ਨਾਸ਼ ਕਰਨ ਲਈ ਪਰਮੇਸ਼ੁਰ ਦਾ ਔਜ਼ਾਰ

10. ਬਾਬਲ ਨੂੰ ਹਰਾਉਣ ਲਈ ਯਹੋਵਾਹ ਨੇ ਕਿਨ੍ਹਾਂ ਨੂੰ ਇਸਤੇਮਾਲ ਕੀਤਾ ਸੀ?

¹⁰ ਯਹੋਵਾਹ ਨੇ ਬਾਬਲ ਦਾ ਨਾਸ਼ ਕਰਨ ਲਈ ਕਿਸ ਤਾਕਤ ਨੂੰ ਵਰਤਿਆ? ਇਹ ਘਟਨਾ ਵਾਪਰਨ ਤੋਂ ਕੁਝ 200 ਸਾਲ ਪਹਿਲਾਂ, ਯਹੋਵਾਹ ਨੇ ਜਵਾਬ ਦਿੱਤਾ ਸੀ: “ਵੇਖੋ, ਮੈਂ ਉਨ੍ਹਾਂ ਦੇ ਵਿਰੁੱਧ ਮਾਦੀਆਂ ਨੂੰ ਪਰੇਰ ਰਿਹਾ ਹਾਂ, ਜਿਹੜੇ ਚਾਂਦੀ ਦੀ ਪਰਵਾਹ ਨਹੀਂ ਕਰਦੇ, ਨਾ ਸੋਨੇ ਤੋਂ ਖੁਸ਼ ਹੁੰਦੇ ਹਨ। ਉਨ੍ਹਾਂ ਦੇ ਧਣੁਖ ਜੁਆਨਾਂ ਦੇ ਕੁਤਰੇ ਕਰਨਗੇ, ਓਹ ਢਿੱਡ ਦੇ ਫਲ ਉੱਤੇ ਰਹਮ ਨਾ ਕਰਨਗੇ, ਉਨ੍ਹਾਂ ਦੀਆਂ ਅੱਖਾਂ ਬੱਚਿਆਂ ਉੱਤੇ ਤਰਸ ਨਾ ਖਾਣਗੀਆਂ। ਬਾਬਲ ਜੋ ਪਾਤਸ਼ਾਹੀਆਂ ਦੀ ਸਜਾਵਟ, ਕਸਦੀਆਂ ਦੇ ਹੰਕਾਰ ਦੀ ਸ਼ਾਨ ਹੈ, ਸਦੂਮ ਅਤੇ ਅਮੂਰਾਹ ਜਿਹਾ ਹੋ ਜਾਵੇਗਾ, ਜਦੋਂ ਪਰਮੇਸ਼ੁਰ ਨੇ ਉਨ੍ਹਾਂ ਨੂੰ ਢਾਹ ਦਿੱਤਾ ਸੀ।” (ਯਸਾਯਾਹ 13:17-19) ਸ਼ਾਨਦਾਰ ਬਾਬਲ ਨੂੰ ਡੇਗਣ ਵਾਸਤੇ ਯਹੋਵਾਹ ਨੇ ਮਾਦਾ ਦੇ ਦੂਰ ਦੇ ਪਹਾੜੀ ਦੇਸ਼ ਤੋਂ ਫ਼ੌਜਾਂ ਨੂੰ ਇਕ ਔਜ਼ਾਰ ਵਜੋਂ ਵਰਤਿਆ।a ਅਖ਼ੀਰ ਵਿਚ, ਬਾਬਲ ਸਦੂਮ ਅਤੇ ਅਮੂਰਾਹ ਦੇ ਬਦਚਲਣ ਦੇਸ਼ਾਂ ਵਾਂਗ ਉਜਾੜਿਆ ਗਿਆ।—ਉਤਪਤ 13:13; 19:13, 24.

11, 12. (ੳ) ਮਾਦਾ ਇਕ ਵਿਸ਼ਵ ਸ਼ਕਤੀ ਕਿਵੇਂ ਬਣਿਆ ਸੀ? (ਅ) ਭਵਿੱਖਬਾਣੀ ਵਿਚ ਮਾਦੀ ਫ਼ੌਜਾਂ ਬਾਰੇ ਕਿਹੜੀ ਅਜੀਬ ਗੱਲ ਦੱਸੀ ਗਈ ਸੀ?

¹¹ ਯਸਾਯਾਹ ਦੇ ਜ਼ਮਾਨੇ ਵਿਚ, ਮਾਦਾ ਅਤੇ ਬਾਬਲ ਦੋਵੇਂ ਅੱਸ਼ੂਰ ਦੇ ਅਧੀਨ ਸਨ। ਲਗਭਗ ਇਕ ਸਦੀ ਬਾਅਦ, 632 ਸਾ.ਯੁ.ਪੂ. ਵਿਚ, ਮਾਦਾ ਅਤੇ ਬਾਬਲ ਨੇ ਮਿਲ ਕੇ ਅੱਸ਼ੂਰ ਦੀ ਰਾਜਧਾਨੀ ਨੀਨਵਾਹ ਨੂੰ ਜਿੱਤ ਲਿਆ ਸੀ। ਇਸ ਜਿੱਤ ਨੇ ਬਾਬਲ ਨੂੰ ਪ੍ਰਮੁੱਖ ਵਿਸ਼ਵ ਸ਼ਕਤੀ ਬਣਾ ਦਿੱਤਾ ਸੀ। ਪਰ ਉਸ ਨੂੰ ਇਹ ਨਹੀਂ ਪਤਾ ਸੀ ਕਿ ਇਸ ਤੋਂ ਕੁਝ 100 ਸਾਲ ਬਾਅਦ, ਮਾਦਾ ਉਸ ਦਾ ਨਾਸ਼ ਕਰੇਗਾ! ਸਿਰਫ਼ ਯਹੋਵਾਹ ਹੀ ਅਜਿਹੀ ਸਪੱਸ਼ਟ ਭਵਿੱਖਬਾਣੀ ਕਰ ਸਕਦਾ ਸੀ!

¹² ਜਦੋਂ ਯਹੋਵਾਹ ਨੇ ਨਾਸ਼ ਲਿਆਉਣ ਲਈ ਆਪਣੇ ਚੁਣੇ ਹੋਏ ਔਜ਼ਾਰ ਬਾਰੇ ਦੱਸਿਆ, ਉਸ ਨੇ ਕਿਹਾ ਕਿ ਮਾਦਾ ਦੇ ਫ਼ੌਜੀ “ਚਾਂਦੀ ਦੀ ਪਰਵਾਹ ਨਹੀਂ ਕਰਦੇ, ਨਾ ਸੋਨੇ ਤੋਂ ਖੁਸ਼ ਹੁੰਦੇ ਹਨ।” ਇਹ ਚੀਜ਼ ਉਨ੍ਹਾਂ ਫ਼ੌਜੀਆਂ ਲਈ ਕਿੰਨੀ ਅਜੀਬ ਸੀ ਜੋ ਲੜਾਈ ਕਰਨੀ ਗਿੱਝੇ ਸਨ! ਬਾਈਬਲ ਦਾ ਇਕ ਵਿਦਵਾਨ ਕਹਿੰਦਾ ਹੈ ਕਿ “ਹਮਲਾ ਕਰਨ ਵਾਲੀਆਂ ਅਜਿਹੀਆਂ ਫ਼ੌਜਾਂ ਬਹੁਤ ਘੱਟ ਹੋਈਆਂ ਹਨ ਜਿਨ੍ਹਾਂ ਨੇ ਲੁੱਟ ਦੇ ਮਾਲ ਦੀ ਉਮੀਦ ਨਹੀਂ ਰੱਖੀ।” ਕੀ ਇਸ ਵਿਚ ਮਾਦੀ ਫ਼ੌਜਾਂ ਨੇ ਯਹੋਵਾਹ ਨੂੰ ਸਹੀ ਸਾਬਤ ਕੀਤਾ ਸੀ? ਜੀ ਹਾਂ। ਬਾਈਬਲ-ਕੰਮ ਨਾਂ ਦੀ ਅੰਗ੍ਰੇਜ਼ੀ ਪੁਸਤਕ ਦੇ ਲੇਖਕ ਦੀ ਗੱਲ ਵੱਲ ਧਿਆਨ ਦਿਓ: “ਜ਼ਿਆਦਾਤਰ ਕੌਮਾਂ ਤੋਂ ਉਲਟ, ਮਾਦੀਆਂ ਅਤੇ ਖ਼ਾਸ ਕਰਕੇ ਫ਼ਾਰਸੀਆਂ ਲਈ ਸੋਨੇ ਚਾਂਦੀ ਨਾਲੋਂ ਲੜਾਈ ਜਿੱਤਣੀ ਅਤੇ ਮਾਣ ਰੱਖਣਾ ਜ਼ਿਆਦਾ ਪਿਆਰਾ ਸੀ।”b ਇਸ ਨੂੰ ਮਨ ਵਿਚ ਰੱਖਦੇ ਹੋਏ, ਇਹ ਕੋਈ ਹੈਰਾਨੀ ਦੀ ਗੱਲ ਨਹੀਂ ਹੈ ਕਿ ਜਦੋਂ ਫ਼ਾਰਸੀ ਰਾਜਾ ਖੋਰਸ ਨੇ ਇਸਰਾਏਲੀ ਲੋਕਾਂ ਨੂੰ ਬਾਬਲ ਦੀ ਬੰਦਸ਼ ਤੋਂ ਛੁਡਾਇਆ ਸੀ, ਤਾਂ ਉਸ ਨੇ ਉਨ੍ਹਾਂ ਨੂੰ ਸੋਨੇ ਅਤੇ ਚਾਂਦੀ ਦੇ ਹਜ਼ਾਰਾਂ ਹੀ ਭਾਂਡੇ ਵਾਪਸ ਦਿੱਤੇ ਸੀ ਜਿਨ੍ਹਾਂ ਨੂੰ ਨਬੂਕਦਨੱਸਰ ਨੇ ਯਰੂਸ਼ਲਮ ਦੀ ਹੈਕਲ ਵਿੱਚੋਂ ਲੁੱਟਿਆ ਸੀ।—ਅਜ਼ਰਾ 1:7-11.

13, 14. (ੳ) ਭਾਵੇਂ ਮਾਦੀ ਅਤੇ ਫ਼ਾਰਸੀ ਫ਼ੌਜੀ ਲੁੱਟ ਦਾ ਮਾਲ ਨਹੀਂ ਚਾਹੁੰਦੇ ਸਨ, ਪਰ ਉਹ ਕੀ ਕਰਨਾ ਚਾਹੁੰਦੇ ਸਨ? (ਅ) ਖੋਰਸ ਨੇ ਬਾਬਲ ਦੀ ਚੌੜੀ ਖਾਈ ਨੂੰ ਕਿਵੇਂ ਪਾਰ ਕੀਤਾ ਸੀ?

¹³ ਭਾਵੇਂ ਕਿ ਮਾਦੀ ਅਤੇ ਫ਼ਾਰਸੀ ਫ਼ੌਜੀ ਲੁੱਟ ਦਾ ਮਾਲ ਨਹੀਂ ਚਾਹੁੰਦੇ ਸਨ, ਪਰ ਉਹ ਆਪਣਾ ਨਾਂ ਜ਼ਰੂਰ ਕਮਾਉਣਾ ਚਾਹੁੰਦੇ ਸਨ। ਉਹ ਦੁਨੀਆਂ ਵਿਚ ਕਿਸੇ ਵੀ ਕੌਮ ਤੋਂ ਦੂਜਾ ਦਰਜਾ ਨਹੀਂ ਰੱਖਣਾ ਚਾਹੁੰਦੇ ਸਨ। ਇਸ ਤੋਂ ਇਲਾਵਾ, ਯਹੋਵਾਹ ਨੇ ਉਨ੍ਹਾਂ ਦੇ ਦਿਲਾਂ ਵਿਚ “ਬਰਬਾਦੀ” ਪਾਈ। (ਯਸਾਯਾਹ 13:6) ਇਸ ਲਈ, ਆਪਣੀਆਂ ਲੋਹੇ ਦੀਆਂ ਕਮਾਨਾਂ ਨਾਲ ਉਹ ਬਾਬਲ ਉੱਤੇ ਜਿੱਤ ਪਾਉਣ ਲਈ ਦ੍ਰਿੜ੍ਹ ਸਨ। ਇਹ ਕਮਾਨਾਂ ਸਿਰਫ਼ ਤੀਰ ਮਾਰਨ ਲਈ ਹੀ ਨਹੀਂ, ਪਰ ਦੁਸ਼ਮਣ ਫ਼ੌਜੀਆਂ, ਜੋ ਬਾਬਲੀ ਮਾਂਵਾਂ ਦੀ ਸੰਤਾਨ ਸਨ, ਉੱਤੇ ਵਾਰ ਕਰਨ ਅਤੇ ਉਨ੍ਹਾਂ ਨੂੰ ਕੁਚਲਣ ਲਈ ਵੀ ਵਰਤੀਆਂ ਜਾ ਸਕਦੀਆਂ ਸਨ।

¹⁴ ਮਾਦੀ-ਫ਼ਾਰਸੀ ਫ਼ੌਜਾਂ ਦਾ ਆਗੂ, ਖੋਰਸ, ਬਾਬਲ ਦੀ ਕਿਲਾਬੰਦੀ ਦੇ ਕਾਰਨ ਰੁਕਣ ਵਾਲਾ ਨਹੀਂ ਸੀ। ਸੰਨ 539 ਸਾ.ਯੁ.ਪੂ. ਵਿਚ 5/6 ਅਕਤੂਬਰ ਦੀ ਰਾਤ ਨੂੰ ਉਸ ਨੇ ਫਰਾਤ ਦਰਿਆ ਦੇ ਪਾਣੀਆਂ ਦਾ ਵਹਾਅ ਮੋੜਨ ਦਾ ਹੁਕਮ ਦਿੱਤਾ ਸੀ। ਜਿਉਂ-ਜਿਉਂ ਪਾਣੀ ਘੱਟਦਾ ਗਿਆ, ਹਮਲਾ ਕਰਨ ਵਾਲੇ ਫ਼ੌਜੀ ਪੱਟਾਂ ਤਕ ਪਹੁੰਚਦੇ ਪਾਣੀ ਵਿੱਚੋਂ ਲੰਘ ਕੇ ਚੋਰੀ-ਛਿਪੇ ਸ਼ਹਿਰ ਵਿਚ ਘੁਸ ਗਏ। ਬਾਬਲ ਦੇ ਵਾਸੀ ਅਚਾਨਕ ਫੜੇ ਗਏ ਅਤੇ ਬਾਬਲ ਡਿੱਗ ਪਿਆ। (ਦਾਨੀਏਲ 5:30) ਯਹੋਵਾਹ ਪਰਮੇਸ਼ੁਰ ਨੇ ਯਸਾਯਾਹ ਨੂੰ ਇਨ੍ਹਾਂ ਗੱਲਾਂ ਦੀ ਭਵਿੱਖਬਾਣੀ ਕਰਨ ਲਈ ਪ੍ਰੇਰਿਤ ਕੀਤਾ ਅਤੇ ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਮਾਮਲਾ ਯਹੋਵਾਹ ਦੇ ਹੱਥਾਂ ਵਿਚ ਸੀ।