Jesus Ongeleka Ongwa Pala Okulandula

OKUTI uhanda okukala omunthu ukahi nawa nokuna ehambu? Apostolu Petulu wahangununa oñgeni tupondola okutyilinga. Oe wahoneka okuti: “Kristu wamuene ononkhumbi mokonda yenyi, emuhila ongeleka opo mulandule onomphai mbae.” (1 Pedro 2:21) Mokonda Jesus ankho wali nonkhalelo ongwa yomuenyo, pena ovipuka ovinyingi oviwa tupondola okulilongesila kwe. Inkha tulilongesila ku Jesus, nokulandula ongeleka yae, tupondola okukala nonthumbi yokuti matukala nomuenyo omuwa, nehambu. Tutalei ovituwa vimue ankho Jesus ena, nokutala oñgeni tupondola okupola esilivilo kue.

Jesus ankho wapola pokati. Namphila Jesus apopile okuti “utupu apa alangeka omutwe,” oe ankho kekahi nokuhongiliya ovanthu opo velimonese ononkhumbi. (Mateus 8:20) Jesus ankho wenda kovipito. (Lucas 5:29) Ehuviso liae liotete alingile, wapilululile omeva aakala ovinyu pala otyipito tyotyinepo, otyo tyilekesa okuti oe ankho keyele omuenyo omuwa. (João 2:1-11) Mahi, Jesus walekesile nawa etyi tyakolela vali momuenyo wae. Oe wati: “Okulia kuange okulinga ehando lia una wanthuma, nokumanuhula ovilinga viae.”—João 4:34.

□ Okuti ove watalale nawa onkhalelo yomuenyo wove opo utale oñgeni mopolo pokati okulitekula mopalutu no mopaspilitu?

Jesus ankho epanga liovanthu. Ombimbiliya ipopia okuti Jesus ankho omulume umue wokuna ohole, nomutima omuwa. Tyina ovanthu ankho veya kwe novitateka viavo, ine okumulinga omapulo epuiya, Jesus ankho kanumana. Nthiki imue etyi ekahi pokati kovanthu ovanyingi, omukai umue ankho uvela omanima 12, wakuata kotyikutu tyae opo aveluke. Mahi, Jesus kanumanene mokonda yetyi omukai oo alinga, anthi, noluembia emupopila okuti: “Mona wange ekolelo liove liekuvelukisa.” (Marcos 5:25-34) Novana ankho vahambukwa okukala nae, ankho vetupu owoma wokuti kamesuku navo. (Marcos 10:13-16) Jesus ankho una oupanga omuwa novalongwa vae, nokutomphola nawa navo. Ovalongwa vae ankho vetupu owoma wokufuena kwe.—Marcos 6:30-32.

□ Okuti vakuenyi tyivepuiya okufuena kuove?

Ankho omuna-luembia no munankhenda. Otyituwa otyiwa ankho Jesus ena, okulipaka pomphangu ya vakuavo, okunoñgonoka oñgeni velitehelela, nokuvekuatesako. Apostolu Paulu wapopile okuti etyi Jesus amona Maliya ukahi nokulila omphange yae Lasalu, Jesus “tyemuihama, akeme” iya “ahimbika okulila.” Vokuetyimuene, vanoñgonokele nawa ohole onene Jesus ankho ena nombunga oyo, ankho utupu ohonyi yokulekesa kovanthu okuti uhole ombunga oyo. Tyotyili, walekesile okankhenda okanene etyi akondola epanga liae komuenyo!—João 11:33-44.

Tupu onthiki onkhuavo, omulume umue ankho wokuna otyilundu—ouvela umue ankho umukalesa aike— waita ku Jesus okuti: “Tatekulu inkha wahanda upondola okumbelula.” Jesus akumbulula nehambu okuti: “‘Ame nahanda. Veluka. Iya otyilundu atyimutundu liwa-liwa.’” (Mateus 8:2, 3) Jesus kavelulile ovanthu opo afuisepo vala omaulo. Ankho uhanda okuvepola ononkhumbi mbavo. Ovipuka aviho ankho alinga vihongolelwa no nondaka ombu apopia okuti: “Ngetyi muhanda ovanthu vemulinge, tupu nonue otyo muvelinga.”—Lucas 6:31.

□ Okuti ovipuka ulinga vilekesa okuti una okankhenda na vana vekahi movitateka?

Jesus ankho una enoñgonoko nounongo wokupunga. Namphila Jesus ankho kalingi nkhali, nalumue akevelele vakuavo valinge apeho etyi tyaviuka ine okulipakako. Ankho kalingi etyi ahanoñgonokele nawa. Nthiki imue omukai umue ankho “wiue mepundaumbo okuti ulinga ovivi,” wakohele onomphai mba Jesus nononkhuka mbae, okulekesa ekolelo liae mu Jesus, nolupandu. Jesus wayekele omukai oo emukohe, iya ovanthu vana ankho vapopia omapita omukai oo avahuvu. Jesus wanoñgonoka okuti omukai oo ankho una ekolelo, ehemuhitisa mokonda yononkhali mbae. Anthi, Jesus wati: “Ekolelo liove liekuyovola; enda nombembwa.” Mokonda Jesus wakumbulula omukai oo noluembia, tyemukuatesako okupilulula onkhalelo yae yomuenyo.—Lucas 7:37-50.

□ Okuti ove wiwe ngomunthu uhole okupandula liwa vakuayi, nokuhavele liwa onombei?

Ankho utupu okapungulula mahi ankho una onthilo. Jesus ankho velihole unene nomulongwa João, tyafuile omokonda ankho velivila ine omokonda ankho onombunga.a Anthi, otyo katyilekesa okuti Jesus ankho una okapungulula, ine upanda vala ovalongwa vamue. (João 13:23) Etyi João na Tiago vapula Jesus ovilinga patyi mavakapewa Mouhamba wa Huku, Jesus evekumbulula okuti: “Okupumphama kokulio ine okokumbili, otyo hameko ndyityaava.”—Marcos 10:35-40.

Jesus apeho ankho una onthilo navakuavo. Ankho utupu okapungulula namphila ankho ekahi pokati kovanthu vena otyituwa otyo. Mongeleka, ovakai ankho vatalwa ngatyina vehena esilivilo. Mahi, Jesus ankho una ehumbilo novakai. Otyikando tyotete apopia okuti oe o Mesiya, wetyipopile omukai umue wehemu Judeu ankho omu Samaria. Iya ankho ova Samaria veyelwe no va Judeu, kavelikukunya. (João 4:7-26) Omukai wakalele nelao enene liokukala ombangi yotete, yetutilo lia Jesus.—Mateus 28:9, 10.

□ Okuti ove utekula vakuenyi tyihena okapungulula, ohatale omuhoko, elaka vapopia ine otyilongo?

Jesus ankho utavela kovohe no konondenge mbae. Mokutala Jose tate ya Jesus, wankhia etyi nkhele Jesus omukuendye. Jesus waundapele ngomuhongi womavai opo atekule ina yae, no nondenge mbae, no nomphange. (Marcos 6:3) Mokueenda kuonohanyi mbahulililako mbomuenyo wae, Jesus wapopia nomulongowa wae João opo atekule Maliya ina yae.—João 19:26, 27.

□ Okuti upondola okuhetekela Jesus mokutekula ombunga ngetyi oe alingile?

Jesus ankho epanga liotyotyili. Jesus ankho epanga liavilapo. Ñgeni? Jesus ankho kayekepo omapanga ae mokonda vala valinga oviponyo, namphila pamue ankho vapalaikenya otyiponyo tyike. Ovalongwa vae ankho kavalingi apeho ngetyi ahanda. Mahi, Jesus walekesile okuti epanga liavo mokonda ankho utala vali unene kovituwa viavo oviwa, ehevekoyesa mokonda yovivi. (Marcos 9:33-35; Lucas 22:24-27) Namphila ankho ehevekuluminya okulinga ehando liae, oe ankho uveita vapopie etyi tyikahi momitima viavo.—Mateus 16:13-15.

Haunene, Jesus ankho uhole omapanga ae. (João 13:1) Ankho uvehole alopi? Jesus wati: “Nawike una ohole ipona yauna waava omuenyo mokonda yomapanga ae.” (João 15:13) Okuti pena otyipuka omunthu apondola okuava tyakolela vali tyipona omuenyo?

□ Okuti ove utualako noupanga na vakuenyi na tyina vekuleva ine vekunumanesa?

Jesus ankho una omutima wakola nokuapama. Jesus ankho hamunthu wokuhena omafa, ngetyi ovanthu vamue vehole okumulekesa momikanda. Ono Evandyeliu mbupopia okuti ankho omunthu wononkhono, nokuapama. Jesus wataatele ovikando vivali ovanthu ankho vekahi nokulingila ovitanda mondyuo ya Huku. (Marcos 11:15-17; João 2:14-17) Etyi ovanthu veya okukuata “Jesus wo ko Nazare,” tyehena owoma wapita komutue okuamena ovalongwa vae, iya ati: “Ame uno. Inkha ame mukahi nokuovola, ava veyekei vaye.” (João 18:4-9) Etyi Posu Pilatu amona okuti Jesus wakola omutima namphila ankho ekahi nokumoneswa ononkhumbi, oe ati: “Talei, omunthu oyou!”—João 19:4, 5.

□ Okuti ove utokola nokukola omutima tyina utyii oityi una okulinga?

Mokonda yovituwa ovio novikuavo viae viavilapo, Jesus ongeleka ongwa pala onthue. Inkha tuyeka ongeleka ya Jesus ihongolele omuenyo wetu, matukala ovanthu ovawa, nokuna ehambu. Otyo apostolu Petulu alondolela Ovakristau valandule popepi monomphai mba Jesus. Okuti ukahi nokulinga ononkhono opo ulandule popepi monomphai mba Jesus?

Kaavele Vala Ongeleka Tuna Okulandula

Anthi, Jesus waava vali tyipona ongeleka tuna okulandula. Oe wati: “Ame ndyila, ame tyili, ame muenyo. Nawike uya ku Tate ahapiti puame.” (João 14:6) Jesus walongesa otyili konthele ya Huku, tyaikula ondyila yokulinga oupanga na Huku. Tupu, waava omphitilo opo ovanthu aveho vekolelo vakamone omuenyo.—João 3:16.

Jesus wapopia konthele yetyi eila pano pohi, okuti: “Omona womunthu keile opo aumbilwe, anthi weya okuumbila, nokuava omuenyo wae ngofeto pala okuyovola ovanthu ovanyingi.” (Mat. 20:28) Mokuaava omuenyo wae ngotyilikutila, Jesus waikula ondyila opo ovanthu vakale nomuenyo wahapu. Oityi kese umue puonthue ena okulinga opo apole esilivilo kotyilikutila otyo? Jesus wahangununa okuti: “Omuenyo wahapu oyou, okunoñgonoka ove awike Huku yotyotyili, na Jesus Kristu una watumine.”—João 17:3.

Tyotyili, opo tukamone omuenyo wahapu, tuna okukala nenoñgonoko lia Jesus, okuhetekela ongeleka yae, nokukala nekolelo motyilikutila tyae. Tukukonga opo wovole omuvo wokulilongesa Ombimbiliya ondyivindyivi yenoñgonoko, nokulinga ononkhono mbokulinga etyi ipopia, ngetyi tyalingile Jesus.b

Omuenyo wa Jesus utulongesa ovituwa patyi onthue tuna okukala navio. Otyilikutila tyae tyipondola okutoyovola monkhali, no nonkhia. (Rom. 6:23) Inkha katualandulile ongeleka ya Jesus Kristu, omuenyo wetu ñgeno wakala omapita ngatyi! Uhayeke omasukalalo omuenyo notyiho vikutyilike okulilongesa, nokulandulila popepi omunthu wavilapo wakalele kombanda yoohi—Jesus Kristu.

[Onondaka Poutoi]

[Okakasa/​Omalutalatu pefo 7]

◼ Jesus ankho utupu okapungulula mahi ankho una onthilo

◼ Wali epanga liotyotyili alo konthyulilo

◼ Ankho wakola omutima

[Olitalatu pefo 5]

Jesus ankho wapola pokati

ankho epanga liovanthu . . .

ankho omunankhenda