Disyembre

Kasin sarasarag nen Jehova ya bilayen iray inatey? On, ta sikato so “Makapanyarin-amin”! (Apo. 1:8) Matmainomay ton taloen so amin ya kalaban, anggan say patey, “say unor a kabusol.” (1 Cor. 15:26) Say sakey nin rason no akin ya makapantiwala tayon sarasarag nen Jehova ya bilayen iray inaatey et lapud anggapoy limitasyon na memorya to. Memorize toy ngaran na amin ya bitewen. (Isa. 40:26) Ibabaga met na Biblia ya mabilabilay nin siansia ed nonot to iray matoor ya lingkor to anggano abaybayag la ran inatey. (Job 14:13; Luc. 20:38) Kanian no bilayen to ray inatey, matmainomay to ta walad memorya to so amin ya impormasyon da—no antoy walad DNA da, saray agawgawa ed bilay da, tan anggan say sankamelagan ya detalye tungkol ed sikara. On, manisia tayo ya bilayen nen Jehova iray inaatey diad arapen ta labalabay tan sarasarag ton gawaen itan. Pero walay sakey nin rason no akin ya manisia tayo ed satan ya promise to: Ginawa to la itan nensaman. Wala ray matoor ya lingkor to ya inikdan toy pakayari ya bilayen so inatey, sakey lay Jesus. w23.04 9-10 ¶7-9

No mauyamo tan marespeto tayo, mas dengelen itayo na katongtong tayo. Pero siempre, nalikas tayo met no say nantepet et labay to labat so midebati o man-insulto. No ontan so situasyon, mas maabig no agtayo la itutuloy so tongtongan. (Pro. 26:4) Pero matalag met so ontan, ta mas dakel so totoo ya labay day ondengel. On, dakel so maabig ya resulta no i-goal mo ya ipanengneng so inkaulimek. Ipikasim ed si Jehova ya nakontrol mo komoy liknaan mo pian mansiansia kan maulimek no walay mantepet ed sika tungkol ed kontrobersial ya topic tan no wala ray mamabalaw ed saray papanisiaan tayo. Tandaan ya no maulimek ka, naiwasan moy midebati anggano duma so opinyon mo ed arum. Tan no mauyamo tan marespeto kan onebat, ompan atan so rason ya say katongtong mo et manguman so pakanengneng to ed saray Tasi tan ed Biblia. Naynay ka komon ya “akaparaan a mangidepensa” ed saray papanisiaan tayo “tekep na inkaulimek tan aralem a respeto.” (1 Ped. 3:15) On, nonot mon lanang ya mabiskeg ka no maulimek ka! w23.09 19 ¶18-19

Walay apatiran paraan pian naipanengneng tayoy inkaanos. Unona, say toon maanos et matantan ya manpasnok. Labay ton ibaga, aliwan mipepetang so ulo to. Kanian anggano makapasyodot o makapa-stress so situasyon, kalmado labat. Tan ag-ombabawi anggano aliwliwa so impantrato ed sikato. (Exo. 34:6) Komadua, say toon maanos et amta toy manalagar. Aliwan maingongot, anggano nababayagan la ed panaalagar to. (Mat. 18:​26, 27) Komatlo, say toon maanos et aliwan apurado. No walay importantin gawaen to, iplano ton maong antis ya onggapo. Tan seseguradoen to ya walay sapat ya panaon to ya gawaen itan, ta agto labay ya inapura so kimey to. Komapat, say toon maanos et itetepel toy irap tan agmanrereklamo anggano ondadalan ed subok. Aliwan puros negatibo so ibabaga to ta sankanonot to nin siansia iray bendisyon ya iiter nen Aman Jehova. (Col. 1:11) Komon ta nanengneng irayan amin ed sikatayo. w23.08 20-21 ¶3-6

Akin et importante ya protektaan tayoy simbolikon puso tayo? Say sakey ya rason et lapud uusisaen itan nen Jehova. Labay ton ibaga, anggano maong so ipapanengneng tayod arum, agtayo niyamot ed si Jehova so walad puso tayo—say tuan inkatoo tayo. No nanengneng to ya ipapapuso tayo ray bilin to, ar-aroen to tayo tan ikdan to tayoy bilay ya andi-anggaan. (Juan 4:14) No say isip tayo et napno na karunongan nen Jehova, agditan makaloob iray makasamal ya ideya nen Satanas tan na sayan mundo. (1 Juan 5:​18, 19) No man-effort ka ya kabaten ya maong si Aman Jehova, lalom ya naaro tan narespeto. Agmo anggan naimadyin so sarilim ya manggaway kasalanan ta antam ya nasakitan moy liknaan to. Si Marta et sister ya tagad Croatia. Inamin to ya sikatoy atukson manggaway imoral. Imbaga to: “Amtak ya temporaryo labat so liket ya iter na kasalanan, pero diad tua, talagan mairap ya labanan so tukso. Agak laingen makapannonot na duga. Pero amay takot ko ed si Jehova so namprotekta ed siak.” Inisip nen Sister Marta iray aliwliwan epekto no sikatoy manpadaeg ed tukso. Ontan met so isipen tayo. w23.06 20-21 ¶3-4

Amta nen Jesus ya importantin maong ed Ama to ya nalinisan tan napasanto so ngaran To. Atan so rason no akin ya imbangat nen Jesus iray papatumbok to ya ipikasi ran: “Ama mi a walad tawen, napasanto komon so ngaran mo.” (Mat. 6:9) Amta nen Jesus ya aya so sankaimportantian ya isyu ed interon uniberso. Diad amin ya pinalsa, anggapoy makapipara ed ginawa nen Jesus pian napasanto so ngaran nen Ama to. Pero nen sikatoy inaresto na saray mamubusol ed sikato, inakusaan da ya anggapo kunoy respeto to ed ngaran na Dios. Parad si Jesus, atan la so sankabelatan tan sankaugsan ya kasalanan. Agto naawat ya sikatoy nasentensiaan lapud sayan krimen! Nayarin atan so rason no akin ya ‘agonigon a maong’ si Jesus antis dan arestoen.—Luc. 22:​41-44. w24.02 11 ¶11

Diad lumba parad bilay, dapat mas inaro tayoy Jehova tan si Jesus nen saray kapamilya o kakanayon tayo. (Mat. 10:37) Pero agto labay ya ibaga ya paulyanan tayo la ray obligasyon tayo ed pamilya tan ibaraan tayo ya makahadlang iratan ed saray responsabilidad tayo bilang Kristiano. Diad tua, ibabaga na Biblia ya importantin gampanan tayoy responsabilidad tayo ed pamilya pian awaten nen Jehova tan Jesus so panlilingkor tayo. (1 Tim. 5:​4, 8) Tan parad pankaabigan tayo lanlamang no gawaen tayo ray kanya-kanyan obligasyon tayo ed pamilya. Amta nen Jehova ya mas maliket so pamilya no walay aroan tan respeto ed baetan na sanasawa, no aroen tan ibangat na atateng iray ananak da, tan no unoren na ananak iray atateng da. (Efe. 5:33; 6:​1, 4) Antokaman so papel mo ed pamilya, unor mo iray prinsipyo ed Biblia. Agka dapat akadepende ed ididikta na emosyon mo, kultura yo, odino opinyon na saray eksperto. Man-research ka ed saray publikasyon tayo, ta ditan mo nabasa no panon mon naiyaplika iray prinsipyo ed Biblia. w23.08 28 ¶6-7

Nakomendaan so sister ya mani-effort pian aralen iray skill ya mausar ed bilay. No say sakey ya sister et aralen to la iratan anggano ugaw ni, seguradon nausar to itan anggad ibaleg to. Singa bilang, aral mon maong so manbasa tan mansulat. Diad arum ya kultura, ayos labat kuno anggano agmarunong ya manbasa tan mansulat so sakey ya bii. Pero diad sikatayo ran Kristiano, importante ya amta tayoy manbasa tan mansulat. (1 Tim. 4:13) Kanian anggano mairap, anosan mo labat anggad marunong ka lan manbasa tan mansulat. Akin et sulit so effort mo? On ta nayarin atan so makatulong pian makalmo kay trabaho. Makatulong met itan pian mas mainomay mon aralen tan talosan so Biblia, kanian mas epektibo so panagbangat mo. Tan say sankaimportantian, legan mon babasaen tan dadalepdepen so Biblia, mas naka-close moy Aman Jehova.—1 Tim. 4:15. w23.12 20-21 ¶10-11

Ipikasim ed si Jehova ya tulongan to ka ya nalabanan moy tukso. Lapud agtayo perpekto, mainomay itayon natukso ya manggaway aliwa. Kanian dapat et lanang tayon akaparaan ya labanan so tukso. Mamapasyay Satanas tan dakel so uusaren ton paraan pian natukso tayo. Say sakey ya uusaren to pian nadutakan so isip tayo et saray imoral tan malaswan libangan. No akaloob lad isip tayo iray marutak ya bagay, naapektoan met lay puso tayo ya anggad makagawa tayo lay seryoson kasalanan. (Mar. 7:​21-23; Sant. 1:​14, 15) Pero agtayo nalabanan so tukso no anggapoy tulong nen Jehova. Atan so rason no akin ya impila itan nen Jesus ed samay pangaligan ya pikakasi ya imbangat to. Kuan tod Ama to: “Agmo aabuloyan a napelag kami ed tukso, noagta iliktar mo kami ed samay mauges.” (Mat. 6:13) Labalabay itayon tulongan nen Jehova, pero dapat nanengneng to ya labalabay tayo met so patulongan ed sikato. Kanian espisipiko tayon ipikasi ya tulongan to tayon nalabanan so tukso. Tan siempre, onkilos tayo met. w23.05 6-7 ¶15-17

No mabiskeg so relasyon na sanasawa ed si Jehova, mabiskeg met so aroan da. Akin ey? On ta no inaro day Aman Jehova, unoren da iray bilin to, kanian naiwasan tan nasarag da iray problema ya nayarin manpabetel ed aroan da. Tan no maespiritual so sanasawa, gawaen day anggaay nayarian dan aligen si Jehova tan saray ugali to—singa say kaabigan, inkaanos, tan say mabulos ya pameperdona to. (Efe. 4:32–5:1) No ontan so ugali da, mas naaro day sakey tan sakey. Oniay imbaga nen Sister Lena ya masulok lan 25 taon ya kasal: “Main-inomay ya aroen tan respetoen so maespiritual ya too.” Say balibalin alimbawa ed saya et si Jose tan Maria. Diad karakel ya apo nen David, akin et sikara so apili nen Jehova ya magmaliw ya ateng na Mesias? On ta pareho iran maespiritual tan inar-aro day Jehova. Amta nen Jehova ya sikato nin siansia so iyuna dad bilay da anggano sanasawa la ra. w23.05 20-21 ¶3-4

Perpekto so lider tayo, si Jesus. Pero aliwan perpekto iray brother ya uusaren ton mangidaulo, kanian no maminsan et nanairapan tayon onunor ed sikara lalo la no agtayo kompormi ed instruksion da. Agawa itan ed si apostol Pedro. Nen sikatoy ingganggan na anghel ya mangan na karne na ayayep ya ipapasen ya marutak ed Mosaikon Ganggan, tinmanggi si Pedro—aliwa labat ya aminsan noagta amitlo! (Gawa 10:​9-16) Akin et agto labay? On, ta diad interon bilay to et agnin balot angan na ontan iran karne kanian agto natatalosan akin et onman so ipapagawa to may anghel. Maong balet ya alimbawa si apostol Pablo. Sikatoy inmunor nen ingganggan na saray mamatatken ed Jerusalem ya mangitagar na apatiran lalaki diad templo tan linisan toy sarili to unong ed Mosaikon Ganggan pian nanengneng na saray Judion agagi ya uunoren to itan. Amta to ya agla sakop na Mosaikon Ganggan iray Kristiano. Sakey ni, anggapoy ginawa ton aliwa. Pero diad tinmumbok ya agew, intagar nen Pablo iraman a lalaki tan “nilinisan [day] sarili [da] unong ed Ganggan.” (Gawa 21:​23, 24, 26) Lapud inmunor si Pablo, agla binmaleg so isyu tan ag-aderal so pankakasakey.—Roma 14:​19, 21. w23.10 10 ¶15-16

Antoy aanapen nen Jehova ed sakey ya kaaro? Labalabay nen Jehova ya kaaro iramay “ontatakot ed sikato.” Importante sirin ya walay takot tayod si Jehova, balanglan abayag tayo lan manlilingkor ed sikato o agano ni. Anto kasi koneksion na takot ed pikakaaro tayod si Jehova? Antoy labay ya ibaga na itakot ed Dios? Say sakey ya too ya walay takot tod Dios et inar-aro toy Jehova kanian agto labay ya nasakitan. Alwaran toy kagagawa to ta amta to ya no manggawa na aliwa, naderal so pankakaaro da. Ontan so alikna nen Jesus. Ibabaga na Biblia ya “walay takot tod Dios.” (Heb. 5:7) Labay to kasin ibaga, mankebbiew tan natatakot si Jesus ed si Jehova? Andi. (Isa. 11:​2, 3) Imbaga na Biblia ya walay takot tod Dios ta antakot ton napaermen so Ama to. Inar-aro toy Aman Jehova kanian lanang ton uunoren. (Juan 14:​21, 31) Ontan met so nalilikna tayo ed si Jehova. Balbaleg so respeto tayo ed Dios ta agnaparaan so panangaro, karunongan, hustisya, tan pakapanyari to. Imamalasakit to tayo tan labalabay to tayon ibangat. No agtayo awaten so panangigiya to, sikatoy napaermen tayo. Pero no unoren tayoy bangat to, napaliket tayoy puso to.—Sal. 78:41; Pro. 27:11. w23.06 14 ¶1-2; 15 ¶5

Nen mabiskeg la so pamamahala nen Arin Uzias, alingwanan to ya agawaan to itan lapud tulong nen Jehova. Antoy naaralan tayod satan ey? Lanang tayo komon ya isipen ya amin ya bendisyon tan pribilehyo tayo et manlalapud si Jehova. Kanian imbes ya manlastog tayo tan ombaleg so ulo tayo lapud mararakep ya nagagawaan tayo, ipaarap tayoy dayew ed si Jehova. (1 Cor. 4:7) Tandaan tayo met ya aliwa tayon perpekto, kanian kailangan tayoy ondengel ed panonot tan simbawa na arum. Oniay imbaga na sakey ya brother ya manga 60 so taon to: “No walay mangipaimano ed siak ed agawaan kon lingo, agko sisintien. Awaten koy simbawa pian napaaligwas koy sarilik tan makapantultuloy ak ed panaglingkor.” On, no walay takot tayo ed si Jehova tan lanang tayon manpaabeba, maong so pansumpalan tayo.—Pro. 22:4. w23.09 10 ¶10-11

Dakel so inanosan na saray inmuunan Kristiano. Siempre, asali da met iray problema ya dadalanen met na arum ya totoo. Pero dakel nin subok so inarap da. Kinontra tan pinairap ira na saray Judion lider na relihyon tan saray opisyal na Roma. Tan say mas ansakit, binusol ira na mismon kapamilya ra. (Mat. 10:21) Diad loob na kongregasyon, kailangan da met so manalwar ed impluensya na saray apostata, ta no andi, naderal so pankakasakey da. (Gawa 20:​29, 30) Pero inanosan da iratan ya amin tan nanmatoor ira. (Apo. 2:3) Panon iran akapan-anos? Dinalepdep da so impan-anos na saray matoor ya lingkor na Dios, ya singa si Job. (Sant. 5:​10, 11) Impikasi dad si Jehova ya ikdan to ra na pakpel tan biskeg. (Gawa 4:​29-31) Tan imbes ya manpokus irad problema, inisip da no anto ray maong ya resulta no mananos ira. (Gawa 5:41) Naanosan tayo met iray subok no lanang tayon i-personal study tan dalepdepen iray maong ya alimbawa ed Biblia tan nanduruman eksperiensya na agagi ed saray publikasyon tayo. w23.07 3 ¶5-6

Ag-itayo sukoan nen Jehova tan Jesus. Nen imburi nen apostol Pedro si Jesus, walay duara ya pampilian to: Kasin ontunda la bilang disipulo nen Jesus, odino ipetek toy lingo to tan ag-onsuko? Antis ni man ya agawa, ‘masimsimoon lan impikasi nen Jesus ya agkomon onkapuy so pananisia nen Pedro.’ Imbaga nen Jesus ed si Pedro itan ya pikakasi to. Onia ingen so bilin tod si Pedro: “Sano akapawil ka la, pabiskeg mo iray agagim.” (Luc. 22:​31, 32) Lapud satan ya imbaga nen Jesus, aliklikna nen Pedro ya walay tiwala nen Jesus ed sikato. No wala tayo met ed situasyon ya singa labay tayo lay ontundan manlingkor, sarag ya usaren nen Jehova iray maaron pastol pian napaseseg tayon manmatoor. (Efe. 4:​8, 11) Inter nen Aman Jehova iray materyal ya pankaukolan nen Pedro tan arum ya apostol. Kanian seguradon iter to met iray materyal ya pankaukolan tayo no iyuna tayod bilay tayo so Panarian. w23.09 24-25 ¶14-15

Nanenengneng nen Jehova so itutulong tayod arum anggano say pakalikna tayo et melmelag tan simpli met labat so ginawa tayo. Diad tua, ipapasen to itan ya singa bagat tayod sikato. Tan ibabaga ni ingen na Biblia ya singa walay utang nen Jehova ed sikatayo ya bayaran ton bayaran. No nakal kad pribilehyom bilang ministeryal a lingkor o elder, tandaan mo ya papablien nin siansia nen Jehova iray agawaan mo nensaman tan agton balot lingwanan so panangarom. (1 Cor. 15:58) Anggano anggapoy pribilehyom natan ed kongregasyon, naiimano to so ipapanengneng mon panangaro ed saray agagi. Labay nen Jehova ya ombiskeg so panangaro tayod sikato tan ed kapara tayon too. Ombiskeg so panangaro tayo ed si Jehova no maaral tan mabasa tayoy Biblia, no lanang tayon dadalepdepen itan, tan no naynay tayon manpipikasi ed sikato. Ombiskeg so panangaro tayo ed agagi no tulongan tayo ra tan no lanang tayon wadtan parad sikara. No gawaen tayo iratan ya amin, lalo tayon onapit ed si Aman Jehova tan ed sakey tan sakey. Tan sayan malet ya pankakaaro tayo et mansiansia anggad angga! w23.07 10 ¶11; 11 ¶13; 13 ¶18

Sikatayon mismo so mandesisyon parad sarili tayo no tungkol ed pangasikaso ed laman tayo tan panagpatambal. Siempre, agtayo pilien iray panagpatambal ya mangusar na dala tan walay laok ton espiritismo ta ibabawal iratan na Biblia. (Gawa 15:20; Gal. 5:​19, 20) Likud ed saratan, wala lay kalayaan na kada Kristiano ya manpili no antoy labay to. Anggano asubok tayo la so sakey ya klase na panagpatambal tan epektibo itan ed sikatayo, agtayo itan ipipilit ed arum ya agagi. Respetoen tayoy kalayaan dan mandesisyon. Importante ya tandaan tayo iyan apatiran punto: (1) Panarian na Dios labat so makaekal ed amin ya sakit. (Isa. 33:24) (2) Responsabilidad na kada Kristiano ya amtaen no antoy sankaabigan parad laman to, tan nepeg ya “kombinsido a dugay papanisiaan to.” (Roma 14:5) (3) Agtayo huhusgaan so arum tan agtayo manggagawa na pakagapolan da. (Roma 14:13) (4) Inar-aro tayo ray agagi kanian mas importante ed sikatayo so pankakasakey na kongregasyon nen say opinyon tayo.—Roma 14:​15, 19, 20. w23.07 24 ¶15

Kasin inar-arom si Jehova? Seguradon “on” so ebat mo. Ontan met so alikna na dakel ya lingkor to manlapu la nensaman. (Sal. 104:​33, 34) Diad tua, akaparaan iran mansakripisyo pian makapandayew irad si Jehova. Ontan so ginawa na saray Israelita nensaman ya tinawag ya Nazareo, odino mankabaliksay “sakey ya indedika.” Dugaruga itan ya deskripsion ed saray maseseg ya Israelita nensaman ya pinili day mansakripisyo pian makapanlingkor irad si Jehova diad espisyal ya paraan. Base ed Mosaikon Ganggan, say sakey ya laki o bii et nayarin “manggawa na nikabiig a sipan a manbilay bilang sakey a Nazareo.” (Num. 6:​1, 2) Say kabayag na inka-Nazareo to et depende ed karukey na panaon ya insipan to. Legan na inka-Nazareo to, wala ray kailangan ton unoren ya ganggan ya ag-uunoren na arum ya Israelita. No ontan sirin, akin et mandesisyon so sakey ya Israelita ya man-Nazareo? Seguradon say manunan rason et lapud inar-aro toy Jehova tan labay toy ombales ed dakdakel ya bendisyon ya naaawat to.—Deu. 6:5; 16:17. w24.02 14 ¶1-2

Diad Biblia, uusaren so Hebreon salita parad “katooran” odino “matoor a panangaro” no say idedeskribe et say espisyal ya panangaro na Dios parad saray lingkor to. Uusaren met itan ya salita pian deskribien so aroan na saray lingkor na Dios. (2 Sam. 9:​6, 7) Iilaloan met nen Jehova ya matoor tayod sikato tan agtayo onikban anggan antoy nagawa. Ontan so ginawa nen Daniel. Lalon inmelet so katooran tod si Jehova diad inlabas na panaon. Diad interon bilay nen Daniel, aminpigan asubok so katooran to ed si Jehova. Balet say sakey ed saray sankairapan ya subok ya inarap to et nen masulok lan 90 so taon to. Kabusol na saray opisyal na palasyo si Daniel tan anggapoy respeto ra ed si Jehova, kanian nanggawa ray pakana pian ompatey si Daniel. Walay batas ya impapirmaan dad ari ya ditan nasubok no siopay panmatooran nen Daniel—say Dios to o say ari. Diad satan ya batas et bawal so manpikasi ed anggan siopan Dios diad loob na 30 ya agew. Pero kasin tinmunda si Daniel ya manpikasi ed si Jehova pian naala toy pabor na ari tan agnadusa? Andi. Agbalot tinmunda. Nanmatoor ed Dios to!—Dan. 6:​12-15, 20-22. w23.08 5 ¶10-12

Labay nen Aman Jehova ya itultuloy tayon aroen iray agagi. No bilang ta asakitan da tayo, isipen tayo la ya agda itan ginagala tan mani-effort met ira ya unoren iray prinsipyo na Biblia. (Pro. 12:18) Tandaan tayo met ya inar-aro na Dios iray matoor ya lingkor to anggano wala ray nagagawaan dan lingo. Di ba no makakagawa tayoy lingo, peperdonaen itayo nen Jehova tan ituturing to tayo nin siansia ya kaaro? (Sal. 103:9) No say Ama tayod tawen et mabulos ya mamerdona, di mamerdona tayo met sirin! (Efe. 4:32–5:1) Anto ni sakey ya manpakilos ed sikatayon manpeperdonaan? Tandaan tayo ya asingsingger lay anggaan kanian kaukolan tayon paeleten so aroan tayon sanaagi. Lalo la ta amta tayon onsabi panaon et pairapen itayo na gobierno tan ompan napriso tayo ni ingen lapud pananisia tayo. No nagawa itan, sika-sikatayo lanlamang so mantutulongan.—Pro. 17:17. w24.03 15-16 ¶6-7

Dakel nin salaysay so nabasa ed Biblia tungkol ed saray kabataan ya ginawa ray panlabayan nen Jehova kanian naar-aro to ra tan maong so nansumpalan na bilay da. Say sakey et si David. Anggano ugaw ni, kaaro to lay Dios tan nen baleg la et nagmaliw ya matoor ya ari ed Israel. (1 Ara. 3:6; 9:​4, 5; 14:8) No i-personal study’m so bilay nen David, seguradon napaseseg kan manmatoor met ed si Jehova. Sarag mo met ya i-personal study so alimbawa nen Marcos tan Timoteo. Ugugaw ni ra nen ginmapo iran nanlingkor ed si Jehova, tan apaliket da so Dios anggad intatken da. On, saray desisyon mo natan et apektoen toy bilay mo diad arapen. No mantiwala kad si Jehova, aliwan diad sarilim, tulongan tan igiya to ka pian duga iray desisyon mo. Labay to ya maliket ka tan maong so pansumpalan mo. Tandaan mo ya iya-appreciate nen Aman Jehova so amin ya gagawaen mo parad sikato. No usaren moy bilay mo parad sikato, anggapon balot so pagbabawian mo. On, say panlingkor ed si Aman Jehova so sankaliketan ya bilay! w23.09 13 ¶18-19

Asali nen apostol Pablo so asakitan lapud imbaga tan ginawa na arum ya agagi. Anengneng ton mismo iray kakapuyan tan lingo ra. Singa bilang, sikatoy hinusgaan na arum ya agagi nen balobalo ni labat ya disipulo. (Gawa 9:26) Nen ombibisita lay Pablo ed saray kongregasyon, wala ray agagi ya dineral day reputasyon to. (2 Cor. 10:10) Anengneng to met so aliwliwa tan makapagapol ya ginawa na sakey ya manangidaulo. (Gal. 2:​11, 12) Tan wala met may panaon ya adismayan maong si Pablo ed ginawa na sakey ya agi ya kaiba ton ombibisita ed saray kongregasyon, si Marcos. (Gawa 15:​37, 38) Wala komoy rason nen Pablo ya ombarong ed sarayan agagi, pero kasin iniwasan to ra? Andi, ag-anguman so pakanengneng tod sikara, tan aga pinmayag ya naapektoan so panaglingkor tod si Jehova lapud lingo na arum. Antoy akatulong ed si Pablo pian nitepel to iratan ya amin? Inar-aro nen Pablo iray agagi. Kanian imbes ya manpokus ed saray lingo da, say ninengneng to la et say maong ya ugali da. Panangaro met so nampakilos ed si Pablo ya iyaplika so teksto tayo ed sayan agew. w24.03 15 ¶4-5

Dakel so alimbawa ed Biblia ya impanengneng day inkaulimek. Say sakey et si Isaac. Nen manaayam si Isaac tan say pamilya to ed Gerar ya teritorya na saray Filisteo, akaibeg ed sikato iray Filisteo kanian tinabonan da iray bobon ya kinotkot na saray lingkor nen ama to. Imbes ya ilaban nen Isaac so karapatan to, inmalis lad arum ya lugar tan diman la nankotkot na arum ya bobon. (Gen. 26:​12-18) Pero imbaga na saray Filisteo ya gawa da met so danum ed saman ya lugar. Antoy ginawa nen Isaac? Imbes ya mikolkol, inmalis lamet. (Gen. 26:​19-25) Akin et mahinahon si Isaac anggano walay rason to komon ya mamasnok? Seguradon akaaral ed alimbawa na saray atateng to. Say tatay ton si Abraham et mapalugar ya too tan say nanay ton si Sara et “mareen tan maulimek” ya bii.—1 Ped. 3:​4-6; Gen. 21:​22-34. w23.09 15 ¶4

Imbaki nen Jehova so panguloan ya Anak to diad dalin pian ibangat iray totoo tungkol ed Panarian tan iter toy bilay to pian nadondon so kasalanan tayo. Nen binilay nen Jehova si Jesus, pinmawil ed tawen ta sikato so apili ya Ari ed Panarian na Dios. Anto so manunan nalalanor ed gagala nen Jehova? Pasantosen to so ngaran to. Diad tua, atan so tema na interon Biblia. Pian nasumpal itan, usaren to so Panarian to ya say Ari et si Kristo. Agbalot manguman so gagala nen Jehova parad dalin. Ginarantiyaan to ya no antoy imbaga to et sumpalen to. (Isa. 46:​10, paimanod leksab; Heb. 6:​17, 18) Kanian nagawan-nagawa so gagala to ya say dalin et magmaliw ya paraiso. Magmaliw ya perpekto iray matunong ya ananak nen Adan tan Eva. Tan ditan et “panliketan [da] so bilay ya anggad angga.” (Sal. 22:26) Pero wala ni sankanonot nen Jehova ya gawaen to—pankasakeyen toy amin ya ananak to diad tawen tan diad dalin, tan matoor iran manpasakop ed sikato. (Efe. 1:​8-11) No aralen mon maong so gagala nen Jehova tan no anto ray ginawa to pian nasumpal itan, seguradon pambiliban mo so Ama tayo ed tawen! w23.10 20 ¶7-8

Ag-abayag kayarin akasabi ed Jerusalem iray Judion abihag ed Babilonia, inmirap so situasyon da ta binmagsak so ekonomiya, magulo so politika, tan dakel so kinmontra ed pampapaalagey da na templo. Lapud saratan ya subok, apaulyanan da laingen itan ya kimey, anta atan so sankaimportantian ya ipapagawa nen Jehova ed sikara. Kanian imbaki nen Jehova si propetan Aggeo tan Zacarias pian pasesegen iray Judio. Tan balbaleg so epekto na panamaseseg da. (Ag. 1:1; Zac. 1:1) Pero kalabas na manga 50 ya taon, kinmapuy lamet so espiritualidad na saray Judio. Maong labat ta walay marundunong ya managkopya na Ganggan ed Babilonia ya linmad Jerusalem—si Esdras. Pinaseseg to met iray Judio ya iyuna ed bilay da so dugan panagdayew. (Esd. 7:​1, 6) Amay mensahe nen Aggeo tan Zacarias so akatulong ed saray Judio pian ag-onkapuy so tiwala dad si Jehova anggano dakel so subok ya dadalanen da. Makatulong met itan ed sikatayo natan pian agtayo pandudaan so tulong nen Jehova no wala ray ag-iilaloan ya nagawa ed bilay tayo.—Pro. 22:19. w23.11 14 ¶2-3

Antoy gawaen tayo pian naipanengneng tayoy panangaro tayo ed saray agagi? Say sakey ya paraan et no ligliwaen tayo ra. No makasi tayo ya singa si Jehova, napakilos tayon “itultuloy [ya] ligliwaen so sakey tan sakey.” (1 Tes. 4:18) Antoy gawaen tayo pian mansiansian mabiskeg so aroan tayo? Mabulos tayon manpeperdonaan. Akin et kakkaukolan tayo la natan ya pabiskegen so panangaro tayo ed sakey tan sakey? Oniay imbaga nen apostol Pedro ya rason: “Asingger lay anggaan na amin a bengatla. Kanian, . . . nawalaan kayo komon na aralem a panangaro ed sakey tan sakey.” (1 Ped. 4:​7, 8) Legan ya manasingger so anggaan, antoy iilaloan tayon nagawa? Oniay imbaga nen Jesus: “Busolen kayo na amin a nasyon lapud ngaran ko.” (Mat. 24:9) Pian makapanmatoor tayo anggano busolen itayo na mundo, dapat walay pankakasakey tayo. No mabiskeg so aroan tayo, agan balot nabuyak nen Satanas so pankakasakey tayo.—Fil. 2:​1, 2. w23.11 13 ¶18-19

No naamtaan na sakey ya too so katuaan ya walad Salita na Dios, balbaleg so epekto ed bilay to. No naamtaan to no anton klase na Dios si Jehova, manguma-uman so bilay to. Sikatoy kalkalnan nibulos ed saray katilaan nen Satanas. Malinlinew to lan nanengneng iray balibalin ugali na Ama tayo. Seguradon pambiliban toy pakapanyari nen Aman Jehova. (Isa. 40:26) Naaralan toy mantiwala ed Dios ta perpekto so hustisya To. (Deu. 32:4) Naaralan to met so manmatalek ed aralem ya karunongan na Dios. (Isa. 55:9; Roma 11:33) Tan seguradon na-touch ed katuaan ya say Dios et maar-aro. (1 Juan 4:8) No diman oneelet so pikakaaro tod si Jehova, diman met mas ombiskeg so ilalo to ya sikatoy manbilay ya andi-anggaan tan ituring nen Jehova bilang anak. Amay natulongan moy sakey ya too ya nakabkabat tan naar-aro toy Ama to ed tawen—balbaleg itan ya pribilehyo! Kagalangan tayo ya ituring itayo nen Jehova ya “kakimeyan” to.—1 Cor. 3:5. w24.02 12 ¶15

No sakey kan Bible study odino binmaleg kad katuaan lapud Tasi iray ateng mo, kasin plaplanoen mo met lay manpabautismo? No on, marakep sirin ta ontan so goal mo. Pero antis kan nabautismoan, kailangan mo nin idedika so sarilim ed si Jehova. Panon mon idedika so sarilim ed si Jehova? Manpikasi ka tan i-promise mod sikato ya sikato labat so dayewen mo tan lanang mon iyuna ed bilay mo so panlabayan to. Isipan mod sikato ya sikatoy aroen mo ed “interon pusom tan interon kamarerwam tan interon nonot mo tan interon biskeg mo.” (Mar. 12:30) Espisyal so dedikasyon—gawaen mo iya ya sikayon dua labat nen Jehova. Say bautismo balet et nanengneng na totoo. Atan so mangipaamta ed sikara ya indedikam lay sarilim ed si Jehova. Say dedikasyon et seryoso tan sagradon sipan. Gawam sirin so anggaay nayarian mo ya tooren so im-promise mo ta atan so eekspiken nen Jehova.—Ecl. 5:4. w24.03 2 ¶2; 3 ¶5

Anggapo tay sanasawa ya anggapoy problema ra. Diad tua, ibabaga na Biblia ya saramay mangasawa et “nawalaay irap ed laman da.” (1 Cor. 7:28) Akin ey? On ta anggano inar-aro day sakey tan sakey, pareho ra ya aliwan perpekto tan walay kanya-kanyan ugali tan inkatoo ra. Ompan mandumaan so kultura tan background da. Ompan diad ilabas na panaon et wala ray ompaway ya ugali da ya agda anengneng nen saninaro ni ra labat. Amin iratan et nayarin panlapuan na problema. No maminsan no naproproblema so sanasawa, tetelen day sakey tan sakey, imbes ya ayosen day problema tan birbiren da ya walay kanya-kanyan lingo ra. Tan ompan onsabi ni ingen ed punto ya isipen da lay mansian o mandiborsyo ta atan labat la kunoy ultimon solusyon. Pero, duga kasi itan? Andi. Labay nen Jehova ya respetoen na asawan laki tan asawan bii so uksoyan na panangasawa anggano walay kakapuyan na asawa ra. w24.03 16 ¶8; 17 ¶11

Kayari na dedikasyon mo tan bautismom, tuloytuloy nin ombaleg tan ombiskeg so ilalom legan kan ontatatken ed espiritual tan ondadakel so antam ed Biblia. (Heb. 5:13–6:1) Seguradon apatunayan mo la ya tua imay ibabaga na Roma 5:​2-4. Seguradon dakel lan subok so dinalan mo. Pero inanosan mon amin iratan kanian aliknam ya walad sikay pabor nen Jehova. Lapud kombinsido ka ya inaro ka na Dios tan naliliketan ed sika, mas binmiskeg so tiwalam ya talagan awaten mo so premyom—say bilay ya andi-anggaan. On, mas mabiskeg la natan so ilalom kompara nen Bible study ka ni labat. Mas malinew tan mabilabilay itan ed isip mo. Talagan balbaleg so epekto tod bilay mo—apakilos ka ya lalon aroen so pamilyam, usaren so panaon mo diad dugan paraan, tan sankanonot mon lanang so ilalom antis kan mandesisyon. Wala ni imbaga nen apostol Pablo tungkol ed ilalo tayo. Indanet to ya say ilalo tayo et seguradon nagawa. On, makaseguro ka ya agkan balot dismayaen nen Jehova.—Roma 15:13. w23.12 12-13 ¶16-19

No ondadalan tayod graben subok, mairap so magmaliw ya balanse. Agtayo natatalosan so nalilikna tayo, nambabangil so naiisip tayo, tan agtayo nakontrol so reaksion tayo. Lapud aliwan maligen so liknaan tayo, singa tayo barko diad pegley na dayat legan na maksil ya bagyo. No ontan so situasyon tayo, panon itayon tutulongan nen Jehova? Im-promise to ya tulongan to tayo pian onligen so liknaan tayo. No walay bagyo, angkakabaleg so daluyon kanian magalaw so barko. Delikado itan! Pero maong labat ta maslak ya barko et walay singa duaran payak da ya akalegep ed danum. Atan so manbalanse ed barko. Ontulong itan pian mas maligen tan mainawa so biahe. Pero mas onggana itan no onaabante so barko kompara no steady labat. Mipadpara, tutulongan itayo nen Aman Jehova pian onligen so liknaan tayo. Pero mas onggana so tulong to no tuloytuloy tayon manlingkor ed sikato anggano wala ray subok. w24.01 22 ¶7-8

No natatakot ka, isip mo no anto la ray ginawa nen Jehova nensaman. Obserbaan tan dalepdep mo iray pinalsa to. Singa bilang, ‘imanom ya maong’ iray siwit tan rosas. No aasikasoen ira nen Jehova anta anggapoy abilidad dan mandayew ed sikato tan agto ra ginawa unong ed indengan to, di mas asikasoen to tayo ta manlilingkor tayod sikato! (Mat. 6:​25-32) Isip mo met iray ginawa nen Jehova parad saray lingkor to. Maabig no i-personal study’m so sakey ya karakter ed Biblia ya mabisbiskeg so pananisia to. Odino basam so istoryay bilay na saray matoor ya lingkor nen Jehova natan. Tan isip mo met no anto la ray ginawa nen Jehova parad sika. Singa bilang, anto ray ginawa to pian naamtaan moy katuaan? (Juan 6:44) Anto la ran pikakasim so inebatan to? (1 Juan 5:14) Panon kan minanabang ed dondon bagat na inad-aro ton Anak kada agew?—Efe. 1:7; Heb. 4:​14-16. w24.01 3 ¶6; 7 ¶17