Lebaka Leo ka Lona o Swanetšego go ba Gona Dibokeng tša Bokriste

ROSARIO yo a dulago Amerika Borwa, o ile a thabela go ithuta Beibele le Elizabeth ka dikgwedi tše dintši. Go ithuta ka Mmušo wa Modimo le kamoo o tlago go tliša maemo a Paradeise mo lefaseng go be go thabiša Rosario. Lega go le bjalo, nako le nako ge Elizabeth a be a mo laleletša go ba gona Holong ya Mmušo, o be a gana. O be a nagana gore a ka ithuta Beibele a le gae gomme a dira seo e se bolelago, a dira bjalo ka ntle le go ba gona dibokeng tša phuthego. Na le wena o kile wa ipotšiša ge e ba ruri diboka tša Bokriste di go hola? Ke ka baka la’ng Modimo a rulaganyetša gore batho ba gagwe ba bokane gotee?

Ka ge Bakriste ba lekgolong la pele la nywaga ba be ba fapane kudu le batho bao ba bego ba ba dikologile, bogwera bjo bo lokilego bo be bo le bohlokwa gore ba tle ba atlege. Moapostola Paulo o ngwaletše phuthego e nngwe ya Bakriste ba pele gore: “Xore Le bê ba se naxo bosodi le lengalatsepa, Le bê bana ba Modimo ba ba se naxo senyalô Lé le xare xa bakxôpô le bahlanoxi ba mehla yeno, bao—Lè le mo xare xa boná—Le kaxo bônêxa byalo ka dietša lefaseng.” (Ba-Filipi 2:15) Bakriste ba bile le nako e thata kudu kua Judea, gomme ke bona bao Paulo a ilego a ba ngwalela ka gore: “A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo ka mokxwa wa ba bangwê; sa rena a e bê xo eletšana, xa-xolo ka xe letšatši le le kxaufsi; le lena Le a di bona.” (Ba-Hebere 10:24, 25) Re ka išana leratong le medirong e botse bjang ka go bokana gotee?

Kamoo Bakriste ba “Loutšanago” ka Gona

Lentšu la se-Gerika leo Paulo a le dirišitšego le fetoletšwe e le ‘išana’ ka go lebanya le ra “go loutša.” Seema sa Beibele se hlalosa kamoo Bakriste ba ‘loutšanago’ ka gona ge se re: “Thsipi e kxaritša thsipi; le mahlô a batho a a kxaritšana.” (Diema 27:17; Mmoledi 10:10) Re bjalo ka didirišwa tšeo di nyakago go loutšwa ka mehla. Ka ge go bontšha lerato go Jehofa le go dira diphetho tšeo di theilwego tumelong ya rena go bolela go ba ba fapanego le lefase, ka mehla go swanetše go ba bjalo ka ge eka re tšea tsela e fapanego le ya ba bantši.

Boiteko bjo bo tšwelago pele bja go ba ba fapanego bo ka fokodiša phišego ya rena medirong e mebotse. Eupja ge re e-na le ba bangwe bao ba ratago Jehofa, re a loutšana—re išana leratong le medirong e mebotse. Ka lehlakoreng le lengwe, ge re le noši, re ka ba le go inagana kudu. Dikgopolo tše di gobogilego tša boithati goba tša bošilo di ka tsena menaganong ya rena. “Mo-dula-thokô ó ile le boithatêlô; tše byôbana tšohle ó xanana natšô.” (Diema 18:1) Ke ka baka leo Paulo a ngwaletšego phuthego ya motseng wa Thesalonika gore: “Eletšanang-xê, e mongwê a axišê e mongwê ka mokxwa wo Le fêlaxo Le dira ka wôna.”—1 Ba-Thesalonika 5:11.

Ge Rosario a fetša thuto ya gagwe ya dithuto tša motheo tša Beibele, o ile a tšwela pele ka go se kopanele le phuthego. Ka gona, Elizabeth ge a palelwa ke go nea thušo e oketšegilego, o ile a kgaotša go mo etela. Lebaka la dikgwedi ka morago, molebeledi wa mosepedi o ile a etela Rosario gomme a mmotšiša gore: “Le ge setho se sengwe le se sengwe sa lapa se ka hwetša dijo tše bose ka go jela lebenkeleng la dijo, ke’ng seo ditho ka moka di tlago go se foša ka go se je ba le gotee gae?” Rosario a araba ka gore: “Ba tla lahlegelwa ke bogwera bja lapa.” O ile a kwešiša ntlha gomme a thoma go tla ka mehla dibokeng. O ile a hwetša e le mo go holago kudu mo e lego gore o bile gona sebokeng se sengwe le se sengwe ga e sa le go tloga moo.

Go kwa batho ba bangwe ba bontšha tumelo dilong tšeo le wena o di dumelago go a kgothatša gomme go bjalo le ka go bona kamoo tumelo e bjalo e fetotšego maphelo a bona. Paulo o ile a tseba se ka phihlelo ya gagwe ka noši, gomme a ngwalela phuthego ya Roma gore: “Xobane ke hloloxetšwe xo Le bôna, xore ke Le hlallêlê neô ya Môya, e bê xo Le tiiša. E tlo ba xo êmêlana ka tumêlô ya rena, xò le ya lena, xò le ya-ka.” (Ba-Roma 1:11, 12) Ge e le gabotse, go fetile nywaga pele Paulo a ka etela Roma, gomme ge a ba etela, o ile e le mogolegwa diatleng tša ba-Roma. Eupja ge a bona banababo bao ba tšwago Roma bao ba bego ba sepetše dikhilomithara tše fetago 60 go tšwa motseng go tla go mo gahlanetša, ‘Paulo o ile a leboga Modimo, a tia kholofelo.’—Ditiro 28:15.

Go Hwetša Dijo Tša Moya Dinakong tša Mathata

Ge a be a swerwe kua Roma a tswaleletšwe ka ngwakong, Paulo o ile a ngwalela Ba-Hebere mabapi le go se kgaotše go bokana gotee. Ke ga bohlokwa go rena ka ge a okeditše ka mantšu a rego: “Xa-xolo ka xe letšatši le le kxaufsi; le lena Le a di bôna.” (Ba-Hebere 10:25) Dihlatse tša Jehofa di ile tša bontšha ka go se fetoge go tšwa Mangwalong gore ngwaga wa 1914 o swaile mathomo a mehla ya bofelo bja lefase le le gore “letšatši la kahlolô la xo tlo lôba xa batho ba banyatši” le kgaufsi. (2 Petro 3:7) Go ya ka puku ya Beibele ya Kutollo, ge Diabolo a rakwa legodimong mathomong a mehla ya bofelo, o be a galefile ka kudu gomme ‘a tloga a yo tsoša ntwa le bao ba bego ba šaletše . . . ba ba gomaretšego melao ya Modimo, ba ba nago le bohlatse bja Jesu Kriste.’ (Kutollo 12:7-17) Ke gona, go kwa melao ya Modimo go bothata kudu mo nakong ye; re swanetše go kopana le badumedi-gotee go feta lege e le neng pele. Diboka di tla re thuša go matlafatša tumelo ya rena le lerato la rena la go rata Modimo e le gore re lwantšhe ditlhaselo tša Diabolo.

Lerato la go rata Modimo le tumelo ga di swane le meago yeo e dulelago ruri ka morago ga ge e agilwe. Go e na le moo, di swana le dilo tše phelago tšeo di golago ganyenyane-ganyenyane ge di fepja ka mehla eupja di a pona le go hwa ge di sa fepje. Ke ka baka leo Jehofa a neago dijo tša moya ka mehla go matlafatša batho ba gagwe. Ka moka ga rena re nyaka dijo tše bjalo, eupja re ka di hwetša kae ge e se mokgatlong wa Modimo le dibokeng tša ona? Ga go na mo gongwe.—Doiteronomio 32:2; Mateo 4:4; 5:3.

Jesu o ile a rotoša potšišo yeo e ka re thušago go bona kamoo a fepago phuthego ya Bokriste ka gona. O botšišitše: “Byale ké mang molaki e a bôtexaxo yo bohlale, yo mong wa xaxwe a mmeilexo xo laka bahlanka ba xaxwe le xo ba fa dijô ka lebaka la xôna? Wa lehlôxônôlô e tlo ba molaki eo, mong wa xaxwe xe a e-tla, a mo hwetša a dira tšona tšeo.” (Mateo 24:45, 46) Ke mang yo Jesu a mo kgethilego lekgolong la pele la nywaga go fepa balatedi ba gagwe, gomme ke mang yo a mo hweditšego a ba fepa ka go botega ge a boa a le matleng a Mmušo? Go molaleng gore ga go motho yo a phetšego go theoša le nywaga-kgolo yeo ka moka. Bohlatse bo bontšha gore molaki ke phuthego ya Bakriste ba tloditšwego ka moya, go fo swana le ge setšhaba sa Israele e be e le mohlanka wa Modimo mehleng ya pele ga Bokriste. (Jesaya 43:10) Ee, Jesu o re nea dijo tša moya ka sehlopha sa lefase ka bophara sa Bakriste ba tloditšwego ka moya, seo lehono se fetišetšago dijo tša moya ka diphuthego tša gabo rena tša Dihlatse tša Jehofa.

Tokišetšo ya Jesu ya mokero wa go aba dijo tša moya e ile ya hlaloswa ka mo go tšwelago pele ke moapostola Paulo: “Ó rotogetše kwa xodimo, a thopolla mathopya, a nea batho dineo [dimpho tše e lego banna, NW]. . . . Ba bangwe ya ba Baapostola, ba bangwe ya ba Baxoeledi, ba bangwê ya ba Badiši le Baruti, Ya ba xo hlamiša bakxêthwa xore ba kxônê xo dirêla phuthêxô, xore mmele wa Kriste o axišwê. Xore rena ka moka re be re fihlêlê botee bya tumêlo le bya tsebô ya xo tseba Morwa wa Modimo, re fihlêlê senna ka botlalô, le boxolwane bya xo lekanêla botlalo bya Kriste.”—Ba-Efeso 4:8, 11-13.

Kudu-kudu e be e le ka diphuthegong tša lefelong leo—dibokeng—mo ‘dimpho tše tšeo e lego banna’ di bego di aga banababo bona. Ka mohlala, kua Antiokia, “Juda le Silase, ba e bexo e le baporofeta le bona, ba eletša bana babô ba tumêlô ka ditaba tše ntši, ba ba tiiša.” (Ditiro 15:32) Dipolelo tšeo di newago ke banababo rena ba swanelegago moyeng lehono di tla fepa tumelo ya rena ka mo go swanago e le gore e se ke ya pona goba ya tapa.

E ka ba e le therešo gore re dirile tšwelopele e botse ka baka la go thušwa ke motho yo e lego setho sa phuthego gaešita lege re ka ba re se ra hlwa re thoma go ba gona dibokeng. Beibele e bolela gore go na le nako yeo ‘go ratago ge motho a boeletša go le ruta ditaba tša mathomo a thuto ya Modimo, ka ge le . . . fiwa lebese, e sego dijo tše tiilego.’ (Ba-Hebere 5:12) Eupja motho a ka se dule a le boemong bja go fepja ka lebese ka mo go sa felego. Diboka tša Bokriste di nea lenaneo le le tšwelago pele la thuto ya Beibele leo le rulaganyeditšwego go boloka lerato la go rata Modimo le tumelo go yena di phela gotee le go nea thušo e holago ka go diriša “dikeletšo tšohle tša Modimo.” (Ditiro 20:27, bapiša le NW.) Se ke se se fetago “lebese.” Beibele e tšwela pele ka gore: “Xe e le dijô tše tiilexo ké tša ba ba xodilexo, ba ba ithutilexo ba tlwaêla xo kxetholoxanya botse le bobe.” (Ba-Hebere 5:14) Dibokeng go ahla-ahlwa dithuto tše dintši tšeo e ka bago e se karolo ya thuto ya motheo ya legae ya Beibele, tše bjalo ka dithuto tša temana ka temana tša diporofeto tša bohlokwa tša Beibele le dipoledišano tše di tseneletšego tše di lego mabapi le kamoo re ka ekišago Modimo maphelong a rena ka noši.

Dikgopotšo tša Jehofa—di Bjalo ka Lentšu ka Morago ga Gago

Ka dithuto tše bjalo tša phuthego, Jehofa o re gopotša ka mehla mabapi le mohuta wa batho bao re swanetšego go ba bona. Dikgopotšo tše bjalo di bohlokwa. Ka ntle le tšona re tla sekamela boithating, boikgogomošong, le megabarung gabonolo. Dikgopotšo tše tšwago Mangwalong di tla re thuša go thabela ditswalano tše atlegago le batho ba bangwe le Modimo ka noši. Mongwadi wa Psalme 119:59 o dumetše gore: “Ke xopola ’tsela tša-ka, ’me ke sokollêla ’naô tša-ka mabohlatseng [dikgopotšong, NW] a xaxo.”

Ge re e ba gona ka mehla dibokeng tša Bokriste, re lemoga go phethagala ga boporofeta bja Jehofa ka Jesaya, bjo bo rego: “Molai wa lena a ka se hlwê a iphihla, mahlô a lena a tlo mmôna, Molai wa lena. Ditsêbê tša lena di tlo kwa ka nthaxo xa lena xe xo thwe: Tsela šé! Tšeang ka yôna!” Jehofa o šetša tšwelopele ya rena gomme ka lerato a re phošolle ge re gata mogato o fošagetšego. (Jesaya 30:20, 21; Ba-Galatia 6:1) O bile o nea thušo e oketšegilego go feta mo.

Go Hwetša Moya o Mokgethwa ka Phuthego

Ka go ba gona ka mehla dibokeng tša Bokriste le Dihlatse tša Jehofa, re matlafatšwa ke moya o mokgethwa wa Modimo wo o lego godimo ga batho ba gagwe. (1 Petro 4:14) Go feta moo, balebeledi ba Bakriste ka phuthegong ba kgethilwe ka moya o mokgethwa. (Ditiro 20:28) Matla a a dirago a tšwago go Modimo a na le tutuetšo e matla go Mokriste. Beibele e re: “Dienywa tša moya ke lerato, lethabo, khutšo, go se fele pelo, botho, bonolo, tumelo, boleta, boitshwaro.” (Ba-Galatia 5:22, 23, NW) Moya o mokgethwa, wo o šomago ka mokgatlo wa Modimo, gape o tla re thuša go hwetša kwešišo e botse ka mo go makatšago ya seo Jehofa a se boloketšego bao ba mo ratago. Ka morago ga go hlalosa gore batho ba tumilego ba tshepedišo ye ya dilo ba ka se kwešiše merero ya Modimo, Paulo o ngwadile gore: “’Me rena, Modimo ó re utolletše tšôna ka Môya wa xaxwe.”—1 Ba-Korinthe 2:8-10.

Ka ntle le dijo tša moya tše matlafatšago tumelo, phuthego e nea tlwaetšo go bao ba ratago go ba le karolo modirong o mogolo wa phuthego. Ke ofe?

Tlwaetšo e Newago ka Phuthego

Phuthego ya Bokriste ga se sehlopha sa tša leago mo batho ba ipshinago feela ka boithabišo gomme mohlomongwe ba kgothaletšana go phela maphelo a kaone. Jesu o laetše phuthego go iša ditaba tše di lokilego tša Mmušo go bao ba phelago lefsifsing la moya. (Ditiro 1:8; 1 Petro 2:9) Go tloga letšatšing le o hlomilwego ka lona, ka Pentekoste ya 33 C.E. e be e le mokgatlo wa baboledi. (Ditiro 2:4) Na o ile wa ba le phihlelo ya go leka go botša motho o mongwe ka merero ya Jehofa eupja wa palelwa ke go mo kgodiša? Diboka tša phuthego di nea tlwaetšo go motho ka noši ka bokgoni bja go ruta. Ka go ithuta mehlala ya Beibele, re ithuta go thea selo seo go dumelelanwago ka sona seo mabaka a tlago go newa ka sona, mokgwa wa go diriša Mangwalo e le motheo wa mabaka a kwagalago le tsela ya go thuša ba bangwe go naganišiša ka go diriša dipotšišo le diswantšho. Bokgoni bjo bjalo bo ka go thuša gore o be le lethabo le sa hlalosegego la go thuša motho o mongwe go kwešiša therešo ya Beibele.

Lefaseng le le hlagaditšwego ke ntwa le le gobogilego, phuthego ya Bokriste ke yona botšhabelo bja kgonthe bja moya. Lege e bopja ke batho ba sa phethegago, fela ke botšhabelo bja khutšo le lerato. Ka gona, e ba gona ka mehla dibokeng tša yona gomme o iponele ka noši therešo ya mantšu a mopsalme a rego: “A botse le thatêxo! xe bana ba motho bá dula bá kwana! . . . Xobane xôna-mó Morêna ó laetše thšexofatšô, bophelô neng le neng.”—Psalme 133:1, 3.