Tito

3 Sigui rekordá e rumannan pa nan ta sumiso, obediente na gobièrnu i outoridat, kla pa tur bon obra; 2 pa nan no papia malu di ningun hende ni kana buska pleitu, ma pa nan ta rasonabel, demostrando pleno suavedat pa ku tur hende. 3 Pasobra un tempu asta nos mes tabata insensato, desobediente, siendo engañá pa hende, sklabisá na vários deseo i plaser, bibando den maldat i envidia; nos tabata abominabel i tabata odia otro.

4 Ma ora e bondat di nos Salbador, Dios, i su amor pa humanidat a keda revelá, 5 el a salba nos (no pa motibu ku nos a hasi ningun obra hustu, sino pa motibu di su miserikòrdia) pa medio di e baño ku a hiba nos na un bida nobo i pa medio di spiritu santu ku a hasi nos nobo. 6 El a drama e spiritu akí rikamente* riba nos pa medio di Hesukristu, nos Salbador, 7 di manera ku despues ku el a deklará nos hustu pa medio di su bondat inmeresí,* nos por a bira heredero di bida eterno di akuerdo ku e speransa ku nos tin.

8 E palabranan akí ta konfiabel, i mi ke pa bo keda hasi deklarashon firme relashoná ku e kosnan akí, pa asina esnan ku a kere den Dios por konsentrá riba hasimentu di bon obra. E kosnan akí ta ekselente i probechoso pa hende.

9 Pero evitá di pleita riba ko’i kèns i di investigá lista di antepasado i di diskutí i bringa tokante Lei, pasobra e kosnan akí no ta di ningun probecho i no tin balor. 10 Pa loke ta e hende ku ta promové un sekta, dun’é un promé i un di dos spièrtamentu. I si e no skucha, e ora ei rechas’é, 11 sabiendo ku e hende ei a desviá for di e kaminda di e bèrdat i ta pekando, i ku ta su mes e ta kondená.

12 Ora mi manda Artemas òf Tikiko serka bo, hasi tur bo esfuerso pa bini serka mi na Nikópolis, pasobra mi a disidí di pasa wenter einan. 13 Hasi tur loke bo por pa yuda Zenas, kende ta vèrsá den Lei, i Apolo ku loke nan tin mester pa nan biahe. 14 Pero nos hendenan tambe mester siña okupá nan mes ku bon obra pa asina nan por kumpli ku nan nesesidatnan urgente, pa nan no ta improduktivo.

15 Tur esnan ku ta huntu ku mi ta manda kumindamentu pa bo. Kumindá esnan den fe ku tin kariño pa nos.

E bondat inmeresí di Dios sea ku boso tur.