Filemon

1 Esaki ta un karta ku ami, Pablo, prizonero pa kousa di Kristu Hesus, i Timoteo, nos ruman, ta skirbi na Filemon, nos kompañero di trabou stimá, 2 i na e kongregashon ku ta reuní den bo kas, tambe na Apfia, nos ruman muhé, i na Argipo, nos kompañero den lucha:

3 Bondat inmeresí i pas di parti di Dios, nos Tata, i di nos Señor Hesukristu sea ku boso.

4 Semper mi ta gradisí mi Dios ora mi ta menshoná bo den mi orashonnan, 5 pasobra mi ta sigui tende di bo fe den Señor Hesus i di bo amor p’e i pa tur e santunan. 6 Mi ta pidi Dios pa e fe ku bo tin en komun ku otronan por motivá bo pa rekonosé tur e bon kosnan ku nos tin pa medio di Kristu. 7 Mi ruman, mi a sinti un gran goso i konsuelo ora mi a tende di bo amor, pasobra bo a animá kurason* di e santunan.

8 Pa e motibu akí mes, aunke en konekshon ku Kristu mi tin gran frankesa di papia* i por ordená bo pa hasi loke ta korekto, 9 mi ta preferá di hasi un apelashon na bo a base di amor, mirando ku mi ta loke mi ta, Pablo, un hòmber di mas edat, sí, awor tambe prizonero pa kousa di Kristu Hesus. 10 Mi ta hasi un apelashon na bo relashoná ku mi yu, Onésimo; mi a bira manera un tata p’e den prizòn. 11 Ántes e tabata inútil pa bo, pero awor e ta útil pa bo i pa mi. 12 Mi ta mand’é bèk serka bo, sí, esun pa ken mi tin masha kariño.

13 Mi tabatin gana di keda kuné akinan pa mi mes pa e por sigui sirbi mi na bo lugá tanten ku mi ta prezu pa kousa di e bon notisia. 14 Pero mi no ke hasi nada sin bo konsentimentu, pa bo akto di bondat no sali fòrsá, sino di bo propio boluntat. 15 Kisas ta p’esei mes el a kita bai for di bo pa un ratu, ya bo por hañ’é bèk pa semper, 16 pero no mas komo djis un esklabo, sino mas ku un esklabo, komo un ruman stimá—stimá spesialmente pa mi, pero kuantu mas pa bo—tantu den boso relashon di doño ku esklabo komo den Señor. 17 P’esei, si bo ta konsiderá mi bo kompañero di fe, risibié amablemente manera lo bo a risibí ami. 18 Ademas, si el a hasi bo algu malu òf ta debe bo algu, pone esaki riba mi kuenta. 19 Ami, Pablo, ta skirbi esaki ku mi mes man: lo mi paga bo bèk. Ademas, mi no tin nodi di bisa bo ku bo debe mi asta bo mes. 20 Sí, mi ruman, laga mi risibí e yudansa akí di bo en konekshon ku Señor: animá mi kurason* en konekshon ku Kristu.

21 Mi tin sigur ku lo bo hasi esei, ta p’esei mi ta skirbi bo, pasobra mi sa ku lo bo hasi asta mas di loke mi ta bisa. 22 Pero huntu ku esei, prepará tambe un lugá pa mi keda, pasobra mi ta spera ku pa medio di boso orashonnan lo mi ser entregá bèk na boso.

23 Epafras, mi kompañero di prizòn den union ku Kristu Hesus, ta manda kumindamentu pa bo, 24 i tambe Marko, Aristargo, Demas i Lukas, mi kompañeronan di trabou.

25 E bondat inmeresí di nos Señor Hesukristu sea ku boso pa e spiritu ku boso ta manifestá.