Nɔmbɛse

16 Akee Livae+ ara Kohate+ ara Yezehaa+ ara Kɔla+ nee Ɛlayabe+ amra Deetan nee Abaelam yɛɛ Pilɛte ara Ɔɔn mɔɔ bɛvi Wulubɛn+ abusua nu la hanle bɛ nwo bɔle nu. 2 Bɛ nee Yizilayɛ mgbanyima 250 mɔɔ bɛkpa bɛ wɔ menli ne anu na bɛle menli titili la dwazole tiale Mosisi. 3 Ɔti bɛboɔboale bɛ nloa bɛtiale+ Mosisi nee Aalɔn na bɛzele bɛ kɛ: “Akee bɛmaa yebo yɛ nwo zo! Menli ne amuala le nwuanzanwuanza,+ yɛɛ Gyihova wɔ bɛ avinli.+ Duzu ati a akee bɛmemaa bɛ nwo zo wɔ Gyihova menli ne anwo zo ɛ?”

4 Mɔɔ Mosisi dele ɛhye la, ɛkɛ ne ala ɔbutule ɔ nyunlu aze. 5 Akee ɔzele Kɔla nee ɔ sa zo ne mɔ kɛ: “Ɛhyema nwonlomɔ, Gyihova bahile ahenle mɔɔ le ye ɛdeɛ+ nee ahenle mɔɔ le nwuanzanwuanza mɔɔ ɔwɔ kɛ ɔba ɔ nyunlu la,+ na ahenle mɔɔ ɔbakpa ye la,+ yemɔ a bara ɔ nyunlu a. 6 Bɛyɛ ɛhye: Kɔla, ɛ nee ɛ sa zo ne mɔ amuala,+ bɛva senlevalɛ ahyɛnze,+ 7 bɛva senle bɛgua nu na bɛva ayilevuanlɛ bɛgua zolɛ bɛrɛla Gyihova anyunlu ɛhyema, na ahenle mɔɔ Gyihova bakpa ye la,+ yemɔ a le nwuanzanwuanza a. Bɛmɛ Livaema,+ akee bɛyɛ bɛmaa yebo zo!”

8 Akee Mosisi zele Kɔla kɛ: “Bɛmɛ Livaema, mesɛlɛ bɛ, bɛdie. 9 Asoo bɛdwenle kɛ ɔle debie ekyi kɛ Yizilayɛ Nyamenle ne ɛye bɛ ɛvi Yizilayɛma amuala avinli+ na yemaa bɛra ɔ nyunlu amaa bɛayɛ gyima wɔ Gyihova ɛdanlɛsua ne anu na bɛagyinla Yizilayɛma amuala anyunlu bɛazonle bɛ,+ 10 na yemaa bɛ nee bɛ mediema Livaema amuala ɛbikye ye la ɔ? Eza bɛpele bɛalie ɛsɔfo gyima ne ɔ?+ 11 Ɛhye ati, ɛ nee ɛ sa zo ne mɔ amuala mɔɔ ɛboɔboa bɛ nloa la ɛdwazo ɛtia Gyihova. Aalɔn ɛdeɛ, ɔle nwane mɔɔ ɔwɔ kɛ bɛtendɛ bɛ nzo abo bɛtia ye a?”+

12 Nzinlii, Mosisi zoanle kɛ bɛhɔvɛlɛ Ɛlayabe amra Deetan nee Abaelam,+ noko bɛhanle kɛ: “Yɛnrɛra! 13 Ɛdwenle kɛ ɔle debie ekyi kɛ wɔye yɛ wɔvi azɛlɛ mɔɔ meleke nee wolɛ se zolɛ la azo kɛ ɛku yɛ wɔagua fienemgbole ye anu ɔ?+ Eza ɛkulo kɛ ɛdi yɛ nwo zo tumi bɔkɔɔ ɔ?* 14 Ɛtɛfale yɛ ɛtɛbale azɛlɛ biala mɔɔ meleke nee wolɛ se zolɛ la azo,+ yɛɛ ɛtɛmaanle yɛ azɛlɛ nee vanye egyinli kɛ yɛ agyapadeɛ. Ɛkulo kɛ ɛtudu menli ɛhye mɔ anye ɔ? Yɛnrɛra!”

15 Yemɔti Mosisi vale ɛya kpole na ɔzele Gyihova kɛ: “Mmato ɛ nye ɛnea bɛ ma afɔlebɔdeɛ ne. Metɛdiele asoaso ko bɔbɔ metɛfile bɛ ɛkɛ, yɛɛ metɛyɛle bɛ nuhua biala ɛhwee.”+

16 Akee Mosisi zele Kɔla kɛ: “Ɛdawɔ nee ɛ sa zo ne mɔ amuala yɛɛ Aalɔn ɛrɛla Gyihova anyunlu ɛhyema. 17 Ɔwɔ kɛ awie biala fa ye senlevalɛ kyɛnze na ɔfa ayilevuanlɛ ɔgua nu, na bɛ nuhua ko biala bava ye senlevalɛ kyɛnze ne ara Gyihova anyunlu, ɔbayɛ senlevalɛ ahyɛnze 250, ɛdawɔ nee Aalɔn noko, ko biala ɛva ye senlevalɛ kyɛnze ɛrɛla.” 18 Ɔti bɛ nuhua ko biala vale ye senlevalɛ kyɛnze na bɛvale senle nee ayilevuanlɛ bɛguale nu, na bɛragyinlanle Mosisi nee Aalɔn anwo ɛkɛ wɔ nyianu ɛdanlɛsua ne anuhɔlɛ. 19 Mɔɔ Kɔla boɔboale ɔ sa zo ne mɔ anloa+ maanle bɛragyinlanle bɛ nwo ɛkɛ ne wɔ nyianu ɛdanlɛsua ne anuhɔlɛ la, Gyihova anyunlunyia ne dale maanle menli ne amuala nwunle ye.+

20 Akee Gyihova zele Mosisi nee Aalɔn kɛ: 21 “Bɛhwe bɛ nwo bɛvi menli ɛhye mɔ anwo na menzɛkye bɛ kɛkala.”+ 22 Na bɛbutubutule bɛ nyunlu aze na bɛhanle kɛ: “O Nyamenle, wɔmɔ mɔɔ ɛmaa menli kɔsɔɔti ngoane la,*+ asoo sonla ko ɛtane ti ɛbava menli ne amuala anwo ɛya ɔ?”+

23 Akee Gyihova zele Mosisi kɛ: 24 “Ka kile menli ne amuala kɛ, ‘Bɛhwe bɛ nwo bɛvi Kɔla, Deetan yɛɛ Abaelam+ ɛdanlɛ azua ne mɔ anwo!’”

25 Akee Mosisi dwazole hɔle Deetan nee Abaelam ɛkɛ, na Yizilayɛ mgbanyima+ nee ye hɔle. 26 Ɔzele menli ne amuala kɛ: “Mesɛlɛ bɛ, bɛhwe bɛ nwo bɛvi amumuyɛma ɛhye mɔ ɛdanlɛ azua ne mɔ anwo, na bɛmmafa bɛ sa bɛka bɛ debie biala, amaa bɛ ɛtane ne ati bɛanzɛkye bɛ.” 27 Ɛkɛ ne ala bɛhwenle bɛ nwo bɛvile Kɔla, Deetan yɛɛ Abaelam ɛdanlɛ azua ne mɔ anwo, na Deetan nee Abaelam yɛɛ bɛ ye mɔ, bɛ mra mrenyia nee bɛ mra ngyikyi vindele ragyinlanle bɛ ɛdanlɛ azua ne mɔ anuhɔlɛ.

28 Akee Mosisi hanle kɛ: “Ɛhye bamaa bɛanwu kɛ Gyihova a ɛzoa me kɛ menyɛ ninyɛne ɛhye mɔ amuala a, na tɛ medame me tumi zo ɔ:* 29 Saa menli ɛhye mɔ wu bɛ ti anwo ewule kɛ mɔɔ menli kɔsɔɔti wu anzɛɛ bɛtwe bɛ nzo kɛ mɔɔ bɛtwe menli kɔsɔɔti anzo la a, ɛnee tɛ Gyihova a ɛzoa me a.+ 30 Noko saa Gyihova yɛ debie ɛzulolɛ kpole bie kile bɛ na ɔmaa azɛlɛ ne kpakye* na ɔme bɛ nee bɛ debie biala na bɛkɔ Nla* ne anu anyewɔzo a, yɛɛ bɛbanwu kɛ menli ɛhye mɔ anli Gyihova eni a.”

31 Ɔhanle edwɛkɛ ɛhye mɔ ɔwiele ala la, yɛɛ azɛlɛ ne mɔɔ bɛgyi zo la anu kpakyele a.+ 32 Azɛlɛ ne kpakyele* na ɔmenle bɛ nee bɛ sua nu amra nee Kɔla+ mbusuafoɔ nee bɛ nwo ninyɛne kɔsɔɔti. 33 Yemɔti bɛ nee bɛ mbusuafoɔ hɔle Nla* ne anu anyewɔzo na azɛlɛ ne hedale bɛ nwo zo, ɔti bɛ bo zo minlinle wɔ Yizilayɛma avinli.+ 34 Yizilayɛma kɔsɔɔti mɔɔ wɔ ɛkɛ ne mɔɔ dele kɛ bɛlɛteɛdea nu la nriandile, ɔluakɛ bɛhanle kɛ: “Yɛsulo kɛ azɛlɛ ne kɛme yɛdayɛ noko!” 35 Na senle vi Gyihova ɛkɛ+ rayelale menli 250 ne mɔɔ ɛlɛkpu ayilevuanlɛ ne la.+

36 Akee Gyihova zele Mosisi kɛ: 37 “Ka kile ɛsɔfo Aalɔn ara Ɛlieza kɛ ɔyeye senlevalɛ ahyɛnze ne mɔ+ ɔvi senle ne anu, ɔluakɛ bɛle nwuanzanwuanza. Eza ka kile ye kɛ ɔvuandi senle ne ɔgua ye ɛleka bie moamoa. 38 Ɔwɔ kɛ ɛfa menli mɔɔ yɛle ɛtane na bɛwule* la senlevalɛ ahyɛnze ne mɔ ɛbolo ɛyɛ ahyɛnze ndɛbandɛba ɛfa ɛkeda afɔlemokyea ne anwo,+ ɔluakɛ bɛvale bɛrale Gyihova anyunlu yɛɛ bɛyɛle nwuanzanwuanza. Ɔwɔ kɛ ɔyɛ sɛkɛlɛneɛ ɔmaa Yizilayɛma.”+ 39 Yemɔti ɛsɔfo Ɛlieza vale menli mɔɔ yelale la kɔbele senlevalɛ ahyɛnze ne mɔ mɔɔ bɛ nee bɛ rale la na ɔbolole bɛ ɔhedale afɔlemokyea ne anwo 40 kɛ mɔɔ Gyihova luale Mosisi anwo zo hanle la. Ɔyɛle ngakyelɛ ɔmaanle Yizilayɛma kɛ ɔnle kɛ awie biala mɔɔ ɛnlɛ nwolɛ adenle* mɔɔ ɛnvi Aalɔn abusua nu la ba Gyihova anyunlu bakpu ayilevuanlɛ,+ yɛɛ ɔnle kɛ awie biala yɛ ɔ nwo kɛ Kɔla nee ɔ sa zo ne mɔ la.+

41 Aleɛ hyenle ala la, Yizilayɛma amuala bɔle ɔ bo dendɛle bɛ nzo abo tiale Mosisi nee Aalɔn+ kɛ: “Bɛ mu nwiɔ bɛhu Gyihova menli.” 42 Mɔɔ menli ne boɔboale bɛ nloa tiale Mosisi nee Aalɔn la, bɛhakyile bɛ nye wɔ nyianu ɛdanlɛsua ne anwo lɔ, na nea! ɛnee amungu ɛheda zolɛ, na Gyihova anyunlunyia ne dale.+

43 Mosisi nee Aalɔn hɔle nyianu ɛdanlɛsua ne anyunlu,+ 44 na Gyihova zele Mosisi kɛ: 45 “Bɛye bɛ nwo bɛvi menli ɛhye mɔ avinli na menzɛkye bɛ kɛkala.”+ Ɔti bɛbutubutule bɛ nyunlu aze.+ 46 Akee Mosisi zele Aalɔn kɛ: “Fa senlevalɛ kyɛnze ne na fa afɔlemokyea ne+ azo senle ne bie gua nu na fa ayilevuanlɛ gua zolɛ na kɔ menli ne avinli ndɛndɛ kɔli bɛ ti mgbɔdalɛ maa bɛ,+ ɔluakɛ Gyihova ɛva ɛya. Ewule ne ɛbɔ ɔ bo!” 47 Ɛkɛ ne ala Aalɔn vale ye kyɛnze ne kɛ mɔɔ Mosisi hanle la na ɔnriandile ɔhɔle menli ne avinli, na nea! ɛnee ewule ne ɛbɔ ɔ bo ɛlɛka menli ne. Yemɔti ɔvale ayilevuanlɛ ne ɔguale senlevalɛ kyɛnze ne anu na ɔlile menli ne ati mgbɔdalɛ. 48 Ɔhɔle zo ɔgyinlanle menli mɔɔ ɛwu nee mɔɔ ɛtɛwule la avinli, na ewule ne gyakyile. 49 Menli mɔɔ ewule ne hunle bɛ la dodo le 14,700, menli mɔɔ Kɔla ati bɛwule la ɛmboka nwo. 50 Nzinlii mɔɔ Aalɔn ziale hɔle Mosisi anwo ɛkɛ wɔ nyianu ɛdanlɛsua ne anuhɔlɛ la, ɛnee ewule ne ɛgyakyi.