Kutollo Yeo e Utolletšwego Johane
19 Ka morago ga dilo tše, ka kwa lentšu le le hlabošago leo le kwagalago eka ke la lešaba le legolo la bao ba lego legodimong. Ba re: “Tumišang Jah!*+ Modimo wa rena o phološa batho, o na le maatla a magolo le letago, 2 ka gobane dikahlolo tša gagwe di lokile ebile ke tša nnete.+ O ahlotše mogwebakammele yo mogolo yo a sentšego lefase ka baka la boitshwaro bja gagwe bjo bobe bja tša thobalano,* a ba a lefetša madi a bahlanka ba gagwe bao mogwebakammele a ba bolailego.”+ 3 Ka yona nako yeo, ba bolela ka lekga la bobedi ba re: “Tumišang Jah!+ Le gona, muši wo o tšwago go yena wa rotoga go ya go ile.”+
4 Ke moka dibopiwa tše di phelago tše nne+ le bagolo ba 24,+ ba khunama ba rapela Modimo yo a dulago setulong sa bogoši, ba re: “Amene! Tumišang Jah!”+
5 Le gona, ka kwa lentšu le etšwa setulong sa bogoši le re: “Lena bahlanka ba Modimo ka moka+ bao ba mmoifago, ba bagolo le ba banyenyane, tumišang Modimo wa rena.”+
6 Ka kwa lentšu le le hlabošago leo le kwagalago eka ke la lešaba le legolo le leo le kwagalago eka ke meetse a mantši le leo le kwagalago eka ke medumo ya magadima. Lešaba leo le be le re: “Tumišang Jah,+ ka gobane Jehofa* Modimo wa rena, yena Ramatlaohle,+ o thomile go buša.+ 7 A re thabeng kudu, re be re mo fe letago ka gobane Kwana e kgauswi le go nyala ebile mosadi wa yona o itokišitše. 8 Mosadi wa Kwana o filwe seaparo se sebotse sa linene, seo se phadimago, le seo se hlwekilego gore a se apare, ka gobane linene e botse e emela dilo tša go loka tšeo bakgethwa ba di dirago.”+
9 Ke moka morongwa a re go nna: “Ngwala o re, go thaba bao ba laleditšwego gore ba tle ba je dijo tša mantšiboa lenyalong la Kwana.”+ A mpotša gape a re: “Dilo tše, tšeo Modimo a di bolelago ke tša nnete.” 10 Nna ka khunama pele ga gagwe gore ke mo rapele. Eupša a re: “Aowa! O se ke wa dira bjalo!+ Nna ke no ba mohlanka go swana le ge wena le banabeno le le bahlanka bao ba nago le mošomo wa go nea bohlatse ka Jesu.+ Rapela Modimo+ ka gobane morero wa diporofeto ke go re botša nnete ka Jesu.”+
11 Ke moka ka bona legodimo le bulega gomme ka bona pere e tšhweu.+ Yo a e nametšego o bitšwa, yo a Botegago+ le yo a Bolelago Nnete.+ Kahlolo ya gagwe ke ya go loka ebile o lwa ka tsela yeo e lokilego.+ 12 Mahlo a gagwe a swana le kgabo ya mollo+ gomme o rwele mefapahlogo e mentši hlogong ya gagwe. O ngwadilwe leina leo le tsebjago ke yena feela gore le ra goreng. 13 Le gona, o apere seaparo sa ka ntle seo se tšhetšwego ke madi gomme leina leo a bitšwago ka lona ke Lentšu+ la Modimo. 14 Le gona, madira a legodimong a be a mo šetše morago a nametše dipere tše ditšhweu ebile a apere diaparo tše ditšhweu tšeo di hlwekilego tša go dirwa ka lešela le lebotse la linene. 15 Molomong wa gagwe go tšwa sabola e telele+ e bogale gore a otle ditšhaba ka yona, ebile o tla di buša ka molamo wa tšhipi.+ Go oketša moo, o gatakela segatelo sa diterebe sa Modimo Ramatlaohle seo se emelago bogale bja gagwe bjo bogolo.+ 16 Seaparong sa gagwe sa ka ntle, e lego seropeng sa gagwe, o na le leina leo le ngwadilwego gore: Kgoši ya dikgoši le Morena wa marena.+
17 Ka morago, ka bona morongwa a eme letšatšing, a goeletša dinonyana ka moka tšeo di fofago sebakabakeng a re: “Etlang mono, le kgobokane gore le je dijo monyanyeng o mogolo wa Modimo,+ 18 e le gore le je dinama tša dikgoši, dinama tša balaodi ba mašole, dinama tša banna ba maatla,+ dinama tša dipere le tša bao ba di nametšego+ le dinama tša batho ka moka tša bao ba lokologilego le tša makgoba, gotee le tša ba bagolo le tša ba banyenyane.”
19 Ka bona sebata le dikgoši tša lefase le mašole a tšona ba kgobokanetše go lwa le yo a nametšego pere le mašole a gagwe.+ 20 Yo a nametšego pere a swara sebata le moporofeta wa maaka+ yoo a bego a dira mehlolo pele ga sona, moo a ilego a timetša bao ba bego ba amogetše leswao la sebata+ le bao ba bego ba rapela seswantšho sa sona,+ a tšea sebata le moporofeta wa maaka ba sa phela a ba lahlela bodibeng bja mollo woo o tukago kudu.*+ 21 Eupša batho ba bangwe ka moka ba bolawa ka sabola e telele yeo e tšwago molomong wa yoo a nametšego pere.+ Ke moka dinonyana ka moka tša ja dinama tša bona tša khora.+