Lakkoofsa

4 Yihowaan Musee fi Aaroniin akkana jedhe: 2 “Ilmaan Leewwii keessaa akka maatii maatii isaaniittii fi akka manneen abbootii isaaniitti ilmaan Qehaat,+ 3 warra umuriin isaanii waggaa 30+ hamma 50+ taʼee fi garee dunkaana walgaʼii keessatti hojjechuuf ramadame keessatti argaman hundumaa lakkaaʼaa.+

4 “Tajaajilli ilmaan Qehaat dunkaana walgaʼii keessatti raawwatan kana dha.+ Kun hundumaa caalaa qulqulluu dha. 5 Israaʼelonni bakka tokkoo gara bakka kan biraa yommuu dhaqan, Aaronii fi ilmaan isaa ol seenanii golgaa+ sana gad buusuudhaan qadaada taabota Dhugaa Baatuu sanaa ittiin haa haguugan.+ 6 Isaan gogaa tahaash* isa irratti ni uwwisu; isa irraan immoo huccuu bifti isaa guutummaatti cuquliisa taʼe ni uwwisu; danqaraawwan isaa warra ittiin isa baatanis+ iddoo isaanii keessa ni loosu.

7 “Kana malees, huccuu bifa cuquliisaa sana minjaala daabboo ilaalchaa irra ni afu;+ achiis saaniiwwan, xoofoowwan, saaniiwwan golboo fi okkoteewwan aarsaa dhugaatii+ achi irra ni kaaʼu; aarsaan daabboo inni yeroo hundumaa dhihaatu+ achuma irra turuu qaba. 8 Isaan huccuu bifa diimaa isaan irratti ni uwwisu; minjaalicha irraan immoo gogaa tahaash ni uwwisu; danqaraawwan isaa warra ittiin isa baatanis+ iddoo isaanii keessa ni loosu. 9 Achiis huccuu bifa cuquliisaa sana fudhatanii baattuu ibsaa,+ ibsaawwan isaa,+ qabduuwwan isaa, qodaawwan ibiddaa isaa,+ akkasumas miʼawwan zayitii isa ibsaan sun ifuu isaa akka itti fufu godhu qabatan hundumaa ni uwwisu. 10 Baattuu ibsaa sanaa fi miʼawwan isaa hundumaas gogaa tahaashiin maranii danqaraa ittiin baatan irra ni kaaʼu. 11 Huccuu bifa cuquliisaa sana iddoo aarsaa warqii+ irraa tolfame irratti uwwisanii, isa irraan immoo gogaa tahaash ni uwwisu; danqaraawwan isaa warra ittiin isa baatanis+ iddoo isaanii keessa ni loosu. 12 Achiis miʼawwan tajaajilaa+ warra yeroo hundumaa iddoo qulqulluu keessatti ittiin tajaajilan hundumaa fudhatanii huccuu bifa cuquliisaatiin ni maru; achiis gogaa tahaash itti uwwisanii danqaraa ittiin baatan irra isaan kaaʼu.

13 “Iddoo aarsaa sana keessaa daaraa* haa haran;+ achiis iddoo aarsaa sana huccuu suufii bifa dhiilgeetiin haa uwwisan. 14 Isaan miʼawwan isaa warra yeroo iddoo aarsaatti tajaajilan itti fayyadaman hundumaa, jechuunis qodaawwan ibiddaa, shukkaawwan, akaafaawwan, saaniiwwan golboo fi miʼawwan iddoo aarsaa hundumaa+ isa irra kaaʼanii gogaa tahaash itti ni uwwisu; achiis danqaraawwan isaa warra ittiin isa baatan+ iddoo isaanii keessa ni loosu.

15 “Buufatichi bakka tokkoo gara bakka kan biraa dhaquuf kaʼuu isaa dura, Aaronii fi ilmaan isaa iddoo qulqulluu fi miʼawwan iddoo qulqulluu hundumaa uwwisanii xumuruu qabu.+ Achiis ilmaan Qehaat isaan baachuuf ni seenu;+ haa taʼu malee, iddoo qulqulluu sana tuquu hin qaban; yoo akkana godhan ni duʼu.+ Dunkaana walgaʼii wajjin haala wal qabateen itti gaafatamummaan* ilmaan Qehaat qaban kana dha.

16 “Eleʼazaar+ ilmi Aaron lubichaa zayitii ibsaa,+ ixaana urgaaʼu,+ aarsaa midhaanii isa yeroo hundumaa dhihaatuu fi zayitii dibataa+ sana ol aantummaadhaan toʼachuu irratti itti gaafatamummaa qaba. Inni iddoo qulqulluu fi miʼawwan isaa dabalatee, guutummaa godoo qulqulluu sanaa fi wanta achi keessa jiru hundumaa ol aantummaadhaan ni toʼata.”

17 Yihowaan itti fufuudhaan Musee fi Aaroniin akkana jedhe: 18 “Gosti maatiiwwan Qehaatotaa+ Leewwota gidduudhaa akka badu hin godhinaa. 19 Kanaa mannaa, isaan lubbuudhaan akka jiraataniif, akkasumas wanta hundumaa caalaa qulqulluu+ taʼetti yommuu dhihaatan akka hin duuneef akkana isaaniif godhaa. Aaronii fi ilmaan isaa ol seenanii tokkoon tokkoon isaanii tajaajila isaan raawwatanii fi wanta isaan baatan isaaniif ni ramadu. 20 Isaan ol seenanii yeroo gabaabaadhaaf illee wantoota qulqulluu ilaaluu hin qaban; akkana yoo godhan garuu ni duʼu.”+

21 Achiis Yihowaan Museedhaan akkana jedhe: 22 “Ilmaan Geershon+ akka manneen abbootii isaaniittii fi akka maatii maatii isaaniitti haa lakkaaʼaman. 23 Warra umuriin isaanii waggaa 30 hamma 50 taʼee fi garee dunkaana walgaʼii keessatti tajaajiluuf ramadame keessatti argaman hundumaa galmeessi. 24 Wanti maatiiwwan Geershonotaa akka kunuunsanii fi akka baataniif isaaniif ramadame kana dha:+ 25 Isaan huccuuwwan dunkaana godoo qulqulluu,+ dunkaana walgaʼii, wanta isa irraan uwwifamu, gogaa tahaash isa gubbaadhaan uwwifamu,+ golgaa balbala dunkaana walgaʼii,+ 26 golgaawwan mooraa+ sanaa, golgaa balbala mooraa+ isa godoo qulqulluuttii fi iddoo aarsaatti marsee jiru sanaa, funyoowwan dunkaanaa fi miʼawwan isaanii hundumaa, akkasumas wantoota tajaajila isaatiif oolan hundumaa ni baatu. Kun hojii isaanii ti. 27 Aaronii fi ilmaan isaa tajaajilaa fi baʼaawwan Geershonotaa+ hundumaa ol aantummaadhaan ni toʼatu; isin baʼaawwan kana hundumaa itti gaafatamummaa isaanii gootanii isaaniif ni ramaddu. 28 Tajaajilli maatiiwwan Geershonotaa dunkaana walgaʼii keessatti raawwatan kana dha;+ isaan qajeelfama Itaamaar+ ilma Aaron lubichaa jala taʼanii itti gaafatamummaa isaanii ni raawwatu.

29 “Ilmaan Meraariis+ akka maatii isaaniittii fi akka mana abbootii isaaniitti ni galmeessita. 30 Warra umuriin isaanii waggaa 30 hamma 50 taʼee fi garee dunkaana walgaʼii keessatti tajaajiluuf ramadame keessatti argaman hundumaa ni galmeessita. 31 Tajaajila isaanii isa dunkaana walgaʼii wajjin haala wal qabateen wanti isaan baachuuf itti gaafatamummaa qaban kana dha:+ maqaaniiwwan+ godoo qulqulluu, danqaraawwan+ isaa, utubaawwan+ isaa, miiloowwan isaa warra uraa qaban,+ 32 utubaawwan+ mooraa sanatti marsanii jiran, miiloowwan isaanii warra uraa qaban,+ qofoowwan dunkaanaa+ isaanii, funyoowwan dunkaanaa isaanii fi miʼawwan isaanii hundumaa, akkasumas wantoota tajaajila kanaa wajjin wal qabatan hundumaa. Miʼawwan isaan baachuuf itti gaafatamummaa qaban maqaa isaaniitiin isaaniif ramadaa. 33 Akkaataan maatiiwwan ilmaan Meraarii,+ qajeelfama Itaamaar ilma Aaron lubichaa jalatti dunkaana walgaʼii keessatti itti tajaajilan kana dha.”+

34 Achiis Museen, Aaronii fi ajajjoonni+ yaaʼichaa akka maatiiwwan isaaniittii fi akka mana abbootii isaaniitti ilmaan Qehaatotaa,+ 35 warra umuriin isaanii waggaa 30 hamma 50 taʼee fi garee dunkaana walgaʼii keessatti tajaajiluuf ramadame keessatti argaman hundumaa ni galmeessan.+ 36 Warri akka maatii maatii isaaniitti galmeeffaman walumaa galatti 2,750 turan.+ 37 Maatiiwwan Qehaatotaa keessaa warri galmeeffamanii fi dunkaana walgaʼii keessatti tajaajilan hundi kanneen kana turan. Musee fi Aaronis akka ajaja Yihowaan karaa Musee kennetti isaan ni galmeessan.+

38 Ilmaan Geershon+ akka maatii maatii isaaniittii fi akka mana abbootii isaaniitti, 39 warri umuriin isaanii waggaa 30 hamma 50 taʼee fi garee dunkaana walgaʼii keessatti tajaajiluuf ramadame keessatti argaman hundi ni galmeeffaman. 40 Warri akka maatii maatii isaaniittii fi akka mana abbootii isaaniitti galmeeffaman walumaa galatti 2,630 turan.+ 41 Maatiiwwan ilmaan Geershon keessaa warri dunkaana walgaʼii keessatti tajaajilan hundi kan galmeeffaman akka kanaan ture. Musee fi Aaronis akkuma Yihowaan ajajetti isaan akka galmeeffaman ni godhan.+

42 Ilmaan Meraarii akka maatii maatii isaaniittii fi akka mana abbootii isaaniitti, 43 warri umuriin isaanii waggaa 30 hamma 50 taʼee fi garee dunkaana walgaʼii keessatti tajaajiluuf ramadame keessatti argaman hundi ni galmeeffaman.+ 44 Warri akka maatii maatii isaaniitti galmeeffaman walumaa galatti 3,200 turan.+ 45 Maatiiwwan ilmaan Meraarii keessaa warri Musee fi Aaron akka ajaja Yihowaan karaa Musee kennetti galmeessan kanneen kana turan.+

46 Museen, Aaronii fi ajajjoonni Israaʼel, akka maatii maatii isaaniittii fi akka manneen abbootii isaaniitti Leewwota kana ni galmeessan; 47 isaan umuriin isaanii waggaa 30 hamma 50 ture; hundi isaaniis dunkaana walgaʼii wajjin haala wal qabateen akka tajaajilanii fi baʼaawwan akka baataniif ramadamanii turan.+ 48 Warri galmeeffamanis walumaa galatti 8,580 turan.+ 49 Tokkoon tokkoon isaanii akka tajaajila isaaniif ramadamettii fi akka baʼaa baatanitti, akkuma Yihowaan karaa Musee ajajetti ni galmeeffaman; isaan akkuma Yihowaan Musee ajajetti ni galmeeffaman.