Laga Nos Ta dje Clase Cu Tin Fe

“Nos . . . [ta] e clase cu tin fe cu ta conserbá e alma bibu.”—HEBREONAN 10:39.

 1. Pakico por bisa cu e fe di cada sirbidó leal di Jehova ta precioso?

EPROXIMO bes cu bo ta den un Salon di Reino yen di adoradó di Jehova, para un ratu i wak e hendenan rond di bo. Pensa riba e hopi maneranan den cua nan ta mustra fe. Bo por mira rumannan di edad cu a sirbi Dios pa décadanan largu, hóbennan cu tur dia ta resistí preshon di nan pareunan i mayornan cu ta traha duru pa lanta yu cu ta teme Dios. Tin anciano i sirbidó ministerial di congregacion cu ta carga diferente responsabilidad. Sí, bo por mira rumannan spiritual di tur edad cu ta vence tur tipo di obstáculo pa por sirbi Jehova. Esta precioso e fe di cada unu ta!—1 Pedro 1:7.

 2. Di con Pablo su conseho na Hebreonan capítulo 10 i 11 ta beneficioso pa nos awe?

² Masha poco hende imperfecto, si tin mes, a comprendé e importancia di fe mihó cu apostel Pablo. De facto, el a remarcá cu berdadero fe ta hiba na “conserbá e alma bibu.” (Hebreonan 10:39) Pero Pablo tabata sa cu fe ta bou di atake, i cu e por swak den e mundu sin fe aki. E tabata profundamente preocupá p’e cristiannan hebreo na Jerusalem i Hudea cu tabata lucha pa conserbá nan fe. Segun cu nos ta analisá parti di Hebreonan capítulo 10 i 11, laga nos tuma nota dje métodonan cu Pablo a usa pa edificá nan fe. Haciendo esei, nos lo mira den ki manera nos por edificá un fe mas firme den nos mes i den esnan rond di nos.

Expresá Confiansa den Otro

 3. Con Pablo su palabranan na Hebreonan 10:39 ta mustra cu e tabatin confiansa den su rumannan den fe?

³ E promé cos cu nos por ripará ta Pablo su actitud positivo pa cu su auditorio. El a skirbi: “Awor nos no ta e clase cu ta hala atras te na destruccion, sino e clase cu tin fe cu ta conserbá e alma bibu.” (Hebreonan 10:39) Pablo a pensa lo mihó, no lo peor, di su fiel compañeronan cristian. Ripará tambe cu el a usa e expresion “nos.” Pablo tabata un homber hustu. Tog, e no a rebahá su auditorio, como si fuera e tabata riba un plano di husticia elevá hopi mas haltu cu nan. (Compará cu Eclesiástes 7:16.) Mas bien, el a incluí su mes den nan. El a expresá confiansa di curason cu e i su lectornan cristian fiel tur lo a enfrentá e obstáculonan desalentador cu a presentá dilanti nan, i cu yen di curashi nan lo a nenga di hala atras na destruccion, i cu nan lo a duna prueba di ta dje clase cu tin fe.

 4. Pa ki motibunan Pablo tabatin confiansa den su compañeronan creyente?

⁴ Con Pablo por tabatin un confiansa asina? E tabata ciegu p’e erornan dje cristiannan hebreo? Al contrario, el a ofrecé nan conseho specífico pa yuda nan vence nan faltanan spiritual. (Hebreonan 3:12; 5:12-14; 6:4-6; 10:26, 27; 12:5) Tog, Pablo tabatin por lo ménos dos bon motibu pa tene confiansa den su rumannan. (1) Como imitadó di Jehova, Pablo a haci esfuerso pa mira e pueblo di Dios manera Jehova ta mira nan. Esei ta, no djis a base di nan faltanan sino a base di nan bon cualidadnan i nan potencial pa scoge di haci bon den futuro. (Salmo 130:3; Efesionan 5:1) (2) Pablo tabatin fe absoluto den e poder di spiritu santu. E tabata sa cu ningun obstáculo, ningun debilidad humano, por a stroba Jehova di impartí “poder mas ayá di loke ta normal” na ningun cristian cu ta haci esfuerso pa sirbié fielmente. (2 Corintionan 4:7; Filipensenan 4:13) Pues Pablo su confiansa den su rumannan no tabata ekibocá, irealista of ciegamente optimista. E tabatin un base firme i un fundeshi bíblico.

 5. Con nos por imitá Pablo su confiansa, i cu ki probabel resultado?

⁵ Siguramente, e confiansa cu Pablo a desplegá a resultá di ta contagioso. P’e congregacionnan na Jerusalem i Hudea, e echo cu Pablo a papia asina edificante cu nan, mester a nificá hopi pa nan. Enfrentá cu e menosprecio debilitante i e indiferencia arogante di nan opositornan hudiu, e expresionnan ei a yuda e cristiannan hebreo resolvé den nan curason pa ta e clase cu tin fe. Nos por haci mescos pa otro awe? Ta masha fácil pa mira den otro hende solamente un lista largu di fayo i cos straño den personalidad. (Mateo 7:1-5) Pero, nos por yuda otro muchu mas si nos tuma nota di e fe único cu cada ken ta poseé anto balorá esei. Cu e animacion ei, fe tin mas chens di crece.—Romanonan 1:11, 12.

Uso Apropiado dje Palabra di Dios

 6. For di ki fuente Pablo tabata citando ora el a skirbi e palabranan registrá na Hebreonan 10:38?

⁶ Tambe Pablo a edificá fe den su compañeronan creyente dor di usa e Scritura cu abilidad. Por ehempel, el a skirbi: “‘Pero mi hustu lo biba pa causa di fe,’ i ‘si e hala atras, mi alma no tin placer den dje.’” (Hebreonan 10:38) Aki Pablo a cita for di profeta Habacuc.a Probablemente e palabranan aki tabata conocí pa Pablo su lectornan, cristiannan hebreo pa ken e bukinan profético tabata bon conocí. Considerando su meta—fortalecé e fe di cristiannan den Jerusalem i su cercania, rond di aña 61 E.C.—e ehempel di Habacuc tabata bon scogé. Pakico?

 7. Na ki tempu Habacuc a skirbi su profecia, i kico tabata e condicionnan den Huda n’e tempu ei?

⁷ Tur cos ta mustra cu Habacuc a skirbi su buki djis un poco mas cu dos década promé cu e destruccion di Jerusalem na aña 607 P.E.C. Den vision, e profeta a mira e caldeonan (of, babilonionan), un “nacion amargá i impulsivo,” cu a bari Huda i destruí Jerusalem, guliendo pueblo i nacionnan den e proceso. (Habacuc 1:5-11) Pero Bijbel a profetisá un calamidad asina for di tempu di Isaías, mas cu un siglo promé. Den tempu di Habacuc, Jehoiakim a bira sucesor di e bon rey Hosías, i maldad a bolbe florecé den Huda. Jehoiakim a persiguí i asta mata esnan cu a papia den Jehova su nomber. (2 Crónicanan 36:5; Jeremías 22:17; 26:20-24) Nada straño anto cu profeta Habacuc yen di angustia a sclama: “Pa cuantu tempu, O Jehova?”—Habacuc 1:2.

 8. Pakico e ehempel di Habacuc a resultá di ta probechoso p’e cristiannan den e promé siglo i awe?

⁸ Habacuc no tabata sa con cerca e destruccion di Jerusalem tabata. Mescos tambe, e cristiannan di promé siglo no tabata sa ki dia e sistema di cosnan hudiu lo a terminá. Nos awe tampoco no sa e “dia i ora” cu Jehova su huicio lo bini contra e sistema malbado aki. (Mateo 24:36) Laga nos tuma nota, anto, di Jehova su contesta dobel na Habacuc. Di promé, el a sigurá e profeta cu e fin lo a bini net na tempu. “Lo e no ta lat,” Dios a bisa, maske for di un punto di bista humano, e por a parce di tarda. (Habacuc 2:3) Di dos, Jehova a corda Habacuc: “Pa loke ta e hustu, pa su fieldad lo e sigui biba.” (Habacuc 2:4) Esta simpel i bunita e berdadnan ei ta! Loke ta conta mas, no ta ki dia e fin ta bini, sino si nos ta sigui hiba un bida di fe.

 9. Con sirbidónan obediente di Jehova a sigui biba pa motibu di nan fieldad (a) na 607 P.E.C.? (b) despues di 66 E.C.? (c) Pakico ta vital pa nos fortalecé nos fe?

⁹ Ora nan a plunder Jerusalem na 607 P.E.C., Jeremías, su secretario Baruc, Ebed-melec, i e recabitanan leal a mira con Jehova su promesa na Habacuc a sali berdad. Nan a ‘sigui biba’ dor di scapa dje destruccion teribel di Jerusalem. Pakico? Jehova a recompensá nan fieldad. (Jeremías 35:1-19; 39:15-18; 43:4-7; 45:1-5) Mescos tambe, e cristiannan hebreo di promé siglo lo mester a respondé bon na Pablo su conseho, pasobra ora e ehército romano a atacá Jerusalem na 66 E.C. anto retirá inexplicablemente despues, fielmente e cristiannan ei a obedecé Jesus su spiertamentu pa hui. (Lucas 21:20, 21) Nan a sigui biba pa motibu di nan fieldad. Mescos tambe, nos lo sigui biba si nos ta fiel ora e fin yega. Ki un motibu vital pa fortalecé nos fe awor!

Describiendo Ehempelnan di Fe na un Manera Bibu

10. Con Pablo a describí Moises su fe, i con nos lo por imitá Moises relacioná cu esaki?

¹⁰ Tambe Pablo a edificá fe dor di usa ehempelnan na un manera poderoso. Segun cu bo ta lesa Hebreonan capítulo 11, ripará con e ta describí ehempel di personahenan bíblico na un manera bibu. E ta bisa, por ehempel, cu Moises “a sigui firme como si el a mira Esun cu ta invisibel.” (Hebreonan 11:27) Cu otro palabra, Jehova tabata asina real pa Moises cu tabata como si fuera e por a mira e Dios invisibel. Por bisa mescos di nos? Ta fácil pa papia tocante un relacion cu Jehova, pero esfuerso ta necesario pa edificá i fortalecé e relacion ei. Ta esfuerso cu nos tin cu haci! Jehova ta asina real pa nos cu nos ta tum’é na consideracion ora di tuma decision, incluso esnan aparentemente menor? E clase di fe ei lo yuda nos wanta asta e pió oposicion.

11, 12. (a) Bou di ki condicionnan kisas e fe di Enoc a ser poné na prueba? (b) Ki recompensa animador Enoc a ricibí?

¹¹ Considerá e fe di Enoc tambe. Ta difícil pa nos imaginá e oposicion cu el a enfrentá. Enoc tabatin cu entregá un mensahe di huicio skerpi contra e hendenan malbado cu tabata biba e tempu ei. (Hudas 14, 15) Evidentemente, e persecucion cu a menasá e homber fiel aki tabata asina feros, asina violento, cu Jehova a ‘transfirié,’ tumand’e for dje condicion di bida p’e soño di morto, promé cu e enemigunan por a gar’é. Pues Enoc no a haña chens di mira cumplimentu dje profecia cu el a pronunciá. Sin embargo, el a ricibí un don cu tabata, den cierto sentido, asta mihó.—Hebreonan 11:5; Génesis 5:22-24.

¹² Pablo ta splica: “Promé cu su transferencia [Enoc] a ricibí testimonio di cu el a agradá Dios bon.” (Hebreonan 11:5) Kico esaki tabata kier men? Promé cu el a bai drumi den morto, kisas Enoc a haña un tipo di vision dje paradijs terenal den cua lo e lanta pronto. Sea cual sea e caso, Jehova a laga Enoc sa cu el a agradá Dios cu su curso fiel. Enoc a alegrá Jehova su curason. (Compará cu Proverbionan 27:11.) Ora bo pensa riba e bida di Enoc, bo no ta bira conmoví? Abo lo tin gana di hiba un bida di fe asina? Anto meditá riba ehempelnan asina; mira nan como hende real. Keda determiná pa biba pa medio di fe, dia tras dia. Corda tambe, cu e sorto di hende cu tin fe, no ta sirbi Jehova a base di un fecha riba cua Dios lo cumpli cu tur su promesanan. Mas bien nos ta determiná pa sirbi Jehova pa semper! Haciendo esei ta nificá e mihó manera di biba den e sistema di cosnan aki i den esun siguiente.

Con pa Bira Fuerte den Fe

13, 14. (a) Con Pablo su palabranan registrá na Hebreonan 10:24, 25 por yuda nos haci nos reunionnan ocasionnan gososo? (b) Kico ta e propósito principal di reunionnan cristian?

¹³ Pablo a mustra e cristiannan hebreo un cantidad di manera práctico pa nan fortalecé nan fe. Laga nos considerá dos so. Probablemente nos conocé e exhortacion na Hebreonan 10:24, 25, cu ta urgi nos pa bini huntu regularmente na nos reunionnan cristian. Pero corda cu Pablo su palabranan inspirá ei no ta nificá cu nos mester ta observadónan pasivo na reunionnan asina. Mas bien, Pablo ta describí e reunionnan como un oportunidad pa conocé otro mihó, pa incitá otro pa sirbi Dios mas plenamente i pa animá otro. Nos ta einan pa duna, no djis pa ricibí. Esei ta yuda haci nos reunionnan ocasionnan gososo.—Echonan 20:35.

¹⁴ Pero, nos ta asistí na reunion cristian principalmente pa adorá Jehova Dios. Nos ta haci esei dor di uni den oracion i cantica, dor di scucha atentamente i dor di ofrecé “e fruta di lipnan”—expresionnan di alabansa na Jehova den nos comentario i partinan den reunion. (Hebreonan 13:15) Si nos tene e metanan ei na mente i actua conforme cu nan na tur reunion, sin faya nos fe lo ser edificá cada biaha atrobe.

15. Pakico Pablo a urgi e cristiannan hebreo pa tene nan ministerio firmemente gará, i pakico e mésun conseho ta apropiado awe?

¹⁵ Un otro manera pa edificá fe ta mediante e trabou di predicá. Pablo a skirbi: “Laga nos tene firmemente gará e declaracion público di nos speransa sin vacilá, pasobra fiel ta esun cu a primintí.” (Hebreonan 10:23) Kisas bo por urgi otronan pa gara algu firmemente ora nan ta parce di ta den peliger di entregá. Satanas sigur tabata pone preshon riba e cristiannan hebreo ei pa entregá den nan ministerio, i e ta poniendo preshon riba e pueblo di Dios awe tambe. Ora nos enfrentá e preshon ei, kico nos tin cu haci? Considerá loke Pablo a haci.

16, 17. (a) Con Pablo a haña curashi p’e ministerio? (b) Ki medidanan nos tin cu tuma si algun aspecto di nos ministerio cristian ta intimidá nos?

¹⁶ Pablo a skirbi e cristiannan na Tesalónica: “Despues cu nos a sufri promé i tabata tratá insolentemente den Filípos (manera boso sa), nos a tuma un curashi mediante nos Dios pa papia e bon nobo di Dios cu boso cu hopi lucha.” (1 Tesalonicensenan 2:2) Den ki manera Pablo i su compañeronan a ser “tratá insolentemente” na Filípos? Segun algun erudito, e palabra griego cu Pablo a usa ta expresá insulto, trato bergonsoso of escandaloso. E autoridadnan filipense a maltratá nan cu bara, a tira nan den prizon, i a mara nan na cadena. (Echonan 16:16-24) Con e experencia doloroso ei a afectá Pablo? E hendenan dje siguiente stad cu Pablo a bishitá riba su biahe di misionero, esta Tesalónica, a haña cu Pablo a hala atras den miedu? No, el a “tuma un curashi.” El a vence miedu i a sigui predicá cu curashi.

¹⁷ Di unda Pablo su curashi a bini? For di paden? No, el a bisa cu el a tuma curashi “mediante nos Dios.” Un obra di referencia pa traductornan di Bijbel ta bisa cu lo por traducí e declaracion aki como “Dios a saca miedu for di nos curason.” Pues si bo ta sinti cu bo no tin muchu curashi den bo ministerio, of cu algun aspecto di dje ta parce di intimidá bo, pakico no apelá na Jehova p’e haci mescos cu bo? Pidié pa saca e miedu for di bo curason. Pidié pa yuda bo tuma un curashi p’e trabou. Ademas, tuma algun otro medida práctico. Por ehempel, haci areglo pa traha cu un persona cu ta ábil den e forma di duna testimonio cu ta preocupá bo. Esei lo por encerá teritorio di negoshi, testificacion riba caya, predicacion informal of testificacion via telefon. Tal bes bo partner lo ta dispuesto pa hiba delantera na promé instante. Si ta asina, observá i siña. Anto tuma un curashi pa purba bo mes tambe.

18. Ki bendicionnan nos por experenciá si nos tuma curashi den nos ministerio?

¹⁸ Si bo realmente tuma un curashi, pensa kico por ta e resultado. Ora bo persistí i no laga bo mes bira desanimá, probablemente lo bo haña bon experencia compartiendo e berdad, experencianan cu di otro manera lo bo a perde di haña. (Mira página 25.) Lo bo tin e satisfaccion di sa cu bo a agradá Jehova dor di haci algu cu ta difícil pa bo. Lo bo experenciá su bendicion i yudansa pa vence bo miedu. Bo fe lo bira mas fuerte. Realmente, bo no por purba edificá fe den otro hende sin na mésun momento edificá bo mes fe.—Hudas 20, 21.

19. Ki recompensa precioso ta warda esnan cu ta di “e clase cu tin fe”?

¹⁹ Sigui fortalecé bo fe i e fe di e personanan rond di bo. Bo por haci esei dor di edificá bo mes i otro hende usando e Palabra di Dios abilmente, studia Bijbel su ehempelnan di fe i trece nan na un manera bibu, prepará pa reunionnan cristian i participá den nan, i dor di tene firmemente gará n’e privilegio precioso dje ministerio público. Segun cu bo ta haci e cosnan aki, sea sigur cu abo, en berdad, ta di “e clase cu tin fe.” Corda tambe cu e clase di personanan aki ta haña un recompensa precioso. Nan ta “e clase cu tin fe cu ta conserbá e alma bibu.”b Ohalá bo fe sigui crece, i laga Jehova Dios conserbá bo na bida pa semper!

[Nota]

Con Lo Bo Contestá?

◻ Con Pablo a expresá confiansa den e cristiannan hebreo, i kico nos por siña for di esaki?

◻ Pakico Pablo su referencia na profeta Habacuc tabata asina apropiado?

◻ Ki ehempelnan bíblico di fe Pablo a relatá na un manera bibu?

◻ Ki medionan práctico pa edificá fe Pablo a recomendá?

[Plachi na página 23]

Despues di su experencia doloroso na Filípos, Pablo a tuma curashi pa sigui predicá

[Plachinan na página 24]

Abo por tuma curashi pa purba vários forma di duna testimonio?