Keessa Deebii

28 “Ati ajajawwan isaa warra ani harʼa si ajaju kana of eeggannoodhaan raawwachuudhaan mamii tokko malee sagalee Waaqa kee Yihowaa yoo dhageesse, Waaqni kee Yihowaan dhugumaan saboota lafa irraa kaan hundumaa irra ol si qaba.+ 2 Ati yeroo hundumaa sagalee Waaqa kee Yihowaa waan dhageessuuf, eebbawwan kun hundi siif ni dhufu, hordofaniis si bira gaʼu:+

3 “Magaalaa keessatti ni eebbifamta; baadiyyaa keessattis ni eebbifamta.+

4 “Ijoolleen kee,*+ firiin lafa keetii, sanyiin horii keetii, jabbiin kee fi ilmooleen hoolaa keetii ni eebbifamu.+

5 “Guuboon kee+ fi qoda bukoon kee+ ni eebbifama.

6 “Yommuu ol seentu ni eebbifamta; yommuu gad baatus ni eebbifamta.

7 “Yihowaan diinonni kee warri si irratti kaʼan si duratti akka moʼaman ni godha.+ Isaan kallattii tokkoon si haleelu, garuu kallattii adda addaa torbaan si irraa baqatu.+ 8 Yihowaan gootaraawwan kee fi wanta hojjettu hundumaa siif ni eebbisa;+ inni biyya Waaqni kee Yihowaan siif kennu keessatti dhugumaan si eebbisa. 9 Ati yeroo hundumaa ajajawwan Waaqa kee Yihowaa waan eegduu fi daandiiwwan isaa irra waan deemtuuf, Yihowaan akkuma siif kakatetti+ saba qulqulluu ofii isaatiif taʼu godhee jabeessee si dhaaba.+ 10 Namoonni lafa irraa hundi ati maqaa Yihowaatiin akka waamamte ni argu,+ si sodaatus.+

11 “Yihowaan biyya Yihowaan akka siif kennu abbootii keetiif kakate+ keessatti, ijoolleen kee fi horiin kee akka baayʼatan, oomishni lafa keetiis akka baayʼatu+ ni godha. 12 Yihowaan waqtii isaatti biyya keetiif bokkaa kennuu fi wanta gootu hundumaa eebbisuuf, gootaraa isaa isa gaarii, jechuunis samii siif ni bana.+ Ati saboota hedduudhaaf ni liqeessita malee, hin liqeeffattu.+ 13 Ajajawwan Waaqa kee Yihowaa warra akka eegduu fi akka raawwattu ani harʼa si ajaju kanaaf yoo ajajamte, Yihowaan mataa malee eegee si hin godhu; ati irra aanta+ malee jala hin taatu. 14 Ati waaqolii kan biroo duukaa buutee isaan tajaajiluuf,+ dubbii ani harʼa si ajaju kana hundumaa irraa gara mirgaatti yookiin gara bitaatti hin jalʼatin.+

15 “Haa taʼu malee, ajajawwanii fi dambiiwwan isaa warra ani harʼa si ajaju kana hundumaa eeguu dhiisuudhaan sagalee Waaqa kee Yihowaa dhagaʼuu yoo didde, abaarsawwan kun baayʼinaan si irra ni gaʼu:+

16 “Magaalaa keessatti ni abaaramta; maasii keessattis ni abaaramta.+

17 “Guuboon kee+ fi qoda bukoon kee+ ni abaarama.

18 “Ijoolleen kee,*+ firiin lafa keetii, jabbiin kee fi ilmooleen hoolaa keetii ni abaaramu.+

19 “Yommuu ol seentu ni abaaramta; yommuu gad baatus ni abaaramta.

20 “Gochawwan kee warra hamoo taʼaniin, akkasumas ana dhiisuu keetiin kan kaʼe, Yihowaan hamma ati haxaaʼamtee badduttii fi hamma daftee balleeffamtutti, wanta gootu hundumaatiin abaarsa, burjaajaʼuu fi adaba sitti erga.+ 21 Yihowaan biyya dhaalaan fudhachuuf jettu keessaa haxaaʼee hamma si balleessutti dhukkubni akka sitti maxxanu ni godha.+ 22 Yihowaan daranyoo sombaatiin, dhaqna gubaa cimaadhaan,+ madaadhaan, hoʼa cimaadhaan, goraadeedhaan,+ bubbee waxaluu fi waagiidhaan+ si rukuta; wantoonni kunis hamma ati baddutti si biraa hin deebiʼan. 23 Samiin sii olitti argamu sibiila diimaa, lafti si jalatti argamus sibiila ni taʼa.+ 24 Yihowaanis hamma ati balleeffamtutti bokkaan samii irraa biyya kee irratti roobu daakuu fi awwaara akka taʼu ni godha. 25 Yihowaan diinota kee duratti akka moʼamtu ni godha.+ Kallattii tokkoon isaan ni haleelta; garuu kallattii adda addaa torbaan isaan jalaa ni baqatta; mootummoonni lafaa hundis wanta hamaa si irra gaʼe yommuu argan ni sodaatu.+ 26 Reeffi kee allaattiiwwan samii fi bineensota lafaa hundumaatiif nyaata ni taʼa; namni tokko illee sodaachisee isaan hin ariʼu.+

27 “Yihowaan dhullaa biyya Gibxiitiin, kormammuudhaan, cittoo fi madaadhaan si rukuta; atis isaan irraa fayyuu hin dandeessu. 28 Yihowaan maraataa fi jaamaa akka taatu,+ akkasumas akka burjaajoftu si godha. 29 Akkuma namni qaro dhabeessi dukkana keessa qaqqabatutti, guyyaa saafaa ni qaqqabatta;+ wanta gootu hundumaa irratti milkaaʼina hin argattu; yeroo hundumaa ni gowwoomfamta, ni saamamtas; namni si oolchus hin jiru.+ 30 Ati durba takka ni kaadhimatta, garuu namni kan biraan ishii gudeeda. Mana ni ijaarratta, garuu keessa hin jiraattu.+ Muka wayinii ni dhaabbatta, garuu itti hin fayyadamtu.+ 31 Qotiyyoon kee ijuma kee duratti ni qalama, ati garuu isa irraa homaa hin nyaattu. Harreen kee suma duratti ni hatama, garuu siif hin deebifamu. Hoolaan kee diinota keetiif ni kennama, namni siif oolchus hin jiru. 32 Ijoolleen dhiiraa fi ijoolleen durbaa kee utuma ati ilaaltuu namoota kaaniif ni kennamu;+ atis yeroo hundumaa isaan ni yaadda, garuu homaa gochuu hin dandeessu. 33 Firiiwwan lafa keetii fi oomisha argattu hundumaa namoonni ati hin beekne ni nyaatu;+ yeroo hundumaa ni gowwoomfamta, ni dhidhiitamtas. 34 Wanti ija keetiin argitu si maraacha.

35 “Yihowaan dhullaa nama dhukkubsuu fi hin fayyineen jilba kee fi luka kee ni rukuta; dhullaan sunis faana miila kee irraa jalqabee hamma gubbee mataa keetti si uwwisa. 36 Yihowaan siinis taʼe mootii ati of irratti muudde gara saba atis taate abbootiin kee hin beeknetti ni ariʼa;+ achittis waaqolii kan biroo warra mukaa fi dhagaa irraa tolfaman ni tajaajilta.+ 37 Saba Yihowaan itti si ergu hundumaa gidduutti, wanti si irra gaʼe isaan sodaachisa; isaan si tuffatu,* sitti qoosus.+

38 “Ati sanyii hedduu maasii kee irratti ni facaasta, garuu awwaannisni waan isa nyaatuuf, xinnuma galfatta.+ 39 Muka wayinii ni dhaabda, ni kunuunsitas, garuu raammoon waan isa nyaatuuf, daadhii wayinii hin dhugdu, homaas irraa hin galfattu.+ 40 Naannoo kee hundumaatti muka ejersaa ni qabaatta, garuu firiin isaa waan irraa harcaʼuuf, zayitii dibattu hin argattu. 41 Ijoollee dhiiraa fi ijoollee durbaa ni dhalchita, garuu boojiʼamanii waan fudhatamaniif isaan kan kee hin taʼan.+ 42 Ilbiisonni hedduun* mukeetii fi firii lafa keetii hundumaa ni weeraru. 43 Namni biyya ormaa si gidduu jiraatu si irratti oluma guddachaa yeroo deemu, ati immoo gaduma xinnaachaa deemta. 44 Isatu siif liqeessa malee, ati isaaf hin liqeessitu.+ Inni mataa taʼa, ati immoo eegee taata.+

45 “Ati ajajawwanii fi dambiiwwan isaa warra inni si ajaje eeguudhaan sagalee Waaqa kee Yihowaa dhagaʼuu waan diddeef, hamma haxaaʼamtee balleeffamtutti+ dhugumaan abaarsawwan kun hundi+ si irra ni gaʼu, hordofaniis si dhaqqabu.+ 46 Isaanis akkuma mallattoo fi akeekkachiisa dhaabbataa taʼetti sii fi sanyii kee irraa hin dhabaman;+ 47 sababiin isaas, ati wanta hundumaa baayʼinaan utuu qabduu gammachuu fi garaa gammaduun Waaqa kee Yihowaa hin tajaajille.+ 48 Yihowaan diinota kee sitti ni erga; atis beeloftee,+ dheebottee, daartee, akkasumas wanta hundumaa dhabdee utuu jirtuu isaan tajaajilta.+ Innis haxaaʼee hamma si balleessutti waanjoo sibiilaa morma kee irratti ni feʼa.

49 “Yihowaan andaara lafaa irraa saba biyya fagoodhaa dhufe tokko si irratti ni kaasa;+ inni akkuma risaan wanta adamsu irra buʼutti tasa si irra buʼa;+ sabni sunis saba ati afaan isaa hin dhageenye,+ 50 saba bifti isaa sodaachisaa taʼe, saba maanguddoota hin kabjnee fi daaʼimmaniif hin gaddine dha.+ 51 Isaan hamma ati haxaaʼamtee baddutti ilmoolee horii keetii fi firii lafa keetii ni nyaatu. Isaan hamma si balleessanitti, midhaan, daadhii wayinii yookiin zayitii haaraa, jabbii yookiin ilmoo hoolaa tokko illee siif hin hambisan.+ 52 Isaan hamma dallaawwan dhedheeroonii fi jajjaboon warri ati itti amanamtu jijjiganitti guutummaa biyya kee keessatti magaalota* kee hundumaa keessatti si irratti cufanii sitti marsu. Eeyyee, isaan dhugumaan guutummaa biyya Waaqni kee Yihowaan siif kenne keessatti magaalota kee hundumaa keessatti sitti marsu.+ 53 Achiis magaalonni kee marfamanii rakkachuu isaaniitiin kan kaʼe, akkasumas diinni kee waan si dhiphisuuf ijoollee kee,* foon ijoollee dhiiraa fi ijoollee durbaa kee warra Waaqni kee Yihowaan siif kenne sanaa nyaachuuf dirqamta.+

54 “Isin gidduudhaa namni hundumaa caalaa garraamii taʼee fi qananiitti guddate illee obboleessa isaatiif yookiin haadha manaa isaa ishii jaallatuuf yookiin ilmaan isaa warra hafaniif hin gaddu; 55 inni magaalonni kee marfamanii rakkachuu isaaniitiin kan kaʼe, akkasumas diinonni kee magaalota kee dhiphisuu isaaniitiin kan kaʼe, wanta kan biraa waan hin qabneef, foon ilmaan isaa isa nyaatu sana irraa homaa isaaniif hin kennu.+ 56 Isin gidduudhaa dubartiin hundumaa caalaa garraamii taate, qananiitti guddattee fi faana miila ishiitiin lafa ejjechuu hin barbaanne+ illee abbaa manaa ishii isa jaallattuuf yookiin ilma ishiitiif yookiin intala ishiitiif hin gadditu; 57 obbaatii luka ishii gidduudhaa baʼuu fi ilmaan deesseef illee hin gadditu; sababiin isaas, magaalonni kee marfamanii rakkachuu isaaniitiin, akkasumas diinonni kee magaalota kee dhiphisuu isaaniitiin kan kaʼe ishiin dhoksaatti isaan ni nyaatti.

58 “Ati dubbii Seera kanaa isa kitaaba kana irratti barreeffame+ hundumaa of eeggannoodhaan yoo eeguu baattee fi maqaa Waaqa kee Yihowaa+ isa ulfina qabeessaa fi sodaachisaa taʼe+ kana yoo sodaachuu baatte, 59 Yihowaan siinis taʼe sanyii kee dhaʼicha baayʼee cimaa taʼeen, dhaʼicha guddaa fi yeroo dheeraadhaaf turuun,+ akkasumas dhukkuba cimaa fi yeroo dheeraadhaaf turuun ni rukuta. 60 Dhukkuboota biyya Gibxii warra ati sodaachaa turte sana hundumaa deebisee sitti fida; isaanis dhugumaan sitti ni maxxanu. 61 Kana malees, Yihowaan hamma ati guutummaatti baddutti dhukkuba yookiin dhaʼicha kitaaba Seeraa kana keessatti hin barreeffamne hundumaa illee si irratti ni fida. 62 Isin sagalee Waaqa keessan Yihowaa waan hin dhageenyeef, akkuma urjiilee samii kan hin lakkaaʼamne+ yoo taatan iyyuu, isin keessaa nama muraasa qofatu hafa.+

63 “Yihowaan akkuma yeroo tokko badhaadhota isin gochuu fi isin baayʼisuutti gammadee ture, Yihowaan isin balleessuu fi isin fixuuttis ni gammada; isinis biyya dhaaluuf jettan irraa ni buqqifamtu.

64 “Yihowaan andaara lafaa isa tokko irraa hamma andaara lafaa isa kan biraatti saboota hundumaa gidduutti si bittinneessa;+ atis achitti waaqolii mukaa fi dhagaa irraa tolfaman warra atis taate abbootiin kee hin beekne waaqeffachuuf dirqamta.+ 65 Saboota sana gidduutti nagaa hin argattu;+ bakka faanni miila keetii itti boqotu illee hin argattu. Kanaa mannaa, Yihowaan achitti garaa yaaddaʼu,+ ija dadhabuu fi garaa abdii kutatu siif kenna.+ 66 Lubbuun kee balaa guddaadhaaf kan saaxilame ni taʼa; halkanii fi guyyaa ni sodaatta; lubbuudhaan ooluu kee illee ni shakkita. 67 Sodaa sitti dhagaʼamuu fi wanta ijji kee ilaaluun kan kaʼe ganama, ‘Maal taʼa utuu dhihee!’ jetta; galgala immoo, ‘Maal taʼa utuu bariʼee!’ jetta. 68 Yihowaan dhugumaan karaa ani, ‘Lammata isa hin argitu’ siin jedheen dooniidhaan gara biyya Gibxiitti si deebisa; isinis achitti diinota keessanitti garbummaadhaan of gurguruuf ni dirqamtu, namni isin bitu garuu hin argamu.”