• Dipo Lolinganira kwa Onse
    Nsanja ya Olonda—1991 | February 15

    • Dipo Lolinganira

      10. Kodi nchifukwa ninji nsembe za nyama sizinali zokwanira kuphimba machimo a anthu?

      10 Zimene talongosolazo zimafotokoza mwafanizo kuti dipo liyenera kukhala lolingana ndi chimene likuchiloŵa m’malo, kapena kuphimba. Nsembe zanyama zoperekedwa ndi amuna okhulupirika kuchokera kwa Abele kunka mtsogolo sizikaphimba kwenikweni machimo a anthu, popeza kuti anthu ngoposa zilombo. (Salmo 8:4-8) Motero Paulo anatha kulemba kuti ‘sikutheka kuti mwazi wa ng’ombe zamphongo, ndi mbuzi ukachotsere machimo.’ Nsembe zoterozo zikangotumikira monga chophimba chowonerapo, kapena chophiphiritsira, poyembekezera dipo limene linkabwera.​—Ahebri 10:1-4.

      11, 12. (a) Kodi nchifukwa ninji anthu mamiliyoni zikwi zambiri sanafunikire kufa imfa zansembe kotero kuti aphimbe kuchimwa kwa anthu? (b) Kodi ndani yekha anakhoza kutumikira monga “dipo lolinganira,” ndipo kodi imfa yake imatumikira chifuno chotani?

      11 Dipo lochitiridwa chithunzi limeneli linayenera kukhala lolingana ndendende ndi Adamu, popeza kuti chilango cha imfa chimene Mulungu anachipereka mwachilungamo pa Adamu chinatulukapo kukanidwa kwa fuko la anthu. “Mwa Adamu onse amwalira,” akutero 1 Akorinto 15:22. Chotero sikunali kofunika kuti anthu mamiliyoni zikwizikwi afe imfa zansembe kuti alinganire mbadwa ya Adamu iriyonse. ‘Uchimo unaloŵa m’dziko lapansi mwa munthu mmodzi [Adamu], ndi imfa mwa uchimo.’ (Aroma 5:12) Ndipo “monga imfa inadza mwa munthu” chiombolo cha mtundu wa anthu chikadzanso “mwa munthu.”​—1 Akorinto 15:21.

      12 Munthu amene akakhala dipo anayenera kukhala munthu wangwiro wa nyama ndi mwazi​—wolingana ndendende ndi Adamu. (Aroma 5:14) Munthu wauzimu kapena “Mulungu-munthu” sakalinganizitsa miyeso ya chilungamo. Kokha munthu wangwiro, winawake wosakhala pansi pa chiweruzo cha imfa cha Adamu, ndiye akapereka “dipo lolinganira,” wolingana ndendende ndi Adamu. (1 Timoteo 2:6, NW)a Mwakupereka nsembe moyo wake modzifunira, “Adamu wotsirizayo” anatha kulipira mtengo wa uchimo wa “munthu woyamba, Adamu.”​—1 Akorinto 15:45; Aroma 6:23.

  • Dipo Lolinganira kwa Onse
    Nsanja ya Olonda—1991 | February 15

    • a Liwu Lachigiriki logwiritsiridwa ntchito panopa, an·tiʹly·tron, silimapezeka kwina kulikonse m’Baibulo. Ilo nlogwirizana ndi liwu limene Yesu analigwiritsira ntchito kutanthauza dipo (lyʹtron) pa Marko 10:45. Komabe, The New International Dictionary of New Testament Theology imanena kuti an·tiʹly·tron ‘limapereka lingaliro la kusinthanitsa.’ Moyenerera, New World Translation imalimasulira kukhala “dipo lolinganira.”