1 Timoteo

4 Sinembargo, e palabra inspirá ta bisa bon kla ku mas despues algun hende lo kai for di fe, pasobra nan ta presta atenshon na deklarashonnan inspirá engañoso i na siñansa di demoño, 2 pa medio di e hipokresia di hende ku ta papia mentira, kende nan konsenshi ta sin heful, komo si fuera kimá ku heru kayente. 3 Nan lo prohibí kasamentu i manda hende apstené di kuminda ku Dios a krea pa hende kome di dje ku gradisimentu, esta, hende ku tin fe i ku konosé e bèrdat ku eksaktitut. 4 Pues, tur loke Dios a krea ta bon i no mester rechasá nada si risibié ku gradisimentu, 5 pasobra e ta ser santifiká pa medio di e palabra di Dios i orashon.

6 Si bo duna e rumannan e konseho akí, lo bo ta un ekselente sirbidó* di Kristu Hesus, nutrí ku e palabranan di fe i di e bon siñansa ku bo a sigui fielmente. 7 Pero rechasá kuentanan falsu ku ta menospresiá loke ta santu, manera esnan ku muhé bieu ta konta. Di otro banda, entrená bo mes ku e meta di kultivá deboshon na Dios. 8 Pasobra entrenamentu físiko ta yuda ku algu; pero deboshon na Dios ta probechoso pa tur kos, ya ku e ta inkluí e promesa di bida tantu pa awor komo pa futuro. 9 E deklarashon ei ta konfiabel i ta meresé pleno aseptashon. 10 Pa e motibu akí mes nos ta traha duru i ta hasi esfuerso, pasobra nos a pone nos speransa den e Dios bibu, kende ta Salbador di tur sorto di hende, spesialmente di esnan fiel.

11 Sigui duna e òrdunan akí i siña e rumannan esakinan. 12 No laga ningun hende menospresiá bo nunka pasobra bo ta yòn. Al kontrario, bira un bon ehèmpel pa esnan fiel den bo manera di papia, bo kondukta, amor, fe i puresa. 13 Sigui dediká bo mes na lesamentu den públiko, na dunamentu di konseho serio i siñansa—te ora mi yega. 14 No neglishá e don ku tin den bo, ku bo a haña pa medio di profesia ora ku e kuerpo di ansiano a pone man riba bo. 15 Reflekshoná riba e kosnan akí; keda intensamente okupá ku nan, pa tur hende por mira bon kla ku bo a hasi progreso. 16 Presta atenshon konstantemente na bo mes i na e siñansa ku bo ta duna. Perseverá den e kosnan akí, pasobra hasiendo esei lo bo salba bo mes i tambe esnan ku ta skucha bo.