Petro wa Bobedi

3 Banabešo le dikgaetšedi ba ba rategago, gona bjale ke le ngwalela lengwalo la bobedi. Ke le gopotša dilo tšeo di tlago go le thuša gore le nagane gabotse,+ go swana le ge ke ile ka dira bjalo lengwalong la mathomo. 2 Ke le ngwalela go le gopotša dilo tšeo baporofeta bao ba tshepegago ba ilego ba di bolela nakong e fetilego, le go le gopotša dithuto tša Morena yo a re phološago. Dilo tšeo le di kwele go baapostola.* 3  Sa pele, tsebang gore mehleng ya bofelo go tla ba le batho bao ba kwerago dilo tše dibotse, ebile ba tla dira dilo tše mpe tšeo ba di kganyogago,+ 4 gomme ba tla re: “O kae Kriste yo a tshepišitšego gore o tla boa?+ Ga go na selo seo se fetogilego ga e sa le borakgolokhukhu ba rena ba hlokofala, dilo ka moka di no tšwela pele di le ka wona mokgwa wo di bego di le ka wona ga e sa le Modimo a bopa lefase.”+

5 Ba itebatša taba ya gore magodimo a bile gona go tloga kgale, gore lefase le ile la aroganywa le meetse ebile la ema le sa šikinyege gare ga meetse go ya ka lentšu la Modimo,+ 6 le gore lefase la mehleng yeo le ile la fedišwa ka go khupetšwa ka meetse.+ 7 Eupša ka lona lentšu leo, magodimo le lefase tšeo di lego gona gona bjale di beetšwe go tlo fedišwa ka mollo, go fihlela letšatšing leo batho bao ba se nago taba le melao ya Modimo ba ahlolwa ebile ba fedišwa.+

8 Ka gona banabešo le dikgaetšedi ba ba rategago, le se ke la lebala gore letšatši letee go Jehofa* le lekana le mengwaga e sekete gomme mengwaga e sekete e lekana le letšatši letee.+ 9 Jehofa ga a diege go dira seo a se tshepišitšego,+ go no swana le ge batho ba bangwe ba nagana bjalo, eupša ga a le felele pelo ka gobane ga a nyake gore go be le motho le ge e le ofe yo a fedišwago, ebile o nyaka gore batho ka moka ba sokologe.+ 10 Letšatši la Jehofa+ lona le tlo tla bjalo ka lehodu,+ nakong yeo magodimo a tlo feta+ ka lešata le legolo, eupša dilo tšeo di lego magodimong le lefaseng tšeo di fišago kudu di tlo tologa gomme lefase le dilo tšeo di lego go lona di tlo fišwa ka mollo.+

11 Ka ge dilo tše ka moka di tla tologa ka tsela yeo, gona le swanetše go hlahlobišiša boitshwaro bja lena le seo le swanetšego go se dira. Le swanetše go ba ba bakgethwa gomme le dire dilo tšeo di bontšhago gore le ineetše go Modimo. 12 Le gona ge le dutše le letile letšatši la Jehofa gore le tle,+ dulang le phafogile gomme le nagana ka lona. Letšatšing leo magodimo a tla fedišwa+ ka mollo gomme dikarolo tša ona di tla tologa ka baka la go fiša kudu. 13 Ge e le rena re letetše seo Modimo a re tshepišitšego sona,+ e lego magodimo a maswa le lefase le leswa, gomme moo dilo di tla be di dirwa ka go loka.+

14 Ka gona banabešo le dikgaetšedi bao ba rategago, ka ge le letetše dilo tše, dirang sohle seo le ka se kgonago gore Modimo a le hwetše le se na sepatso, le sa solege ebile le na le segwera se sebotse le yena.+ 15 Le gona tšeang go se fele pelo ga Morena wa rena e le sebaka sa gore le tle le phologe, go etša ge ngwanabo rena yo a rategago Paulo le yena a ile a le ngwalela mabapi le bohlale bjo a bo neilwego ke Modimo.+ 16 Ge e le gabotse o le ngwaletše ka dilo tše mangwalong a gagwe ka moka. Eupša go na le dilo tše dingwe tšeo di lego ka mangwalong ao tšeo go lego thata go di kwešiša, gomme batho bao ba sa šetšego le bao tumelo ya bona e fokolago ba kgopamiša dilo tše go no swana le ge ba kgopamiša Mangwalo a mangwe ka moka, gomme seo se tla dira gore bona ka bobona ba fedišwe.

17 Ka gona banabešo le dikgaetšedi bao ba rategago, ka ge le tsebile se e sa le pele, le itlhokomele gore le se ke la aroga le bona ka thuto ya maaka ya batho bao ba tshelago molao, gomme seo sa dira gore le fokole tumelong.+ 18 Go e na le moo, ke tshepa gore le tla tšwela pele le hwetša botho bjo bogolo bja Morena le Mophološi wa rena Jesu Kriste, le gore le tla dula le ithuta ka yena gomme la mo tseba. Eka a ka tumišwa gona bjale le go ya go ile. Amene.