Momalikuambelo Ove Onondaka Mba Jesus Mbukukuatesako?

“Etyi Jesus amana okupopia onondaka ombo, ovanthu aveho avakala tyahuva nonkhalelo yae yokulongesa.”—MATEUS 7:28.

1, 2. Omokonda yatyi onkhalelo ya Jesus yokulongesa yahuvisile ovanthu?

ONTHUE tuesukisa okutavela onondaka mbo Mona wongunga wa Huku Jesus Kristu, nokumbuundapesa momuenyo wetu. Kutupu omunthu ankho upopia ngae. Ovanthu vahuvile unene nonkhalelo yae yokulongesa Melongomona lio Komphunda.—Tanga Mateus 7:28, 29.

² Omona wa Jeova kolongesile ngo vanongo vovihonekwa ankho valongesa omalongeso ovanthu ovakuankhali. Kristu ankho ulongesa “ngatyina ena ounene” mokonda etyi ankho apopia tyitunda ku Huku. (João 12:50) Pahe tutalei oñgeni onondaka ononkhuavo mba Jesus Melongomona lio Komphunda mbutuvatela nokutuavela ondundo momalikuambelo etu.

Uhelikwambele Ngovemphinia

 3. Hangununa monondaka mbehehi onondaka mba Jesus mu Mateus 6:5.

³ Okulikuambela tyakolela unene mefendelo liotyotyili, iya onthue tuesukisa okulikuambela apeho ku Jeova. Mahi tyesukisa omalikuambelo etu elikuate nonondaka mba Jesus Melongomona lio Komphunda. Oe wati: “Tyina mulikuambela, muahalingei ngetyi tyilinga vemphinia. Mokonda ovo vetyihole okulikuambela lutai monondyuo mbefendelo, no ponthele yomatapalo opo ovanthu vevemone. Tyotyili, ame ndyimupopila okuti, venale ondyambi yavo.”—Mateus 6:5.

4-6. (a) Omokonda yatyi ova Faliseu ankho veholele okulikuambela “lutai mono ndyuo mbefendelo no ponthele yomatapalo”? (b) Oñgeni ovanthu ovo vemphinia ‘vatambulale ondyambi yavo aiho’?

⁴ Tyina ovalongwa va Jesus velikuambela ankho vena okulityilika okuhetekela ovanthu ovo “vemphinia,” ngo va Faliseu ankho vaovola okulilekesa kuvakuavo ngatyina ovaviuki. (Mateus 23:13-32) Ovanthu ovo vomatutu, ankho vehole okulikuambela “lutai monondyuo mbefendelo no ponthele yomatapalo.” Omokonda yatyi? Opo “ovanthu vevemone.” Ewaneno lio va Judeu kohale ankho vena otyituwa tyokulikuambela mokueenda komuvo wovilikutila viokuyokwa mondyuo ya Huku, (9 ola yo komuhuka no 3 ola yo kekumbi). Ovanyingi ankho vakala mo Jelusalei, ankho vapondola okulikuambela kumue notyinyingi tyovafendi mondyuo ya Huku. Kondye yepundaumbo, ova Judeu vokuayembela mo via Huku, ankho velikuambela tuvali monthiki “lutai monondyuo mbefendelo.”—Tyieleka na Lucas 18:11, 13.

⁵ Ovanthu ovanyingi, ankho vekahi kokule nondyuo ya Huku ine ondyuo imue yefendelo pala okuenda komalikuambelo oo. Moluotyo, valingila pana vavasiwa pomivo ovio. Vamue tyina tyamehiki momivo viomalikuambelo oo, vaya “konthele yomatapalo.” Ankho vahanda opo ‘ovanthu vakuata ponondyila ombo vevemone.’ Ovanthu ovo vemphinia ankho “vatatesila momalikuambelo omale,” opo vapandwe na vana vevetala. (Lucas 20:47) Onthue katupondola okukala notyituwa ngotyo.

⁶ Jesus wapopia okuti ovanthu vatyo ovo vemphinia ankho “venale ondyambi yavo aiho.” Mokonda ankho vahanda okutalwa nokupandwa novanthu vakuavo. Iya oyo ankho oyo ondyambi yavo vala. Mokonda Jeova katavela omalikuambelo emphinia, okulilekesa vala kovanthu. Anthi, Huku ukumbulula omalikuambelo ovalanduli vo tyotyili va Kristu, ngetyi tyalekesa onondaka ononkhuavo mba Jesus monthele ino.

 7. Oityi tyihangununa okulingila elikuambelo ‘mondyuo yetu atuike’?

⁷ “Anthi, tyina ove ulikuambela, nyingila mondyuo yove, oiki epito liove, olikuambela ku Tate yove uhamonwa. Iya Tate yove utalela pokamphengi, mekufete.” (Mateus 6:6) Elondolo lia Jesus liokulikuambela mondyuo awike tyina wamaikipo epito, katyilekesa okuti omunthu kapondola vali okulinga elikuambelo mewaneno. Anthi, onondonga ombo, mbulekesa okuti vana velikuambela pokati kovanthu opo vapandwe na vakuavo, vena okuyekapo otyituwa otyo. Otyo, tuesukisa okutyihinangela inkha tuholovonwa pala okuitilako ovanthu va Huku mewaneno. Tutavelei elondolo ekuavo lia Jesus konthele yelikuambelo.

 8. Ngetyi tyilekesa Mateus 6:7, otyituwa patyi tyahaviukile tuna okulityilika melikuambelo?

⁸ “Mahi, tyina ulikuambela, wahapalaukunune onondaka mbuike vala apeho, ngetyi tyilinga ovanthu vouye, mokonda vasoka okuti ngotyo mavatehelelwa mokonda yokupopia onondaka ononyingi.” (Mateus 6:7) Jesus wati otyituwa otyikuavo tyahaviukile melikuambelo, okupitaulula onondaka. Katile melikuambelo katupondola okupitulula omaito etu atunda komutima no nondaka mbolupandu. Motyikunino tyo Getsemani monthyinthiki tyahulilila kononkhia mbae, Jesus wapitaulula okupopia “onondaka mbuike” melikuambelo.—Marcos 14:32-39.

9, 10. Omonkhalelo patyi tuesukisa okulityilika okulinga omalikuambelo okupitaulula?

⁹ Tyapenga okuhetekela omalikuambelo okupitaulula alingwa “novanthu vomouye.” ‘Ovikando ovinyingi’ vawana-wana onondaka vakoneka, muakutikinya onondaka ononyingi mbehesukisile. Ovafendeli va Mbaale vapitalululile okuihana enyina liohuku oyo yomatutu “tunde komuhuka alo komutenya, avati: ‘Mbaale, tukumbulule!’” (1 Reis 18:26) Ovanthu ovanyingi hono vapopia onondaka ononyingi, nokuwana-wana omalikuambelo, okusoka okuti ngotyo “mavatehelelwa.” Mahi Jesus utuvatela okunoñgonoka okuti “okupopia onondaka ononyingi” momalikuambelo omale nokuwana-wana, kaasilivila komaiho a Jeova. Jesus wayawisako okuti:

¹⁰ “Ngotyo, muhevehetekelei, mokonda Huku Tate yenyi utyii ovipuka patyi onwe muesukisa, tyina nkhele muhenemuite.” (Mateus 6:8) Omalikuambelo ononkhalamutue ononyingi mbo va Judeu ankho, elifwa no Onosendiyu, mokonda ankho vapopia onondaka ononyingi tyina velikuambela. Mefendelo liotyotyili muakutikinya omalikuambelo atunda komutima nomahiviliko, nolupandu, nomaite. (Filipenses 4:6) Anthi, katyaviukile okuwana-wana okupopia ovipuka vike, okusoka okuti tyesukisa okupitaulula pala okupopila Huku omasukasuka etu. Tyina tulikuambela tuesukisa okuhinangela okuti tukahi nokupopia na Una ‘wiale omasukasuka etu putyina nkhele tuhenemuite.’

11. Oityi tuna okuhinangela tyina tuapewa otyilinga tyokulinga elikuambelo mewaneno?

¹¹ Onondaka mba Jesus konthele yomalikuambelo ahaviukile mbutuhinangesa okuti, Huku kahuviswa nonondaka mbahasukisile mbumoneka ngoti mbakolela. Tupu, tyina tulinga omalikuambelo mounyingi hamovo wokuovola okuhuvisa ovateheleli, ine okupopia ehimbwe alo ovanthu vasoka onalupi elikuambelo malivituka opo vatie “Amem.” Okulinga elikuambelo liava omaiviso ine omalondolo kovateheleli, tupu katyelikuatele nonondaka mba Jesus Melongoma lio Komphunda.

Jesus Utulongesa Oñgeni Tuna Okulikuambela

12. Onondaka “enyina liove linkhimanekwe” mbuhangununa tyi?

¹² Namphila Jesus alondola konthele yokulityilika okulinga omalikuambelo ahaviukile, tupu walongesa ovalongwa vae oñgeni mavelikuambela. (Tanga Mateus 6:9-13.) Elikuambelo alongesa, ankho hapala okulikoneka opo velipitaulule apeho. Anthi, ankho litulekesa oñgeni matulingi omalikuambelo etu. Jesus watetekela okupopia enyina lia Huku ati: “Tate yetu keulu, enyina liove linkhimanekwe.” (Mateus 6:9) Onthue tupopila Jeova okuti “Tate yetu” mokonda oe Omupakeko wetu, ukala “keulu,” kokule noohi. (Deuteronômio 32:6; 2 Crônicas 6:21; Atos 17:24, 28) Okupopia okuti “yetu” tyituhingelesa okuti ovakuatate vetu navo vena oupanga omuwa na Huku. Onondaka “enyina liove linkhimanekwe” mbulekesa okuti tukahi nokuita opo Jeova asukukise enyina liae momatendeleyo aeho apopiwa konthele yae tunde poungangala mo Endene. Pokukumbulula elikuambelo olio, Jeova makanyima ovivi kombanda yoohi, opo elisukukisa.—Ezequiel 36:23.

13. (a) Oñgeni Huku mafuisapo elikuambelo liokuti “ouhamba wove uye”? (b) Okufuisapo ehando lia Huku pano pohi tyakutikinya tyi?

¹³ “Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:10) Etyi tyaitwa melikuambelo eli, tyituhinangelesa “Ouhamba” wa Mesiya keulu utuminwa na Kristu no ‘no sandu’ vokuatutiliswa mavakaundapa nae. (Daniel 7:13, 14, 18; Isaías 9:6, 7) Okulikuambela okuti “uye,” tyilekesa okuti tuita Ouhamba wa Huku uye okunyimako onondyale ambuho mbefendelo lia Huku pano pohi. Otyo matyikamoneka apa katutu, okuikula ondyila pala omphangu yombembwa nouviuki, nouhona ouye auho. (Salmo 72:1-15; Daniel 2:44; 2 Pedro 3:13) Ehando lia Jeova likahi nokulingwa keulu. Iya okuita okuti lilingwa na pano pohi, tukahi nokuita Huku afuisepo ehando liae konthele yoohi yetu, nokunyimako onondyale mbae hono ngetyi alingile kohale.— Tanga Salmo 83:1, 2, 13-18.

14. Tyina tuita “ombolo yetu pala onthiki yo hono” tukahi nokuita tyi?

¹⁴ “Tuavelevo ombolo yetu pala onthiki yo hono.” (Mateus 6:11; Lucas 11:3) Tyina tuita ngotyo melikuambelo, tukahi nokuita Huku opo etuvatela okuvasa okulia kuesukisa pala “onthiki oyo.” Otyo tyilekesa okuti tuna ekolelo liokuti Jeova una epondolo liokutuavela okulia kese nthiki. Olio helikuambelo liokuita ovipuka ovinyingi. Okuita opo tupewe etyi tuesukisa kese nthiki, tyituhinangelesa okuti Huku watumine ova Isilayeli okukoya omanaa “ituuka kese nthiki.”—Êxodo 16:4.

15. Hangununa oityi tyilekesa onondaka mbati “tuevele oviponyo vietu ngetyi nonthue tuhole okuevela vana vetulinga oviponyo.”

¹⁵ Okulandulisako melikuambelo olio, tuita otyipuka tyimue tuesukisa okulinga. Jesus wati: “Tuevele oviponyo vietu, ngetyi nonthue tuhole okuevela vana vetulinga oviponyo.” (Mateus 6:12) O Evangeliu ya Luka ilekesa okuti “oviponyo” ovio “ononkhali.” (Lucas 11:4) Jeova metuevela vala ononkhali mbetu, inkha onthue “tuaevela” vana vetulinga oviponyo. (Tanga Mateus 6:14, 15.) Tuesukisa okuevela vakuetu tyihakuluminyua.—Efésios 4:32; Colossenses 3:13.

16. Oñgeni tunoñgonoka onondaka mbati wehetuyeke tulolwe, no kutuyovola kondingavivi?

¹⁶ “Wehetuyeke tulolwe, mahi tuyovole kondingavivi.” (Mateus 6:13) Oñgeni matunoñgonoka ovipuka vivali viaitwa melikuambelo lia Jesus? Tete, Jeova ketulolo opo tulinge onkhali. (Tanga Tiago 1:13.) Satanasi “ondingavivi,” oe ‘Ulola ovanthu.’ (Mateus 4:3) Anthi, Ombimbiliya ipopia Huku ngatyina ovipuka vimue ovivi oe uvilinga, mahi tyotyili ukahi vala nokuviyeka. (Rute 1:20, 21; Eclesiastes 11:5) Ngotyo, tyina tuti “wehetuyeke tulolwe,” tukahi nokuita ku Jeova opo ahayeke tutokele monkhali putyina tukahi nokulolwa. Okumanuhula, okuita okuti “tuyovole kondingavivi,” tukahi nokuita opo Jeova ahayeke Satanasi etutokesile monkhali. Iya tupondola okukala nonthumbi yokuti, ‘Huku kametuyeke tulolwe alo tuhetyivili vali okukoleleya.’—Tanga 1 Coríntios 10:13.

‘Tualako Okuita, Nokuovola, Nokutotola’

17, 18. ‘Okutualako okuita, nokuovola, nokutotola,’ tyihangununa tyi?

¹⁷ Apostolu Paulu walunda ovakuatate okuti: “Tualeiko okulikuambela.” (Romanos 12:12) Jesus waavele otyitumino tyelifwa notyo etyi ati: “Tualeiko nokuita, alo mupewa; tualeiko nokuovola, alo muvasa; tualeiko nokutotola, alo muikulwa. Mokonda kese munthu wiita utambula, kese una wovola mavasi, iya kese una utotola maikulwa.” (Mateus 7:7, 8) Tyaviuka “okutualako okuita” kese tyimue tyelikuata nehando lia Huku. Okuendela monondaka mba Jesus, apostolu João wahoneka okuti: “Ei oyo onthumbi tuna mu [Huku], yokuti kese etyi tuita inkha tyelikuata nehando liae, oe metutehelela.”—1 João 5:14.

¹⁸ Onondonga mba Jesus mbo ‘kutualako okuita nokuovola,’ mbulekesa okuti tuesukisa okulikuambela nomutima auho nokuhetyiyekepo. Tupu, tuesukisa “okutualako okutotola” opo tutavelwe Mouhamba wa Huku, atukamona ononkhano onongwa, nouwa, nondyambi. Mahi, okuti tupondola okukala nonthumbi yokuti Huku makumbulula omalikuambelo etu? Enga, tupondola inkha tuna ekolelo mu Jeova, mokonda Kristu wati: “Kese munthu wiita utambula, kese una wovola mavasi, iya kese una utotola maikulwa.” Onongeleka ononyingi mbovaumbili va Jeova, mbulekesa okuti Huku tyotyili “Omuteheleli womalikuambelo.”—Salmo 65:2.

19, 20. Oñgeni Jesus mu Mateus 7:9-11 aeleka Jeova nomunthu wokuna oluembia novana vae?

¹⁹ Jesus waeleka Huku nomunthu una oluembia wavela ovana vae ovipuka oviwa. Pahe soka ñgeno ankho utehelela Elongomona lio Komphunda! Oivi Jesus wati: “Omunthu patyi pokati kenyi tyina omona wae emuita ombolo, emuavela emanya? Ine pamue tyina emuita ombisi, emuavela onyonka? Onwe namphila munondingavivi, mutyivila okuavela ovana venyi ovipuka oviwa. Unene vali Tate yenyi ukahi keulu wavela ovipuka oviwa vana vemuita?”—Mateus 7:9-11.

²⁰ Omunthu wopahitu namphila aelelekwa “nondingavivi” mokonda yokuapiñgana onkhali, una oluembia novana vae. Kapondola okulimbilika ovana vae, anthi ulinga ononkhono mbokuvepa ‘ovipuka oviwa.’ Ngetyi ovanthu valinga novana vavo, Tate yetu keulu woluembia olunene wava ‘ovipuka oviwa,’ puvio ononkhono mbae. (Lucas 11:13) Ononkhono ombo mbutupameka opo tulinge ovilinga viapandwa na Jeova, Omuavi wa “kese otyiawa otyiwa notyali tyafuapo.”—Tiago 1:17.

Tualako Okupola Esilivilo Konondaka mba Jesus

21, 22. Oityi tyakolela vali Melongomona lio Komphunda? Onondaka mba Jesus mbukukalesa ñgeni?

²¹ Elongomona lio Komphunda, liavilapo unene komalongomona aeho alingwa pano pohi. Liakolela unene mokonda yetyi lilongesa konthele ya Huku, tupu liayandyuluka nawa. Ngetyi ononthele ombo ononthatu tuelilongesa mbalekesa, tupondola okupolako esilivilo enene, inkha tuendela monondonga mbukahi melongomona olio. Onondaka ombo mba Jesus mbupondola okutuetela omuenyo omuwa pahetyino, nokutuavela ekevelelo lihambukiswa.

²² Mononthele ombu, tuelilongesa vala katutu konthele yolumono luakolela luvasiwa Melongomona lio Komphunda lia Jesus. Otyo tyilekesa nawa omokonda yatyi vana ankho veivile elongomona liae ‘vahuvile unene nonkhalelo yae yokulongesa.’ (Mateus 7:28) Nonthue ongotyo matulitehelela, inkha tuyulisa momitue vietu no momitima onondaka ombo no nonkhuavo mbakolela mba Jesus Kristu Omulongesi Omunene.

Ove Mokumbulula Ñgeni?

• Oityi Jesus apopia konthele yovanthu vemphinia?

• Omokonda yatyi tuna yokulityilika okuwana-wana onondaka tyina tulikuambela?

• Omapulo patyi avasiwa melikuambelo lia Jesus?

• Oñgeni ‘matutualako okuita, nokuovola, nokutotola’?

[Olutalatu pefo 15]

Okuti utyii omokonda yatyi tyaviuka okulikuambela pala okulia kua kese nthiki?