Ebangedi ya Johane

11 Go be go na le monna yo mongwe yo a bego a babja. Leina la gagwe e be e le Latsaro. Yena le dikgaetšedi tša gagwe e lego Maria le Mareta+ ba be ba dula motsaneng wa Bethania. 2 Maria yo ke yena yo a ilego a tlotša Morena ka makhura ao a nkgago bose a ba a phumola maoto a gagwe ka meriri ya gagwe.+ Ke yena yo kgaetšedi ya gagwe Latsaro a bego a babja. 3 Ka gona dikgaetšedi tša Latsaro tša romela molaetša go Jesu, tša re: “Morena, tseba gore motho yo o mo ratago o a babja.” 4 Ge Jesu a ekwa seo a re: “Bolwetši bjo bo ka se feleletše ka lehu, eupša bo tla dira gore Modimo a tumišwe,+ e le gore Morwa wa Modimo a tle a tumišwe ka baka la bjona.”

5 Bjale Jesu o be a rata Mareta, Maria le Latsaro. 6 Le ge go le bjalo, ge Jesu a kwele gore Latsaro o a babja, o ile a no tšwela pele a le lefelong leo a bego a le go lona ka matšatši a mangwe a mabedi. 7 Ka morago ga moo, o ile a re go barutiwa ba gagwe: “A re boeleng Judea.” 8 Barutiwa ba gagwe ba re go yena: “Rabi,+ ga se kgale Bajuda ba be ba nyaka go go kgatla ka maswika,+ bjale o nyaka go boela go bona gape?” 9 Jesu a ba araba a re: “Na mosegare ga o na diiri tše 12?+ Ge e ba motho a sepela mosegare a ka se thule selo ka gobane a bona seetša sa lefase le. 10 Eupša ge e ba motho a sepela bošego, o tlo thula ka gobane ga a na seetša.”

11 Ka morago ga go ba botša dilo tšeo, o ile a oketša ka gore: “Mogwera wa rena Latsaro o robetše,+ bjale ke ya moo go yo mo tsoša.” 12 Ke moka barutiwa ba gagwe ba re go yena: “Morena, ge e ba a robetše, o tla ba kaone.” 13 Eupša Jesu o be a era gore Latsaro o hlokofetše. Bona ba be ba nagana gore o bolela ka go robala ga go khutša. 14 Ke moka Jesu a ba botša ka go lebanya a re: “Latsaro o hlokofetše,+ 15 gomme ke thabela gore ke be ke se gona moo, ka gobane seo ke tlago go se dira se tlo tiiša tumelo ya lena. Bjale a re yeng go yena.” 16 Ka gona Thomase yo a bego a bitšwa Lefahla o ile a botša barutiwagotee le yena a re: “Le rena a re yeng e le gore re yo hwa le Jesu.”+

17 Ge Jesu a fihla, o ile a hwetša gore Latsaro o be a šetše a na le matšatši a mane a le ka lebitleng. 18 Go tloga Bethania go ya Jerusalema e be e ka ba dikhilomithara tšeo e ka bago tše tharo.* 19 Bajuda ba bantši ba be ba tlile go tlo homotša Mareta le Maria ka baka la lehu la kgaetšedi ya bona. 20 Ge Mareta a ekwa gore Jesu o a tla, o ile a ya go mo gahlanetša. Eupša Maria+ a itulela ka gae. 21 Mareta a re go Jesu: “Morena, ge nkabe o be o le mo, kgaetšedi ya ka nkabe a se a hlokofala. 22 Le ge go le bjalo, ke a tseba gore selo le ge e le sefe seo o ka se kgopelago go Modimo, Modimo o tla go nea sona.” 23 Jesu a re go yena: “Kgaetšedi ya gago o tla tsoga.” 24 Mareta a re go yena: “Ke a tseba gore o tla tsoga ge bahu ba tsošwa+ letšatšing la mafelelo.” 25 Jesu a re go yena: “Ke nna tsogo le bophelo.+ Yo a dumelago go nna, le ge a ka hlokofala, o tla buša a phela, 26 ebile yo mongwe le yo mongwe yo a dumelago go nna a ka se hlokofalele sa ruri.+ Na o dumela se?” 27 Mareta a re go yena: “Ee Morena. Ke a dumela gore o Kriste Morwa wa Modimo, yena yo a bego a swanetše go tla lefaseng.” 28 Ge Mareta a boletše seo, o ile a tloga a ya go bitša Maria gomme a mmotša ka sephiring a re: “Morutiši+ o gona ebile o a go bitša.” 29 Maria ge a ekwa seo, a emelela kapelapela a ya go Jesu.

30 Jesu o be a se a tšwa a fihla motsaneng woo, eupša o be a le lefelong leo Mareta a kopanego le yena go lona. 31 Ka nako yeo, go be go na le Bajuda bao ba bego ba le ka ntlong ya Maria ba tlile go mo homotša. Ge ba bona Maria a emelela kapelapela a eya ka ntle, ba ile ba mo šala morago ka gobane ba be ba nagana gore mohlomongwe o be a eya lebitleng+ go yo llela gona. 32 Ge Maria a fihla moo Jesu a bego a le gona gomme a mmona, o ile a khunama pele ga gagwe, ke moka a re: “Morena, ge nkabe o be o le mo, kgaetšedi ya ka nkabe a se a hlokofala.” 33 Ge Jesu a bona Maria a lla le Bajuda bao ba bego ba tlile le yena ba lla, pelo ya gagwe e ile ya kwa bohloko kudu gomme a nyama. 34 Ke moka a re: “Le mmolokile kae?” Ba re go yena: “Morena etla re go bontšhe.” 35 Ke moka Jesu a ntšha megokgo.+ 36 Ka gona Bajuda ba thoma gore: “Bonang gore o be a mo rata bjang!” 37 Eupša ba bangwe ba bona ba re: “Na monna yo, yoo a dirilego gore monna yo e lego sefofu a bone,+ o paletšwe ke go dira gore Latsaro a se hlokofale?”

38 Ka gona ka morago ga gore Jesu a kwe bohloko gape, o ile a ya lebitleng. Ge e le gabotse, e be e le lewa leo le thibilwego ka leswika. 39 Jesu a re: “Tlošang leswika le.” Mareta, e lego kgaetšedi ya mohu a re go yena: “Morena e šetše e le matšatši a mane a hlokofetše. Gona bjale o swanetše go ba a nkga.” 40 Jesu a re go yena: “Na ga se ka go botša gore ge e ba o dumela o tla bona maatla a Modimo a magolo?”*+ 41 Ka gona ba tloša leswika. Ke moka Jesu a lebelela legodimong+ a re: “Tate, ke a go leboga ka ge o nkwele. 42 Ke nnete gore o dula o nkwa. Eupša ke boletše ka baka la batho ba ba emego mo, e le gore ba dumele gore o nthomile.”+ 43 Ge Jesu a boletše dilo tšeo, o ile a goeletša a re: “Latsaro, etšwa!”+ 44 Motho yo a bego a hlokofetše a tšwa gomme maoto a gagwe le matsogo a gagwe a tateditšwe ka mašela. Sefahlego sa gagwe le sona se be se tateditšwe ka lešela. Ke moka Jesu a re go bona: “Mo tatolleng, le mo tlogele a sepele.”

45 Ka gona, Bajuda ba bantši bao ba bego ba tlile go Maria le bao ba bonego dilo tšeo Jesu a di dirilego, ba ile ba dumela go yena.+ 46 Eupša ba bangwe ba bona ba ile ba ya go Bafarasei ba ba botša gore Jesu o dirile eng. 47 Ka gona, baperisita ba bagolo le Bafarasei ba kgoboketša maloko a Sanhedrine, ke moka ba re: “Re tla dira eng ka gobane monna yo o dira mehlolo e mentši?+ 48 Ge re ka no mo tlogela a dira dilo tše, ba tla thoma go dumela go yena gomme Baroma ba tla tla ba tšea tempele ya rena le setšhaba sa rena.” 49 Eupša yo mongwe wa bona, e lego Kayafa,+ yoo e bego e le moperisita yo a phagamego ngwageng woo, o ile a re go bona: “Lena ga le tsebe selo le gatee. 50 Na ga le lemoge gore se sekaone go lena ke gore motho o tee a hwele setšhaba ka moka go e na le gore setšhaba ka moka se fedišwe?” 51 Le ge go le bjalo, moperisita yoo o be a sa bolele dikgopolo tša gagwe ka gobane ka ge e be e le moperisita yo a phagamego ngwageng woo, Modimo o ile a mo diriša go porofeta gore Jesu o be a swanetše go hwela setšhaba. 52 Ge e le gabotse o be a sa hwele setšhaba feela, eupša o be a swanetše go kgoboketša bana ba Modimo bao ba bego ba phatlaletše. 53 Ka gona go tloga letšatšing leo ba mo logela maano a go mmolaya.

54 Ka baka leo Jesu o ile a se sa hlwa a sepelasepela phatlalatša gare ga Bajuda, eupša o ile a tloga a ya motseng wo o bitšwago Efuraime+ woo o bego o le kgauswi le lešoka gomme a dula moo le barutiwa ba gagwe. 55 Ka nako yeo, monyanya wa Bajuda woo o bitšwago Paseka+ o be o le kgauswi le go ketekwa. Ka gona batho ba bantši bao ba bego ba etšwa dinagamagaeng ba ile ba rotogela Jerusalema pele ga monyanya woo wa Paseka e le gore ba itlhwekiše go ya ka setlwaedi. 56 Ba be ba nyaka Jesu. Ka gona ge ba be ba eme moo tempeleng ba be ba boledišana ba re: “Le nagana eng? Na o tla tla monyanyeng goba a ka se tle?” 57 Eupša baperisita ba bagolo le Bafarasei ba be ba boditše batho gore ge e ba go na le yoo a tsebago mo Jesu a lego gona, o swanetše go ba tsebiša e le gore ba ye ba mo sware.