Ebangedi ya Johane
9 Ge Jesu a dutše a sepela, o ile a bona monna yo a belegwego e le sefofu. 2 Ke moka barutiwa ba gagwe ba re: “Rabi,+ ka ge monna yo a belegwe e le sefofu, ke mang yo a dirilego sebe? Ke yena goba ke batswadi ba gagwe?” 3 Jesu a araba a re: “Monna yo ga se a foufala ka baka la sebe seo a se dirilego goba tšeo batswadi ba gagwe ba di dirilego. Se se diragetše e le gore batho ba bone seo Modimo a kgonago go se dira.+ 4 Re swanetše go dira mediro ya Modimo yo a nthomilego e sa le mosegare+ ka gobane go tla bošego bjoo ka bjona motho a ka se kgonego go dira selo. 5 Ge ke sa dutše ke le lefaseng, ke seetša sa lefase.”+ 6 Ge a boletše dilo tšeo, o ile a tshwela mare mmung, a dira leraga ka ona gomme a le tlotša mahlong a monna yoo,+ 7 ke moka a re go yena: “Sepela o yo hlapa mahlo a gago bodibeng bja Siloama” (yeo e rago gore ‘Romilwego’). Ke moka a ya a hlapa gomme a boa a kgona go bona.+
8 Ka gona, baagišane ba gagwe le batho bao ba bego ba tlwaetše go mmona a kgopela batho dilo ba thoma gore: “Na yo ga se monna yo a bego a tlwaetše go kgopela batho dilo?” 9 Ba bangwe ba be ba re: “Ke yena.” Ba bangwe ba re: “Ga se yena, eupša o swana le yena.” Monna yoo a dulela gore: “Ke nna yena.” 10 Ke moka ba mmotšiša ba re: “Bjale go tlile bjang gore o kgone go bona?” 11 A ba araba a re: “Monna yo a bitšwago Jesu o dirile leraga a ntlotša lona mahlong ke moka a re go nna: ‘Sepela o yo hlapa mahlo Siloama.’+ Ke moka ka ya ka hlapa gomme ka kgona go bona.” 12 Ke moka ba mmotšiša ba re: “Monna yoo o kae?” Yena a re: “Ga ke tsebe.”
13 Ke moka ba iša monna yoo ga bjale a bego a kgona go bona go Bafarasei. 14 Bjale letšatši leo Jesu a bego a dirile leraga gomme a dira gore monna yoo e bego e le sefofu a kgone go bona,+ e be e le la Sabatha.+ 15 Ka gona, Bafarasei ba thoma go botšiša monna yoo gore go tlile bjang gore a kgone go bona. Yena a re go bona: “O tloditše leraga mahlong a ka, ka ya ka hlapa mahlo gomme ka kgona go bona.” 16 Ka gona ba bangwe ba Bafarasei ba thoma gore: “Monna yo ga a tšwe go Modimo ka gobane ga a boloke Sabatha.”+ Ba bangwe ba re: “Motho yo e lego modiradibe a ka kgona bjang go dira mehlolo ya mohuta woo?”+ Ke moka ba thoma go ganetšana.+ 17 Ka gona ba boela ba botšiša monna yoo ga bjale a bego a kgona go bona ba re: “Wena o reng ka monna yo a go thušitšego gore o kgone go bona?” Monna yoo a re: “Ke moporofeta.”
18 Eupša Bajuda ba be ba sa dumele gore monna yoo e be e le sefofu le gore o boetše o a bona, go fihlela ge ba biditše batswadi ba monna yoo ga bjale a bego a kgona go bona. 19 Ba ba botšiša ba re: “Na yo ke morwa wa lena? Na o belegwe e le sefofu? Bjale, go tla bjang gore a kgone go bona?” 20 Batswadi ba gagwe ba re: “Rena re tseba gore yo ke morwa wa rena le gore o belegwe e le sefofu. 21 Eupša ga re tsebe gore go tlile bjang gore gona bjale a kgone go bona le gore ke mang a mo dirilego gore a kgone go bona. Botšišang yena. Ke yo mogolo. O swanetše go ipolelela.” 22 Batswadi ba gagwe ba boletše dilo tše ka gobane ba be ba tšhaba Bajuda,+ ka ge Bajuda ba be ba dumelelane ka gore yoo a ka bolelago gore Jesu ke Kriste, o swanetše go rakwa sinagogeng.+ 23 Ke ka baka leo batswadi ba gagwe ba itšego: “Ke yo mogolo. Botšišang yena.”
24 Ka gona, Bajuda ba bitša gape monna yoo ga bjale a bego a kgona go bona ba re: “Bontšha gore o hlompha Modimo ka go bolela nnete. Re a tseba gore monna yo ke modiradibe.” 25 Ke moka monna yoo a re: “Tša gore ke modiradibe, nna ga ke di tsebe. Seo ke se tsebago ke gore ke be ke le sefofu gomme ga bjale ke kgona go bona.” 26 Ka gona ba re go yena: “O go dirile eng? O dirile eng gore o kgone go bona?” 27 A re go bona: “Ke šetše ke le boditše, eupša ga se la ntheetša. Ke ka baka la eng le nyaka gore ke le botše gape? Kgane le nyaka go ba barutiwa ba gagwe?” 28 Ge a realo ba mo roga ba re: “Wena o morutiwa wa motho yoo, eupša rena re barutiwa ba Moshe. 29 Re a tseba gore Modimo o boletše le Moshe, eupša motho yo ga re tsebe gore o romilwe ke mang.” 30 Monna yoo a ba araba a re: “Taba ye e a mmakatša. Le re ga le tsebe gore o romilwe ke mang, le ge go le bjalo o ntirile gore ke bone. 31 Re a tseba gore Modimo ga a theetše badiradibe,+ eupša ge e ba motho a boifa Modimo ebile a dira thato ya gagwe, Modimo o a mo theetša.+ 32 Go tloga kgale ga se gwa ka gwa kwewa taba ya gore go na le motho yoo a kilego a dira gore motho yoo a belegwego e le sefofu a kgone go bona. 33 Ge nkabe motho yoo a be a sa tšwe go Modimo, o be a ka se kgone go dira dilo tše.”+ 34 Ba mo araba ba re: “Na wena o re o a re ruta mola o belegwe o na le sebe?” Ke moka ba mo lahlela ka ntle!+
35 Jesu o ile a kwa gore ba mo lahletše ka ntle. Ke moka ge a mo hwetša a re go yena: “Na o dumela go Morwa wa motho?” 36 Monna yoo a re: “Morena, ke mang yena yoo? Mpotše e le gore ke dumele go yena.” 37 Jesu a re go yena: “O mmone, ebile ge e le gabotse o bolela le yena.” 38 Monna yoo a re: “Morena, ke dumela go yena.” Ka morago ga moo a mo khunamela. 39 Ke moka Jesu a re: “Ke tlile mo lefaseng e le gore dilo tšeo ke di dirago di dire gore bao ba foufetšego ba bone+ le gore bao ba bonago ba foufale.”+ 40 Bafarasei bao ba bego ba le gona ba ile ba kwa dilo tšeo ke moka ba re go yena: “O ra gore le rena re difofu?” 41 Jesu a re go bona: “Ge nkabe le le difofu, le be le ka se be le sebe. Eupša ka ge le re: ‘Re a bona,’ le ka se lebalelwe sebe sa lena.”+