Salmo

83 O Dios, no keda ketu.

O Dios Santu, no keda ketu* ni keda sin hasi nada.

 2 Wak kon bo enemigunan ta hasi boroto!

Hende ku ta odia bo ta aktua na un manera arogante.*

 3 Den sekreto, nan ta traha plan astuto kontra bo pueblo;

nan ta traha kòmplòt kontra hende ku ta presioso pa bo.*

 4 Nan ta bisa: “Ban, laga nos kaba ku e nashon di Israel

pa hende no kòrda nan nòmber mas.”

 5 Huntu, nan a plania un strategia.*

Nan a forma un aliansa* pa oponé bo:

 6 edomita, ismaelita, moabita, hagrita,

 7 hende di Gebal, di Ámòn, di Ámalèk,

di Filistea i e habitantenan di Tiro.

 8 Asiria tambe a djòin nan.

Nan tur ta apoyá e desendientenan di Lòt.* (Sela)

 9 Hasi ku nan manera bo a hasi ku Mádian,

manera bo a hasi ku Sísera i Yabin na riu* Kison.

10 Nan a ser destruí na En-Dor.

Nan a keda meskos ku mèst riba suela.

11 Hasi ku nan noblenan manera bo a hasi ku Órèb i Zeeb,

i hasi ku nan lidernan* manera bo a hasi ku Zeba i Zalmuna,

12 pasobra nan tur a bisa: “Laga nos poderá di e pais kaminda Dios ta biba.”

13 O mi Dios, laga nan bira meskos ku mata seku ku bientu ta lastra bai kuné,

meskos ku bagas ku bientu ta hiba p’aki i p’aya.

14 Manera kandela ta kima mondi,

sí, manera vlam ta kima seru hasié pretu,

15 laga bo tempestat persiguí nan,

i laga bo orkan spanta nan.

16 O Yehova, humiá nan*

pa nan buska bo.*

17 Laga nan ser brongosá i keda morto spantá pa semper.

Laga nan ser humiá, i laga nan muri.

18 Laga tur hende sa ku bo nòmber ta Yehova

i ku ta abo so ta Dios Haltísimo riba henter tera.