O se ke wa Dumelela Motho a Senya Mekgwa ya Gago e Mebotse

“Le se ke la forwa. Ditlwaelano tše mpe di senya mekgwa e mebotse.”—1 BA-KORINTHE 15:33, NW.

1, 2. (a) Moapostola Paulo o ile a ikwa bjang ka Bakriste ba Korinthe, gomme ka baka la’ng? (b) Ke keletšo efe e kgethegilego yeo re tlago go e ela hloko?

LERATO la botswadi ke maikwelo a matla gakaakang! Le tutueletša batswadi gore ba ikgafe ka baka la bana ba bona, ba ba rute le go ba eletša. Moapostola Paulo e ka ba e be e se tate wa tlhago, eupja o ngwaletše Bakriste ba Korinthe gore: “Xe ke ngwala ’taba tšé xa se xore ke Le hlabišê dihlong; ké xo Le eletša bo-ka bana-baratiwa.”—1 Ba-Korinthe 4:15.

² Pejana, Paulo o be a ile a ya Korinthe moo a ilego a bolela go ba-Juda le ba-Gerika. O ile a thuša go bopa phuthego kua Korinthe. Ka lengwalong le lengwe Paulo o swantšhitše tlhokomelo ya gagwe le ya mma yo a hlokomelago, eupja o be a le bjalo ka tate go Ba-Korinthe. (1 Ba-Thesalonika 2:7) Go etša kamoo tate wa tlhago yo lerato a dirago ka gona, Paulo o ile a eletša bana ba gagwe ba moya. O ka holwa ke keletšo ya gagwe yeo ekago ke ya tate go Bakriste ba Korinthe: “Le se ke la forwa. Ditlwaelano tše mpe di senya mekgwa e mebotse.” (1 Ba-Korinthe 15:33, NW) Ke ka baka la’ng Paulo a ile a ngwalela ba-Korinthe seo? Re ka diriša bjang keletšo ye?

Keletšo Bakeng sa Bona le Rena

3, 4. Re tseba’ng ka Korinthe ya lekgolong la pele la nywaga le baagi ba yona?

³ Lekgolong la pele nywaga, setsebi sa tša thutafase sa mo-Gerika Strabo o ngwadile gore: “Korinthe e bitšwa e ‘humilego’ ka baka la kgwebo ya yona, ka ge e le Isthmus e bile e e-na le maema-kepe a mabedi, ao bjo bongwe bja ona bo lebago thwii Asia gomme bjo bongwe bo leba Italy; le gona e dira gore go be bonolo go ananya dithoto go tšwa dinageng tšeo ka bobedi.” Nywageng e mengwe le e mengwe e mebedi Dipapadi tše di tumilego tša Isthmus di be di gogela mašaba Korinthe.

⁴ Go thwe’ng ka batho ba motseng wo wo e bego e le lefelo la motheo la taolo ya mmušo le la borapedi bja go tsoša kganyogo ya kopano ya botona le botshadi bja Aphrodite? Moporofesara T. S. Evans o hlalositše gore: “Palo ya baagi mo gongwe [e be] e ka ba 400 000. [E be] e le lekoko la setlogo sa maemo a godimo, eupja le e-na le boitshwaro bjo bo hlephilego gaešita le ka mo go feteletšego. . . . Badudi ba Gerika ba Akaya ba be ba hlaolwa ka go se dudišege ka baka la bohlale gomme ba thetha ka go fišegela go kwa madireng a mafsa. . . . Boikgogomošo bja bona bo be bo ka hlohleletša go ipopa dihlotswana gabonolo.”

5. Ke kotsi efe yeo banababo rena ba Korinthe ba ilego ba lebana le yona?

⁵ Ge nako e dutše e e-ya gaešita le phuthego e ile ya aronganywa ke ba bangwe bao ba bego ba sa dutše ba sekametše boikgopolelong bja boikgogomošo. (1 Ba-Korinthe 1:10-31; 3:2-9) Bothata bjo bogolo e be le gore ba bangwe ba be ba re: “Tsoxô ya bahu xa eyo’.” (1 Ba-Korinthe 15:12; 2 Timotheo 2:16-18) Go sa šetšwe gore tumelo ya bona (goba go se dumele) ge e le gabotse e be e le efe, Paulo o ile a swanelwa ke go ba phošolla ka bohlatse bjo bo kwalago bja gore Kriste “ó tsoxile bahung.” Ka gona, Bakriste ba be ba ka holofela gore Modimo o be a tla ba “nea [phenyo] ka Mong wa rena Jesu Kriste.” (1 Ba-Korinthe 15:20, 51-57) Ge nkabe o be o le moo, na o be o ka se be kotsing?

6. Keletšo ya Paulo go 1 Ba-Korinthe 15:33 e be e šoma kudu-kudu go bomang?

⁶ Ge a dutše a nea bohlatse bjo bo tiilego bja gore bahu ba tla tsošwa, Paulo o ile a ba botša gore: “Le se ke la forwa. Ditlwaelano tše mpe di senya mekgwa e mebotse.” (NW) Morero wa keletšo ye o be o lebane le bao ba bego ba kopanela le phuthego bao ba bego ba sa dumelelane le thuto ya tsogo. Na ba be ba fo ba ba sa kgonthišegego ka ntlha yeo ba bego ba sa e kwešiše? (Bapiša le Luka 24:38.) Aowa. Paulo o ngwadile gore ‘ba bangwe go lena ba re tsogo ga e gona,’ ka gona bao ba bego ba akaretšwa ba be ba bontšha go se dumele, ba sekamela bohlanoging. Paulo o be a lemogile gabotse gore ba be ba tla senya mekgwa e mebotse le menagano ya ba bangwe.—Ditiro 20:30; 2 Petro 2:1.

7. Ke boemong bofe bjo bongwe bjoo go bjona re ka dirišago 1 Ba-Korinthe 15:33?

⁷ Re ka diriša bjang temošo ya Paulo mabapi le ditlwaelano? O be a sa bolele gore re swanetše go gana go thuša motho o mongwe ka phuthegong yo a bego a hwetša go le thata go kwešiša temana goba thuto ya Beibele? Ka kgonthe, Juda 22, 23 e re kgothaletša go nea thušo ya kgaugelo go batho ba ba botegago bao ba nago le dipelaelo tše bjalo. (Jakobo 5:19, 20) Lega go le bjalo, keletšo ya Paulo e kego ya tate ruri e swanetše go šoma ge e ba motho o mongwe a tšwela pele go phema seo re se tsebago e le therešo ya Beibele goba a tšwela pele go bolela dipolelo tša go se kgodišege tše di fošagetšego. Re swanetše go itota gore re se gwerane le motho wa mohuta woo. Ke therešo gore ge e ba motho a fetoga mohlanogi yo a sa fetogego, badiši ba moya ba tla swanelwa ke go gata mogato go šireletša mohlape.—2 Timotheo 2:16-18; Tito 3:10, 11.

8. Re ka gata mogato bjang ka temogo ge e ba motho a sa dumelelane le thuto ya Beibele?

⁸ Re ka diriša gape mantšu a Paulo ao ekago ke a tate go 1 Ba-Korinthe 15:33 ge go tliwa go bao ba lego ka ntle ga phuthego bao ba godišago dithuto tša maaka. Re ka gokeletšwa bjang go gweraneng le bona? Go ka direga ge e ba re sa kgone go lemoga phapano magareng ga bao ba ka thušwago go ithuta therešo le bao ba fogo tsoša kgang ka morero wa go godiša thuto ya maaka. Ka mohlala, modirong wa rena wa go nea bohlatse, re ka gahlana le motho yo a ganago ntlha e itšego eupja e le yo a ikemišeditšego go e ahla-ahla ka mo go tšwelago pele. (Ditiro 17:32-34) Seo ka bosona ga se sa swanela go rotoša bothata, ka gobane re hlalosetša ka lethabo motho lege e le ofe therešo ya Beibele ge e ba a nyaka go e tseba, gaešita le go boela go yo nea bohlatse bjo go kgodišago. (1 Petro 3:15) Lega go le bjalo, ba bangwe ba ka ba ba se na kgahlego ya go hwetša therešo ya Beibele e le ka kgonthe.

9. Re swanetše go arabela bjang go hlohlweng ga ditumelo tša rena?

⁹ Batho ba bantši ba tla fetša diiri tše dintši le dibeke ka go latelana ba ngangišana, eupja e se ka gobane ba nyaka therešo. Ba upja ba nyaka go fokodiša tumelo ya o mongwe mola ba kgantšha seo go thwego ke tsebo ya bona ka noši ya Sehebere, Segerika goba thutamahlale ya tlhagelelo. Ge di gahlana le bona, Dihlatse tše dingwe di ile tša ikwa di hlohlilwe, gomme ka baka leo tša feleletša di bile le kgokagano yeo e theilwego tumelong ya bodumedi bja maaka, filosofing goba thutamahlaleng yeo e fošagetšego. Go molaleng gore Jesu ga se a ka a dumelela seo se direga go yena, gaešita lege a be a ka ba a ile a fenya dingangišanong tša go ngangišana le baetapele ba bodumedi bao ba bego ba rutegile ka Sehebere le Segerika. Ge a be a hlohlwa, Jesu o be a araba ka boripana gomme a lebiša tlhokomelo ya gagwe gape go batho ba ikokobetšago, bao e lego dinku tša kgonthe.—Mateo 22:41-46; 1 Ba-Korinthe 1:23–2:2.

10. Ke ka baka la’ng temogo e le e swanetšego go Bakriste bao ba nago le di-computer gomme ba ka kgona go romela melaetša ka go diriša thulaganyo ya go boloka melaetša ka electronic lefelong la melaetša?

¹⁰ Di-computer tša mehleng yeno di butše ditsela tše difsa tše di išago tlwaelanong e mpe. Difeme tše dingwe tša kgwebo di dira gore babeeletši bao ba dirišago computer le mogala ba kgone go romela molaetša ka thulaganyo ya go sepediša melaetša ka electronic; ka gona motho a ka romela molaetša wo babeeletši ka moka ba ka o hwetšago lefelong la melaetša. Se se ile sa lebiša go seo se bitšwago dingangišano tša electronic mabapi le ditaba tša bodumedi. Mokriste a ka gokeletšwa dingangišanong tše bjalo gomme a tšea diiri tše dintši a e-na le motho yo a naganago tša bohlanogi yoo mo gongwe a ka bago a ile a kgaolwa phuthegong. Tlhahlo e lego go 2 Johane 9-11 e gatelela keletšo ya Paulo ye e kego ke ya tate mabapi le go phema ditlwaelano tše mpe.a

Go Phema go Forwa

11. Boemo bja tša papatšo kua Korinthe bo be bo nea sebaka sefe?

¹¹ Bjalo ka ge go boletšwe, Korinthe e be e le lefelo la papatšo leo le nago le mabenkele a mantši le dikgwebo. (1 Ba-Korinthe 10:25) Ba bantši bao ba bego ba tlela Dipapadi tša Isthmus ba be ba ka dula ka dintenteng, gomme nakong ya tiragalo yeo babapatši ba be ba rekišetša ka mešašaneng e rwalegago goba ditaleng tšeo di ruletšwego. (Bapiša le Ditiro 18:1-3.) Se se ile sa dira gore go kgonege gore Paulo a hwetše mošomo moo gore a dire ditente. O be a ka diriša lefelo leo a šomelago go lona bakeng sa go tšwetša pele ditaba tše di lokilego. Moporofesara J. Murphy-O’Connor o ngwala gore: “Go tšwa lebenkeleng le le lego mmarakeng wa leema-ema . . . wo o lebanego le setarata seo se tletšego batho, Paulo o be a kgona go bolela, e sego le badirišani ba gagwe feela le bareki, eupja gape le mašaba a lego ka ntle. Dinakong tšeo go bego go e-na le batho ba sego kae feela o be a ema mojako gomme a leka go boledišana le bao a bego a nagana gore ba ka theetša . . . Go thata go akanya gore semelo sa gagwe se matla le kgodišego ya gagwe e feletšego ga se tša mo dira gore ka bjako e be ‘motho yo a tumilego’ tikologong, gomme se se ka be se ile sa gokeletša bao ba ratago go tseba, e sego feela ba sego mafolofolo eupja le bao ba tsomago tsebišo e le ka kgonthe. . . . Basadi bao ba nyetšwego le bahlokomedi ba bona, bao ba bego ba kwele ka yena ba be ba etela ka go itira eka ba tla go reka. Dinakong tša kgateletšego ge ba be ba ukametšwe ke tlaišo goba go fo swarwa gampe, badumedi ba be ba gahlana le yena ba le bjalo ka bareki. Lefelo leo a šomelago go lona gape le ile la mo kopanya le matona a motse.”

12, 13. Ba-Korinthe ba Pele 15:33 e ka šoma bjang ka mo go swanetšego lefelong la mošomo?

¹² Lega go le bjalo, Paulo a ka ba a ile a lemoga kgonagalo ya go ba le “ditlwaelano tše mpe” lefelong leo a šomago go lona. Le rena re swanetše go e lemoga. Sa bohlokwa ke gore Paulo o ile a hlalosa kgopolo yeo e bego e apareditše go ba bangwe: “A re jeng! A re nweng! xobane ka moswana re y’o hwa!” (1 Ba-Korinthe 15:32) Kapejana ka morago ga moo o ile a nea keletšo ye ekago ke ya tate: “Le se ke la forwa. Ditlwaelano tše mpe di senya mekgwa e mebotse.” (NW) Lefelo la mošomo le go tsoma lethabo di be di ka kgokaganywa bjang le go tšweletša kgonagalo ya kotsi?

¹³ Bakriste ba nyaka go ba botho go badiri-gotee le bona, gomme diphihlelo tše dintši di hlatsela kamoo se e ka bago se se atlegago ka gona go buleng tsela ya go nea bohlatse. Lega go le bjalo, modiri-gotee a ka kwešišetša bogwera thoko e le go nyaka bogwera bakeng sa go ithabiša gotee. Mo gongwe a ka fo dira taletšo e se nago molato bakeng sa letena, go šalela go se nene ka morago ga modiro bakeng sa go nwa bjala goba go ya boitapološong bjo bo itšego mafelo-bekeng. Motho yoo a ka bonala e le yo botho le yo a nago le ponagalo e botse, gomme taletšo e ka bonala e se na molato. Lega go le bjalo Paulo o re eletša gore: “Le se ke la forwa.”

14. Bakriste ba bangwe ba forilwe bjang ka ditlwaelano?

¹⁴ Bakriste ba bangwe ba ile ba forwa. Ganyenyane-ganyenyane ba ile ba thoma go ba le kgopolo ya go se šetše tabeng ya go tlwaelana le bašomi-gotee le bona. Mohlomongwe go tsošišwe ke go rata papadi e swanago goba selo sa go itloša bodutu. Goba motho yo e sego Mokriste mošomong e ka ba yo botho le yo a naganelago ka tsela e sa tlwaelegago, e lego seo se ilego sa lebiša go dirišeng nako e oketšegilego le motho yoo, gaešita le go thabela bogwera bjo bjalo go e na le bja ba bangwe ka phuthegong. Ka gona mo gongwe tlwaelano e ka feleletša ka go foša seboka se tee feela. Go ka bolela go intšha go fihla bošego mantšiboeng a mangwe le go senya thulaganyo ya go tšea karolo bodireding bja tšhemo mesong. Go ka feleletša ka go bogela difilimi goba video yeo Mokriste ka tlwaelo a bego a tla e gana. Mo gongwe re ka nagana gore, ‘Aowa, seo le ka mohla se ka se ntiragalele.’ Eupja bontši bja bao ba ilego ba forwa mo gongwe ba ka ba ba ile ba arabela ka tsela yeo. Re swanetše go ipotšiša gore, ‘Ge e le gabotse ke ikemišeditše gakaaka’ng go diriša keletšo ya Paulo?’

15. Re swanetše go ba le pono efe e leka-lekanego ka baagišani?

¹⁵ Seo re sa tšwago go se ahla-ahla mabapi le lefelo la mošomo se šoma gape le go tlwaelaneng le baagišani. Ka kgonthe, Bakriste ba Korinthe ya bogologolo ba be ba e-na le baagišani. Ditšhabeng tše dingwe ke mo go tlwaetšwego go ba yo a nago le bogwera kudu le yo a thušago go baagišani. Mafelong a magaeng baagišani ba ka thekgana ka baka la go ba bao ba lego lekatana. Ditswalano tša lapa ke tše di tiilego kudu ditlogong tše dingwe, e lego seo se dirago gore go be le ditaletšano tše dintši bakeng sa dijo. Go molaleng gore pono e leka-lekanego ke ya bohlokwa, bjalo ka ge Jesu a bontšhitše. (Luka 8:20, 21; Johane 2:12) Ge re dirišana le baagišani le ba leloko, na re na le tshekamelo ya go itshwara go etša pele ga ge re e-ba Bakriste? Go e na le moo, na ga se ra swanela go hlahloba ditirišano tše bjalo le go ikemišetša go lemoga mellwane e swanetšego?

16. Mantšu a Jesu go Mateo 13:3, 4 a swanetše go kwešišwa bjang?

¹⁶ Jesu o kile a swantšha lentšu la Mmušo le dipeu tšeo di ‘wetšego tseleng, gomme dinonyana tša tla tša di ja.’ (Mateo 13:3, 4, 19) Mehleng yeo, mmu o lego tseleng o be o thatafala ge maoto a mantši a be a dutše a sepela-sepela godimo ga wona. Go bjalo le ka batho ba bantši. Baagišani, ba leloko le ba bangwe, ge ba dutše ba tloga go e-tla ba bangwe, ba ba dira gore batho ba ba dule ba swaregile maphelong a bona. Go bjalo ka ge eka ke go gatakela mobu wa dipelo tša bona, go o dira gore o tie moo peu tša therešo di sa kgonego go tsema medu. Go se arabele mo go swanago go ka mela go yo e šetšego e le Mokriste.

17. Go tlwaelana le baagišani le ba bangwe go ka re kgoma bjang?

¹⁷ Baagišani ba bangwe ba lefase le ba leloko e ka ba bao ba nago le bogwera le bao ba thušago, gaešita lege le ka mohla ba se ba ka ba bontšha kgahlego dilong tša moya goba go rata toko. (Mareka 10:21, 22; 2 Ba-Korinthe 6:14) Go ba ga rena Bakriste ga se gwa swanela go bolela gore re be ba ba se nago bogwera, e lego ba se nago botho. Jesu o re eleditše gore re bontšhe go kgahlegela ba bangwe e le ka kgonthe. (Luka 10:29-37) Eupja keletšo ya Paulo ya gore re hlokomele ditlwaelano tša rena ke yeo e buduletšwego le yeo e nyakegago ka mo go swanago. Ge re dutše re diriša keletšo e boletšwego pele, ga se ra swanela go lebala e boletšwego mafelelong. Ge e ba re sa dule re gopola melao yeo ya motheo ka bobedi, mekgwa ya rena e ka kgongwa. Mekgwa ya gago e fapana bjang le ya baagišani ba gago goba ba leloko tabeng ya potego goba go kweng molao wa Kesara? Ka mohlala, ba ka nagana gore nakong ya go ntšha metšhelo, go bega moputso goba dipoelo tša tlase tša kgwebo go a lokafatšwa, gaešita le go ba mo go swanetšego bakeng sa go tšwelela. Mo gongwe ba ka bolela ka tsela e fekeetšago ka dikgopolo tša bona ge le dutše gotee le e-nwa kofi goba nakong ya ketelo e kopana. Seo se ka kgoma bjang kgopolo ya gago le mekgwa ya potego? (Mareka 12:17; Ba-Roma 12:2) “Le se ke la forwa. Ditlwaelano tše mpe di senya mekgwa e mebotse.”—NW.

Le Mekgwa ya Bofsa

18. Ke ka baka la’ng 1 Ba-Korinthe 15:33 e šoma le go bafsa?

¹⁸ Bafsa ka mo go kgethegilego ba kgongwa ke seo ba se bonago le seo ba se kwago. Na o kile wa ela hloko bana bao boitšhišinyo bja bona bja mmele ge ba bolela goba mekgwa ya bona di swanago kudu le tša batswadi ba bona goba banababo bona? Ka gona, ga se ra swanela go makatšwa ke gore bana ba ka tutuetšwa kudu ke bao ba bapalago le bona goba bao ba tsenago le bona sekolo. (Bapiša le Mateo 11:16, 17.) Ge e ba morwa goba morwedi wa gago a e-ba le bafsa ba ba bolelago ka batswadi ba bona ka go se hlomphe, ke ka baka la’ng o ka nagana gore se se ka se ke sa kgoma bana ba gago? Go thwe’ng ge e ba ba e-kwa bafsa ba bangwe gantši ba diriša polelo e gobogilego? Go thwe’ng ge e ba dithaka tša bona sekolong goba tikologong di kgahlišwa ke mohuta o mofsa wa dieta goba mabenyabje ao a lego nakong? Na re swanetše go nagana gore bafsa ba Bakriste ba ka se ke ba kgongwa ke tutuetšo e bjalo? Na Paulo o boletše gore 1 Ba-Korinthe 15:33 e kgoma batho ba bogolo bjo bo itšego feela bja nywaga?

19. Batswadi ba swanetše go leka go mediša pono efe ka go bana ba bona?

¹⁹ Ge e ba o le motswadi, na o lemoga keletšo yeo ge o dutše o bontšhana mabaka le go dira diphetho mabapi le bana ba gago? Mohlomongwe go tla thuša ge e ba o lemoga gore se ga se bolele gore bafsa ka moka bao bana ba gago ba bago le bona tikologong goba sekolong ga se ba ba lokilego. Ba bangwe ba bona e ka ba ba kgahlišago le bao ba itlhomphago go etša ge go le bjalo ka ba bangwe ba baagišani ba gago, ba leloko le badiri-gotee le wena. Leka go thuša bana ba gago go bona se le go kwešiša gore o yo a leka-lekanego go dirišeng ga gago keletšo e bohlale ya botswadi ya Paulo go ba-Korinthe. Ge ba dutše ba lemoga tsela yeo o leka-lekanyago dilo ka yona, go ka ba thuša go go ekiša.—Luka 6:40; 2 Timotheo 2:22.

20. Bafsa, le lebane le tlhohlo efe?

²⁰ Lena bao le sa lego bafsa, lekang go lemoga kamoo le ka dirišago keletšo ya Paulo ka gona, le tseba gore ke ya bohlokwa go Mokriste o mongwe le o mongwe, o mofsa goba o mogolo. Se e tla ba se se hlohlago, eupja ke ka baka la’ng le sa ikemišetše go lebana le tlhohlo? Lemogang gore feela ka gobane le tsebile ba bangwe ba bafsa go tloga bjaneng ga go bolele gore ba ka se ke ba kgoma mekgwa ya lena, ba senya mekgwa yeo le e medišago bjalo ka bafsa ba Bakriste.—Diema 2:1, 10-15.

Megato e Lebanego ya go Šireletša Mekgwa ya Rena

21. (a) Ke senyakwa sefe seo re nago le sona ge e le ka bogwera? (b) Ke ka baka la’ng re ka kgodišega gore ditlwaelano tše dingwe e ka ba tše kotsi?

²¹ Ka moka ga rena re nyaka bagwera. Lega go le bjalo, re swanetše go phafogela therešo ya gore bagwera ba rena ba ka re kgoma, e ka ba gabotse goba gampe. Seo se ipontšhitše e le therešo ka Adama le ka o mongwe le o mongwe nywaga-kgolong ka moka ga e sa le go tloga nakong yeo. Ka mohlala, Josafate, kgoši ya go loka ya Juda, o ile a thabela kamogelo le tšhegofatšo tša Jehofa. Eupja ka morago ga ge a dumeletše morwa wa gagwe a nyala morwedi wa Kgoši Ahaba wa Isiraele, Josafate o ile a thoma go tlwaelana le Ahaba. Tlwaelano yeo e mpe e ile ya nyaka e lobiša Josafate bophelo bja gagwe. (2 Dikxoši 8:16-18; 2 Koronika 18:1-3, 29-31) Ge e ba re dira dikgetho tše e sego tša bohlale tabeng ya ditlwaelano tša rena, go ka ba kotsi ka mo go swanago.

22. Ke’ng seo re swanetšego go se tšeela godimo, gomme ka baka la’ng?

²² Ka gona, anke re nweletšeng pelong keletšo e lerato yeo Paulo a re neago yona go 1 Ba-Korinthe 15:33 (NW). Ao ga se mantšu feela ao re ka bago re a kwele gantši moo re ka a boeletšago ka hlogo. A bontšha lerato la tate leo Paulo a bego a e-na le lona go banababo le dikgaetšedi ba Korinthe gomme la fetišetšwa le go rena. Le gona, ka ntle le pelaelo a rwele keletšo yeo Tatago rena wa legodimong a e neago ka gobane a nyaka gore maiteko a rena a atlege.—1 Ba-Korinthe 15:58.

[Mongwalo wa tlase]

Na o sa Gopola?

◻ Ke lebaka lefe leo le kgethegilego leo ka lona Paulo a ilego a ngwala 1 Ba-Korinthe 15:33?

◻ Re ka diriša bjang keletšo ya Paulo lefelong la mošomo?

◻ Re swanetše go ba le pono efe e leka-lekanego ka baagišani?

◻ Ke ka baka la’ng 1 Ba-Korinthe 15:33 e le keletšo e swanetšego ka mo go kgethegilego bakeng sa bafsa?

[Seswantšho go letlakala 17]

Paulo o ile a diriša lefelo leo a šomelago go lona go tšwetša pele ditaba tše di lokilego

[Seswantšho go letlakala 18]

Bafsa ba bangwe ba ka senya mekgwa ya gago ya Bokriste