⁵ Mwa njira imeneyi, ochimwa aŵiriwo anayamba kufa. Popereka chiweruzo cha imfa, Mulungu anauzanso Adamu kuti: “Nthaka ikhale yotembereredwa chifukwa cha iwe; m’kusauka udzadyako masiku onse a moyo wako: minga ndi mitula idzakubalira iwe; ndipo udzadya therere la m’thengo.” (Genesis 3:17, 18) Motero Adamu ndi Hava anataya chiyembekezo cha kusandutsa dziko lapansi losalimidwalo kukhala paradaiso. Atapitikitsidwa mu Edene, anafunikira kugwira ntchito zolimba ndi nyonga kuti apeze chakudya m’nthaka yotembereredwa. Mbadwa zawo, pokhala kuti zinalandira choloŵa cha mkhalidwe wauchimo ndi wakufa umenewu, zinakhala zofunikiradi chitonthozo.​—Aroma 5:12.

⁸ Yehova anafuna kuwononga dziko loipalo ndi chigumula cha dziko lonse, koma choyamba anauza Nowa kuti amange chingalawa chopulumutsiramo moyo. Chifukwa chake, fuko la anthu ndi mitundu ya nyama inapulumutsidwa. Nowa ndi banja lake ayenera kuti anapeza mpumulo chotani nanga Chigumulacho chitapita pamene anatuluka m’chingalawacho kuloŵa m’dziko loyeretsedwa! Nkotonthoza mtima chotani nanga kudziŵa kuti temberero pa nthaka linachotsedwa, zikumapangitsa ntchito yaulimi kukhala yopepuka kwambiri! Ndithudi, ulosi wa Lameke unakhaladi woona, ndipo Nowa anakwaniritsa tanthauzo la dzina lake. (Genesis 8:21) Monga mtumiki wokhulupirika wa Mulungu, Nowa anagwiritsiridwa ntchito kudzetsa ‘chitonthozo’ kwa anthu pamlingo winawake. Komabe, chisonkhezero choipa cha Satana ndi angelo ake auchiŵanda sichinathere pa Chigumula, ndipo anthu akupitiriza kubuula m’goli la uchimo, matenda, ndi imfa.