Seenaa Baraa Isa Tokkoffaa

21 Sana booda Seexanni* Israaʼeliin mormee kaʼuudhaan Israaʼeliin akka lakkaaʼu Daawitiin kakaase.+ 2 Kanaafuu, Daawit Yoʼaabii+ fi ajajjoota sabichaatiin, “Dhaqaatii Ber Sheebaadhaa hanga Daanitti+ Israaʼeliin lakkaaʼaa; achiis lakkoofsa isaanii akkan beekuuf natti himaa” jedhe. 3 Yoʼaab garuu, “Yihowaan uummata isaa siʼa 100 haa baayʼisu! Yaa gooftaa koo yaa mootii, hundi isaanii amma iyyuu tajaajiltoota gooftaa kootii mitii? Gooftaan koo wanta akkanaa gochuu kan barbaade maaliifi? Inni Israaʼel irratti yakka kan fidu maaliifi?” jedhe.

4 Haa taʼu malee, wanti mootichi dubbate wanta Yoʼaab dubbate irra ni caale. Kanaafuu, Yoʼaab baʼee guutummaa Israaʼel keessa erga naannaʼee booda gara Yerusaalemitti deebiʼe.+ 5 Yeroo kanatti Yoʼaab lakkoofsa namoota galmeeffaman sanaa Daawitiif ni kenne. Israaʼelonni hundi warri goraadee hidhatan 1,100,000 turan; namoonni Yihudaa warri goraadee hidhatan immoo 470,000 turan.+ 6 Haa taʼu malee, Yoʼaab wanti mootichi dubbate jibbisiisaa taʼee waan isatti mulʼateef,+ Leewwii fi Biiniyaamiin isaan gidduutti hin galmeessine.+

7 Kunis Waaqa dhugaa baayʼee waan gaddisiiseef, inni Israaʼeliin ni rukute. 8 Achiis Daawit Waaqa dhugaatiin, “Ani kana gochuu kootiin cubbuu guddaa hojjedheera.+ Ammas, ani gowwummaa guddaa waanan raawwadheef,+ maaloo, dogoggora ani tajaajilaan kee raawwadhe naaf dhiisi”+ jedhe. 9 Achiis Yihowaan Gaad+ isa Daawitiif mulʼata argu sanaan akkana jedhe: 10 “Dhaqiitii Daawitiin akkana jedhi: ‘Yihowaan akkana jedha: “Ani filannoo sadii siif nan kenna. Isaan keessaa wantan si irratti fidu tokko filadhu.”’” 11 Kanaafuu, Gaad gara Daawititti seenee akkana isaan jedhe: “Yihowaan akkana jedha: ‘Kanneen kana keessaa isa tokko filadhu; 12 waggaa sadiif beelli+ haa dhufuu? Yookiin jiʼa sadiif goraadeen diinota keetii utuu si rukutuu diinota kee jalaa baqachuu siif wayya+ moo guyyaa sadiif goraadeen Yihowaa, jechuunis biyyattii irratti golfaan+ dhufee maleekaan Yihowaa guutummaa naannoo Israaʼelitti badiisa+ akka fidu filatta?’ Amma isa na erge sanaaf maal jedhee akkan deebisu itti yaadi.” 13 Kanaafuu Daawit Gaadiin, “Ani baayʼee dhiphadheera. Gara laafinni isaa baayʼee guddaa waan taʼeef,+ maaloo, harka Yihowaa irratti kufuu naaf wayya; garuu harka namaa irratti akkan kufu hin godhin”+ jedhe.

14 Achiis Yihowaan Israaʼel irratti golfaa erge;+ kanaan kan kaʼes Israaʼel keessaa namoonni 70,000 ni duʼan.+ 15 Kana malees, Waaqni dhugaan Yerusaalemiin akka balleessuuf maleekaa tokko ni erge; haa taʼu malee, inni ishii balleessuuf yommuu jedhu, Yihowaan badiisa gaʼaa jiru sana argee ni gaabbe;*+ maleekaa isa badiisa geessisaa jiru sanaanis, “Ni gaʼa!+ Amma harka kee irraa deebisi” jedhe. Maleekaan Yihowaa oobdii Ornaan+ Yebuusichaa+ bira dhaabbatee ture.

16 Daawit ol jedhee yommuu ilaalu, maleekaan Yihowaa goraadee Yerusaalem irratti luqqifame tokko harka isaatti qabatee lafaa fi samii gidduu dhaabbatee arge.+ Daawitii fi jaarsoliin sunis uffata gaddaa uffatanii+ yeruma sana adda isaaniitiin lafatti gombifaman.+ 17 Daawitis Waaqa dhugaatiin, “Sabichi akka lakkaaʼamu kan ajaje ana mitii? Cubbuu kan hojjete ana dha; balleessaa kan raawwates ana dha;+ hoolonni kun garuu maal godhan? Yaa Waaqa koo Yihowaa, maaloo, harki kee ana irrattii fi mana abbaa koo irratti haa dhufu; garuu saba kee irratti dhaʼicha kana hin fidin”+ jedhe.

18 Achiis maleekaan Yihowaa Daawit ol baʼee, oobdii Ornaan Yebuusichaa irratti Yihowaadhaaf iddoo aarsaa akka ijaaru+ akka itti himu Gaaditti+ dubbate. 19 Kanaafuu, Daawit dubbii Gaad dhagaʼee akkuma inni maqaa Yihowaatiin isatti dubbatetti ol baʼe. 20 Kana gidduutti Ornaan garagalee maleekaa sana arge; ilmaan isaa warri isaa wajjin turan arfanis ni dhokatan. Yeroo kanatti Ornaan qamadii dhaʼaa ture. 21 Daawit yommuu gara isaa dhufus, Ornaan ol jedhee ilaalee Daawit gara isaa dhufaa akka jiru arge; innis yeruma sana bakka oobdii sanaa gad baʼee lafatti gombifamee Daawitiif sagade. 22 Daawitis Ornaaniin, “Ani Yihowaadhaaf iddoo aarsaa akkan irratti ijaaruuf, oobdii kee natti gurguri.* Dhaʼichi namoota kana irra gaʼaa jiru akka dhaabbatuuf,+ gatii guutuudhaan natti gurguri” jedhe. 23 Ornaan garuu Daawitiin akkana jedhe: “Akkasumaan fudhadhu; gooftaan koo mootichi wanta gaarii fakkaatee isatti mulʼate* haa godhu. Kunoo, ani aarsaa gubamu akka taʼaniif loon, qoraan akka taʼuuf konkolaataa* ittiin midhaan siribsiisanii+ fi aarsaa midhaanii akka taʼuuf qamadii nan qopheessa. Ani wantoota kana hundumaa nan kenna.”

24 Daawit Mootichi garuu Ornaaniin, “Hin taʼu, gatii guutuu kaffalee si irraa bituun qaba; wanta kan kee taʼe fudhadhee Yihowaadhaaf hin dhiheessu; yookiin wantan gatii itti hin baasne aarsaa gubamu godhee hin dhiheessu” jedhe.+ 25 Kanaafuu, Daawit gatii iddoo sanaa warqii sheeqilii* 600 madaalee Ornaaniif ni kenne. 26 Achiis Daawit bakka sanatti Yihowaadhaaf iddoo aarsaa ijaaree,+ aarsaawwan gubamanii fi aarsaawwan gamtaa dhiheesse; Yihowaas ni waammate; innis yeroo kanatti aarsaawwan iddoo aarsaa aarsaan gubamu irratti dhihaatu sana irra jiran gubuuf samii irraa ibidda erguudhaan deebii isaaf ni kenne.+ 27 Achiis Yihowaan maleekaan sun goraadee isaa manʼee isaatti akka deebisu isa ajaje.+ 28 Yeroo sanatti, Daawit Yihowaan bakka oobdii Ornaan Yebuusichaatti akka isaaf deebise yommuu argu, achitti aarsaa dhiheessuu isaa itti fufe. 29 Haa taʼu malee, godoo qulqulluun Yihowaa inni Museen lafa onaa keessatti ijaaree fi iddoon aarsaa aarsaan gubamu irratti dhihaatu sun yeroo sanatti iddoo ol kaʼaa isa Gibeʼonitti argamu irra turan.+ 30 Daawit garuu goraadee maleekaa Yihowaatiin kan kaʼe baayʼee sodaatee waan tureef, Waaqayyoon gaafachuuf gara iddoo aarsaa sanaa deemuu hin dandeenye.