Akumalunjikitsa mawu ake kwa ophunzira ake, Yesu akuyamba mwa kumati: “Odala osauka inu; chifukwa uli wanu ufumu wa Mulungu. Odala inu akumva njala tsopano; chifukwa mudzakhuta. Odala inu akulira tsopano; chifukwa mudzaseka. Odala inu, pamene anthu adzada inu, . . . kondwerani tsiku lomweli, dumphani ndi chimwemwe; pakuti wonani, mphotho zanu nzazikulu kumwamba.”

Komabe, chimene Yesu akutanthauza mwa kukhala achimwemwe, sindicho kokha kukhala osekaseka kapena ansangala, mofanana ndi pamene munthu akusewera. Chimwemwe chowona chiri chozamirapo, chiri ndi ganizo la kukhutira, lingaliro lachikhutiro ndi kukwaniritsidwa m’moyo. Chotero Yesu akusonyeza, kuti anthu amene alidi achimwemwe ali awo amene amazindikira chosowa chawo chauzimu, akumva chisoni ndi mkhalidwe wawo wa uchimo, ndi awo amene amafikira pakudziwa ndi kutumikira Mulungu. Pamenepo, ngati iwo adedwa kapena kuzunzidwa kaamba ka kuchita chifuniro cha Mulungu, ngachimwemwe chifukwa chakuti amadziwa kuti akukondweretsa Mulungu ndipo adzalandira mphotho yake ya moyo wosatha.

Kenako, polankhula kwa ophunzira ake, Yesu akuti: “Ndinu mchere wa dziko lapansi.” Ndithudi, iye sakutanthauza kuti, iwo ali mchere weniweni. Mmalo mwake, mchere umatetezera kuvunda. Mulu wake waukulu unaunjikidwa pafupi ndi guwa lansembe pakachisi wa Yehova, ndipo ansembe okhala pantchito anaugwiritsira ntchito kukoleretsa nsembe.