Mutu 16

Boma la Mulungu Liyamba Ulamuliro Wake

 1. (a) Kodi nkuchiyani kumene anthu a chikhulupiriro ayembekezera nthawi yaitali? (b) Kodi nchifukwa ninji ufumu wa Mulungu ukutchedwa “mudzi”?

KWA ZAKA ZIKWI zambiri anthu okhala ndi chikhulupiriro m’boma la Mulungu ayembekezera nthawi pamene likayamba ulamuliro wake. Mwa chitsanzo, Baibulo limanena kuti Abrahamu wokhulupirika “analindirira mudzi wokhala nawo maziko [enieni], mmisiri wake ndi womanga wake ndiye Mulungu.” (Ahebri 11:10) “Mudzi” umenewo ndiwo ufumu wa Mulungu. Koma kodi panopa nchifukwa ninji ukutchedwa “mudzi”? Izi ziri chifukwa chakuti m’nthawi zakale kunali kofala kwa mfumu kulamulira mudzi. Motero anthu kawirikawiri anaganizira za mudzi kukhala ufumu.

 2. (a) Kodi nchiyani chimene chikusonyeza kuti Ufumuwo unali weniweni kwa ophunizira oyambirira a Kristu? (b) Kodi iwo anafuna kudziwanji ponena za uwo?

² Ufumu wa Mulungu unali weniweni kwa atsatiri oyambirira a Kristu. Zimenezi zikusonyezedwa ndi chikondwerero chawo chachikulu mu ulamuliro wake. (Mateyu 20:20-23) Funso m’maganizo mwawo linali: Kodi ndiliti pamene Kristu ndi ophunzira ake akayamba kulamulira? Pa nthawi ina pamene Yesu anawonekera kwa ophunzira ake pambuyo pa chiukiriro chake, iwo anafunsa kuti: “Ambuye, kodi nthawi yino mubwezera ufumu kwa Israyeli?” (Machitidwe 1:6) Motero, kodi muli wofunitsitsa kudziwa pamene Kristu ayamba kulamulira monga Mfumu ya boma la Mulungu, monga momwedi ophunzira a Kristu analiri?

BOMA LIMENE AKRISTU AMAPEMPHA

 3, 4. (a) Kodi nchiyani chimene chikusonyeza kuti Mulungu nthawi zonse walamulira monga Mfumu? (b) Motero kodi nchifukwa ninji Kristu anaphunzitsa omtsatira kupempha ufumu wa Mulungu kuti udze?

³ Kristu anaphunzitsa omtsatira kupemphera kwa Mulungu: “Ufumu wanu udze. Kufuna kwanu kuchitidwe, monga kumwamba chomwecho pansi pano.” (Mateyu 6:9, 10) Koma wina anagfunse kuti: ‘Kodi Yehova Mulungu sanalamulire nthawi zonse monga mfumu? Ndipo ngati watero, nkupempheranji kuti ufumu wake udze?’

⁴ Zowona, Baibulo limatcha Yehova “Mfumu ya muyaya.” (1 Timoteo 1:17, NW) Ndipo limati: “Yehova anakhazika mpando wachifumu wake kumwamba; ndi ufumu wake uchita mphamvu ponsepo.” (Salmo 103:19) Motero Yehova nthawi zonse wakhala Wolamulira Wamkulu pa zolengedwa zake zonse. (Yeremiya 10:10) Komabe, chifukwa cha kupandukira ulamuliro wake m’munda wa Edene, Mulungu analinganiza boma lapadera. Limeneli ndilo boma limene Yesu Kristu pambuyo pake anaphunzitsa omtsatira kupempha. Chifuno chake ndicho kuthetsa mavuto ochititsidwa pamene Satana Mdyerekezi ndi ena anabwevuka ku ulamuliro wa Mulungu.

 5. Ngati uli ufumu wa Mulungu, kodi nchifukwa ninji ukutchedwanso ufumu wa Kristu ndi ufumu wa a144,000?

⁵ Boma Laufumu latsopano limeneli limalandira mphamvu yake ndi kuyenera kwa kulamulira kuchokera kwa Mfumu Yaikuluyo, Yehova Mulungu. Ndilo ufumu wake. Mobwerezabwereza, Baibulo limalitcha “ufumu wa Mulungu.” (Luka 9:2, 11, 60, 62; 1 Akorinto 6:9, 10; 15:50) Komabe, popeza kuti Yehova waika Mwana wake kukhala Wolamulira wake Wamkulu, limatchedwanso ufumu wa Kristu. (2 Petro 1:11) Monga momwe tinaphunzirira m’mutu wina wapitawo, anthu 144,000 ochokera pakati pa anthu adzalamulira ndi Kristu muufumu umenewu. (Chivumbulutso 14:1-4; 20:6) Motero Baibulo limautchanso kukhala “ufumu wawo.”—Danieli 7:27.

 6. Malinga ndi kunena kwa anthu ena, kodi ndiliti pamene ufumu wa Mulungu unayamba kulamulira?

⁶ Anthu ena amanena kuti Ufumuwo unayamba ulamuliro wake m’chaka chimene Yesu anabwerera kumwamba. Iwo amanena kuti Kristu anayamba kulamulira pamene anatsanulira mzimu woyera pa atsatiri ake pa tsiku la phwando Lachiyuda la Pentekoste m’chaka cha 33 C.E (Machitidwe 2:1-4) Koma boma Laufumu limene Yehova analinganiza kuti lithetse mavuto onse olengedwa ndi chipanduko cha Satana silinayambe ulamuliro wake nthawi imeneyo. Palibe chirichonse chosonyeza kuti ‘mwana wamwamuna,’ amene ali boma la Mulungu lokhala ndi Kristu monga wolamulira, anabadwa pa nthawi imeneyo ndi kuyamba ulamuliro wake. (Chivumbulutso 12:1-10) Eya, kodi Yesu m’njira iriyonse anali ndi ufumu m’chaka cha 33 C.E.?

 7. Kodi Kristu wakhala akulamulira yani chiyambire 33 C.E?

⁷ Inde, Yesu pa nthawi imeneyo anayamba kulamulira pa mpingo wake wa atsatiri amene, m’kupita kwa nthawi, anayenera kugwirizana naye kumwamba. Motero Baibulo limalankhula za iwo, pamene iwo ali padziko lapansi, kukhala akulowetsedwa mu “ufumu wa Mwana wa chikondi [cha Mulungu].” (Akolose 1:13) Koma ulamuliro umenewu, kapena “ufumu,” pa Akristu okhala ndi chiyembekezo cha moyo wakumwamba suli boma Laufumu limene Yesu anaphunzitsa omtsatira kupempha. Ndiwo ufumu pa anthu 144,000 okha amene adzalamulira naye kumwamba. Mkati monse mwa zaka mazana ambiri iwo akhala nzika zake zokha. Motero ulamuliro umenewu, kapena ‘ufumu wa Mwana wa chikondi cha Mulungu,’ udzatha pamene wotsirizira wa nzika zokhala ndi chiyembekezo cha kumwamba zimenezi afa ndi kugwirizana ndi Kristu kumwamba. Iwo sadzakhalanso nzika za Kristu, koma iwo pa nthawi imeneyo adzakhala mafumu limodzi naye m’boma Laufumu la Mulungu lolonjezedwa kalekale.

CHIYAMBI CHA ULAMULIRO PAKATI PA ADANI

 8. (a) Kodi nchiyani chimene chikusonyeza kuti pambuyo pa kuuka kwa Kristu pakakhala nthawi ya kuyembekezera asanayambe kulamulira? (b) Kodi Mulungu ananenanji kwa Kristu pamene inali nthawi yakuti iye alamulire?

⁸ Pamene Kristu anabwerera kumwamba pambuyo pa chiukiriro chake, iye sanayambe kulamulira pa nthawi imeneyo monga Mfumu ya boma la Mulungu. M’malo mwake, panayenera kukhala nthawi ya kuyembekezera, monga momwe mtumwi Paulo akufotokozera: “Munthu uyu [Yesu Kristu] anapereka nsembe imodzi ya machimo kosatha nakhala pansi pa padzanja la Mulungu, kuyambira pa nthawi imeneyo kumkabe mtsogolo akuyembekezera kufikira adani ake ataikidwa kukhala chopondapo mapazi ake.” (Aheb. 10:12, 13, NW) Pamene nthawi inafika yakuti Kristu ayambe kulamulira, Yehova anamuuza kuti: “Chitani ufumu [kapena, gonjetsani] pakati pa adani anu.”—Salmo110:1, 2, 5, 6.

 9. (a) Kodi nchifukwa ninji sialiyense amene akufuna ufumu wa Mulungu? (b) Pamene boma la Mulungu liyamba ulamuliro wake, kodi mitundu ikuchitanji?

⁹ Kodi zikumveka zachilendo kuti aliyense akakhala mdani wa boma la Mulungu? Komabe sialiyense amafuna kukhala pansi pa boma limene limafuna nzika zake kuchita chimene chiri chabwino. Motero litasimba mmene Yehova ndi Mwana wake akatengera ulamuliro wadziko, Baibulo limati, “amitundu anakwiya.” (Chivumbulutso 11:15, 17, 18) Mitundu sikulandira ufumu wa Mulungu chifukwa chakuti Satana akuilowetsa m’kuutsutsa.

10, 11. (a) Pamene boma la Mulungu liyamba ulamuliro wake, kodi nchiyani chimene chikuchitika kumwamba? (b) Kodi chiyani chimene chikuchitika padziko lapansi? (c) Motero kodi ndimfundo yofunika yotani imene tikufuna kukumbikira?

¹⁰ Pamene boma la Mulungu liyamba ulamuliro wake, Satana ndi angelo ake ali chikhalirebe kumwamba. Popeza kuti iwo akutsutsa ulamuliro Waufumu, nthawi yomweyo nkhondo ikuulika. Monga chotulukapo chake, Satana ndi angelo ake akuchotsedwa kumwamba. Zitatero, mawu opfuula akuti: “Tsopano zafika chipulumutso, ndi mphamvu, ndi ufumu za Mulungu wathu, ndi ulamuliro wa Kristu wake.” Inde, ulamuliro wa boma la Mulungu ukuyamba! Ndipo Satana ndi angelo ake pokhala atachotsedwa kumwamba, kumeneko kuli kukondwera. “Chifukwa chake, kondwerani, miyamba inu, ndi inu akukhala momwemo!” Baibulo limatero.—Chivumbulutso 12:7-12.

¹¹ Kodi inonso ndinthawi yokondweretsa ya dziko lapansi? Ayi! M’malo mwake, pali nthawi ya vuto yaikulu koposa imene dziko lapansi silinakhale nayo. Baibulo limatiuza kuti: “Tsoka mtundu ndi nyanja, chifukwa Mdyerekezi watsikira kwa inu, wokhala nawo udani waukulu, podziwa kuti kamtsalira kanthawi.” (Chivumbulutso 12:12) Motero imeneyi ndiyo mfundo yaikulu yokumbukira: Chiyambi cha ulamuliro wa ufumu wa Mulungu sichimatanthauza mtendere wamwamsanga ndi chisungiko padziko lapansi. Mtendere weniweni udzadza pambuyo pake pamene ufumu wa Mulungu utenga ulamuliro wotheratu wa dziko lapansi. Zimenezi zikuchitika pa mapeto a “kanthawi,” pamene Satana ndi angelo ake adzachotsedwa kotero kuli iwo sangachititsire vuto aliyense.

12. Kodi nchifukwa ninji tingayembekezere kuti Baibulo likatiuza nthawi pamene ufumu wa Mulungu uyamba ulamuliro wake?

¹² Koma kodi ndiliti pamene Satana akuchotsedwa kumwamba, motero akumachititsa vuto padziko lapansi kwa “kanthawi”? Kodi ndiliti pamene boma la Mulungu likuyamba ulamuliro wake? Kodi Baibulo limapereka yankho? Tiyenera kuyembekezera kuti likatero? Chifukwa ninji? Eya, chifukwa chakuti kalekale pasadakhale Baibulo linaneneratu nthawi pamene Mwana wa Mulungu akawonekera choyamba monga munthu padziko lapansi kuti akhele Mesiya. Kunena zowona, linasonyeza chaka chenicheni chimene iye anakhala Mesiya. Pamenepa, bwanji ponena za kudza kwa Mesiya, kapena Kristu, kofunika kwambiridi, kuti ayambe ulamuliro wake Waufumu? Ndithudi tikayembekezera kuti Baibulo likatiuzanso nthawi pamene zimenezi zikachitika!

13. Kodi ndimotani mmene Baibulo limaneneratu chaka chenicheni chimene Mesiya anawonekera padziko lapansi?

¹³ Koma munthu angafunse kuti: ‘Kodi mpati pamene Baibulo limaneneratu chaka chenicheni chimene Mesiya anawonekera padziko lapansi?’ Bukhu Labaibulo la Danieli limati: “Kuyambira kutuluka lamulo lakukonzanso, ndi kummanga Yerusalemu, kufikira Wodzozedwayo ndiye Karonga, kudzakhala masabata asanu ndi awiri; ndi masabata makumi asanu ndi limodzi mphambu awiri,” kapena onse pamodzi masabata 69. (Danieli 9:25) Komabe, amenewa, sali masabata enieni 69, amene akukwanira masiku 483 okha, kapena opitirira pang’ono chaka chimodzi. Iwo ndiwo masabata 69 a zaka, kapena zaka 483. (Yerekezerani ndi Numeri 14:34.) Lamulo la kokonza ndi kumanganso linga la Yerusalemu linaperekedwa mu 455 B.C.E.a (Nehemiya 2:1-8) Motero masabata 69 a zaka amenewa anatha zaka 483 pambuyo pake, mu 29 C.E. Ndipo chimenecho ndicho chaka chenichenicho chimene Yesu anadza kwa Yohane kuti abatizidwe! Pa nthawi imeneyo iye anadzozedwa ndi mzimu woyera ndipo anakhala Mesiya, kapena Kristu.—Luka 3:1, 2, 21-23.

PAMENE BOMA LA MULUNGU LIYAMBA ULAMULIRO WAKE

14. Kodi “mtengowo” m’Danieli chaputala chachinai umaphiphiritsira chiyani?

¹⁴ Chabwino, pamenepa, kodi mpati pamene Baibulo limaneneratu chaka chimene Kristu akuyamba kulamulira monga ufumu ya boma la Mulungu? Ndimo m’bukhu Labaibulo limodzimodzili la Danieli. (Danieli 4:10-37) M’menemo, mtengo wautali kufikira kumwamba ukugwiritsiridwa ntchito kuphiphiritsira Mfumu Nebukadinezala ya Baibulo. Iye anali wolamulira waumunthu wapamwamba kwambiri pa nthawi imeneyo. Komabe, Mfumu Nebukadinezala anakakamizidwa kudziwa kuti wina wokulirapo anali kulamulira. Ameneyu ndiye “Wam’mwambamwamba,” kapena “Mfumu ya kumwamba,” Yehova Mulungu. (Danieli 4:34, 37) Motero, m’njira yofunika kwambiri, mtengo wofika kumwamba umenewu, ukudzaphiphiritsira ulamuliro waukulu wa Mulungu, makamaka m’kugwirizana kwake ndi dziko lathu lapansi. Ulamuliro wa Yehova unasonyezedwa kwa kanthawi mwa ufumu umene iye anakhazikitsa pa mtundu wa Israyeli. Motero mafumu a fuko la Yuda amene analamulira pa Aisrayeli ananenedwa kukhala ‘akukhala pa mpando wachifumu wa Yehova.’—1 Mbiri 29:23.

15. Pamene “mtengowo” unalikhidwa, kodi nchifukwa ninji mikombero inaikidwa pa uwo?

^{15 M}alinga ndi kunena kwa cholembedwa Chabaibulo m’Danieli chaputala chachinai, mtengo wofika kumwambawo unalikhidwa. Komabe, chitsa chinasiyidwa, ndipo mkombero wa chitsulo ndi wa mkuwa unaikidwa pa icho. Zimenezi zikachititsa chitsacho kusaphukira kufikira itakhala nthawi ya Mulungu ya kuchotsa mikombero ndi kuchilola kuyamba kuphukiranso. Koma kodi ndimotani ndipo ndiliti pamene ulamuliro wa Mulungu unalikhidwa?

16. (a) Kodi ndimotani ndipo ndiliti pamene ulamuliro wa Mulungu unalikhidwa? (b) Kodi nchiyani chimene mfumu yotsiriza ya Yuda kukhala pa “mpando wachifumu wa Yehova” inauzidwa?

¹⁶ M’kupita kwa nthawi, ufumu wa Yuda umene Yehova adakhazikitsa unakhala woipa kwambiri chakuti analola Mfumu Nebukadinezala kuuchotsa, kuulikha. Zimenezi zinachitika m’chakacho 607 B.C.E. Pa nthawi imeneyo Zedekiya, mfumu yotsiriza ya Yuda kukhala mpando wachifumu wa Yehova, anauzidwa kuti: “Chotsa chilemba . . . ndithudi sichidzakhala cha aliyense kufikira iye atadza amene ali ndi kuyenera kwalamulo, ndipo ndiyenera kuchipereka kwa iye.”—Ezekieli 21:25-27, NW.

17. Kodi ndinyengo yanthawi yotani imene inayamba mu 607 B.C.E.?

¹⁷ Motero ulamuliro wa Mulungu, monga momwe unaphiphiritsiridwira ndi “mtengo,” unalikhidwa mu 607 B.C.E. Panalibenso boma loimira ulamuliro wa Mulungu m’dziko lapansi. Chifukwa cha chimenecho, mu 607 B.C.E. nyengo ya nthawi inayamba imene Yesu Kristu pambuyo pake anaitchula kukhala “nthawi zoikidwiratu za mitundu,” kapena, “nthawi za Akunja.” (Luka 21:24; King James Version) Mkati mwa “nthawi zoikidwiratu” zimenezi Mulungu analibe boma loimira ulamuliro wake m’dziko lapansi.

18. Kodi nchiyani chimene chinayenera kuchitika pa mapeto a “nthawi zoikidwiratu za mitundu”?

¹⁸ Kodi nchiyani chimene chinayenera kuchitika pa mapeto a “nthawi zoikidwiratu za mitundu” zimenezi? Yehova anayenera kupereka mphamvu ya kulamulira kwa Iye ‘amene ali ndi kuyenera kwalamulo.” Ameneyu ndiye Yesu Kristu. Motero ngati tingapeze nthawi pamene “nthawi zoikidwiratu za mitundu” zitha, tidzadziwa nthawi pamene Kristu akuyamba kulamulira monga mfumu.

19. Kodi ulamuliro wa Mulungu padziko lapansi ukadodometsedwa kwa “nthawi zingati?

¹⁹ Malinga ndi kunena kwa Danieli chaputala chachinai, “nthawi zoikidwiratu” zimenezi zikakhala “nthawi zisanu ndi ziwiri.” Danieli akusonyeza kuti kudzakhala “nthawi zisanu ndi ziwiri” mkati mwa zimene ulamuliro wa Mulungu, monga momwe unaphiphiritsiridwira ndi “mtengo,” sukakhala ukugwira ntchito padziko lapansi. (Danieli 4:16, 23) Kodi “nthawi zisanu ndi ziwiri” zimenezi nzazitali motani?

20. (a) Kodi “nthawi” imodzi njautali wotani? (b) Kodi “nthawi zisanu ndi ziwiri” nzazitali motani? (c) Kodi nchifukwa ninji tikuwerenga tsiku kukhala chaka?

²⁰ M’Chivumbulutso chaputala 12, vesi 6 ndi 14, tikuphunzira kuti masiku 1,260 ngolingana ndi “nthawi [ndiko kuti, nthawi 1], ndi zinthawi [ndiko kuti nthawi 2], ndi nusu la nthawi.” Ndicho chiwonkhetso cha nthawi 3 1⁄2. Motero “nthawi” ikakhala yolingana ndi masiku 360. Chifukwa cha chimenecho, “nthawi zisanu ndi ziwiri” zikakhala 7 kuchulukitsa ndi 360, kapena masiku 2,520. Tsopano ngati tiwerenga tsiku limodzi kukhala chaka, malinga ndi njira Yabaibulo, “nthawi zisanu ndi ziwiri” zikukwanira zaka 2,520.—Numeri 14:34; Ezekieli 4:6.

21. (a) Kodi ndiliti pamene “nthawi zoikidwiratu za mitundu” zikuyamba ndi kutha? (b) Kodi ndiliti pamene boma la Mulungu likuyamba ulamuliro wake? (c) Kodi nchifukwa ninji kuli koyenerabe kupempha ufumu wa Mulungu kuti udze?

²¹ Taphunzira kale kuti “nthawi zoikidwiratu za mitundu” zinayamba m’chaka cha 607 B.C.E. Motero mwa kuwerenga zaka 2,520 kuchokera pa deti limenelo, tikufika ku 1914 C.E. Chimenecho ndicho chaka chimene “nthawi zoikidwiratu” zimenezi zinatha. Mamiliyoni ambiri a anthu okhalabe ndi moyo akukumbukira zinthu zimene zinachitika mu 1914. M’chaka chimenecho, Nkhondo Yoyamba ya Dziko inayamba nyengo ya vuto lowopsa imene yapitirizabe kufikira ku nthawi yathu. Zimenezi zikutanthauza kuti Yesu Kristu anayamba kulamulira monga mfumu ya boma lakumwamba la Mulungu mu 1914. Ndipo chifukwa chakuti Ufumuwo wayamba kale ulamuliro wake, nkwapanthawi yake motani mmene kuliri kuti tikuupempha kuti “udze” ndi kuchotsa padziko lapansi dongosolo la zinthu loipa la Satana!—Mateyu 6:10; Danieli 2:44.

22 Komabe munthu angafunse kuti: ‘Ngati Kristu wabwera kale kudzalamulira muufumu wa Atate wake, Kodi nchifukwa ninji sitikumuwona?’

[Mawu a M’munsi]

22. Kodi ndifunso lotani limene ena angafunse?

[Tchati pamasamba 140, 141]

Mu 607 B.C.E. ufumu wa Mulungu wa Yuda unagwa.

Mu 1914 C.E. Yesu Kristu anayamba kulamulira monga mfumu ya boma lakumwamba la Mulungu

607 B.C.E.—1914 C.E.

October, 607 B.C.E.—October, 1 B.C.E. = Zaka 606

October, 1 B.C.E.—October, 1914 C.E. = Zaka 1,914

NTHAWI ZISANU NDI ZIWIRI ZA AMITUNDU = Zaka 2,520

[Chithunzi patsamba 134]

“Kodi nthawi yino mubwezera ufumu kwa Aisrayeli?”

[Chithunzi patsamba 139]

Mtengo wautali m’Danieli chaputala 4 umaphiphiritsira ulamuliro wa Mulungu. Kwa kanthawi umenewu unasonyezedwa mwa ufumu wa Yuda

[Chithunzi pamasamba 140, 141]

Mtengowo unalikhidwa pamene ufumu wa Yuda unagwetsedwa

Mutu 17

Kubweranso kwa Kristu—Kodi Kuwoneka Motani?

 1. (a) Kodi Kristu anapereka lonjezo lotani? (b) Kodi pali kufunika kotani kwa kubweranso kwa Kristu?

“NDIDZABWERANSO.” (Yohane 14:3) Yesu Kristu anapereka lonjezo limeneli kwa atumwi ake pamene anali nawo usiku wotsatiridwa ndi imfa yake. Mwina mwake mudzavomereza kuti sipanakhale kufunika kokulirapo kwa mtendere, thanzi ndi moyo zimene kubweranso kwa Kristu m’mphamvu Yaufumu kudzathetsa kwa anthu. Koma kodi Kristu akubweranso motani? Kodi ndani amene akumuwona, ndipo m’njira yotani?

 2. (a) Pamene abweranso, kodi Kristu akutengera kuti atsatiri ake odzozedwa, kuphatikizapo atumwi ake, kukakhala? (b) Kodi iwo kumeneko akukhala ndi matupi a mtundu wotani?

² Pa kubweranso kwake, Kristu sakudza kudzakhala padziko lapansi. M’malo mwake, awo amene ayenera kulamulira monga mafumu limodzi naye akutengedwa kukakhala naye kumwamba. Yesu anauza atumwi ake kuti: “Ndidzabweranso, ndipo ndidzalandira inu kwa Ine ndekha; kuti kumene kuli Ineko, mukakhale inunso.” (Yohane 14:3) Motero, pamene Kristu abweranso, awo amene akutengeredwa kumwamba akukhala anthu auzimu, ndipo iwo akuwona Kristu m’thupi lake lauzimu laulemerero. (1 Akorinto 15:44) Koma kodi ena a anthu, amene sakupita kumwamba, akuwona Kristu pamene abweranso?

CHIFUKWA CHAKE IYE SAKABWERANSO MONGA MUNTHU

 3. Kodi ndiumboni Wabaibulo wotani umene umasonyeza kuti anthu sazawonanso Kristu?

³ Usiku umodzimodziwo Yesu anapitiriza kunena kwa atumwi ake kuti: “Katsala kanthawi. Ndipo dziko lapansi silindiwonanso Ine.”(Yohane 14:19) Dziko lapansi” limatanthauza anthu. Motero Yesu panopa mwachimvekere ananena kuti anthu padziko lapansi sakamuwonanso pambuyo pa kukwera kwake kumwamba. Mtumwi Paulo analemba kuti: “Ndipo ngati tizindikira Kristu monga mwa thupi, koma tsopano sitimzindikiranso motero.”—2 Akorinto 5:16.

 4. Kodi nchiyani chimene chikusonyeza kuti Kristu akubweranso monga munthu wauzimu wosawoneka wamphamvu?

⁴ Komabe anthu ambiri amakhulupirira kuti Kristu adzabweranso m’thupi laumunthu limodzimodzilo m’limene iye anaphedwa, ndi kuti awo onse okhala ndi moyo padziko lapansi adzamuwona. Komabe, Baibulo limanena kuti Kristu akubweranso mu ulemerero limodzi ndi angelo onse, ndi kuti iye akukhala “pachimpando cha kuwala kwake.” (Mateyu 25:31) Ngati Yesu akanati adze ndi kukhala pansi monga munthu pampando wachifumu wapadziko lapansi, iye akanakhala wotsikirapo m’malo koposa angelo. Koma iye akudza monga wamphamvu koposa ndi waulemerero koposa ana auzimu a Mulungu onsewa ndipo chifukwa cha chimenecho ngwosawoneka, monga momwedi iwo aliri.—Afilipi 2:8-11.

 5. Kodi nchifukwa ninji Kristu sakabweranso m’thupi laumunthu?

⁵ Ndiponso, koposa zaka 1,900 zapitazo kunali kofunika kwa Yesu kudzitsitsa ndi kukhala munthu. Iye anafunikira kupereka moyo wake waumunthu wangwiro monga dipo kwa ife. Yesu pa nthawi ina anakufotokoza motere: “Mkate umene ndidzapatsa Ine, ndiwo thupi langa, ukhale moyo wa dziko lapansi.” (Yohane 6:51) Yesu motero anapereka thupi lake lanyama mu nsembe kaamba ka anthu. Kodi nsembe imeneyo ikakhala ikugwira ntchito kwautali wotani? Mtumwi Paulo akuyankha kuti: “Tayeretsedwa mwa chopereka cha thupi la Yesu Kristu, kamodzi, kwatha.” (Ahebri 10:10) Atapereka thupi lake kaamba ka moyo wa dziko lapansi, Kristu sakadalitenganso ndi kukhala munthu kachiwiri. Kaamba ka chifukwa chachikulu chimenecho kubweranso kwake sikungakhale m’thupi laumunthu limene iye analipereka nsembe kamodzi kwatha.

THUPI LANYAMA SILITENGEREDWE KUMWAMBA

 6. Kodi nchifukwa ninji anthu ambiri amakhulupirira kuti Kristu anatengera thupi lake lanyama kumwamba?

⁶ Komabe, anthu ambiri amakhulupirira kuti Kristu anatengera thupi lake lanyama kumwamba. Iwo amasonyeza chenicheni chakuti pamene Kristu anaukitsidwa kwa akufa, thupi lake lanyama silinalinso m’manda. (Marko 16:5-7) Ndiponso, pambuyo pa imfa yake Yesu anawonekera kwa ophunzira ake m’thupi lanyama kuwasonyeza kuti iye anali wamoyo. Pa nthawi ina Iye anachititsa mtumwi Tomasi kupisa dzanja lake mu una wam’nthinthi Mwake kotero kuti Tomasi akakhulupirire kuti Iye adaukitsidwadi. (Yohane 20:24-27) Kodi zimenezi sizimatsimikizira kuti Kristu anaukitsidwa wamoyo m’thupi limodzimodzilo m’limene iye anaphedwera?

 7. Kodi nchiyani chimene chimatsimikizira kuti Kristu anapita kumwamba monga munthu wauzimu?

⁷ Ayi, sizikutero. Baibulo nlomvekera bwino kwambiri pamene limati: “Kristu anafa kamodzi kwatha ponena za machimo . . . , iye akumaphedwa m’thupi lanyama, koma akumakhalitsidwa wamoyo mu mzimu.” (1 Petro 3:18, NW) Anthu okhala ndi matupi anyama ndi mwazi sangakhale kumwamba. Ponena za chiukiriro cha kumoyo wakumwamba, Baibulo limati: “Lifesedwa thupi lachibadwidwe, liukitsidwa thupi lauzimu. . . . thupi ndi mwazi sizingathe kulowa ufumu wa Mulungu.”(1 Akorinto 15:44-50) Anthu okha auzimu okhala ndi matupi auzimu angakhale kumwamba.

 8. Kodi nchiyani chimene chinachitikira thupi laumunthu la Kristu?

⁸ Chabwino, pamenepa, kodi nchiyani chimene chinachitikira thupi lanyama la Yesu? Kodi ophunzirawo sanapeze manda ake apululu? Iwo anatero, chifukwa chakuti Mulungu anachotsa thupi la Yesu. Kodi nchifukwa ninji Mulungu anachita zimenezi? Kunakwaniritsa zimene zidalembedwa M’Baibulo. (Salmo 16:10; Machitidwe 2:31) Motero Yehova anawona kukhala koyenera kuchotsa thupi la Yesu, monga momwe iye adachitira kale ndi thupi la Mose. (Deuteronomo 34:5, 6) Ndiponso, ngati thupilo likadasiyidwa m’manda, ophunzira a Yesu sakanamvetsetsa kuti iye adaukitsidwa kwa akufa, popeza kuti pa nthawi imeneyo iwo sanazindikire mokwanira zinthu zauzimu.

 9. Kodi kunatheka motani kuti Tomasi apise dzanja lake pa chironda m’thupi losandulizidwa la Yesu woukitsidwayo?

⁹ Koma popeza kuti mtumwi Tomasi anali wokhoza kupisa dzanja lake mu una m’nthiti mwa Yesu, kodi zimenezo sizikusonyeza kuti Yesu anaukitsidwa kwa akufa m’thupi limodzimodzilo limene linakhomeredwa pa mtengo? Ayi, pakuti Yesu anangosanduka kapena anangovala thupi lanyama, monga momwe angelo adachitira kale. Kuti akhutiritse maganizo Tomasi za amene Iye anali, Iye anagwiritsira ntchito thupi lokhala ndi mauna azironda. Iye anawonekera, kapena anawoneka kukhala, munthu weniweni, wokhoza kudya ndi kumwa, monga momwedi anachitira angelo amene Abrahamu anachereza pa nthawi ina. —Genesis 18:8; Ahebri 13:2.

10. Kodi nchiyani chimene chikusonyeza kuti Yesu anavala matupi anyama osiyanasiyana?

¹⁰ Pamene Yesu anawonekera kwa Tomasi m’thupi lofanana ndi m’limene iye anaphedwa, Iye anavalanso matupi osiyanasiyana powonekera kwa atsatiri Ake. Motero Maliya wa Magadala poyamba anaganiza kuti Yesu anali wakumunda. Pa nthawi zina ophunzira ake sanamzindikire poyamba. M’zochitika zimenezi sikanali kawonekedwe kake ka iye mwini kamene kanatumikira kumdziwikitsa, koma anali mawu ena kapena kachitidwe kamene iwo anazindikira.—Yohane 20:14-16; 21:6, 7; Luka 24:30, 31.

11, 12. (a) Kodi Kristu anachoka padziko lapansi mu mkhalidwe wotani? (b) Motero tiyenera kuyembekezera kubweranso kwa Kristu mu mkhalidwe wotani?

¹¹ Kwa masiku 40 pambuyo pa chiukiriro chake, Yesu anawonekera m’thupi lanyama kwa ophunzira ake (Machitidwe 1:3) Ndiyeno ananyamuka kupita kumwamba. Koma ena angafunse kuti: ‘Kodi angelo awiri amene analipo sanauze atumwi kuti Kristu “adzadza momwemo monga munamuwona alinkupita kumwamba”?’ (Machitidwe 1:11) Inde, iwo anatero. Koma wonani kuti iwo anati “momwemo,” osati m’thupi limodzimodzilo. Ndipo kodi mkhalidwe wa kuchoka kwa Yesu unali wotani? Unali wakachetechete, wopanda kudziwonetsera poyera. Atumwi ake okha anakudziwa. Dziko silinakudziwe.

¹² Lingalirani mmene Baibulo limafotokozera mmene Yesu anasiyira atumwi ake pa ulendo wake wakumwamba: “Ali chipenyerere iwo, ananyamulidwa; ndipo mtambo unamlandira Iye kumchotsa kumaso kwawo.” (Machitidwe 1:9) Motero pamene Yesu anayamba kulowa kumwamba mtambo unambisa ku maso enieni a atumwi ake. Chifukwa cha chimenecho, Yesu wochokayo anakhala wosawoneka kwa iwo. Iwo sanathe kumuwona. Ndiyeno anakwera kumwamba m’thupi lake lauzimu. (1 Petro 3:18) Motero kubweranso kwake kukakhalanso kosawoneka, m’thupi lauzimu.

MMENE AKUWONEDWERA NDI DISO LIRILONSE

13.Kodi tiyenera kumva motani kanenedwe kakuti “diso lirilonse lidzawona” Kristu pamene adza ndi mitambo?

¹³ Pamenepa, kodi ndimotani mmene tingamvere mawu a Chivumbulutso 1:7? Pamenepo mtumwi Yohane akulemba kuti: “Tawonani adza ndi mitambo; ndipo diso lirilonse lidzampenya Iye, iwonso amene anampyoza; ndipo mafuko onse apadziko adzamlira Iye.” Panopo Baibulo likutchula kuwona, osati ndi maso enieni, koma m’lingaliro la kuzindikira kapena kumva. Motero, pamene munthu amva kapena azindikira chinthu, iye anganene kuti, ‘Ndikuwona.’ Baibulo, kunena zowona, limatchula “maso a kuzindikira kwanu.” (Aefeso 1:8, King James Version) Motero kanenedweko “diso lirilonse lidzampenya Iye” kamatanthauza kuti munthu aliyense pa nthawi imeneyo adzamva kapena kuzindikira kuti Kristu wafika.

14. (a) Kodi ndani amene akutanthauzidwa mwakuti “amene anampyoza”? (b) Kodi nchifukwa ninji kudzakhala chisoni chachikulu pamene aliyense potsirizira pake azindikira kufika kwa Kristu?

¹⁴ Awo amene “anapyoza” kwenikweni Yesu salinso amoyo padziko lapansi. Motero iwo amaphiphiritsira anthu amene, mwa kuvulaza atsatiri amakono a Kristu, akutsanzira khalidwe la anthu a m’zaka za zana loyamba amenewo. (Mateyu 25:40, 45) Nthawi idzafika posachedwapa yakuti Kristu aphe anthu oipa oterowo. Iwo achenjezedweratu za zimenezi. Pamene kupha kumeneku kuchitika, iwo “adzawona” kapena kuzindikira chimene chirinkuchitika. Ndipo chisoni chawo chidzakhaladi chachikulu!

KODI KRISTU AKUBWERANSO KUDZIKO LAPANSI?

15. Kodi liwulo “kubwera” kawirikawiri limagwiritsiridwa ntchito m’njira yotani?

¹⁵ Kubwerera sikumatanthauza nthawi zonse kuti munthuyo amapita kumalo enieni. Motero anthu odwala amanenedwa kukhala ‘akubwerera ku thanzi.’ Ndipo wolamulira wapapitapo anganenedwe kukhala ‘akubwerera ku ulamuliro.’ M’njira yofananayo, Mulungu anauza Abrahamu kuti: “Ndidzabwera kwa iwe, pakufika nyengo yake, ndipo Sara adzakhala ndi mwana wamwamuna.” (Genesis 18:14; 21:1) Kubwereranso kwa Yehova kunatanthauza, osati kubwerera kwenikweni, koma kutembenuzira maso ake kwa Sara kuchita zimene iye adalonjeza.

16. (a) Kodi Kristu akubweranso kudziko lapansi m’njira yotani? (b) Kodi Kristu anabweranso liti, ndipo kodi nchiyani chimene chinachitika pa nthawi imeneyo?

¹⁶ M’njira imodzimodziyo, kubweranso kwa Kristu sikumatanthauza kuti iye akubweranso kwenikweni kudziko lapansili. M’malo mwake, kumatanthauza kuti iye amatenga ulamuliro Waufumu kulinga ndi dziko lapansili ndi kutembenuzira maso ake ku ilo. Iye sakufunikira kusiya mpando wake wachifumu wakumwamba ndi kutsikira kwenikweni kudziko lapansi kuti achite zimenezi. Monga momwe tawonera m’mutu wapitawo, umboni Wabaibulo umasonyeza kuti m’chaka cha 1914 C.E. nthawi ya Mulungu inafika yakuti Kristu abwerenso ndi kuyamba kulamulira. Kunali pa nthawi imeneyo pamene mfuu inamvedwa kumwamba: “Tsopano zafika chipulumutso, ndi mpha mvu, ndi ufumu za Mulungu wathu, ndi ulamuliro wa Kristu wake.”—Chivumbulutso 12:10.

17. Popeza kuti kubweranso kwa Kristu nkosawoneka, kodi iye anaperekanji kotero kuti tikathe kudziwa kuti iye adabweranso?

¹⁷ Popeza kuti kubweranso kwa Kristu nkosawoneka, kodi pali njira yotsimikizirira kuti kwachitikadi? Inde, iripo. Kristu mwiniyo anapereka “chizindikiro” chowoneka mwa chimene tingadziwire kuti iye wafika mosawoneka ndipo mapeto a dziko ayandikira. Tiyeni tipende “chizindikiro” chimenecho.

[Chithunzi patsamba 142]

Kristu anapereka thupi lake kukhala nsembe. Iye sakadalitenganso ndi kukhala munthu kachiwiri

[Zithunzi pamasamba 144, 145]

Kodi nchifukwa ninji Maliya wa Magadala anayesa Yesu kukhala wakumunda pambuyo pa chiukiriro chake?

Kodi ndim’thupi lanyama lotani limene Yesu woukitsidwayo anapempha Tomasi kupisa dzanja lake?

[Chithunzi patsamba 147]

Kristu anayenera kubweranso mu mkhalidwe umodzimodziwo umene iye anachokera padziko lapansi. Kodi iye anachoka mu mkhalidwe wotani?

Mutu 18

“Mapeto a Dziko” Ayandikira!

 1. Kodi atsatiri apadziko lapansi a Kristu akadziwa motani nthawi pamene iye adayamba kulamulira kumwamba?

PAMENE YESU KRISTU anachotsa Satana ndi angelo ake kumwamba nayamba ulamuliro wake Waufumu, kunatanthauza kuti mapeto a Satana ndi dongosolo lake loipa anayandikira. (Chivumbulutso 12:7-12) Koma kodi atsatiri a Kristu padziko lapansi akadziwa motani kuti chochitika chimenechi kumwamba, chosawoneka ku maso awo, chidachitika? Kodi iwo akadziwa motani kuti Kristu anafika mosawoneka mu ulamuliro Waufumu ndi kuti “mapeto a dziko” anali pafupi? Iwo akadadziwa mwa kupenda kuti awone ngati “chizindikiro” chimene Yesu anapereka chinalinkukwaniritsidwa.

 2. Kodi ophunzira a Kristu anamfunsa funso lotani?

² Imfa ya Yesu iri pafupi kwenikweni, pamene anali chikhalire pa Phiri la Azitona, anai a atumwi ake anadza kudzamfunsa “chizindikiro.” Umu ndimo mmene funso lawo lawerengedwera, mu King James Version, ndi mamiliyoni ambiri a anthu: “Tiuzeni, kodi zinthu zimenezi zidzakhala liti? ndipo kodi nchiyani chimene chidzakhala chizindikiro cha kudza kwanu, ndi cha mapeto a dziko?” (Mateyu 24:3) Koma kodi manenedwe amenewa, “kudza kwanu” ndi “mapeto a dziko,” amatanthauzanji kwenikweni?

 3. (a) Kodi manenedwewo “kudza kwanu”ndi “mapeto a dziko” amatanthauzanji kwenikweni? (b) Pamenepa, kodi ndimotani mmene funso lofunsidwa ndi ophunzira a Kristu latembenuzidwira molondola?

³ Liwu Lachigiriki lotembenuzidwa pano kukhala “kudza” ndilo parousia, ndipo limatanthauza “kukhalapo.” Chotero, pamenepa, pamene “chizindikirocho” chiwoneka, zimenezi zikutanthauza kuti tikadziwa kuti Kristu wafika ngakhale ngosawoneka, kuti iye wadza kale mu ulamuliro Waufumu. Kanenedweko “mapeto a dziko” nkosokeretsanso kwambiri. Sikamatanthauza mapeto a nthakayi, koma, m’malo mwake, mapeto a dongosolo la zinthu la Satana. (2 Akorinto 4:4) Chifukwa cha chimenecho funso la atumwiwo mosalakwitsa limati: “Tiuzeni, Kodi zinthu zimenezi zidzakhala liti, ndipo kodi nchiyani chimene chizakhala chizindikiro cha kukhalapo kwanu ndi cha mapeto a dongosolo la zinthu?’—Mateyu 24:3, New World Translation.

 4. (a) Kodi nchiyani chimene chimapanga “chizindikiro” chimene Yesu anapereka? (b) Kodi “chizindikirocho” chingayerekezeredwe ndi chidindo cha chala m’njira yotani?

⁴ Yesu sanapereke chochitika chimodzi chokha monga “chizindikiro.” Iye anasimba zochitika ndi mikhalidwe yambiri. Olemba Baibulo ena kuphatikizapo Mateyu anatchula zochitika zina zimene zikasonyeza “masiku otsiriza.” Zinthu zonsezi zimene zinanenedweratu zikachitika mkati mwa nthawi imene olemba Baibulo anatcha “masiku otsiriza.” (2 Timoteo 3:1-5; 2 Petro 3:3 ,4) Zochitika zimenezi zikakhala ngati mizera yosiyanasiyana imene imapanga chidindo cha chala cha munthu, chidindo chimene sichingakhale cha munthu wina aliyense. “Masiku otsiriza” ali ndi malukidwe awoawo a zizindikiro, kapena zochitika. Zimenezi zimapanga “chidindo cha chala” chotsimikizika chimene sichingakhale cha nyengo ina iriyonse yanthawi.

5, 6. Pamene mupenda maumboni 11 a “masiku otsiriza” pamasamba otsatirapowa, kodi mukuzindikira chiyani ponena za “mapeto a dongosolo la zinthu?”

⁵ M’mutu 16 wa bukhu lino tinalingalira umboni Wabaibulo wakuti Kristu anabweranso nayamba kulamulira pakati pa adani ake m’chaka cha 1914. Tsopano yang’anitsitsani mbali zosiyanasiyana za “chizindikiro” cha kukhalapo kwa Kristu ndi umboni wowonjezereka wa “masiku otsiriza” a dongosolo la zinthu loipa la Satana. Pamene mupenda zinthu zonenedweratu zimenezi pa masamba anai otsatirapowo, wonani mmene izo zakhala zikukwaniritsidwira chiyambire 1914.

“MTUNDU UMODZI WA ANTHU UDZAUKIRANA NDI MTUNDU WINA, NDI UFUMU NDI UFUMU WINA.”—Mateyu 24:7.

Ndithudi mwawona mbali imeneyi ya “chizindikiro” ikukwaniritsidwa chiyambire 1914! M’chaka chimenecho Nkhondo Yoyamba ya Dziko inayamba. Mu mbiri simunakhale nkhondo yowopsa yotero. Inali nkhondo yanamkukule. Nkhondo Yoyamba ya Dziko inali yokulirapo kwambiri koposa nkhondo zazikulu zonse zomenyedwa mkati mwa zaka 2,400 1914 isanafike. Komabe zaka 21 zokha nkhondo imeneyo itatha, Nkhondo Yoyamba ya Dziko inayamba. Ndipo inali yowononga ngati Nkhondo Yachiwiri ya Dziko kowirikiza kanai.

Nkhondo zowopsa zikupitiriza kumenyedwa. Chiyambire pamene Nkhondo Yachiwiri ya Dziko inatha mu 1945, oposa anthu mamiliyoni 25 aphedwa m’nkhondo zokwanira 150 zomenyedwa padziko lonse lapansi. Pa tsiku lirilonse, pakhala, pa avereji, nkhondo 12 zochitika kwina kwake m’dziko lapansi. Ndipo pali chiwopsezo chosalekeza cha nkhondo ina yadziko. United States yokha iri ndi zida zankhondo zanyukliya zokwanira kupha mwamuna aliyense, mkazi ndi mwana padziko lapansi koposa nthawi 12!

“KUDZAKHALA NJALA.”—Mateyu 24:7.

Motsatizana ndi Nkhondo Yoyamba ya Dziko panadza njala yaikulu koposa mu mbiri yonse. Chakumpoto kwa China kokha 15,000 anafa tsiku lirilonse ndi njala. Koma kusoweka kwa chakudya kunalidi kokulirapo pambuyo pa Nkhondo Yachiwiri ya dziko. Chigawo chimodzi mwa zinai za dziko pa nthawi imeneyo chinali ndi njala! Ndipo chiyambirecho, chakudya chakhalabe chosowa kwa anthu ambiri padziko lapansi.

“Masekendi 8.6 alionse munthu wina m’dziko losatukuka akufa ndi kudwala kochititsidwa ndi kudya kosakwanira,” inatero New York Times mu 1967. Mamiliyoni ambiri akufabe ndi njala—okwanira mamiliyoni 50 pa chaka! Pofika 1980, pafupifupi chigawo chimodzi mwa zinai cha anthu padziko lapansi (anthu 1,000,000,000) anali ndi njala chifukwa chakuti iwo sanathe kupeza chokwanira kuti adye. Ngakhale m’malo kumene chakudya chiri chochuluka, ambiri ngosowa kwambiri kosakhoza kuchigula.

“MILIRI M’MALO AKUTIAKUTI.”—Luka 21:11.

Pambuyo penipeni pa Nkhondo Yoyamba ya Dziko anthu ambiri anafa ndi flu Yachispanya koposa amene adafa ndi mliri wa nthenda ina iriyonse mu mbiri ya anthu. Chiwerengero cha akufa chinalo chokwanira anthu mamiliyoni 21! Komabe mliri ndi nthenda zikupitiriza kufala. Mamiliyoni ambiri amafa chaka chirichonse ndi nthenda yamtima ndi khensa. Nthenda yopatsana mwa kugonana ikufala mofulumira. Nthenda zina zowopsa, monga ngati malungo, likodzo ndi khungu lochititsidwa ndi kulumidwa ndi ntchentche za m’mitsinje ina, zimapezeka m’dziko ndi dziko, makamaka mu Asia, Africa ndi Latin America.

“KUDZAKHALA . . . ZIVOMEREZI M’MALO AKUTIAKUTI.”—Mateyu 24:7.

Kuyambira 1914 kufikira tsopano, pakhala zivomerezi zazikulu zambirimbiri koposa m’nyengo ina iriyonse yofananayo mu mbiri yolembedwa. Kwa zaka zoposa 1,000, kuyambira m’chaka cha 856 C.E. kufikira 1914, kunali zivomezi zazikulu 24 zokha, zikumachititsa akufa okwanira 1,973,000. Koma m’zaka 63 kuyambira 1915 kufikira 1978, chiwonkhetso cha anthu okwanira 1,600,000 anafa m’zivomerezi zazikulu 43.

“KUCHULUKA KWA KUSAYERUZIKA.”—Mateyu 24:12.

Padziko lonse lapansi pakuchokera malipoti a kusayeruzika ndi upandu zowonjezereka. Maupandu a chiwawa, monga ngati mbanda, kugwirira chigololo ndi kulanda, zikuwonjezeka kwambiri tsopano. Mu United States mokha, upandu waukulu umachitidwa, pa avereji, pafupifupi sekendi iriyonse. M’malo ambiri palibe amawona kukhala wosungika pamakwalala, ngakhale masanasana. Usiku anthu amakhala m’nyumba zawo kutseri kwa zitseko zokhomedwa loko ndi zoipichizidwa, owopa kupita kunja.

“ANTHU AKUKOMOKA NDI MANTHA.”—Luka 21:26.

Mantha mwina mwake ndiwo lingaliro limodzi lalikulu koposa m’miyoyo ya anthu lerolino. Sipanapite nthawi yaitali pambuyo pa kuphulika kwa mabomba oyamba anyukliya, wasayansi ya maatomu Harold C. Urey anati: “Tidzadya mantha, tidzagona mantha, kukhala m’mantha ndi kufa m’mantha.” Kwa ochuluka a anthu zimenezi ndizo zimene zikuchitika. Ndipo sikuli chabe chifukwa cha chiwopsezo chachikhalire cha nkhondo yanyukliya. Anthu amawopanso upandu, kuipitsa, nthenda, kukwera mitengo kwa zinthu ndi zinthu zina zambiri zimene zimawopseza chisungiko chawo ndi miyoyo yawo yeniyeniyo.

‘KUSAMVERA MAKOLO.’—2 Timoteo 3:2.

Makolo lerolino kawirikawiri amakhala ndu ulamuliro wochepa pa ana awo. Ana amapandukira ulamuliro wonse. Motero dziko lirilonse padziko lapansi layambukiridwa ndi mliri wa upandu wa ana. Lopitirira theka la maupandu onse aakulu m’maiko ena amachitidwa ndi ana ausinkhu wa zaka 10 kufikira 17. Mbanda, kugwirira chigololo, kuukira, kulanda, kuswa nyumba, kuba magalimoto—ana akuchita zinthu zonsezi. Kusamvera makolo sikunakhale kofala kwambiri mu mbiri ngati tsopano.

“OKONDA NDALAMA.”—2 Timoteo 3:2.

Kulikonse kumene mukuyang’ana lerolino mungawone machitidwe a umbombo. Ambiri adzachita pafupifupi chirichonse kaamba ka ndalama. Iwo adzaba kapena ngakhale kupha. Sikwachikendo kwa anthu aumbombo kupanga ndi kugulitsa zinthu zimene zikudziwika, m’njira ina, kukhala zikupangitsa ena kudwala kapena kuwapha. Mwina poyera, kapena mwa njira imene iwo akukhalira ndi moyo, anthu ponena za ndalama akuti: ‘Imeneyi ndiyo mulungu wanga.’

“OKONDA ZOKONDWERETSA MUNTHU OSATI OKONDA MULUNGU.”—2 Timoteo 3:4.

Anthu ochuluka lerolino amaganizira kokha za kuchita chimene chimakondweretsa iwo kapena mabanja awo, osati chimene chimakondweretsa Mulungu. Makamaka ambiri amakonda zimene Mulungu amatsutsa, kuphatikizapo dama, chigololo, kuledzera, kugwiritsira ntchito moipa mankhwala ndi zina zotchedwa zokondweretsa. Ngakhale zokondweretsa zimene, mwa izo zokha, zingakhale zabwino zimaikidwa patsogolo pa kuyesayesa kulikonse kwa kuphunzira za Mulungu ndi kumtumikira.

“AKUKHALA NAWO MAWONEKEDWE A CHIPEMBEDZO, KOMA MPHAMVU YAKE ADAIKANA.”—2 Timoteo 3:5.

Atsogoleri adziko ndi anthu wamba mofanana kawirikawiri amapanga kudzisonyezera kwakunja kwa kukhala opembedza. Iwo angafike pamaserevesi atchalitchi ndi kupereka zopereka za ntchito zachipembedzo. Awo okhala m’boma angaike dzanja lawo pa Baibulo pamene iwo akuyamba ulamuliro. Koma kawirikawiri kumangokhala “mawonekedwe a chipembedzo” Monga momwedi Baibulo linaneneratu, kulambira kowona kwa Mulungu sikulidi mphamvu Yosonkhezera m’miyoyo ya anthu ochuluka lerolino. Iwo sakusonkhezeredwa ndi mphamvu yeniyeni ya chabwino.

“KUWONONGA DZIKO.”—Chivumbulutso 11:18.

Mpweya umene tikupuma, madzi amene tikumwa ndi nthaka pa imene zakudya zathu zikulimidwa zirinkuipitsidwa. Nkwakukulu kwambiri chakuti wasayansi Barry Commoner anachenjeza kuti: “Ndikukhulupirira kuti kuipitsidwa kwa dziko lapansi kopitirizabe, ngati sikuletsedwa, potsirizira pake kudzawononga kuyenerera kwa pulaneti lino kukhala malo a moyo waanthu.”

⁶ Pambuyo pa kulingalira zapitazo, kodi sikwachiwonekere kuti “chizindikiro” chimene Kristu anapereka ndi maumboni onenedweratu ndi ophunzira ake tsopano zirinkukwaniritsidwa? Ngakhale kuli kwakuti pali maumboni ena ambiri, awo ondandalikidwa pano ayenera kukhala okwanira kusonyeza kuti ife tirinkukhaladi m’nthawi imene Baibulo linaneneratu kukhala “masiku otsiriza.”

 7. (a) Kodi nchiyani chimene chimapangitsa maulosi Abaibulo onena za kukhalapo kwa Kristu ndi “masiku otsiriza” kukhala apadera kwambiri? (b) Mosiyana ndi zimene Baibulo linaneneratu, kodi atsogoleri adziko anali kuneneratu chiyani 1914 isanafike?

⁷ Komabe anthu ena anganene kuti: ‘Zinthu zonga ngati nkhondo, njala, miliri ndi zivomerezi zachitika kawirikawiri mu mbiri yonse. Motero sikukanakhala kovuta kuneneratu kuti izo zikachitikanso.’ Koma taganizirani: Baibulo silinaneneretu zinthu zokhazi, koma linasonyeza kuti izo zikachitika padziko lonse. Ndiponso, Baibulo linanena kuti zinthu zonsezi zikachitika pa mbadwo umene unali wamoyo mu 1914. Komabe kodi atsogoleri adziko otchuka anali kuneneratu chiyani 1914 itatsala pang’ono kufika? Iwo anali kunena kuti mikhalidwe yosonyeza mtendere wadziko inali yabwino kwambiri koposa kale lonse. Komabe mavuto owopsa amene Baibulo limaneneratu anayamba pa nthawi yeniyeni, mu 1914! Kunena zowona, atsogoleri adziko tsopano akunena kuti 1914 inali posinthira mu mbiri.

 8. (a) Kodi ndimbadwo uti umene Yesu anasonyeza kuti ukawona mapeto a dongosolo lino la zinthu? (b) Motero kodi ife tingakhale otsimikizira za chiyani?

⁸ Atasonyeza zinthu zambiri zimene zasonyeza nyengoyo kuyambira 1914 kumkabe mtsogolo, Yesu anati: “Mbadwo uwu sudzatha kuchoka, kufikira zinthu zonse [kuphatikizapo mapeto a dongosolo lino] zidzachitidwa.” (Mateyu 24:34, 14) Kodi Yesu anatanthauza mbadwo uti? Anatanthauza mbadwo wa anthu amene anali ndi moyo mu 1914. Anthu otsalabe amenewo a mbadwo umenewo tsopano akalamba kwambiri. Komabe, ena a iwo adzakhalabe amoyo kuti awone mapeto a dongosolo loipa lino. Motero tingakhale otsimikizira za zimenezi: Posachedwapa tsopano kudzakhala mapeto amwadzidzidzi a kuipa konse ndi anthu oipa pa Harmagedo.

[Chithunzi patsamba 149]

Yesu anauza ophunzira ake chimene chikakhala umboni wowoneka wa kukhalapo kwake kosawoneka mu ulamuliro Waufumu

[Chithunzi patsamba 154]

1914—HARMAGEDO

Ena a mbadwo wokhala ndi moyo mu 1914 adzawona mapeto a dongosolo la zinthu ndi kuwapyola