morwa wa gagwe yo a tswetšwego a nnoši, Jesu.—Joh. 3:16; Ba-Kol. 1:15.

Jesu o ile a amogela kabelo ye ka mafolofolo le ka boikokobetšo, gaešita lege e be e bolela go tlogela legae la gagwe la legodimong leo a bego a dula go lona le Tatagwe ka nako e telele go feta lege e le mang o mongwe. (Joh. 8:23, 58; Ba-Fil. 2:5-8) O be a tutuetšwa ke eng? Lerato le le tseneletšego la go rata Jehofa le kganyogo ya phišego ya go bona leina la Gagwe le tlošitšwe kgobogo ka moka. (Joh. 14:31) Gape Jesu o ile a gata mogato ka lerato la go rata batho. (Die. 8:30, 31; bapiša le Johane 15:13.) Go belegwa ga gagwe lefaseng mathomong a seruthwane sa ngwaga wa 2 B.C.E. go ile gwa dirwa gore go kgonege ka moya o mokgethwa—woo ka wona Jehofa a ilego a fetišetša bophelo bja Jesu go tloga legodimong go ya popelong ya kgarebe ya mo-Juda Maria. (Mat. 1:18; Luka 1:26-38) Ka gona Jesu o ile a tswalelwa setšhabeng sa Isiraele.—Ba-Gal. 4:4.

Go feta mo-Isiraele lege e le ofe o mongwe, Jesu o be a tseba gore o be a swanetše go ba hlatse ya Jehofa. Ka baka la’ng? E be e le setho sa setšhaba seo Jehofa a boletšego go sona ka moporofeta Jesaya gore: “Lena Le dihlatse tša-ka.” (Jes. 43:10) Go oketša moo, ge Jesu a be a kolobetšwa Nokeng ya Jorodane ka 29 C.E., Jehofa o ile a mo tlotša ka moya o mokgethwa. (Mat 3:16) Ka go rialo Jesu o ile a newa matla a go ‘goelela ngwaga wa kgahlego wa Morena’ bjalo ka ge a ile a bontšha ka morago.—Jes. 61:1, 2; Luka 4:16-19.

Jesu o ile a phetha kabelo ya gagwe ka potego gomme a ba hlatse ya Jehofa e kgolo kudu yeo e kilego ya ba gona lefaseng. Ka gona moapostola Johane, e lego yo a ilego a ba kgaufsi le Jesu nakong ya lehu la gagwe o be a e-na le tshwanelo e feletšego ya go bitša Jesu “Hlatse ye e bôtêxaxo.” (Kut. 1:5) Le gona go Kutollo 3:14 (PK), Jesu yo a tagafaditšwego o ipitša “Amene” le “hlatse e botegago, e rerešago.” “Hlatse ye e bôtêxaxo” e neile bohlatse bofe?

‘Go Hlatsela Therešo’

Ge a be a sekišwa pele ga mmušiši wa Roma Pilato, Jesu o itše: “Ké se ke se tswàletšwexo; ke tletše sôna lefaseng xore ke bê hlatse ya therešô. Xomme mang le mang e lexo wa therešô ó kwa Lentšu la-ka.” (Joh. 18:37) Jesu o hlatsetše therešo efe? E be e le therešo ya Modimo, kutollo ya merero ya Jehofa ya ka mo go sa felego.—Joh. 18:33-36.

Eupja, Jesu o hlatsetše therešo ye bjang? Lediri la Segerika bakeng sa “go hlatsela” gape le bolela “go goeletša, go tiiša, go hlatsela gabotse, go bolela gabotse (ka), go amogela.” Diphaphiraseng tša kgale tša Segerika sebopego se sengwe sa lediri (mar·ty·roʹ) se be se tšwelela ka tlwaelo ka morago ga mosaeno, bjalo ka dikwanong tša kgwebo. Ka gona, Jesu ka bodiredi bja gagwe o ile a swanelwa ke go tiiša therešo ya Modimo. Ka kgonthe se se be se nyaka gore a goeletše, goba a bolele therešo yeo go ba bangwe. Lega go le bjalo, go be go nyakega se se fetišago go bolela.

Jesu o itše, “Ke Nna . . . therešô.” (Joh. 14:6) Ee, o phetše ka tsela yeo a ilego a phetha therešo ya Modimo. Morero wa Modimo mabapi le Mmušo le Mmuši wa wona wa Mesia o be o hlalositšwe boporofeteng. Jesu ka tsela ya gagwe ka moka ya go phela ya lefaseng yeo e feleletšago ka lehu la gagwe la sehlabelo o phethagaditše dilo ka moka tšeo di porofetilwego ka yena. Ka gona o ile a tiiša le go kgonthišetša go rereša ga lentšu la Jehofa la boporofeta. Ka lebaka le moapostola Paulo o be a ka re: “Xobane dikholofedišo tšohle tša Modimo di ba ‘E’ ka Yêna, di ba ‘Amene’ [ke gore, “a go be bjalo,” goba “ke therešo”] ka Yêna, xore Modimo a rêtwê ka rena.” (2 Ba-Kor. 1:20) Ee, Jesu ke yena yo dikholofetšo tša Modimo di phethagatšwago go yena.—Kut. 3:14.

Go Hlatsela Leina la Modimo

Jesu o rutile balatedi ba gagwe go rapela ka gore: “Tata-wešo wa maxodimong! Leina la xaxo a le kxêthwê [goba, “le swarwe ka kgethego; le swarwe e le le lekgethwa”].” (Mat. 6:9, mongwalo wa ka tlase wa NW) Bošegong bja mafelelo bja bophelo bja gagwe bja lefaseng, Jesu o boletše gape thapelong go Tatagwe wa legodimong gore: “Ke tsebaditše ’ina l’axo mo bathong ba O nneilexo bôná bà e-tšwa ’faseng. E be e le ba xaxo, wa nnea bôná; ’me ba lototše ’ntšu la xaxo. Ke ba tsebišitše ’ina l’axo; ’me ke sa tlo ba tsebiša lôna, xore leratô wa xo nthata ka lôna, le bê xo bônà, le Nna ke bê mo xo bôná.” (Joh. 17:6, 26) Ge e le gabotse, wo e be e le morero wa Jesu o mogolo wa go tla lefaseng. Ke’ng seo se bego se akaretšwa go tsebatšeng ga gagwe leina la Modimo?

Balatedi ba Jesu ba be ba šetše ba tseba le go diriša leina la Modimo. Ba le bone le go le bala mangwalong a Sehebere a Beibele ao a bego a le ka disinagogeng tša bona. Gape ba le bone le go le bala ka go Septuagint—phetolelo ya Segerika ya Mangwalo a Sehebere yeo ba bego ba e diriša go ruteng le go ngwaleng. Ge e ba ba be ba tseba leina la Modimo, gona Jesu o le tsebaditše bjang go bona goba go ba tsebiša lona?

Mehleng ya Beibele maina e be e se tlhaloso feela. A Greek-English Lexicon of the New Testament yeo e ngwadilwego ke J. H. Thayer e re: “Leina la Modimo ka T[estamenteng] e M[psha] le dirišwa bakeng sa dika ka moka tšeo go barapedi ba gagwe di akareditšwego leineng leo, gomme ke ka lona Modimo a itsebišago go batho.” Jesu o tsebaditše leina la Modimo e sego ka go fo le diriša eupja ka go utolla Mong wa leina leo—merero ya gagwe, mediro ya gagwe le dika tša gagwe. Ka ge e le yo ‘a bego a le sehubeng sa Tate,’ Jesu o be a ka hlalosa Tatagwe ka tsela yeo go sego motho o mongwe yo a bego a ka mo hlalosa ka yona. (Joh. 1:18) Go feta moo, Jesu o bonagaditše Tatagwe ka mo go phethagetšego kudu mo e lego gore barutiwa ba Jesu ba be ba ka ‘bona’ Tate go Morwa. (Joh. 14:9) Jesu o hlatsetše leina la Modimo ka seo a se boletšego le seo a se dirilego.

O Neile Bohlatse ka Mmušo wa Modimo

Ka ge e le “Hlatse ye e bôtêxaxo,” Jesu e be e le mogoeledi o mogolo kudu wa Mmušo wa Modimo. O boletše ka go gatelela gore: “Ke swanetše go goeletša ditaba tše di lokilego tša mmušo wa Modimo, ka gobane se ke se ke rometšwego sona.” (Luka 4:43, NW) O goeleditše Mmušo woo wa legodimo Palestina ka moka, a sepela dikhilomithara tše makgolo ka maoto. O boletše gohle mo go bego go e-na le batho bao ba bego ba tla theetša: mabopong a matsha, dithitong tša dithaba, metseng le metsaneng, disinagogeng le tempeleng, mebarakeng le magaeng a batho. Eupja Jesu o be a tseba gore lefelo leo a ka le akaretšago le palo ya batho bao a bego a ka nea bohlatse go bona di be di lekanyeditšwe. (Bapiša le Johane 14:12.) Ka gona ka maikemišetšo a go akaretša tšhemo ya lefase Jesu o ile a tlwaetša le go roma barutiwa ba gagwe gore e be bagoeledi ba Mmušo.—Mat. 10:5-7; 13:38; Luka 10:1, 8, 9.

Jesu e be e le hlatse e šomago ka thata le e mafolofolo, gomme ga se a ka a itumelela gore a fapošwe. Gaešita lege a ile a bontšha go kgomega ga motho ka noši ka dinyakwa tša batho, ga se a ka a swarega ka kudu ka go dira dilo tšeo di bego di tla tliša kimologo ya nakwana mo a ilego a hlokomologa kabelo ya gagwe yeo a e neilwego ke Modimo, ya go lebiša batho tharollong ya ka mo go sa felego ya mathata a bona—Mmušo wa Modimo. Lebakeng le lengwe ka morago ga ge a fepile banna ba 5 000 ka mohlolo (mohlomongwe batho bao ba fetago 10 000 ge go balwa le basadi le bana), sehlopha sa ba-Juda se ile sa rata go mo goga gore se mo dire kgoši ya lefaseng. Jesu o ile a dira’ng? O ile a “ba ngwêxêla a boêla thabeng à nnoši.” (Joh. 6:1-15; bapiša le Luka 19:11, 12; Ditiro 1:6-9.) Gaešita lege a dirile mehlolo e mentši ya go fodiša, Jesu o be a sa tsebje ka kudu-kudu e le Modiri wa Mehlolo, eupja go e na le moo o be a tsebja ke bobedi badumedi le ba ba sa dumelego e le “Moruti.”—Mat. 8:19; 9:11; 12:38; 19:16; 22:16, 24, 36; Joh. 3:2.

Ka mo go kwalago, go hlatsela Mmušo wa Modimo e be e le modiro o bohlokwa kudu wo Jesu a bego a ka o dira. Jehofa o rata gore batho bohle ba tsebe seo Mmušo wa Gagwe o lego sona le kamoo o tlago go phethagatša merero ya Gagwe ka gona. O bohlokwa kudu go Yena, ka gobane ke wona tsela yeo A tlago go kgethagatša leina la Gagwe ka yona, a le tloša kgobošo ka moka. Jesu o be a tseba seo, ka gona o dirile Mmušo woo sehlogo sa boboledi bja gagwe. (Mat. 4:17) Ka go ba le karolo ka pelo ka moka go o goeletšeng, Jesu o ile a phagamiša bogoši bjo bo swanetšego bja Jehofa.

Hlatse e Botegago Gaešita le go Fihla Lehung

Ga go motho yo a ka ratago Jehofa le bogoši bja Gagwe go feta kamoo Jesu a dirago ka gona. Ka ge e le “tháka-letswalô ya dibopya tšohle,” Jesu ‘o be a tseba ka mo go tletšego’ Tate ka ge a be a gwerane kgaufsi kudu le yena e le sebopiwa sa moya magodimong. (Ba-Kol. 1:15; Mat. 11:27) O ile a ikokobeletša bogoši bja Modimo ka go rata nywageng e sa balegego pele ga go bopja ga monna wa pele le mosadi. (Bapiša le Johane 8:29, 58.) O swanetše go ba a ile a kwa bohloko gakaakang ge Adama le Efa ba be ba furalela bogoši bja Modimo! Lega go le bjalo, o ile a leta ka go se fele pelo legodimong ka nywaga e ka bago 4 000, gomme ka morago mafelelong gwa fihla nako ya gore a dire e le hlatse e kgolo kudu ya Jehofa yeo e kilego ya ba gona lefaseng!

Jesu o be a tseba ka mo go tletšego gore dikgang tša legohleng di mo akaretša ka go lebanya. Go ka ba go ile gwa bonala eka Jehofa o ile a mo direla legora. (Bapiša le Jobo 1:9-11.) Ke therešo gore o be a bontšhitše potego ya gagwe le boineelo magodimong, eupja na o be a tla botega e le motho lefaseng ka tlase ga teko ya mohuta lege e le ofe? Na o be a tla ganetša Sathane boemong bjo go lego molaleng gore lenaba la gagwe ke lona le bušago?

Lenaba leo le swanago le noga ga se la ka la senya nako. Kapejana ka morago ga go kolobetšwa le go tlotšwa ga Jesu, Sathane o ile a mo leka gore a bontšhe boithati, a iphagamiše le go gana bogoši bja Tatagwe mafelelong. Eupja polelo ya Jesu ya go ganetša Sathane ya gore, “O khunamêlê Morêna Modimo wa xaxo, O dirêlê Yêna à nnoši” e ile ya bontšha boemo bja gagwe go dikgang tšeo. O dirile ka mo go fapanego le Adama gakaakang!—Mat. 4:1-10.

Tsela yeo e bego e kgethetšwe Jesu e be e bolela tlaišego le lehu, gomme Jesu o be a tseba se gabotse. (Luka 12:50; Ba-Heb. 5:7-9) Lega go le bjalo, “ge a ikhwetša a le ka sebopego sa go swana le sa motho, o ile a ikokobetša gomme a ba yo a kwago go ba go fihla lehung, ee, lehung la koteng ya tlhokofatšo.” (Ba-Fil. 2:7, 8, NW) Moo Jesu o ile a hlatsela Sathane e le moaketši yo šoro, a araba ka mo go feletšego potšišo e rego, Na motho lege e le ofe a ka botegela bogoši bja Modimo ge Sathane a dumeletšwe gore a mo leke? Eupja lehu la Jesu le phethile se se fetišago.

Ka lehu la gagwe koteng ya tlhokofatšo, Jesu gape o neile “bophelô bya xaxwe xore e bê topollô ya ba bantši.” (Mat. 20:28; Mar. 10:45) Bophelo bja gagwe bjo bo phethagetšego bja motho bo be bo e-na le mohola wa sehlabelo. Go dira ga Jesu sehlabelo ka bophelo bja gagwe ga se feela gore go dira gore re kgone go swarelwa dibe, eupja gape go re bulela sebaka sa bophelo bjo bo sa felego lefaseng la paradeise ka go dumelelana le morero wa Modimo wa mothomong.—Luka 23:43; Dit. 13:38, 39; Ba-Heb. 9:13, 14; Kut. 21:3, 4.

Jehofa o hlatsetše lerato la gagwe go Jesu le go mo amogela e le “Hlatse ye e bôtêxaxo” ka go mo tsoša bahung ka letšatši la boraro. Se se tiišitše gore bohlatse bjo Jesu a bego a bo neile mabapi le Mmušo e be e le therešo. (Dit. 2:31-36; 4:10; 10:36-43; 17:31) Ka morago ga go dula tikologong ya lefase ka matšatši a 40, e lego nako yeo ka yona a ilego a tšwelela go baapostola ba gagwe ka makga a mantši, Jesu o ile a rotogela legodimong.—Dit. 1:1-3, 9.

Jesu o bontšhitše gore go hlongwa ga Mmušo wa Modimo wa Mesia go be go tla direga nakong e tlago yeo e sa lego kgole. (Luka 19:11-27) Tiragalo yeo e be e tla swaya le mathomo a “go ba gona ga [Jesu] le bofelo bja tshepedišo ya dilo.” (Mat. 24:3, NW) Eupja balatedi ba gagwe lefaseng ba be ba tla lemoga bjang nako yeo dilo tše di bego di tla direga ka yona? Jesu o ile a ba nea ‘pontšho’—pontšho e bopanego yeo e bopilwego ke bohlatse bjo bontši, go akaretša dintwa, ditšhišinyego tša lefase, tlhaelelo ya dijo, malwetši le go ata ga bokgopo. Gape karolo e bohlokwa kudu ya pontšho yeo e be e tla ba gore ditaba tše di lokilego tša Mmušo di tla bolelwa lefaseng ka moka leo go agilwego go lona e le bohlatse go ditšhaba tšohle. Dibopego ka moka tša pontšho yeo e lego molaleng di ka bonwa mehleng ya rena, go bontšha gore re phela mehleng ya go ba gona ga Jesu e le Kgoši ya legodimong le mehleng ya bofelo bja tshepedišo ya dilo.a—Mat. 24:3-14, bapiša le NW.

Ka gona, go thwe’ng ka balatedi ba Jesu? Mehleng ye ya go ba gona ga Jesu, batho bao ba kgomaretšego dikereke tše dintši tše di fapa-fapanego ba ipolela gore ba latela Kriste. (Mat. 7:22) Eupja Beibele e bolela gore “tumêlô ké e tee.” (Ba-Ef. 4:5) Ka gona o ka hlaola bjang phuthego ya therešo ya Bokriste, e lego yeo e amogelwago le go hlahlwa ke Modimo? O ka dira bjalo ka go hlahloba seo Mangwalo a se bolelago ka phuthego ya Bokriste ya lekgolong la pele la nywaga gomme o bone bao ba latelago mohlala o swanago lehono.

[Mongwalo wa tlase]

[Seswantšho go letlakala 23]