Timotheo wa Bobedi

3 Eupša tseba gore mehleng ya bofelo+ bophelo bo tla ba boima kudu ebile bo tla thatafa le go feta.* 2 Ka gobane batho ba ka se be le taba le batho ba bangwe, ba tla rata tšhelete, ba ikgantšha, ba ikgogomoša, ba bolela gampe ka Modimo le ka batho,* ba se kwe batswadi, ba se leboge, ba se tshepege, 3 e tla ba bao ba sa ratego batho ba bangwe, bao ba sa nyakego go dumelelana le batho ka selo, bao ba senyago ba bangwe maina, bao ba se nago boitshwaro, bao ba lego sehlogo, bao ba sa ratego dilo tšeo di lokilego, 4 bao ba hlanogelago bakgotse ba bona, ba dihlogo tše thata, bao ba iponago ba le kaone go feta batho ba bangwe le bao ba ratago menate go feta go rata Modimo. 5 Ba tla itira eka ba hlankela Modimo eupša tsela yeo ba phelago ka yona e sa bontšhe seo.+ Batho ba bjalo o be kgole le bona. 6 Ka gobane gare ga batho bao, go tla ba le banna bao ba tsenago ka dintlong tša batho ba bangwe ka go khukhuna gomme ba aroša basadi bao ba fokolago bao ba nago le dibe tše dintši, e lego bao ba laolwago ke dikganyogo tša mehutahuta. 7 Basadi bao ba dula ba ithuta eupša le ka mohla ga ba kgone go kwešiša nnete ka mo go feletšego.

8 Bjale banna ba le bona ba tšwela pele ba ganetša nnete go no swana le ka mokgwa wo Jannese le Jamborese ba ilego ba ganetša Moshe. Banna ba bjalo ba senyegile menagano gomme Modimo ga a ba amogele, ka gobane ga ba latele dithuto tšeo di re thušago go ba le tumelo. 9 Fela ba ka se tšwele pele go ya kae, ka gobane batho ka moka ba tlo kgona go bona dilo tša bošilo tšeo ba di dirago, go no swana le ge batho ba bangwe ba ile ba kgona go bona bošilo bja Jannese le Jamborese.+ 10 Eupša wena o ile wa theetša dithuto tša ka gabotse. Le gona o ile wa ekiša tsela yeo ke phelago ka yona,+ maikemišetšo a ka, tumelo ya ka, go se fele pelo ga ka, lerato la ka le go kgotlelela ga ka. 11 Wena o tseba kamoo ke ilego ka tlaišwa le kamoo ke ilego ka welwa ke mathata ge ke be ke le Antiokia,+ Ikonia+ le Lisitara.+ Ke ile ka kgotlelela ge ke be ke tlaišwa gomme Morena a nntšha mathateng ao ka moka.+ 12 Ge e le gabotse, balatedi ka moka ba Kriste Jesu bao ba nyakago go hlankela Modimo ka go tshepega le bona ba tla tlaišwa.+ 13 Eupša batho ba babe le bao ba itirago seo ba se go sona ba tla fetelela. Ba tla aroša batho gomme le bona ba arošwa.+

14 Eupša wena tšwela pele o latela dilo tšeo o di rutilwego gomme wa kgodišega gore ke nnete+ ka ge o tshepa batho bao ba go rutilego tšona. 15 Le gona o a tseba gore o tsebile Mangwalo a Makgethwa go tloga o sa le lesea.+ Mangwalo+ ao ke ona a dirago gore o hlalefe gore o tle o phologe ka gobane o na le tumelo go Kriste Jesu.+ 16 Dilo ka moka tšeo di ngwadilwego ka Mangwalong a Makgethwa di tšwa go Modimo+ gomme di hola ka go ruta batho,+ go ba bontšha seo se fošagetšego,* go ba phošolla+ le go ba bontšha tsela ya nnete yeo ba swanetšego go sepela ka yona, 17 e le gore mohlanka wa Modimo a tle a swanelege ka mo go feletšego, a kgone go dira mošomo o mongwe le o mongwe o mobotse.