Bakorinthe ba Pele

15 Banabešo, ke le gopotša ditaba tše dibotse tšeo ke ilego ka le botša tšona,+ tšeo le ilego la di amogela le go di tshepa. 2 Le gona le tlo phološwa ge e ba le dula le na le tumelo e tiilego ditabeng tše dibotse tšeo ke le boditšego tšona, ge le sa dire bjalo tumelo ya lena e tla be e le ya lefeela.

3 Tše dingwe tša dilo tše bohlokwa tšeo ke ilego ka le botša tšona, ke tšeo le nna ke ilego ka di rutwa. Tše dingwe tša tšona ke gore go ya ka Mangwalo Kriste o hwetše dibe tša rena.+ 4 Le gona Mangwalo+ a re o ile a bolokwa+ gomme a tsošwa bahung+ ka letšatši+ la boraro, 5 le gore o ile a iponagatša go Kefase+ ke moka a iponagatša go baapostola ba 12.+ 6 Ka morago ga moo o ile a iponagatša go barutiwa ba fetago ba 500 ka nako e tee,+ ba bantši ba bona ba sa phela eupša ba bangwe ba hlokofetše. 7 Ka morago ga moo o ile a iponagatša go Jakobo,+ ke moka a tla a iponagatša go baapostola ka moka.+ 8 Mafelelong o ile a iponagatša go nna+ bjalo ka ge eka ke nna ngwana yo a belegwego pele ga nako.

9 Nna ga ke bohlokwa go swana le baapostola ba bangwe ka moka, ebile ga ke swanelwe ke go bitšwa moapostola ka gobane ke ile ka tlaiša phuthego ya Modimo.+ 10 Eupša ke moapostola ka baka la botho bjo bogolo bja Modimo. Modimo o be a sa senye nako ka gore a mpontšhe botho bja gagwe bjo bogolo, ka gobane ke šomile ka thata go feta batho ba bangwe ka moka. Fela ga se ka dira seo ka maatla a ka, eupša ke thušitšwe ke botho bjo bogolo bja Modimo. 11 Nna le baapostola ba bangwe re bolela molaetša wo, ka moka ga rena re ruta molaetša o tee wo le ilego la o dumela.

12 Re ruta molaetša wa gore Kriste o tsošitšwe bahung,+ bjale go tla bjang gore gare ga lena go be le bao ba rego bahu ba ka se tsoge? 13 Ge e ba bahu ba ka se tsošwe, gona go ra gore le Kriste ga se a tsošwa. 14 Ge e ba Kriste a se a tsošwa bahung, gona go ra gore re senya nako ge re bolela ditaba tše dibotse, ebile le tumelo ya rena ga e na mohola. 15 Ge e ba bahu ba ka se tsošwe go ra gore le Modimo+ ga se a tsoša Kriste. Seo se ra gore re bolela maaka ge re re Modimo o ile a tsoša Kriste bahung.+ 16 Ge bahu ba ka se tsošwe, go ra gore le Kriste ga se a ka a tsošwa. 17 Le gona ge e ba Kriste a se a tsošwa bahung, gona tumelo ya lena ga e na mohola ebile dibe tša lena ga se tša lebalelwa.+ 18 Seo se ra gore batho bao ba hlokofetšego e le balatedi ba Kriste ba ka se tsošwe.+ 19 Ge e ba ke bophelong bjo feela mo re holofetšego Kriste, gona re kweša bohloko kudu go feta batho ka moka.

20 Eupša re a tseba gore Kriste o tsošitšwe bahung, ke yena motho wa mathomo yo a ilego a tsošwa bahung.+ 21 Ka ge lehu le bile gona ka baka la motho,+ le tsogo ya bahu le yona e tlo ba gona ka baka la motho.+ 22 Ka ge ka moka ga rena re ehwa ka baka la Adama,+ ka moka ga rena re tlo tsošwa ka baka la Kriste.+ 23  Batho ka moka ba tsošwa ka tatelano, Kriste ke yena a tsošitšwego pele,+ ka morago ga moo go tlo tsošwa balatedi ba Kriste ka moka nakong ya go ba gona ga gagwe.+ 24 Ke moka bofelo bo tla tla. Ka morago ga gore a fediše mebušo ka moka le batho bao ba nago le maatla o tla bušetša mmušo go Modimo Tatagwe.+ 25 O tlo buša e le kgoši go ba go fihlela ge Modimo a bea manaba a gagwe ka moka ka tlase ga dinao tša gagwe.+ 26 Lehu ke lenaba la mafelelo leo le tlago go fedišwa.+ 27 Mangwalo a re: “Modimo o dirile gore Kriste a laole dilo ka moka.”+ Eupša ge a be a re ‘a laole dilo ka moka,’+ seo ga se re gore o be a laola le Modimo yo a dirilego gore a laole dilo ka moka.+ 28 Ka morago ga gore Modimo a dire gore a laole dilo ka moka, Morwa le yena o tla bontšha gore o ikokobeletša bolaodi bja Modimo yo a dirilego gore a laole dilo ka moka,+ ke moka Modimo o tla buša dibopiwa ka moka.+

29 Ge e ba bahu ba ka se tsošwe, go tlo diregang ka batho bao ba kolobeletšwago gore ba tle ba hwe?+ Gona ke ka baka la eng ba kolobeletšwa gore ba tle ba hwe? 30 Ke ka baka la eng maphelo a rena a dula a le kotsing?+ 31 Banabešo, letšatši le lengwe le le lengwe ke lebana le lehu. Ke tloga ke ikgantšha ka lena balatedi ba Kriste Morena wa rena. 32 Ke holegile ka eng ge e ba ke lwele le dibata kua Efeso+ go swana le batho ba bangwe? Ge e ba bahu ba ka se tsošwe, gona “a re jeng, re nweng, ka gobane gosasa re tlo hwa.”+ 33 Le se ke la forwa, bagwera ba babe ba senya mekgwa e mebotse.+ 34 Phafogang gomme le dire dilo tšeo di lokilego, le se ke la dira sebe, ka gobane batho ba bangwe ga ba tsebe Modimo. Ke bolela se gore ke le hlabiše dihlong.

35 Eupša motho yo mongwe a ka botšiša gore: “Bahu ba tlo tsošwa bjang? Ba tlo ba le mmele wa mohuta mang?”+ 36 Wena motho yo a hlokago tlhaologanyo, dilo tše o di bjalago di swanetše go hwa pele e le gore di tle di phele. 37 Ga o bjale semela eupša o bjala peu, e ka ba ya korong goba ya mohuta le ge e le ofe. 38 Eupša Modimo o dira gore peu yeo e mele ka mokgwa wo a ratago ka gona, le gona peu e nngwe le e nngwe ge e mela ga e swane le tše dingwe. 39 Mebele ka moka ga e swane, go na le mebele ya batho, ya dikgomo, ya dinonyana le ya dihlapi. 40 Diphedi ka moka tšeo di lego legodimong di na le mebele+ ya go se swane le ya diphedi tšeo di lego lefaseng,+ ebile bobotse bja diphedi tšeo di lego legodimong ga bo swane le bja diphedi tšeo di lego lefaseng. 41 Letšatši, ngwedi le dinaledi le tšona ga di swane ka letago,+ le dinaledi ka botšona ga di swane ka go taga.

42 Go bjalo le ka go tsošwa ga bahu. Mmele o swana le peu yeo e bjalwago e bola eupša ya tsošwa e sa bole.+ 43 Mmele o bolokwa o nyatšega gomme wa tsošwa o hlomphega.+ O bolokwa o fokola, wa tsošwa o na le maatla.+ 44 O bolokwa e le mmele wa nama, wa tsošwa e le mmele wa moya. Ge e ba go na le mmele wa nama, le wa moya o gona. 45 Mangwalo a re: “Adama motho wa mathomo o ile a ba motho yo a phelago.”+ Adama wa mafelelo a ba yo a neago bophelo.+ 46 Le ge go le bjalo, mmele wa nama ke wa mathomo e sego wa moya, mmele wa moya o tlile ka morago. 47 Mangwalo a re motho wa pele o tšwa lefaseng ebile o dirilwe ka mobu,+ motho wa bobedi yena o tšwa legodimong.+ 48 Bao ba dirilwego ka mobu ba swana le motho wa mathomo yo a dirilwego ka mobu, bao ba lego legodimong ba swana le yo a tlilego a etšwa legodimong.+ 49 Le ge gona bjale re swana le yo a dirilwego ka mobu,+ re tlo swana le yo a tlilego a etšwa legodimong.+

50 Banabešo, ke re go lena mmele wa nama le madi o ka se tsene Mmušong wa Modimo, le mmele o senyegago o ka se hwetše bophelo bjo bo sa senyegego. 51 Bjale ke le botša sephiri se se sekgethwa: Re ka se hlokofale ka moka, eupša Modimo o tlo re fetoša ka moka.+ 52 Seo se tlo direga kapejana, ka ponyo ya leihlo, nakong ya ge go tla be go lla phalafala ya mafelelo. Ge phalafala yeo e lla,+ bahu ba tla tsošwa ba na le mebele yeo e sa bolego, gomme Modimo o tla re fetoša. 53 Ka gobane mmele wo o bolago o tla fetošwa gore e se sa ba mmele wo o bolago+ le gona mmele wo o hwago o tla fetošwa gore o se sa hwa.+ 54 Eupša ge mmele wo o bolago o fetošitšwe o se sa bola, gomme wo o hwago o fetošitšwe o se sa hwa, go tla phethagala seo mangwalo a se boletšego ge a re: “Modimo o tla metša lehu sa ruri.”+ 55 “Lehu, maatla a gago a go fenya a kae? Lehu, maatla a gago a go baka bohloko a kae?”*+ 56 Sebe se na le maatla a go bolaya,+ ebile Molao ke wona o dirago gore sebe se be le maatla.+ 57 Eupša re leboga Modimo ka gobane o re thuša gore re fenye lehu a diriša Morena wa rena Jesu Kriste.+

58 Banabešo ba ba rategago, ebang ba tiilego+ le bao ba sa šišinyegego. Dulang le swaregile+ modirong wa Morena, le dule le gopola gore ge le dira sohle seo le ka se kgonago go šomela Morena, ga le itapišetše lefeela.+