Ebangedi ya Mareka

10 Go tloga moo a ya mellwaneng ya Judea ka mošola wa Noka ya Jorodane. Le gona moo, mašaba a ile a mo kgobokanela. O ile a thoma go a ruta gape bjalo ka ge a be a tlwaetše go dira bjalo.+ 2 Ke moka Bafarasei ba tla go yena ba ikemišeditše go mo leka. Ba mmotšiša ge e ba molao o dumelela gore monna a hlale mosadi wa gagwe.+ 3 A ba araba a re: “Moshe o le file taelo efe?” 4 Ba re: “Moshe o dumeletše gore go ngwalwe lengwalo la go raka mosadi le go mo hlala.”+ 5 Eupša Jesu a re go bona: “Moshe o le ngwaletše taelo ye+ ka baka la gore le dinganga.+ 6 Le ge go le bjalo, go tloga mathomong ‘Modimo o ba dirile gore e be monna le mosadi.+ 7 Ka lebaka le, monna o tla tlogela tatagwe le mmagwe,+ 8 gomme yena le mosadi wa gagwe e tla ba nama e tee.’+ Ka gona e ka se sa hlwa e eba ba babedi, eupša e tla ba nama e tee. 9 Ka baka leo, seo Modimo a se tlemagantšego,* go se be le motho yo a se aroganyago.”+ 10 Ge ba be ba le ka ntlong gape, barutiwa ba gagwe ba ile ba thoma go mmotšiša ka se. 11 A re go bona: “Motho yo mongwe le yo mongwe yo a hlalago mosadi wa gagwe gomme a nyala yo mongwe, o a hlotlola*+ ebile o direla mosadi wa gagwe phošo, 12 le gona ge e ba mosadi a ka nyalwa ke monna yo mongwe ka morago ga gore a hlale monna wa gagwe, o a hlotlola.”+

13 Bjale batho ba thoma go mo tlišetša bana ba banyenyane gore a ba kgwathe, eupša barutiwa ba kgalema batswadi ba bana bao.+ 14 Ge Jesu a bona seo a galefa gomme a re go barutiwa ba gagwe: “Tlogelang bana ba banyenyane ba tle go nna, ebile le se ke la leka la ba thibela, ka gobane Mmušo wa magodimo ke wa bao ba swanago le bona.+ 15 Ruri ke re go lena mang le mang yo a sa amogelego Mmušo wa Modimo go swana le ngwana yo monyenyane, a ka se tsene go wona le gatee.”+ 16 Ke moka a gokarela bana bao, a thoma go ba šegofatša le go ba bea diatla.+

17 Bjale ge a be a le tseleng a sepela, monna yo mongwe o ile a mo kitimela a fihla a mo khunamela ke moka a mmotšiša a re: “Morutiši yo Botse, ke swanetše go dira eng gore ke hwetše bophelo bjo bo sa felego?”+ 18 Jesu a re go yena: “Ke ka baka la eng o mpitša Morutiši yo botse? Ga go yo botse ge e se o tee, yena Modimo.+ 19 O tseba ditaelo tše di rego: ‘O se ke wa bolaya,+ o se ke wa hlotlola,+ o se ke wa utswa,+ o se ke wa nea bohlatse bja maaka,+ o se ke wa radia batho ba bangwe.+ Hlompha tatago le mmago.’”+ 20 Monna yoo a re go yena: “Morutiši, dilo tšeo ka moka ke be ke dutše ke di dira go tloga bosweng bja ka.” 21 Jesu a mo lebelela, a kwa a mo rata gomme a re go yena: “Go na le selo se setee seo se hlaelelago go wena: Sepela o yo rekiša dilo tša gago gomme tšhelete ya gona o e nee badiidi. Ka gona, o tla ba le mahumo legodimong, ke moka o tle o be molatedi wa ka.”+ 22 Eupša a nyamišwa ke karabo yeo gomme a tloga a kwele bohloko, ka gobane o be a na le dilo tše dintši.+

23 Ka morago ga gore Jesu a lebelele ka mo le ka mo, o ile a re go barutiwa ba gagwe: “Ruri go tla ba thata gore batho bao ba nago le tšhelete e ntši ba tsene Mmušong wa Modimo!”+ 24 Eupša barutiwa ba Jesu ba makatšwa ke seo a se boletšego. Ke moka Jesu a re: “Bana ba ka, ruri ga go bonolo gore motho a tsene Mmušong wa Modimo! 25 Go bonolo gore kamela e tsene ka lešobana la nalete go e na le gore mohumi a tsene Mmušong wa Modimo.”+ 26 Ba makala le go feta gomme ba re go yena:* “Ke mang yo a ka phologago?”+ 27 Jesu a ba lebelela ka mahlong a re go bona: “Batho ba ka bona seo se sa kgonege eupša ga go bjalo go Modimo ka gobane ga a palelwe ke selo.”+ 28  Petro a re go yena: “Re tlogetše dilo ka moka ra go latela.”+ 29 Jesu a re: “Ruri ke le botša gore motho yoo a tlogetšego ntlo, bomorwarragwe, dikgaetšedi, mmagwe, tatagwe, bana le mašemo ka baka la ka le ka baka la ditaba tše dibotse+ 30 mo nakong ye o tlo hwetša dintlo, bomorwarragwe, dikgaetšedi, bomma, bana, mašemo ka makga a fetago 100 a ba a tlaišega,+ gomme nakong e tlago* o tla hwetša bophelo bjo bo sa felego. 31 Eupša ba bantši bao e lego ba mathomo e tla ba ba mafelelo gomme ba bantši bao e lego ba mafelelo e tla ba ba mathomo.”+

32 Bjale Jesu le barutiwa ba gagwe ba be ba sepela tseleng yeo e yago Jerusalema gomme Jesu o be a ba etile pele. Le gona, barutiwa ba gagwe ba be ba maketše. Eupša ba bangwe bao ba bego ba latela Jesu, ba ile ba thoma go tšhoga. Ke moka Jesu a buša a tšea baapostola ba gagwe ba 12 a ba iša ka thokwana gomme a thoma go ba botša dilo tšeo di bego di tla mo diragalela, a re:+ 33 “Gona bjale re ya Jerusalema gomme Morwa wa motho o tla fiwa baperisita ba bagolo le ditsebi tša molao. Ke moka bona ba tla phetha ka gore a bolawe, gomme ba mo iša go batho ba ditšhaba tše dingwe 34 gomme bona ba tla mo kwera, ba mo tshwela ka mare ba mo otla ba ba ba mmolaya eupša ka morago ga matšatši a mararo o tla tsošwa bahung.”+

35 Ke moka Jakobo le Johane, e lego barwa ba babedi ba Tsebedeo,+ ba ya go yena ba re: “Morutiši re nyaka gore o re direle selo le ge e le sefe seo re go kgopelago sona.”+ 36 A re go bona: “Le nyaka gore ke le direle eng?” 37 Ba re go yena: “Re dumelele gore re dule le wena mmušong wa gago, yo mongwe ka letsogong la gago le letona, yo mongwe ka go le letshadi.”+ 38 Eupša Jesu a re go bona: “Ga le tsebe se le se kgopelago. Na le ka nwa seo ke se nwago goba la kolobetšwa ka kolobetšo yeo ke kolobetšwago ka yona?”+ 39 Ba re go yena: “Ee, re ka se nwa.” Ke moka Jesu a re go bona: “Le tla nwa seo ke se nwago la ba la kolobetšwa ka kolobetšo yeo ke kolobetšwago ka yona.+ 40 Le ge go le bjalo, ga se nna ke dirago phetho ya gore ke mang a tlago go dula ka letsogong la ka le letona goba le letshadi, eupša go tla dula bao ba lokišeleditšwego go dula moo.”

41 Ge barutiwa ba bangwe ba lesome ba ekwa ka seo, ba ile ba galefela Jakobo le Johane.+ 42 Eupša Jesu a bitša barutiwa ba gagwe gore ba tle go yena gomme a re go bona: “Le a tseba gore bao ba bušago* ditšhaba ba di buša ka tsela yeo ba ratago ka yona, ebile bao ba filwego maemo a godimo ba diriša maatla a bona go gatelela batho ba bangwe.+ 43 Ga se gwa swanela go ba bjalo gare ga lena, eupša yo mongwe le yo mongwe yoo a nyakago go ba yo mogolo gare ga lena o swanetše go ba mohlanka wa lena,+ 44 gomme yo mongwe le yo mongwe yo a nyakago go ba wa pele gare ga lena o swanetše go ba mohlanka wa lena ka moka. 45 Ka gobane gaešita le Morwa wa motho ga se a tlela go hlankelwa, eupša o tletše go hlankela+ le go rekolla ba bantši ka bophelo bja gagwe.”+

46 Ke moka ba tsena Jeriko. Eupša ge Jesu le barutiwa ba gagwe le lešaba le legolo leo a bego a na le lona ba be ba etšwa Jeriko, Baratimeo yoo e bego e le sefofu ebile a kgopela batho dilo, o be a dutše kgauswi le tsela.+ (Baratimeo e be e le morwa wa Timeo.) 47 Ge Baratimeo a ekwa gore e be e le Jesu wa Monatsaretha, a thoma go goeletša a re: “Jesu, Morwa wa Dafida,+ ntšhokele!”+ 48 Ge a realo batho ba bantši ba thoma go mo kgalemela ba re a homole. Eupša ge ba mo kgalemela, o ile a goeletša le go feta a re: “Morwa wa Dafida, ntšhokele!” 49 Ka gona, Jesu a ema gomme a re: “Mmitšeng a tle go nna.” Ka gona ba bitša monna yoo wa sefofu ba re go yena: “O se ke wa tšhoga! Emelela, o a go bitša.” 50 Monna yoo a lahla seaparo sa gagwe sa ka ntle, a emelela kapelapela gomme a ya go Jesu. 51 Ke moka Jesu a re go monna yoo: “O nyaka gore ke go direle eng?” Monna yoo wa sefofu a re go Jesu: “Raboni,* ke kgopela gore o dire gore ke boele ke bone gape.” 52 Ke moka Jesu a re go yena: “Sepela. Tumelo ya gago e go fodišitše.”+ Gateetee monna yoo a boela a bona+ gomme a thoma go latela Jesu.