ELONGESO 51
Hambukiswa Huku Muevi Upopia
Etyi Siovaa ati pokwetutunga, wetutunga umwe nawa tutyivile okupopia. Okuti ñgaa Siovaa Huku usuka umwe nevi tupopia? Yoo. (Tanga Tiaku 1:26.) Pahe matulingi ñgeni opo tyina tuti pokupopia, atupopi umwe evi vihambukiswa Siovaa?
1. Oñgeni tuna okupopia opo Siovaa ahambukwe?
Ombimbiliya yati: “Tualeiko okulipameka na vakwenyi nokulikuatesako na vakwenyi.” (1 Ova Tesalonika 5:11) Okuti hamwe wii ovanthu vamwe vesukisa okupamekwa? Oityi upondola okulinga uvepameke? Vepopila okuti uvehole, ovepopila ovipuka vimwe ngwe valinga ove uhole. Mo Mbimbiliya muna onotesitu ononyingi. Okuti ove una otesitu imwe wii, okuisoka ñgaa, ine una omunthu wiitangela imupameka? Mahi wahasoke vala ku etyi mokapopia. Opo utyivile okupameka vakwenyi, tupu una okusoka oñgeni mopopi navo. Likuatehila umwe opo apeho upopie nawa, nokankhenda. — Provérbios 15:1.
2. Ovipuka patyi tuahapondola okupopia?
Ombimbiliya yati: “Momulungu wenyi muhatunde ondaka naike yasila.” (Tanga Ova Efesu 4:29.) Onondaka ombo mbahanda okuti, katupondola okutukana. Katupondola okupopia otyipuka tyimwe twii umwe okuti matyinumanesa mukuetu. Tupu otyiwa tuahaambe vakuetu, tuehevetendeleye otyipuka tyimwe vahalingile. — Tanga Provérbios 16:28.
3. Oityi tuna okulinga tupopie ovipuka vipameka vakuetu?
Ovipuka tupopia, ovio mavilekesa etyi tyili momutima wetu. (Luka 6:45) Naina, opo tupopie ovipuka vikalesa nawa vakuetu, tete tuna okuyulisa momutima wetu ovipuka viaviuka, viasukuka, viapandwa, vihiwa okuhilivikwa. (Ova Filipu 4:8) Mahi opo tutyivile okusoka kovipuka ovio oviwa, tuna okutala nawa omapanga etu, nevi tulimana navio ounye, oviimbo tuhole, nevi tuhole okutala mo televisau. (Provérbios 13:20) Tupu otyiwa okuti tyina tuehenepopie, nkhele atusoko oñgeni matyikalesa vakuetu. Ombimbiliya yati: “Onondaka mba una upopia tyihasokele, mbutoma ngomutunga, mahi elaka liomunthu una onondunge lihakula.” — Provérbios 12:18.
KUHANDE OKUNOÑGONOKA VALI?
Motale etyi una okulinga upopie ovipuka vipameka vakwenyi, ohambukiswa Siovaa.
4. Tala nawa evi upopia
Pamwe tupopia ovipuka viahatiwa ovievi, pahe ha atulivele. (Tiaku 3:2) Tangei Ova Galata 5:22, 23, amutomphola omapulo aa:
Povipuka ovio viapopiwa mo tesitu oyo, ovipi usoka okuti ine ulikuambela ukale navio, motyivili okuyunga evi upopia? Tyina utala ñgaa, oñgeni mavikukuatesako?
Tangei 1 Ova Kolindu 15:33, amutomphola omapulo aa:
Okuti ovanthu tuhimama navo, noviimbo tuhole, nevi tutala mo televisau, vipondola okutunyona, pahe atupopi vala evi viahatiwa ovievi? Oityi wakumbululila ngotyo?
Ovipuka patyi vipondola okutulingisisa, nga tueya pokupopia atukandaukila vala ovanthu? Oityi tuna okulinga tupopie nawa na vakuetu?
Tangei Eclesiastes 3:1, 7, amutomphola epulo eli:
Onalupi otyiwa okuti umwe filuu, atuahapopi natyike, atukevela oola onkhuavo matupopi?
5. Wahapopie omapita vakwenyi
Oityi tuna okulinga tuahapopie ovipuka vipondola okunumanesa vakuetu? Talei OVIDIU, amutomphola omapulo aa:
Oityi omukuendye tuamona movidiu asokela umwe nawa, ati tyokuaamba mandyityiyeke-po?
Oityi alinga etyiyeke-po?
Tangei Eclesiastes 7:16, amutomphola epulo eli:
Ine tukahi ñgaa ngoti tuahanda okupopia omapita vakuetu, oityi tuna okuhinangela?
Tangei Eclesiastes 7:21, 22, amutomphola epulo eli:
Oñgeni okuhinangela onondaka mbo tesitu oyo, matyikukuatesako okuhanumana tyina wameivi okuti pena omunthu wekupopia omapita?
6. Tyina upopia novo meumbo lienyi, popia nawa!
Siovaa uhanda ñgeno tyina tupopia novo meumbo lietu, atupopi nawa. Talei OVIDIU, amutomphola epulo eli:
Oityi tyapopiwa movidiu una okusoka nawa, utyivile okupopia nawa novo meumbo lienyi?
Tangei Ova Efesu 4:31, 32, amutomphola epulo eli:
Ngetyi tyapopia otesitu oyo, oñgeni una okupopia na vakwenyi meumbo lienyi navo vakale nawa?
Siovaa ankho upopia umwe okuti uhole Omona wae Sesusi. Tangei Mateusi 17:5, amutomphola epulo eli:
Oñgeni upondola okuhetekela Siovaa tyina upopia novo meumbo lienyi?
Apeho tala oviwa vakwenyi valinga, ovepandula
OVANTHU VAMWE VATI: “Ame muene ndyipopia vala etyi nasoka. Pahe ou muene tyakala omapita, otyo o tyae!”
Ku ove otyipuka otyo tyaviuka? Oityi wakumbululila ngotyo?
ETYI WELILONGESA
Welilongesa okuti mokonda onondaka mbuna ononkhono, apeho tuna okusoka (1) ku etyi matupopi, (2) onalupi matutyipopi, (3) oñgeni matutyipopi.
Okupitulula
Ovipuka patyi upondola okupopia, mavikalesa nawa vakwenyi?
Ovipuka patyi wahahande vitunde momulungu wove?
Ovipuka patyi upondola okulinga opo apeho upopie ovipuka vikahi nawa, vipameka vakwenyi?
KUHANDE OKUOVOLA VALI?
Oityi una okuhinangela utyivile okupopia ovipuka vipameka vakwenyi?
Tala etyi una okulinga wahatukane.
Ovidiu ei ipopia etyi upondola okulinga wahaambe.
Tala oñgeni Siovaa akuatesako omukulu umwe okuyekapo okutukana.
“Andyihimbika Okusoka Nawa Komwenyo Wange” (onthele Yomutala Womulavi)