ਪਾਠ 52

ਆਪਣੇ ਪਹਿਰਾਵੇ ਅਤੇ ਦਿੱਖ ਬਾਰੇ ਸੋਚਣਾ ਕਿਉਂ ਜ਼ਰੂਰੀ ਹੈ?

ਛਾਪਿਆ ਐਡੀਸ਼ਨ

ਸਾਡੇ ਸਾਰਿਆਂ ਦੀ ਆਪੋ-ਆਪਣੀ ਪਸੰਦ ਹੁੰਦੀ ਹੈ ਕਿ ਅਸੀਂ ਕਿੱਦਾਂ ਦੇ ਕੱਪੜੇ ਪਾਵਾਂਗੇ ਅਤੇ ਵਾਲ਼ਾਂ ਦਾ ਸਟਾਈਲ ਕਿਹੜਾ ਰੱਖਾਂਗੇ। ਬਾਈਬਲ ਵਿਚ ਇਸ ਬਾਰੇ ਕੁਝ ਅਸੂਲ ਦਿੱਤੇ ਗਏ ਹਨ। ਉਨ੍ਹਾਂ ਅਸੂਲਾਂ ਨੂੰ ਮੰਨ ਕੇ ਅਸੀਂ ਆਪਣੀ ਪਸੰਦ ਦੇ ਕੱਪੜੇ ਵੀ ਪਾ ਸਕਾਂਗੇ ਤੇ ਯਹੋਵਾਹ ਨੂੰ ਵੀ ਖ਼ੁਸ਼ ਕਰ ਸਕਾਂਗੇ। ਆਓ ਕੁਝ ਅਸੂਲਾਂ ʼਤੇ ਧਿਆਨ ਦੇਈਏ।

1. ਪਹਿਰਾਵੇ ਦੇ ਮਾਮਲੇ ਵਿਚ ਸਾਨੂੰ ਕਿਨ੍ਹਾਂ ਅਸੂਲਾਂ ਨੂੰ ਧਿਆਨ ਵਿਚ ਰੱਖਣਾ ਚਾਹੀਦਾ ਹੈ?

ਸਾਨੂੰ ‘ਸੋਚ-ਸਮਝ ਕੇ ਸਲੀਕੇਦਾਰ ਕੱਪੜੇ ਪਾਉਣੇ ਚਾਹੀਦੇ ਹਨ ਅਤੇ ਉਨ੍ਹਾਂ ਤੋਂ ਸ਼ਰਮ-ਹਯਾ ਝਲਕਣੀ ਚਾਹੀਦੀ ਹੈ।’ ਸਾਨੂੰ ਸਾਫ਼-ਸੁਥਰੇ ਰਹਿਣਾ ਚਾਹੀਦਾ ਹੈ ਜਿਸ ਤੋਂ ਲੋਕਾਂ ਨੂੰ ਪਤਾ ਲੱਗੇ ਕਿ ਅਸੀਂ “ਪਰਮੇਸ਼ੁਰ ਦੀ ਭਗਤੀ” ਕਰਦੇ ਹਾਂ। (1 ਤਿਮੋਥਿਉਸ 2:9, 10) ਆਓ ਇਨ੍ਹਾਂ ਚਾਰ ਅਸੂਲਾਂ ʼਤੇ ਗੌਰ ਕਰੀਏ: (1) ਸਾਡੇ ਕੱਪੜੇ “ਸਲੀਕੇਦਾਰ” ਹੋਣੇ ਚਾਹੀਦੇ ਹਨ। ਤੁਸੀਂ ਦੇਖਿਆ ਹੋਣਾ ਕਿ ਮੰਡਲੀ ਦੀਆਂ ਸਭਾਵਾਂ ਵਿਚ ਯਹੋਵਾਹ ਦੇ ਲੋਕ ਅਲੱਗ-ਅਲੱਗ ਤਰ੍ਹਾਂ ਦੇ ਕੱਪੜੇ ਪਾਉਂਦੇ ਤੇ ਵਾਲ਼ਾਂ ਦਾ ਸਟਾਈਲ ਰੱਖਦੇ ਹਨ। ਪਰ ਇਸ ਤੋਂ ਸਾਫ਼ ਨਜ਼ਰ ਆਉਂਦਾ ਹੈ ਕਿ ਉਹ ਆਪਣੇ ਪਰਮੇਸ਼ੁਰ ਦਾ ਆਦਰ ਕਰਦੇ ਹਨ। (2) ਸਾਡੇ ਪਹਿਰਾਵੇ ਤੋਂ “ਸ਼ਰਮ-ਹਯਾ ਝਲਕਣੀ” ਚਾਹੀਦੀ ਹੈ। ਇਸ ਦਾ ਮਤਲਬ ਹੈ ਕਿ ਅਸੀਂ ਬੇਢੰਗੇ ਕੱਪੜੇ ਨਹੀਂ ਪਾਵਾਂਗੇ ਤਾਂਕਿ ਲੋਕਾਂ ਦਾ ਧਿਆਨ ਸਾਡੇ ਵੱਲ ਨਾ ਖਿੱਚਿਆ ਜਾਵੇ ਜਾਂ ਉਨ੍ਹਾਂ ਦੇ ਮਨ ਵਿਚ ਗੰਦੇ ਖ਼ਿਆਲ ਨਾ ਆਉਣ। (3) ਆਏ ਦਿਨ ਫ਼ੈਸ਼ਨ ਬਦਲਦਾ ਰਹਿੰਦਾ ਹੈ, ਇਸ ਲਈ ਸਾਨੂੰ “ਸੋਚ-ਸਮਝ ਕੇ” ਫ਼ੈਸਲਾ ਕਰਨਾ ਚਾਹੀਦਾ ਹੈ। ਇਸ ਦਾ ਮਤਲਬ ਹੈ ਕਿ ਅਸੀਂ ਅੱਖਾਂ ਬੰਦ ਕਰ ਕੇ ਕੋਈ ਵੀ ਫ਼ੈਸ਼ਨ ਨਹੀਂ ਕਰਾਂਗੇ। (4) ਅਸੀਂ ਜਿਸ ਤਰ੍ਹਾਂ ਦੇ ਕੱਪੜੇ ਪਾਉਂਦੇ ਤੇ ਤਿਆਰ ਹੁੰਦੇ ਹਾਂ, ਉਸ ਤੋਂ ਹਮੇਸ਼ਾ ਇਹ ਦਿਸਣਾ ਚਾਹੀਦਾ ਹੈ ਕਿ ਅਸੀਂ ਸੱਚੇ “ਪਰਮੇਸ਼ੁਰ ਦੀ ਭਗਤੀ” ਕਰਨ ਵਾਲੇ ਲੋਕ ਹਾਂ।—1 ਕੁਰਿੰਥੀਆਂ 10:31.

2. ਪਹਿਰਾਵੇ ਦੇ ਮਾਮਲੇ ਵਿਚ ਸਾਨੂੰ ਭੈਣਾਂ-ਭਰਾਵਾਂ ਬਾਰੇ ਕਿਉਂ ਸੋਚਣਾ ਚਾਹੀਦਾ ਹੈ?

ਸਾਨੂੰ ਸਾਰਿਆਂ ਨੂੰ ਆਪਣੀ ਪਸੰਦ ਦੇ ਕੱਪੜੇ ਪਾਉਣ ਦਾ ਹੱਕ ਹੈ। ਪਰ ਸਾਨੂੰ ਇਹ ਵੀ ਸੋਚਣਾ ਚਾਹੀਦਾ ਹੈ ਕਿ ਸਾਡਾ ਪਹਿਰਾਵਾ ਦੇਖ ਕੇ ਭੈਣਾਂ-ਭਰਾਵਾਂ ਨੂੰ ਕਿੱਦਾਂ ਲੱਗੇਗਾ। ਅਸੀਂ ਨਹੀਂ ਚਾਹੁੰਦੇ ਕਿ ਸਾਡੇ ਪਹਿਰਾਵੇ ਕਰਕੇ ਕਿਸੇ ਨੂੰ ਬੁਰਾ ਲੱਗੇ, ਸਗੋਂ ਅਸੀਂ ‘ਦੂਸਰਿਆਂ ਦਾ ਭਲਾ ਕਰ ਕੇ ਉਨ੍ਹਾਂ ਨੂੰ ਮਜ਼ਬੂਤ ਕਰਨਾ’ ਚਾਹੁੰਦੇ ਹਾਂ।—ਰੋਮੀਆਂ 15:1, 2 ਪੜ੍ਹੋ।

3. ਸਾਡਾ ਪਹਿਰਾਵਾ ਦੇਖ ਕੇ ਲੋਕ ਕਿਸ ਤਰ੍ਹਾਂ ਸੱਚਾਈ ਵੱਲ ਖਿੱਚੇ ਚਲੇ ਆ ਸਕਦੇ ਹਨ?

ਅਸੀਂ ਮੌਕੇ ਦੇ ਹਿਸਾਬ ਨਾਲ ਤਿਆਰ ਹੁੰਦੇ ਹਾਂ। ਇਸ ਲਈ ਜਦੋਂ ਅਸੀਂ ਸਭਾਵਾਂ ਅਤੇ ਪ੍ਰਚਾਰ ਵਿਚ ਜਾਂਦੇ ਹਾਂ, ਤਾਂ ਅਸੀਂ ਆਪਣੇ ਪਹਿਰਾਵੇ ਵੱਲ ਖ਼ਾਸ ਧਿਆਨ ਦਿੰਦੇ ਹਾਂ। ਅਸੀਂ ਨਹੀਂ ਚਾਹੁੰਦੇ ਕਿ ਲੋਕਾਂ ਦਾ ਧਿਆਨ ਸਾਡੇ ਸੰਦੇਸ਼ ਤੋਂ ਹਟ ਕੇ ਸਾਡੇ ਵੱਲ ਖਿੱਚਿਆ ਜਾਵੇ। ਇਸ ਦੀ ਬਜਾਇ, ਅਸੀਂ ਚਾਹੁੰਦੇ ਹਾਂ ਕਿ ਸਾਡਾ ਪਹਿਰਾਵਾ ਦੇਖ ਕੇ ਲੋਕ ਸੱਚਾਈ ਵੱਲ ਖਿੱਚੇ ਚਲੇ ਆਉਣ ਅਤੇ ‘ਸਾਡੇ ਮੁਕਤੀਦਾਤੇ ਪਰਮੇਸ਼ੁਰ ਦੀ ਸਿੱਖਿਆ ਦੀ ਸ਼ੋਭਾ ਵਧੇ।’—ਤੀਤੁਸ 2:10.

ਹੋਰ ਸਿੱਖੋ

ਮਸੀਹੀ ਹੋਣ ਦੇ ਨਾਤੇ ਅਸੀਂ ਕਿਵੇਂ ਜਾਣ ਸਕਦੇ ਹਾਂ ਕਿ ਸਾਡਾ ਪਹਿਰਾਵਾ ਢੁਕਵਾਂ ਹੈ? ਆਓ ਜਾਣੀਏ।

ਦੋ ਆਦਮੀ ਜੱਜ ਦੇ ਸਾਮ੍ਹਣੇ ਖੜ੍ਹੇ ਹਨ। ਇਕ ਆਦਮੀ ਨੇ ਕੋਟ-ਪੈਂਟ ਪਾਇਆ ਹੈ ਅਤੇ ਦੂਸਰੇ ਨੇ ਫਟੀ ਹੋਈ ਜੀਨ, ਬੇਢੰਗੇ ਕੱਪੜੇ ਅਤੇ ਟੋਪੀ ਪਾਈ ਹੈ। — ਸਾਡੇ ਪਹਿਰਾਵੇ ਤੋਂ ਸਾਫ਼ ਨਜ਼ਰ ਆਉਂਦਾ ਹੈ ਕਿ ਅਸੀਂ ਅਧਿਕਾਰੀਆਂ ਦਾ ਆਦਰ ਕਰਦੇ ਹਾਂ ਜਾਂ ਨਹੀਂ। ਇਹ ਸੱਚ ਹੈ ਕਿ ਯਹੋਵਾਹ ਸਾਡਾ ਦਿਲ ਦੇਖਦਾ ਹੈ, ਪਰ ਸਾਡੇ ਪਹਿਰਾਵੇ ਤੋਂ ਵੀ ਦਿਸਣਾ ਚਾਹੀਦਾ ਹੈ ਕਿ ਅਸੀਂ ਉਸ ਦਾ ਆਦਰ ਕਰਦੇ ਹਾਂ

4. ਸਾਡੇ ਪਹਿਰਾਵੇ ਤੋਂ ਯਹੋਵਾਹ ਲਈ ਆਦਰ ਝਲਕਣਾ ਚਾਹੀਦਾ ਹੈ

ਆਪਣੇ ਪਹਿਰਾਵੇ ʼਤੇ ਧਿਆਨ ਦੇਣ ਦਾ ਸਭ ਤੋਂ ਵੱਡਾ ਕਾਰਨ ਕੀ ਹੈ? ਜ਼ਬੂਰ 47:2 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

ਅਸੀਂ ਯਹੋਵਾਹ ਦੇ ਨਾਂ ਤੋਂ ਜਾਣੇ ਜਾਂਦੇ ਹਾਂ। ਇਸ ਗੱਲ ਨੂੰ ਧਿਆਨ ਵਿਚ ਰੱਖਦਿਆਂ ਅਸੀਂ ਕਿੱਦਾਂ ਦੇ ਕੱਪੜੇ ਪਾਵਾਂਗੇ?
ਕੀ ਸਭਾਵਾਂ ਅਤੇ ਪ੍ਰਚਾਰ ʼਤੇ ਜਾਣ ਵੇਲੇ ਆਪਣੇ ਪਹਿਰਾਵੇ ਵੱਲ ਧਿਆਨ ਦੇਣਾ ਜ਼ਰੂਰੀ ਹੈ? ਤੁਸੀਂ ਇੱਦਾਂ ਕਿਉਂ ਸੋਚਦੇ ਹੋ?

5. ਪਹਿਰਾਵੇ ਦੇ ਮਾਮਲੇ ਵਿਚ ਅਸੀਂ ਸਹੀ ਫ਼ੈਸਲੇ ਕਿਵੇਂ ਕਰ ਸਕਦੇ ਹਾਂ?

ਵੀਡੀਓ ਦੇਖੋ।

ਵੀਡੀਓ: “ਸਾਰਾ ਕੁਝ ਯਹੋਵਾਹ ਦੀ ਮਹਿਮਾ ਲਈ ਕਰੋ”  (10:18)

ਚਾਹੇ ਸਾਡੇ ਕੱਪੜੇ ਮਹਿੰਗੇ ਹੋਣ ਜਾਂ ਸਸਤੇ, ਪਰ ਇਹ ਸਾਫ਼-ਸੁਥਰੇ ਅਤੇ ਮੌਕੇ ਦੇ ਹਿਸਾਬ ਨਾਲ ਢੁਕਵੇਂ ਹੋਣੇ ਚਾਹੀਦੇ ਹਨ। 1 ਕੁਰਿੰਥੀਆਂ 10:24 ਅਤੇ 1 ਤਿਮੋਥਿਉਸ 2:9, 10 ਪੜ੍ਹੋ। ਫਿਰ ਚਰਚਾ ਕਰੋ ਕਿ ਅਸੀਂ ਇੱਦਾਂ ਦੇ ਕੱਪੜੇ ਕਿਉਂ ਨਹੀਂ ਪਾਉਣੇ ਚਾਹਾਂਗੇ . . .

ਜੋ ਜ਼ਿਆਦਾ ਹੀ ਢਿੱਲੇ ਅਤੇ ਬੇਢੰਗੇ ਹੋਣ।
ਜੋ ਤੰਗ ਜਾਂ ਛੋਟੇ ਹੋਣ ਜਾਂ ਜਿਨ੍ਹਾਂ ਨੂੰ ਦੇਖ ਕੇ ਲੋਕਾਂ ਦੇ ਮਨ ਵਿਚ ਗੰਦੇ ਖ਼ਿਆਲ ਆਉਣ।

ਭਾਵੇਂ ਮਸੀਹੀ ਮੂਸਾ ਦੇ ਕਾਨੂੰਨ ਦੇ ਅਧੀਨ ਨਹੀਂ ਹਨ, ਫਿਰ ਵੀ ਉਹ ਇਸ ਤੋਂ ਯਹੋਵਾਹ ਦੀ ਸੋਚ ਜਾਣ ਸਕਦੇ ਹਨ। ਬਿਵਸਥਾ ਸਾਰ 22:5 ਪੜ੍ਹੋ। ਫਿਰ ਇਸ ਸਵਾਲ ʼਤੇ ਚਰਚਾ ਕਰੋ:

ਅੱਜ-ਕੱਲ੍ਹ ਆਦਮੀ ਔਰਤਾਂ ਵਰਗਾ ਅਤੇ ਔਰਤਾਂ ਆਦਮੀਆਂ ਵਰਗਾ ਪਹਿਰਾਵਾ ਪਾਉਂਦੀਆਂ ਤੇ ਹਾਰ-ਸ਼ਿੰਗਾਰ ਕਰਦੀਆਂ ਹਨ। ਪਰ ਸਾਨੂੰ ਇੱਦਾਂ ਕਿਉਂ ਨਹੀਂ ਕਰਨਾ ਚਾਹੀਦਾ?

1 ਕੁਰਿੰਥੀਆਂ 10:32, 33 ਅਤੇ 1 ਯੂਹੰਨਾ 2:15, 16 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

ਸਾਨੂੰ ਕਿਉਂ ਇਸ ਗੱਲ ਦਾ ਧਿਆਨ ਰੱਖਣਾ ਚਾਹੀਦਾ ਹੈ ਕਿ ਸਾਡਾ ਪਹਿਰਾਵਾ ਦੇਖ ਕੇ ਆਲੇ-ਦੁਆਲੇ ਦੇ ਲੋਕਾਂ ਜਾਂ ਮੰਡਲੀ ਦੇ ਭੈਣਾਂ-ਭਰਾਵਾਂ ਨੂੰ ਬੁਰਾ ਨਾ ਲੱਗੇ?
ਤੁਹਾਡੇ ਇਲਾਕੇ ਵਿਚ ਲੋਕ ਕਿਹੜੇ-ਕਿਹੜੇ ਸਟਾਈਲ ਦੇ ਕੱਪੜੇ ਪਾਉਂਦੇ ਹਨ?
ਕੀ ਤੁਹਾਨੂੰ ਲੱਗਦਾ ਹੈ ਕਿ ਇਨ੍ਹਾਂ ਵਿੱਚੋਂ ਕੁਝ ਸਟਾਈਲ ਮਸੀਹੀਆਂ ਨੂੰ ਸ਼ੋਭਾ ਨਹੀਂ ਦੇਣਗੇ? ਤੁਹਾਨੂੰ ਇੱਦਾਂ ਕਿਉਂ ਲੱਗਦਾ ਹੈ?