Habakuk
1 Aki ta sigui un mensahe ku Profeta Habakuk* a risibí pa medio di un vishon.
2 O Yehova, te ki dia mi tin ku keda grita pidi ousilio? Ki dia lo bo skucha mi?
Te ki dia mi tin ku keda pidi yudansa pa bo salba nos? Dikon bo no ta kaba ku violensia?*
3 Dikon bo ta laga mi mira maldat?
Dikon bo ta tolerá opreshon?
Dikon tin destrukshon i violensia?
I dikon tin asina tantu pleitamentu i konflikto?
4 E hendenan no ta kumpli ku lei,
i no tin hustisia.
Hende hustu ta rondoná di hende malbado;
ta p’esei no tin hustisia.
5 * “Opservá e nashonnan, i mira kiko lo sosodé!
Boso lo keda boka habrí i asombrá,
pasobra durante boso bida,* lo sosodé algu
ku boso lo no kere ni maske hende konta boso.
6 Mi ta bai mobilisá e kaldeonan,
ku ta un pueblo violento i impulsivo.
Nan ta invadí hopi teritorio
pa poderá di kas ku no ta di nan.
7 Nan ta terorisá hende; hende tin miedu di nan.
Nan tin poder, i nan ta establesé nan propio leinan.
8 Nan ta mas feros ku lobo ku ta yag den anochi,
i nan kabainan ta mas lihé ku leopardo.
Nan kabainan di guera ta kore masha duru mes;
nan kabainan ta bini di leu.
E kaldeonan* ta ataká manera un águila ku ta baha ku spit riba un proi.
9 Nan ta bini desididu pa mata hende.
Ora nan reuní, nan ta manera bientu di ost.
Nan ta kohe masha hopi hende prezu, mes hopi ku santu di laman.
10 Nan ta hasi bofon di e reinan,
i nan ta hari e funshonarionan den puesto haltu.
Nan ta grita hari e lugánan fortifiká.
Nan ta montoná tera pa traha subida, i nan ta konkistá e lugánan ei.
11 Despues, nan ta sigui nan kaminda, avansando manera bientu.
Sinembargo, nan lo haña nan kastigu pasobra nan ta hasi maldat,
i nan ta kere ku ta nan dios ta duna nan poder.”*
12 O Yehova, no ta semper bo a eksistí?
O mi Dios, mi Dios santu, abo no ta muri.*
13 Bo wowonan ta puru; bo no por soportá mira hende hasi maldat;
bo no ta tolerá maldat.
Dikon anto bo ta tolerá hende falsu?*
Dikon bo ta keda ketu ora hende malbado ta habraká hende mas hustu ku nan?
14 Dikon bo ta permití ku hende ta ser tratá manera piská den laman
òf manera bestia di laman ku no tin un lider pa protehá nan?
15 Nan* ta gara hende ku anzue,
i nan ta kohe hende den nan redanan.
Anto nan ta rekohé e hendenan den nan nètnan di piska.
P’esei, nan ta alegrá mashá.
16 P’esei, nan ta ofresé sakrifisio na nan redanan,
i nan ta kima sensia na onor di nan nètnan di piska
pasobra, danki na e kosnan ei, nan tin kuminda na abundansia.*
I nan kumindanan ta dushi i saludabel.
17 Dikon bo ta laga nan sigui yena nan redanan i hasi nan redanan bashí?*
Nan lo sigui masakrá e pueblonan sin miserikòrdia?