“Mbambavo Tehelelei Ondyoi Ei”

JOSE ukahi nokutala koutundilo nokueivaluka, uhanda okuyomboloka pokati komutanda wovanthu akahateka. Konyima yovipunda, ku he kokule unene, kumonekela eumbo liavo mo Hebrom. Tate yae, Jako, ukahi nokukevela kongulohi tyehetyi oityi tyapita nomona wae ehole unene. Mahi Jose kamoneka. Ovakuendye aveho ankho vemwii nalumwe mavekemumona vali. Ovakuavitanda otyo vemuyunga tyina vataha omakamelu avo mondyila imwe yatwa okuenda no kokumbili kuekumbi. Ovo pahe ovahekulu va Jose, iya ankho kavayeke ahondovoke ponthele yavo. Palavo, omukuendye oo ankho ukahi ngolumono, ngomulela vatyinda, mavikeveavela onombongo ononyingi ko Egitu.

Jose ankho utupu omanima alamba 17. Pahe soka tyina aleuka, atale meulu koutakelo wekumbi likahi nokunyingilila Melunga Enene, no ñgeni omuenyo wae wapiluluka unene. Tyiihama okuhinangela okuti, ovakulu vae muene ankho vahanda okumuipaa, pahe vemulandesa koukonde. Tyipondola tyepuiyile unene ku Jose okulityilika okulila. Ankho ketyii oñgeni omuenyo wae maukakala.

Oñgeni Jose akakala motyitateka ngotyo otyinene? Iya oityi tupondola okulilongesila kekolelo liomukuendye oo wamonesilue ononkhumbi nokuayalwa nombunga yae muene?

Jose watyitilwa mombunga yovanthu ovanyingi, mahi ihena ehambu newaneko. Ombimbiliya ipopia ombunga ya Jako monkhalelo ihaviukile yovakai ankho vanepwa oluvale, otyituwa Huku ayekelele pokati kovanthu vae alo Omona wae etyimanako apindulilapo etyi Huku ahandele potete tyokuti omunthu una okunepa vala omukai wike. (Mateus 19:4-6) Jako ankho una ovana valamba 14 vatunda movakai vekuana velikalaila. Vevali ovakai vae, Leia na Rakele, novaundapi vavo Zilpa na Bila. Tunde ponthyimbi, Jako ankho uhole vali omukai wae omuwa Rakele. Nalumwe ahumbile ngotyo Leia, omukulu wa Rakele, una apelwe tete opo emunepe. Pokati kavo pakalele oundyale omunene, iya otyo atyieta onkhi onene pokati kovana vavo.—Gênesis 29:16-35; 30:1, 8, 19, 20; 37:35.

Rakele wakalele omuvo omunyingi tyihena olutyito, iya konyima etyi akutula Jose, Jako ahumbu unene omona oo mokonda wemumona etyi akulupa. Mongeleka, etyi ombunga ankho ikahi nokuenda okukelivasa nomukulu wa Jako, Esau, ankho uhanda okumuipa, nokuatila owoma, Jako apake Rakele nomona wae Jose, konyima yombunga aiho kuna ankho kuapama vali. Onthiki oyo yepuiya unene Jose keilimbuilwe. Soka oñgeni akala komuhuka una, nokuapana momaiho, utala tate yae namphila akulupa mahi nkhele wapama, ukahi nokuendela kotyimuti. Soka oñgeni akala tyahuva etyi anoñgonoka okuti, omokonda motyinthiki tyalamba tate yae waluile noandyu! Iya oityi alwila? Omokonda ankho Jako uhanda apewe ononkhano onongwa na Jeova Huku. Jako wayambua etyi enyina liae liapilululwa alikala Isilayeli. Elongo aliho ankho lina okutyinda enyina olio. (Gênesis 32:22-31) Konyima, Jose wanoñgonoka okuti ovana va Isilayeli tate yae, ovo omihoko vielongo olio!

Konyima, omukuendye Jose amono ononkhumbi etyi ahiwapo nomunthu ankho ehole unene ngwe nkhele omututu. Me yae wankhia pokukutula ondenge yae, Benjamim. Tate yae anumana unene mokonda yotyo. Pahe hinangela Jako nokankhenda ukahi nokusekuna ononkhuka momaiho a Jose, otyo emuungumanesa nekevelelo lina apopililwe na inakulu Abraiau. Jose tyemuhikile unene komutima okunoñgonoka okuti nthiki imwe Jeova makondola me yae komuenyo! Tyafuile Jose wakalele nohole onene no muna-tyali, “Huku . . . yo vokuna omuenyo.” (Lucas 20:38; Hebreus 11:17-19) Namphila ankho asoya mokonda yokuasiwapo nomukai wae, Jako apeho ankho una okankhenda novana ovo vevali, vavo na Rakele.​—Gênesis 35:18-20; 37:3; 44:27-29.

Ovana ovanyingi tyina vatekulwa nawa vapondola okunanga ine vatomboka. Mahi Jose welilongesilile ko vohe ovituwa ovinyingi oviwa, nokukala nekolelo liapama, nokutyivila okupunga otyiwa notyivi. Etyi ena omanima 17, akala omunthita okukuatesako ovakulu vae, otyo amona ovipuka viapenga ovakulu vae valinga. Okuti ankho uyekelela ovipuka opo vemuhumbe? Hamwe ankho upondola okutyisoka, mahi ankho ulinga etyi tyaviuka. Ankho atyiho utyipopia ku tate yae. (Gênesis 37:2) Tyafuile otyituwa otyo tyapamekele ohole onene ankho Jako ena nomona wae. Oyo ongeleka ongwa ovakuendye Ovakristau vesukisa okulandula! Tyina uhongiliyua okuholeka onkhali yamukuenyi, hamwe una mulikuai nae ine epanga, otyiwa okuhetekela Jose, nokulinga atyiho opo tyiivale ku vana vakuatesako vana valinga ononkhali.​—Levítico 5:1.

Tupu tupondola okulilongesila kombunga ya Jose. Namphila Ovakristau hono kavanepe oluvale, mahi kuna onombunga ononyingi muna o voina ine ovohe koutekuli nono ngenda na ina ine o na he. Aveho vapondola okulilongesila kombunga ya Jako okuti okapungulula nokaamenana tyinyona ombunga. Ovohe ovanongo vokuna ombunga yahonya-honya valinga atyiho opo valekese kovana vavo nono ngenda na ina ine ona he, okuti kese umwe uholwe nokuapewa ondyambi iya aveho vapondola okueta ehambu mombunga.​—Romanos 2:11.

Tyafuile Jako ankho wahumba Jose mokonda ankho wakola omutima, mokuamena etyi tyaviuka. Oe walingile otyikutu tyimwe otyiwa pala omona wae. (Gênesis 37:3) Ankho tyitiwa otyikutu tyovivala ovinyingi, mahi katyapopilwe unene movihonekwa. Momanima omanyingi ankho tyitiwa otyikutu otyile tyihika konomphai no komaoko. Mokutala tyafuile ankho otyikutu otyiwa unene.

Tyafuile Jako ankho una ehunga ewa etyi alinga otyikutu otyo, iya Jose tyemuhikile unene komutima okutala okuti tate yae umuhole nokuna onkhenda nae. Mahi otyikutu otyo tyaetelele omukuendye oo ovitateka ovinene. Tete, hinangela okuti omukuendye oo ankho omunthita. Otyo ankho otyilinga tyepuiya unene. Soka komukuendye oo wavala otyikutu otyile, windauka kononkhanda, ine ukahi nokuhukulula ongi momakete. Mahi, haunene, oñgeni onkhalelo oyo ongwa Jako ankho atekula Jose, yakalesile oupanga ena novakulu vae?

Ombimbiliya ikumbulula okuti: “Etyi ovakulu vae vetyimona okuti tate yavo uhole vali Jose tyipona ovakulu vae aveho, avahimbika okumuyala, iya ankho kavapopi vali nae nombembwa.”a (Gênesis 37:4) Hamwe ankho vena ehunga liokukala nonkhi, mahi ovakulu va Jose ankho kevesukisa okukala notyituwa otyo otyivi. (Provérbios 14:30; 27:4) Okuti nove uhole okukala nonkhi tyina umwe ahumbwa vali ine wapewa etyi ove uhanda? Hinangela ovakulu va Jose. Onkhi yavo yevetuaile kokulinga otyipuka tyimwe otyivi velivelele unene. Ongeleka yavo ihinangelesa Ovakristau aveho okuti otyiwa “okuhambukwa na vana vahambukwa.”​—Romanos 12:15.

Tyotyili Jose ankho utyii okuti ovakulu vae vemuyele. Ngotyo, okuti ankho upondola okuholeka otyikutu tyae tyina ovakulu vae vekahi popepi? Hamwe upondola okusoka okulinga ngotyo. Mahi, hinangela okuti Jako ankho uhanda otyikutu tyina tyikale enyingilikilo liokuti wemupanda nokumuhole. Jose ankho uhanda okulekesa okuti wetavela okuyumbwa onthumbi na tete, mokutualako okuvala otyikutu otyo. Ongeleka yae ongwa pala onthwe. Namphila tate yetu wokeulu ahalingi okapungulula, anthi ulekesa oukuatyili kovaumbili vae nokuvehumba. Tupu, ukevela ovaumbili vae vakale tyelikalela nouye uno wovivi muhena ovituwa oviwa. Ngotyikutu tyelikalela tya Jose, ovituwa Viovakristau votyotyili vielikala no via vana vekahi mouye uno. Ovituwa ovio oviwa pamwe vietesa onkhi noundyale. (1 Pedro 4:4) Okuti Ovakristau vaholeka kovanthu okuti vaumbila Huku? Au, nga Jose katuhande okuholeka otyikutu otyo.​—Lucas 11:33.

Kapakalele ehimbwe, Jose atu onondyoi onombali ononene. Mondyoi yotete, Jose wamona nae novakulu vae, kese umwe wakuta otyipandi. Mahi ovipandi viovakulu vae avihimbika okuliseta-seta notyipandi tyae nokulinyongamena kotyae, tyae otyo tyitai. Mondyoi yavali, ekumbi, nohanyi, no nonthungululu 11 mbukahi nokulinyongamena ku Jose. (Gênesis 37:6, 7, 9) Oityi Jose ankho ena okulinga konthele yonondyoi ombo ehei mbayandyuluka nawa?

Onondyoi ombo ankho mbatunda ku Jeova Huku. Onondyoi ombo ankho eulo, iya Huku menyina lia Jose walekesa etyi mbulekesa. Tyotyili, Jose walinga ngetyi ovauli aveho veya okulinga tyina vamapopilua onondaka mba Huku nekoyeso Liae pala ovanthu vehetavela.

Jose nounkhengela wapopila ovakulu vae okuti: “Mbambavo tehelelei ondyoi ei.” Ovakulu vae vanoñgonokele ondyoi, mahi ankho kaveihandele. Avati: “Ove tyilityili mokala ohamba yetu, otutumina?” Ehipululo liati vali: “Ngotyo, vavasa vali ehunga liokumuyala, mokonda yonondyoi mbae netyi apopia.” Etyi Jose apopia ondyoi yavali ku tate yae no kovakulu vae, avahahande vali okumutehelela. Tutanga okuti: “Tate yae wahimbika okumuviyula nokumupopila okuti: ‘Oityi tyihangununa onondyoi ombu? Ame na nyoko, novakulu vove, tyilityili matuya kuove atulinyongamena?’” Mahi Jako watuaileko okusoka kuotyo. Okuti ankho Jeova ukahi nokupopia nomukuendye oo?​—Gênesis 37:6, 8, 10, 11.

Jose hamunthu wotete ine wahulililako povaumbili va Jeova vapelwe onondaka mbokuula ankho mbeheiwe, alo mbueta oundyale. Jesus ankho oe wavilapo kokupopia onondaka ngombo, apopila ovalanduli vae, okuti: “Inkha ame vamonesa ononkhumbi, nonwe mavemumonesa ononkhumbi.” (João 15:20) Ovakristau vomati aeho vapondola okulilongesila unene kekolelo, nomutima wakola womukuendye Jose.

Pakala vala katutu, Jako atumu omukuendye Jose kohambo. Ovakulu vae ankho vekahi nokuyunga ovipako viavo koutakelo popepi no Siquém, kuna valekesa liwa-liwa oundyale omunene. Tyotyili, Jako ankho walinga otyiho novana vae, atumu Jose akatale etyi vekahi. Okuti ove upondola okusoka oñgeni Jose elitehelela? Ankho utyii okuti ovakulu vae vemuyele unene! Oñgeni ankho mavakala tyina vemumona okuti watumwa na tate yavo? Nongotyo, Jose etavela okuenda.​—Gênesis 34:25-30; 37:12-14.

Ankho tyepuiya unene pala okuhikako, tyafuile waendele ononthiki ononkhuana ine ononthano. Okutunda ko Hebrom alo ko Siquém paendwa km 80. Mahi etyi ehika ko Siquém, Jose eivi okuti ovakulu vae vapita noko Dotan, ankho papondola okuendwa vali km 22 ine tyilamba. Etyi Jose ekahi nokuhika ko Dotan, ovakulu vae vemumonena kokule ukahi nokuya. Liwa-liwa onyengo yavo aitunthuka. Ehipululo liati: “Iya avelipopila okuti: ‘Talei! Wonondyoi ukahi nokuya. Pahe endyuei tumuipae, atumuyumbu monyombo, atukati waliua notyinyama tyofika. Natutale oñgeni onondyoi mbae mambukala.’” Mahi, Ruben aiti onondenge mbae vemuyumbe vala monyombo, ankho okukevela konyima emupolemo.​—Gênesis 37:19-22.

Tyahatilile owoma, Jose afueneko, okukevela okuti ovakulu vae mavemuyakula nombembwa. Mahi, avemuutukila! Nonyengo onene avemukuate avemululu otyikutu tyae otyiwa, avemukokela ponyombo ihena omaande, avemuyumbumo. Jose atokelamo! Nokuatila owoma alingi ononkhono no nomphai opo eliyakulile, mahi kononkhono mbae ehetyivili. Tyina atala peulu amono ovakulu vae veliseta nonyombo vapopia avakaya. Eliyavela okuita opo vemupolemo, mahi avehetavela. Tyihena okankhenda avaende avakalia. Etyi Ruben atundapo avelipakelamo opo vemuipae, mahi Juda evepopila vemulandese ko vakuavitanda. O Dotan ankho o popepi nondyila yokuenda noko Egitu, iya pakala vala katutu akuya omutanda wova Ismaelita no Midianita. Tyina Ruben ehenekondoke avemulandesa. No nombongo 20 mbovivela valandesa ondenge yavo koupika.b​—Gênesis 37:23-28; 42:21.

Ngotyo okupolela konyima tuavasa apa matuhimbikila. Etyi Jose ekahi metapalo okuenda ko Egitu, ankho usoka okuti wakakota. Ankho wapolua mombunga yae! Momanima, omanyingi, ankho kei vali natyike konthele yombunga, ankho ketyii okuti Ruben wesala nokulila etyi avasa Jose kepo. Ankho kei natyike konthele yomuihamo wa tate yae Jako etyi eiva okuti omona wae ehole wankhia. Kei natyike konthele ya Isake he mbuale, ankho nkhele una omuenyo. Ankho kei natyike konthele yondenge yae, Benjamim una ankho eivaluka unene. Mahi okuti Jose ankho utupu vali natyike?​—Gênesis 37:29-35.

Jose ankho una tyipuka tyimwe ovakulu vae vehevili okumupola: ekolelo. Ankho wii ovipuka ovinyingi konthele ya Huku yae, Jeova, iya natyike tyipondola okumupola vio, ankho kakambele eumbo, ankho kahepele etyi alinga oungendi okuenda ko Egitu, tupu ankho kamuene ononkhumbi mokonda ankho omupika womunthu omuhona, utiwa o Potifar. (Gênesis 37:36) Ekolelo Jose ankho ena netokolo liae liokutualako okufuena ku Huku viemukuatesako okukula tyapama namphila ankho ekahi koupika. Mononthele ononkhuavo komutwe, matukatala oñgeni ekolelo olio liakalesa Jose omunthu wakolela ku Huku yae, Jeova, no ñgeni akondoka mombunga. Tyotyili, okuhetekela ekolelo lia Jose ounongo!