O Ineetše—Go Mang?

“Ka moka tše Morêna a di boletšexo re tlo di dira, re tlo fêla rè laiwa ke tšôna.”—EKISODO 24:7.

1, 2. (a) Batho ba bangwe ba ineetše go eng? (b) Na boineelo bo dirwa feela ke bao e lego ditho tša bodumedi?

KA February 1945, bafofiši ba sefofane sa ntwa sa Zero fighter sa lephakga la sešole la Yatabe Flying Corps la Japane ba ile ba kgobokana ka holong. Yo mongwe le yo mongwe o ile a newa pampiri yeo go yona a bego a tla ngwala ge e ba a be a tla ithapela go ba setho sa madira a go hlasela a kamikaze. Mohlankedi yo a bego a le gona ka nako yeo o re, “Ke ile ka nagana gore e be e le pitšo ya-ka ya gore ke ikgafe nakong ya phetogo ya bohlokwa setšhabeng. Ka go tutuetšwa ke maikwelo gore ke itire gore ke hwetšwe, ke ile ka ikgafela thomo yeo.” O ile a tlwaeletšwa go šomiša le go fofiša Ohka (sefofane sa rokhete sa go bolaya) le go se thudiša sefofane sa ntwa sa manaba. Lega go le bjalo, ntwa e ile ya fela pele a ka ba le sebaka sa go dira bjalo, gomme ka go rialo a hwele naga ya gabo le mmušiši wa gagwe. Tumelo ya gagwe go mmušiši e ile ya senyega ge Japane e be e fenywa ntweng.

² Ka nako e nngwe, ba bantši kua Japane ba be ba ineetše go mmušiši, yoo ba bego ba dumela gore ke modimo yo a phelago. Dinageng tše dingwe go kile gwa ba le dilo tšeo go ineetšwego go tšona e bile di sa dutše di le gona. Ba dimilione ba ineetše go Maria, Buddha goba medingwana e mengwe—yeo gantši e emelwago ke medingwana ya diswantšho. Ka go tutuetšwa ke polelo e kgomago maikwelo, ba bantši ba tšhollela tšhelete ya bona yeo ba e šometšego ka thata ka dipotleng tša baebangedi ba TV ka thekgo ya pelo ka moka yeo e lekanago le boineelo. Ka morago ga ntwa, Majapane a nyamilego a ile a nyaka selo se sefsa seo ba bego ba ka neela maphelo a bona go sona. Go ba bangwe, mošomo o ile wa ba selo seo. E ka ba Bohlabela goba Bodikela, ba bantši ba ineela go kgobeleng mahumo. Bafsa ba bantši ba thea maphelo a bona maphelong a diopedi tšeo ba ekišago mekgwa ya tšona ya go phela. Batho ba bantši lehono ba thomile go ba barapedi ba bona ka noši, ba dira dikganyogo tša bona selo seo ba ineelago go sona. (Ba-Filipi 3:19; 2 Timotheo 3:2) Eupša na dilo tše bjalo goba batho ruri di swanelwa ke boineelo bja moya ka moka bja motho?

3. Dilo tše dingwe tšeo go ineelwago go tšona di ipontšhitše bjang e le tšeo di se nago mohola?

³ Ge ba lebane le therešo, barapedi ba medimo ya diswantšho gantši ba a nyama. Go ineela go medimo ya diswantšho go feleletša ka go ferekana ge barapedi ba lemoga gore medimo ya bona ya diswantšho e fo ba ‘yeo e dirilwego ka diatla tša batho.’ (Psalme 115:4) Ge ditiro tša dihlong tšeo di lego mabapi le baebangedi ba tumilego di pepentšhwa batho ba botegago ba ikwa ba nyamišitšwe. Ge tša boiphedišo “tše di hlokago maitseparelo” di fela, bašomi ba ile ba ba le mathata a tšharakano ya monagano ge ba ikhwetša lenaneong la bao ba tlogedišwago modiro ka nakwana. Go fokotšega ga tša boiphedišo ga morago bjale go bakile kotlo e šoro go barapedi ba Mammon. Dikoloto tšeo di bakilwego ka kholofelo ya go dira tšhelete e ntši di ile tša fetoga morwalo go se na kgonagalo ya go di lefelela. (Mateo 6:24 mongwalo wa ka tlase wa NW) Ge dinaledi tša mmino wa rock tšeo di dirilwego medingwana gotee le ba bangwe ba ba tlošago bodutu ba e-hwa goba ba felelwa ke botumo ganyenyane-ganyenyane, barapedi ba bona ba tlogelwa ba hlokomologilwe. Le gona bao ba ilego ba sepela tseleng ya boikgotsofatšo gantši ba buna dienywa tše mpe.—Ba-Galatia 6:7.

4. Ke’ng seo se tutueletšago batho go ineela dilong tše di se nago mohola?

⁴ Ke’ng seo se tutueletšago batho go ineela lefeeleng le le bjalo? Ka tekanyo e kgolo ke moya wa lefase ka tlase ga Sathane Diabolo. (Ba-Efeso 2:2, 3) Tutuetšo ya moya wo e bonwa ka ditsela tše di fapa-fapanego. Motho a ka no laolwa ke moetlo wa lapa woo o ilego wa fetišetšwa go tšwa go bagologolo ba gagwe. Thuto le tsela yeo motho a godišitšwego ka yona di ka tutuetša kudu tsela yeo a naganago ka yona. Boemo bja lefelong la mošomo bo ka hlohleletša “bahlabani ba khamphani” go lemaleleng mošomo mo go ka beago bophelo kotsing. Kganyogo ya go ba le go gontši e hlohleletšwa ke boemo bja kgopolo bja lefase bja go phegelela dilo tše di bonagalago. Dipelo tša ba bantši di senyegile, gomme di ba tutueletša go ineela dikganyogong tša bona ka noši tša boithati. Ba palelwa ke go hlahloba ge e ba dilo tše tšeo ba di phegelelago di swanelwa ke boineelo.

Setšhaba se se Ineetšego

5. Ke boineelo bofe bja go ineela go Jehofa bjo bo ilego bja dirwa nywageng e fetago 3 500 e fetilego?

⁵ Nywageng ya ka godimo ga e 3 500 e fetilego, setšhaba se tee sa batho se ile sa hwetša selo seo se swanelwago kudu ke boineelo. Ba ile ba ineela go Modimo yo a phagamego, Jehofa. E le sehlopha, setšhaba sa Isiraele se ile sa tsebatša boineelo bja sona go Modimo lešokeng la Sinai.

6. Leina la Modimo le be le swanetše go bolela’ng go ba-Isiraele?

⁶ Ke’ng seo se ilego sa tutueletša ba-Isiraele gore ba dire ka tsela ye? Ge ba be ba le bohlankeng kua Egipita, Jehofa o ile a roma Moše gore a ba etelele pele go ya tokologong. Moše o ile a botšiša mokgwa woo a bego a swanetše go hlalosa Modimo yo a bego a mo romile, gomme Modimo o ile a itsebiša e le “Ke tla ipontšha ke le yo ke tlago go ipontšha ke le yena.” O ile a laela Moše gore a botše barwa ba Isiraele gore: “Ke tla ipontšha ke le, o nthomile go lena.” (Ekisodo 3:13, 14, NW) Polelwana ye e bontšha gore Jehofa o ba selo le ge e le sefe seo se nyakegago e le gore a phethagatše merero ya gagwe. O be a ka ikutolla e le Mophethagatši wa dikholofetšo ka tsela yeo bo-rakgolokhukhu ba ba-Isiraele ba sa kago ba e tseba le ka mohla.—Ekisodo 6:2, 3.

7, 8. Ke bohlatse bofe bjo ba-Isiraele ba ilego ba ba le bjona bja gore Jehofa e be e le Modimo yo a swanelwago ke boineelo bja bona?

⁷ Ba-Isiraele ba ile ba bona go tlaišwa ga naga ya Egipita le batho ba yona ka Dikotlo tše Lesome. (Psalme 78:44-51) Ke moka mo e ka bago ba fetago ba dimilione tše tharo tša bona, go akaretša basadi le bana ba ile ba phutha gomme ba tloga nageng ya Gosene ka bošego botee, seo ka bosona e be e le modiro o mogolo. (Ekisodo 12:37, 38) Se se latelago, Lewatleng le Lehwibidu, Jehofa o ile a ikutolla e le “Moxale dintweng” ge a be a phološa batho ba gagwe madireng a tša bohlabani a Farao ka go arola lewatle go dumelela ba-Isiraele gore ba fete, gomme ka morago ya ba ka go le tswalela gore le nweletše ba-Egipita ba ba ba hlomarago. Ka baka la se, “Ké mo Ba-Isiraele ba bonexo tše seatla se sexolo sa Modimo se di dirilexo Ba-Egipita; xomme sethšaba sa boifa Morêna, sa dumêla Morêna.”—Ekisodo 14:31; 15:3; Psalme 136:10-15.

⁸ Bjalo ka ge eka ba be ba hloka bohlatse bja seo leina la Modimo le se bolelago, ba-Isiraele ba ile ba duma-dumela Jehofa le moemedi wa gagwe Moše mabapi le tlhaelelo ya dijo le meetse. Jehofa o ile a romela dikhwiri, a neša manna gomme a dira gore meetse a tšhologe letlapeng la Meriba. (Ekisodo 16:2-5, 12-15, 31; 17:2-7) Jehofa gape o ile a hlakodiša ba-Isiraele tlhaselong ya ba-Amaleke. (Ekisodo 17:8-13) Go be go se ka tsela yeo ba-Isiraele ba bego ba ka latola seo Jehofa ka morago a ilego a se botša Moše: “Morêna, Morêna, Modimo yo mabobo le kxauxêlô, wa xo se fêlê pelo, wa botho byo boxolo le therešô. Wa xo bolokêla ba dikete-kete botho, wa xo lebalêla batho bokxôpô le dikaroxô le dibê.” (Ekisodo 34:6, 7) Ka kgonthe, Jehofa o ipontšhitše e le yo a swanetšwego ke boineelo bja bona.

9. Ke ka baka la’ng Jehofa a ile a nea ba-Isiraele sebaka sa gore ba bolele boineelo bja bona bja go mo hlankela, gomme ba ile ba arabela bjang?

⁹ Gaešita le ge Jehofa a e-na le tshwanelo ya go ba mong wa ba-Isiraele ka gobane a ile a ba lopolla Egipita, yena bjalo ka Modimo yo botho le wa kgaugelo, o ile a ba nea sebaka sa gore ba bolele ka boithatelo kganyogo ya bona ya go nyaka go mo hlankela. (Doiteronomio 7:7, 8; 30:15-20) Gape o ile a hlalosa maemo a kgwerano magareng ga gagwe le ba-Isiraele. (Ekisodo 19:3-8; 20:1–23:33) Ge maemo a a be a laodišwa ke Moše, ba-Isiraele ba ile ba bolela gore: “Tšohle tše Morêna a di boletšexo re tlo di dira.” (Ekisodo 24:3-7) Ka boikgethelo bja bona ba ile ba ba setšhaba seo se neetšwego go Morena Mmuši Jehofa.

Tebogo e Lebiša Boineelong

10. Boineelo bja rena go Jehofa bo swanetše go thewa go eng?

¹⁰ Jehofa Mmopi o tšwela pele a swanelwa ke boineelo bja rena bja moya ka moka. (Maleaki 3:6; Mateo 22:37; Kutollo 4:11) Lega go le bjalo, boineelo bja rena ga se bja swanela go thewa maikwelong a go dumela tšohle, maikwelo ao a fetago ka pela goba kgatelelong e tšwago go ba bangwe—gaešita le batswadi. Bo swanetše go thewa tsebong e nepagetšego ya therešo ka Jehofa le tebogong ya go leboga seo Jehofa a re diretšego sona. (Ba-Roma 10:2; Ba-Kolose 1:9, 10; 1 Timotheo 2:4) Go fo etša ge Jehofa a ile a nea ba-Isiraele sebaka sa go bolela boineelo bja bona ka boithatelo, le rena o re nea sebaka sa gore re ineele ka boithatelo le go bontšha boineelo bjoo phatlalatša.—1 Petro 3:21.

11. Go ithuta ga rena Beibele go utolotše’ng ka Jehofa?

¹¹ Ka thuto ya Beibele, re thoma go tseba Modimo bjalo ka motho. Lentšu la gagwe le re thuša go lemoga dika tša gagwe bjalo ka ge di bonagatšwa tlholong. (Psalme 19:1-4) Re ka bona go tšwa Lentšung la gagwe gore ga se yena Boraro botee bja sephiri yo a ka se kego a kwešišwa. Ga a fenywe dintweng gomme ka go rialo ga se a swanela go gafa Bomodimo bja gagwe. (Ekisodo 15:11; 1 Ba-Korinthe 8:5, 6; Kutollo 11:17, 18) Ka gobane a ile a phethagatša dikholofetšo tša gagwe, re gopotšwa seo leina la gagwe le lebotse la Jehofa le se emelago. Ke Mophethagatši yo Mogolo wa Morero. (Genesi 2:4, mongwalo wa ka tlase wa NW; Psalme 68:4; Jesaya 46:9-11) Ka go ithuta Beibele, re thoma go kwešiša gabotse kamoo e lego yo a botegago.—Doiteronomio 7:9; Psalme 19:7, 9; 111:7.

12. (a) Ke’ng seo se re gokelago go Jehofa? (b) Diphihlelo tša kgonthe tšeo di begilwego ka Beibeleng di tutuetša motho bjang gore a nyake go hlankela Jehofa? (c) O ikwa bjang ka go hlankela Jehofa?

¹² Seo ka mo go kgethegilego se re gokelago go Jehofa ke semelo sa gagwe se lerato. Beibele e bontšha kamoo e lego yo lerato, yo a lebalelago le yo a gaugelago ka gona go dirišaneng ga gagwe le batho. Nagana kamoo a ilego a atlegiša Jobo ka gona ka morago ga ge Jobo yo a botegago a ile a kgomarela potego. Phihlelo ya Jobo e gatelela gore “Morêna ké wa dikxauxêlô tše ntši, ké yo pelo-thlomoxi.” (Jakobo 5:11; Jobo 42:12-17) Nagana kamoo Jehofa a ilego a dirišana le Dafida ka gona ge a be a dirile bohlotlolo gotee le go bolaya. Ee, Jehofa o ikemišeditše go lebalela gaešita le dibe tše dikgolo ge modiradibe a e-ya go yena ka ‘pelo e setlegilego le e robegilego.’ (Psalme 51:3-11, 17) Nagana ka tsela yeo Jehofa a ilego a dirišana ka gona le Saulo wa Tareso, yoo pele e bego e le motlaiši yo a ikemišeditšego wa batho ba Modimo. Mehlala ye e gatelela kgaugelo ya Modimo le boikemišetšo bja gagwe bjo bogolo bja go ikemišetša go diriša batho bao ba itsholago. (1 Ba-Korinthe 15:9; 1 Timotheo 1:15, 16) Paulo o ile a ikwa gore o be a ka gafela bophelo bja gagwe go hlankeleng Modimo yo yo lerato. (Ba-Roma 14:8) Na o ikwa ka tsela e swanago?

13. Ke pontšho efe e kgolo ya lerato ya Jehofa yeo e gapeletšago batho ba dipelo tše di lokilego gore ba ineele ka bobona go yena?

¹³ Go ba-Isiraele, Jehofa o ile a nea phološo go tšwa bohlankeng Egipita, gomme o lokišeditše mokgwa wa go re phološa bohlankeng bja sebe le lehu—e lego sehlabelo sa topollo sa Jesu Kriste. (Johane 3:16) Paulo o re: “Xomme Modimo, leratô le a re ratilexo ka lôna, ó le bônaxatša ka xe Kriste a re hwêla rè sa le ba-dira-dibe.” (Ba-Roma 5:8) Thulaganyo ye e botse e tutueletša batho ba dipelo tše di lokilego gore ba ineele go Jehofa ka Jesu Kriste. “Xobane re xapeletšwa ke leratô la Kriste, xomme re re: Xe Yêna a hwetše bohle è le o tee, xôna xo hwile bohle. O hwile ’bakeng sa bohle, xore ba ba phelaxo ba se kê ba hlwa ba iphelêla, ba phelêlê Yêna e a hwilexo ’bakeng sa bôná ’me a tsoxa bahung ’bakeng sa bôná.”—2 Ba-Korinthe 5:14, 15; Ba-Roma 8:35-39.

14. Na go fo tseba ka ditirišano tša Jehofa le batho go lekane bakeng sa go re tutueletša go neela maphelo a rena go yena? Hlalosa.

¹⁴ Lega go le bjalo, go ba le tsebo ka semelo sa Jehofa le ditirišano tša gagwe le batho ga se gwa lekana. Tebogo ya motho ka noši ya go leboga Jehofa e swanetše go hlagolelwa. Seo se ka dirwa bjang? Ka go diriša Lentšu la Modimo maphelong a rena le go iponela ka noši gore melao ya motheo yeo e hwetšwago ka go lona e tloga e šoma. (Jesaya 48:17) Re swanetše go ikwa gore Jehofa o re phološitše lerageng la lefase le le kgopo ka tlase ga pušo ya Sathane. (Bapiša le 1 Ba-Korinthe 6:11.) Ntweng ya rena ya go lwela go dira se se lokilego, re ithuta go ithekga ka Jehofa, gomme re iponela ka noši gore Jehofa ke Modimo yo a phelago, “Mokwi wa dithapêlô.” (Psalme 62:8; 65:2) Go se go ye kae re ikwa re le kgaufsi le yena gomme re kgona go mmotša maikwelo a rena a ka gare-gare. Maikwelo a borutho a lerato la go rata Jehofa a a gola ka go rena. Se ka ntle le pelaelo se tla re lebiša go neeleng maphelo a rena go yena.

15. Ke’ng seo se ilego sa tutuetša motho yo mongwe yo pele a bego a ineetše modirong gore a hlankele Jehofa?

¹⁵ Ba bantši ba thomile go tseba Modimo yo yo lerato Jehofa, gomme ba neetše maphelo a bona go mo hlankeleng. Tšea ka mohlala ra-mohlagase yo a bego a e-na le kgwebo e atlegago. Go be go e-na le dinako tšeo ka tšona a bego a thoma go šoma mesong gomme a šoma mosegare ka moka le go fihla bošego, gomme a boa ka iri ya bohlano mesong e latelago. Ka morago ga go ikhutša mo e ka bago ka iri, o be a e-ya modirong o latelago. O a elellwa, “Ke be ke ineetše mošomong wa-ka.” Ge mosadi wa gagwe a be a thoma go ithuta Beibele, o ile a mo latela. O re: “Medimo ka moka yeo ke ilego ka e tseba go ba go fihla ka nako yeo e be e letetše go hlankelwa, e sa dire selo go ka re hola. Eupša Jehofa o ile a gata mogato wa pele gomme a roma Morwa wa gagwe yo a tswetšwego a nnoši lefaseng ka boikgafo bjo bogolo bja motho ka noši.” (1 Johane 4:10, 19) Lebakeng la dikgwedi tše lesome, monna yo o ile a ineela go Jehofa. Ka morago ga moo, o ile a lebiša tlhokomelo go hlankeleng Modimo yo a phelago. O ile a tsenela bodiredi bja nako e tletšego gomme a ya go hlankela moo go bego go nyakega thušo e kgolo. Yena ka go swana le baapostola, ‘o ile a tlogela tšohle a latela Jesu.’ (Mateo 19:27) Ka morago ga dikgwedi tše pedi, yena le mosadi wa gagwe ba ile ba bitšwa gore ba tle ba hlankele lekaleng la Watch Tower Bible and Tract Society nageng yeo ba bego ba dula go yona, e le gore a tle a thuše ka modiro wa tša mohlagase. Ka nywaga ya ka godimo ga e 20, o be a dutše a šoma lekaleng, a dira modiro wo a o ratago—e sego bakeng sa gagwe eupša bakeng sa Jehofa.

Dira Boineelo bja Gago Phatlalatša

16. E mengwe ya megato yeo motho a ka e gatago ge a dira boineelo go Jehofa ke efe?

¹⁶ Ka morago ga go ithuta Beibele ka nako e itšego, ba bafsa gotee le ba bagolo ka mo go swanago ba tla thoma go leboga Jehofa le seo a ba diretšego sona. Se se swanetše go ba tutueletša go ineela go Modimo. Mo gongwe o ka ba o le yo mongwe wa bona. O ka ineela bjang go Jehofa? Ka morago ga go monya tsebo e nepagetšego go tšwa Beibeleng, o swanetše go dira ka go dumelelana le tsebo yeo gomme o bontšhe tumelo go Jehofa le go Jesu Kriste. (Johane 17:3) Itshole gomme o sokologe tseleng le ge e le efe ya nakong e fetilego ya sebe. (Ditiro 3:19) Ke moka o tla tla mogatong wa boineelo, wa o bolela ka mantšu a tšwago pelong a thapelo go Jehofa. Thapelo ye ga go pelaelo gore e tla tlogela kgopolo e sa lebalegego monaganong wa gago, ka gobane e tla ba mathomo a tswalano e mpsha le Jehofa.

17. (a) Ke ka baka la’ng bagolo ba hlahloba dipotšišo tšeo di lokišeditšwego le batho bao ba sa tšwago go ineela? (b) Ke mogato ofe wa bohlokwa woo o swanetšego go gatwa gatee-tee ka morago ga boineelo bja motho, gomme ka morero ofe?

¹⁷ Go fo etša ge Moše a ile a hlalosetša ba-Isiraele maemo a go tsenela tswalano ya kgwerano le Jehofa, bagolo ka diphuthegong tša Dihlatse tša Jehofa ba thuša bao ba sa tšwago go dira boineelo gore ba hlahlobe gabotse-botse seo se akaretšwago. Ba diriša dipotšišo tšeo di lokišeditšwego go kgonthišetša gore yo mongwe le yo mongwe o kwešiša ka botlalo dithuto tša motheo tša Beibele gomme o lemoga seo se akaretšwago tabeng ya go ba Hlatse ya Jehofa. Ke moka, tiragalo ya go dira boineelo phatlalatša ke yeo e tlogago e swanetše. Ka kakaretšo, motho yo a sa tšwago go ineela o fišegela go tsebiša ba bangwe gore o tsene tswalanong ye yeo e lego tokelo le Jehofa. (Bapiša le Jeremia 9:24.) Se se dirwa ka mo go swanetšego ka kolobetšo ya meetseng e le go bontšha boineelo. Go inwa meetseng ke moka wa ntšhwa go ona go swantšhetša gore o hwa tseleng ya gagwe ya pele ya bophelo ya boithati gomme o tsošetšwa tseleng e mpsha ya bophelo, e lego ya go dira thato ya Modimo. Ga se sakaramente, le gona ga se tirelo ya borapedi ya go swana le tirelo ya ma-Shinto ya misogi yeo go yona motho go dumelwago gore o hlwekišwa ke meetse.a Go e na le moo, kolobetšo ke boipolelo bja phatlalatša bja boineelo bjoo bo šetšego bo dirilwe ka thapelo.

18. Ke ka baka la’ng re ka kgodišega gore boineelo bja rena e ka se be bja lefeela?

¹⁸ Tiragalo ye ye e hlomphegago ke phihlelo e sa lebalegego, yeo e gopotšago mohlanka yo mofsa wa Modimo ka tswalano e sa felego yeo bjale a nago le yona le Jehofa. Ka go se swane le boineelo bjoo mofofiši wa kamikaze a ilego a bo dira go naga ya gabo le go mmušiši, boineelo bjo bja go ineela go Jehofa e ka se be bja lefeela, ka gobane ke yena Modimo ra-matla-ohle wa ka mo go sa felego yo a phethagatšago tšohle tšeo a rerago go di dira. Yena, yena a nnoši o swanelwa ke boineelo bja rena bja moya ka moka.—Jesaya 55:9-11.

19. Ke’ng seo se tlago go ahla-ahlwa sehlogong se se latelago?

¹⁹ Lega go le bjalo, go akaretšwa go gontši boineelong. Ka mohlala, boineelo bo kgoma bjang bophelo bja rena bja letšatši le letšatši? Se se tla ahla-ahlwa sehlogong se se latelago.

[Mongwalo wa tlase]

Na o a Gopola?

◻ Ke ka baka la’ng boineelo bjalo ka ge bo bonwa lefaseng bo ile bja feleletša ka manyami?

◻ Ke’ng seo se ilego sa tutuetša ba-Isiraele gore ba ineele go Jehofa?

◻ Ke’ng seo se re tutueletšago go hlankela Jehofa lehono?

◻ Re ineela bjang go Modimo?

◻ Ke’ng seo se bolelwago ke kolobetšo ya meetseng?

[Seswantšho go letlakala 10]

Isiraele kua Sinai e ineela go Jehofa