Baʼuu

39 Isaanis foʼaa bifa cuquliisaa, suufii bifa dhiilgee fi foʼaa diimaa+ irraa uffatawwan baʼeessa taʼanii dhaʼamanii fi iddoo qulqulluu keessatti tajaajiluuf uffataman ni tolchan. Akkuma Yihowaan Musee ajajettis, Aaroniif uffatawwan qulqulluu ni tolchan.+

2 Inni efuudicha+ warqii, foʼaa bifa cuquliisaa, suufii bifa dhiilgee, foʼaa diimaa fi quncee talbaa baʼeessa taʼee foʼame irraa ni tolche. 3 Isaan warqii battee tumanii ni haphisan; innis foʼaa bifa cuquliisaa, suufii bifa dhiilgee, foʼaa diimaa fi quncee talbaa baʼeessa sanaa wajjin walitti isaan dhaʼuuf akka foʼaatti qaqalʼisee isaan babbaqaqse; efuudichis warqii sanaan xilfiin kan irratti dhaʼame ture. 4 Isaan efuudii sanaaf kutaa gateettii irra ooluu fi fiixee isaa lamaan irratti walitti qabsiifame ni tolchan. 5 Akkuma Yihowaan Musee ajajettis, sabbanni dhaʼame inni efuudiin sun iddoo isaatii akka hin sochoone gochuuf itti qabsiifamu+ wantootuma wal fakkaatan, jechuunis warqii, foʼaa bifa cuquliisaa, suufii bifa dhiilgee, foʼaa diimaa fi quncee talbaa baʼeessa taʼee foʼame irraa kan tolfame ture.

6 Isaan dhagoota oniiksii sana baattuuwwan warqii irraa tolfaman keessa ni kaaʼan; achiis akkuma chaappaa bocanitti maqaa ilmaan Israaʼel isaan irratti ni bocan.+ 7 Innis akkuma Yihowaan Musee ajajetti, ilmaan Israaʼeliif dhagoota yaadannoo akka taʼaniif+ kutaa efuudichaa isa gateettii irra oolu irra isaan kaaʼe. 8 Achiis inni kiisii qomaa+ sana ni tolche. Kiisiin qomaa sun akkuma efuudichaa nama xilfii dhaʼuun warqii, foʼaa bifa cuquliisaa, suufii bifa dhiilgee, foʼaa diimaa fi quncee talbaa baʼeessa taʼee foʼame irraa kan tolfame ture.+ 9 Yommuu dachaafamus rogni isaa arfan wal qixa ture. Isaan kiisii qomaa yommuu dachaafamu dheerinni isaas taʼe dalgi isaa taakkuu* tokko taʼu ni tolchan. 10 Innis achi irratti tarree afuriin dhagoota ni maxxanse. Tarreen inni jalqabaa ruubii, tophaaziyonii fi imeraaldi ture. 11 Tarreen inni lammaffaan tarkooyis, safiroosii fi yaasphis ture. 12 Tarreen inni sadaffaan lesheem, ageetii fi ametiisxos ture. 13 Tarreen inni arfaffaan immoo kirisoliixos, oniiksii fi jeed ture. Isaan baattuuwwan warqii irraa tolfaman irra kaaʼamanii turan. 14 Dhagoonni kun maqaa ilmaan Israaʼel 12n kan bakka buʼan turan; maqaawwan isaanii akkuma chaaphaatti kan bocaman yeroo taʼu, maqaan tokko gosoota 12n keessaa isa tokko kan bakka buʼu ture.

15 Achiis kiisii qomaatti marsanii funcaa funyoo warqii qulqulluu irraa foʼame fakkaatu ni tolchan.+ 16 Baattuuwwan warqii irraa tolfaman lamaa fi amartiiwwan warqii lama tolchanii, amartiiwwan lamaan sana fiixee kiisii qomaa lamaanitti qabsiisan. 17 Sana booda funyoowwan warqii irraa tolfaman lamaan sana amartiiwwan lamaan warra fiixee kiisii qomaa irra jiran keessa galchan. 18 Fiixeewwan lamaan funyoowwan lamaan sanaa baattuuwwan lamaan keessa galchanii, karaa fuulduraatiin kutaa efuudichaa isa gateettii irra oolu irratti qabsiisan. 19 Achiis amartiiwwan warqii lama tolchanii gara efuudichaatti gargalchanii, qarqara kiisii qomaa lamaan warra gara gadii irratti ni qabsiisan.+ 20 Achiis efuudicha fuulduraan kutaa efuudichaa isa gateettii irra oolu lamaanii gaditti, bakka efuudichii fi sabbanni itti wal qabatu biratti, sabbata efuudii isa dhaʼamee olitti amartiiwwan warqii dabalataa lama ni tolchan. 21 Dhuma irrattis akkuma Yihowaan Musee ajajetti, kiisiin qomaa sun sabbata dhaʼamee olitti efuudichatti maxxanee iddoo isaatii akka hin sochooneef, amartiiwwan isaa amartiiwwan efuudichaatti funyoo bifa cuquliisaatiin ni hidhan.

22 Achiis qoloo efuudicha jalatti uffatamuu fi namni wayyaa dhaʼu qopheesse guutummaatti foʼaa bifa cuquliisaa irraa ni tolche.+ 23 Qoloon sun akkuma baqaqaa kootii sibiilaatti gidduu isaatti baqaqaa qaba ture. Akka hin tarsaaneefis baqaqaan sun qarqarri isaa goodamee ture. 24 Achiis isaan foʼaa bifa cuquliisaa, suufii bifa dhiilgee fi foʼaa diimaa walitti dhaʼame irraa qarqara qoloo sanaatti naannessanii romaanota tolchan. 25 Achiis bilbilawwan warqii tolchanii qarqara qoloo sanaatti naannessanii romaanota sana gidduu isaan kaaʼan; 26 akkuma Yihowaan Musee ajajettis, qarqara qoloo isa tajaajilaaf oolu sanaatti naannessanii bilbala tokko achiis romaanii tokko gochaa wal keessa tolchan.

27 Sana booda isaan Aaronii fi ilmaan isaatiif foʼaa quncee talbaa baʼeessa namni wayyaa dhaʼu qopheesse irraa uffata dheeraa ni tolchan;+ 28 marata mataa+ foʼaa quncee talbaa baʼeessa taʼe irraa tolfame, marata mataa faayawwaniin miidhagfamee+ fi foʼaa quncee talbaa baʼeessa taʼe irraa tolfame, qumxaawwan* foʼaa quncee talbaa+ baʼeessa taʼee foʼame irraa tolfaman, 29 akkasumas, sabbata foʼaa quncee talbaa baʼeessa taʼee foʼame, foʼaa bifa cuquliisaa, suufii bifa dhiilgee fi foʼaa diimaa walitti dhaʼame irraa tolfame ni tolchan; kanas akkuma Yihowaan Musee ajajetti ni raawwatan.

30 Dhuma irrattis warqii qulqulluu irraa wanta diriiraa calaqqisu, jechuunis mallattoo qulqulluu kan murteeffaman taʼuu argisiisu* tolchanii akkuma namni tokko chaappaa bocutti, “Qulqullummaan kan Yihowaa ti” jedhanii irratti bocan.+ 31 Akkuma Yihowaan Musee ajajettis, marata mataa sana irra akka taaʼuuf funyoo bifa cuquliisaa isatti ni hidhan.

32 Kanaafuu, hojiin godoo qulqulluu, jechuunis hojiin dunkaana walgaʼii hundi ni xumurame; Israaʼelonnis wanta Yihowaan Musee ajaje hundumaa ni raawwatan.+ Isaan akkanuma ni godhan.

33 Achiis isaan godoo qulqulluu+ sana, jechuunis dunkaanichaa+ fi miʼawwan isaa hundumaa gara Museetti fidan; wantoonni isaan fidan kanneen kana turan: wal qabsiistuuwwan+ isaa, maqaaniiwwan+ isaa, danqaraawwan+ isaa, utubaawwan isaa, miiloowwan isaa warra uraa qaban,+ 34 wanta irraan uwwifamuu fi gogaa korbeessa hoolaa halluu diimaa cuuphame irraa+ tolfame, wanta irraan uwwifamuu fi gogaa tahaash irraa tolfame, golgaa+ taaboticha duratti fannifamu, 35 taabota Dhugaa Baatuu fi danqaraawwan+ isaa, qadaadicha,+ 36 minjaalicha, miʼawwan isaa hundumaa+ fi daabboo ilaalchaa, 37 baattuu ibsaa warqii qulqulluu irraa tolfame, ibsaawwan+ isaa warra tarree galanii kaaʼamanii fi miʼawwan+ isaa hundumaa, zayitii ibsaa,+ 38 iddoo aarsaa+ warqii irraa tolfame, zayitii dibataa,+ ixaana urgaaʼu,+ golgaa+ balbala dunkaanaa, 39 iddoo aarsaa sibiila diimaa+ irraa tolfame, waan akka gingilchaa sibiila diimaa irraa tolfame, danqaraawwan isaa,+ miʼawwan isaa hundumaa,+ miʼa bishaanii fi wanta inni irra taaʼu,+ 40 golgaawwan mooraa, utubaawwan isaa fi miiloowwan isaa warra uraa qaban,+ golgaa+ balbala mooraa, funyoowwan dunkaanaa, qofoowwan dunkaanaa,+ miʼawwan tajaajila godoo qulqulluutiif, jechuunis dunkaana walgaʼichaatiif oolan, 41 uffatawwan baʼeessa taʼanii dhaʼamanii fi iddoo qulqulluu keessatti tajaajiluuf uffataman, uffatawwan qulqulluu Aaron lubichi uffatu,+ akkasumas uffatawwan ilmaan isaa luboota taʼanii tajaajiluuf uffatan.

42 Israaʼelonni hojii kana hundumaa kan hojjetan akkuma Yihowaan Musee ajajetti ture.+ 43 Museen hojii isaanii hundumaa yommuu qoru, isaan akkuma Yihowaan ajajetti hojjechuu isaanii arge; achiis Museen isaan eebbise.