Romanonan

3 Pues, ki bentaha e hudiu tin riba otro hende anto? Sí, di ki probecho sirkunsishon ta? 2 Masha hopi den tur sentido. Na promé lugá, pasobra ta nan Dios a konfia ku su deklarashonnan sagrado. 3 Kiko si algun hudiu no tabatin fe? Akaso nan falta di fe ta nifiká ku Dios no ta fiel na su palabra? 4 Apsolutamente ku nò! Mas bien, Dios lo papia bèrdat, asta si tur hende ta gañadó, manera ta pará skirbí: “Pa por keda probá ku bo ta hustu ora bo ta papia, i bo por gana bo kaso.” 5 Ma si nos inhustisia ta resaltá e hustisia di Dios, kiko nos lo bisa? Akaso Dios ta inhustu ora e ta kastigá nos? (Mi ta papia manera hende ta papia.) 6 Apsolutamente ku nò! Si Dios ta inhustu, ta kon lo e por husga mundu?

7 Ma asta si mi mester papia mentira, i pa motibu di esei e bèrdat di Dios resaltá mas ainda pa su gloria, pakiko mi ta ser husgá komo pekadó anto? 8 I pakiko nos no ta bisa anto (manera algun hende ta gaña ku nos ta bisa): “Laga nos hasi malu pa loke ta bon por bini”? E huisio kontra e hendenan ei ta hustu.

9 Kiko nos ta kere anto? Akaso nos ku ta hudiu ta den un mihó posishon? Apsolutamente ku nò! Pasobra mas promé nos a splika kaba ku tur, tantu hudiu komo griego,* ta den gara di piká, 10 manera ta pará skirbí: “No tin ningun hende hustu, ni sikiera ún; 11 no tin ningun hende ku tin komprondementu penetrante; no tin ningun hende ku ta buska Dios. 12 Tur a desviá, tur huntu a bira inútil; no tin ningun ku ta mustra bondat, no tin ni sikiera ún.” 13 “Nan garganta ta manera un graf habrí, i ku nan lenga nan ta gaña e hendenan.” “Venenu di kolebra ta tras di nan lep.” 14 “Nan boka ta yen di maldishon i amargura.” 15 “Nan pianan ta lihé pa drama sanger.” 16 “Destrukshon i miseria ta den nan kaminda, 17 i nan no konosé e kaminda di pas.” 18 “Nan no tin temor di Dios.”

19 Awor bon, nos sa ku tur e kosnan ku Lei ta bisa ta dirigí na esnan ku ta bou di Lei, pa tapa nan tur su boka i pa henter mundu meresé e kastigu di Dios. 20 Pues, Dios lo no deklará ningun hende hustu pa medio di obra di lei, pero lei ta duna nos konosementu eksakto di loke piká ta.

21 Ma awor a keda revelá ku un hende por haña un posishon hustu den bista di Dios sin ku e tin ku kumpli ku Lei. Ademas, Lei i e Profetanan a duna testimonio di esaki; 22 sí, tur hende ku tin fe por haña e posishon hustu akí pa medio di fe den Hesukristu. No tin distinshon den nan. 23 Pasobra tur a peka i no por reflehá e gloria di Dios. 24 Pero Dios a duna nan un regalo ora ku, debí na su bondat inmeresí, el a deklará nan hustu pa medio di e liberashon ku ta basá riba e reskate ku Kristu Hesus a paga. 25 Dios a presentá Kristu komo un ofrenda pa haña rekonsiliashon* pa medio di fe den su sanger. El a hasi esaki pa demostrá ku e tabata hustu ora el a tene pasenshi ku nan i a pordoná e pikánan ku nan a kometé den pasado. 26 Tambe el a hasi esaki pa demostrá den e tempu akí ku e ta hustu ora e ta deklará e hende ku tin fe den Hesus hustu.

27 Tin motibu anto pa broma? Nò, no tin motibu. Kua lei no ta duna motibu pa broma? Lei di obra? Nò! Ta lei di fe. 28 Pues, nos ta konsiderá ku Dios ta deklará un hende hustu pa medio di fe, no pa medio di obra di lei. 29 Òf e ta Dios di hudiu so? E no ta Dios di hende di e nashonnan tambe? Sí, di hende di e nashonnan tambe. 30 Ya ku ta ún Dios tin, lo e deklará tantu hende sirkunsidá komo hende ku no ta sirkunsidá hustu pa medio di nan fe. 31 Ta abolí nos ta abolí lei anto pa medio di nos fe? Apsolutamente ku nò! Al kontrario, nos ta apoyá lei.