Hosue

20 Yehova a bisa Hosue: 2 “Bisa e israelitanan: ‘Skohe algun stat di refugio ku mi a papia ku boso di dje pa medio di Moises. 3 Si un hende mata un persona* aksidentalmente òf sin ku e por a yuda, e por hui bai un di e statnan ei pa buska refugio. Den e stat, e por haña protekshon kontra un vengadó.* 4 Ora un hende ku a mata un persona aksidentalmente hui bai un di e statnan ei, e mester para na entrada di porta di e stat i splika e ansianonan di e stat su kaso. E ansianonan mester tum’é den e stat i dun’é un lugá kaminda e por biba. 5 No mester entreg’é den man di un persona ku ta persiguié i busk’é pa mata pa tuma vengansa, pasobra ta aksidentalmente el a mata su próhimo; e no tabata odia su próhimo.* 6 Un hende ku mata un persona aksidentalmente mester keda biba den un stat di refugio te ora ku e tin ku presentá dilanti di komunidat* pa huisio. Apesar ku e ser deklará inosente, ta te ora ku e persona ku ta sirbi komo sumo saserdote muri, e tin mag di bai su kas bèk na e stat for di kaminda el a hui.’”

7 Pues, nan a santifiká* e siguiente statnan komo stat di refugio: Kédes ku tabata un stat na Galilea, den e serunan na Nèftali; Síkèm, ku tabata un stat den e serunan na Efraím; i Kíriat-Arba, esta, Hébròn, ku tabata un stat den e serunan na Huda. 8 Na e otro banda di riu Yordan, ost di Yériko, nan a skohe Bézer, ku tabata un stat riba un seru plat, den teritorio di e tribu di Ruben. Henter e seru plat ei tabata un desierto.* Nan a skohe tambe Rámòt, ku tabata un stat na Gálad, den teritorio di e tribu di Gad, i Gólan, ku tabata un stat na Básan, den teritorio di e tribu di Mánases.

9 Eseinan a bira e statnan di refugio kaminda tur israelita òf estranhero ku tabata biba na e pais por a hui bai den kaso ku nan a mata un persona* sin ku nan por a yuda. Di e manera ei, un hende ku a mata un persona aksidentalmente lo no a muri na man di un vengadó sin ku e por a presentá dilanti di komunidat* pa huisio.