Kico Nos Mester Haci pa Ser Salba?

UN HOMBER un biaha a puntra Jesus: “Señor, esnan cu ta ser salbá ta poco?” Con Jesus a contestá? El a bisa: ‘Djis aceptá mi como bo Señor i Salbador, i lo bo ser salbá’? No! Jesus a bisa: “Boso haci esfuerso vigorosamente pa drenta dor dje porta smal, pasobra hopi, mi ta bisa boso, lo purba di drenta pero lo no por.”—Lucas 13:23, 24.

Jesus a keda sin contestá e homber su pregunta? No, e homber no a puntra con duru lo ta pa ser salbá; el a puntra si e cantidad salbá lo ta poco. Pues Jesus meramente a indicá cu mas poco hende cu tal bes bo ta spera lo forsa nan mes vigorosamente pa ricibí e bendicion maraviyoso aki.

‘Esei no ta loke nan a bisá mi,’ algun lector tal bes ta protestá. Kisas nan ta cita Juan 3:16, cu ta bisa: “Pasobra Dios a stima mundu asina tantu cu El a duna su único Yu, pa tur cu kere den dje, no bai perdí, ma haña bida eterno.” (Testament Nobo) Sin embargo, nos ta contestá: ‘Kico, anto, nos mester kere aden pa ser salbá? Cu Jesus realmente a biba? Naturalmente. Cu e ta e Yu di Dios? Sigur cu sí! I siendo cu Bijbel ta yama Jesus “Maestro” i “Señor,” nos no mester kere tambe loke el a siña, obedec’é i siguié?’—Juan 13:13; Mateo 16:16.

Siguiendo Jesus

Ahan, aki e problema ta lanta! Hopi hende cu a ser bisá cu nan ta “salbá” ta parce di tin poco intencion di sea sigui Jesus of obedec’é. En realidad, un clero protestant a skirbi: “Naturalmente, nos fe den Cristo mester continuá. Pero e pretencion cu nos fe absolutamente mester, of ta necesario p’e continuá, no tin ningun apoyo den Bijbel.”

Al contrario, Bijbel ta mencioná practicánan inmoral cu ta comun entre algun hende cu ta pensa cu nan ta “salbá.” Relacioná cu un persona cu a sigui den tal caminda, Bijbel a instruí cristiannan: “Saca e homber malbado for di entre boso.” Siguramente Dios lo no kier hende malbado pa contaminá su congregacion cristian!—1 Corintionan 5:11-13.

Kico ta nificá, anto, pa sigui Jesus, i con nos por haci esei? Wel, kico Jesus a haci? E tabata inmoral? un fornicador? un buraché? un gañador? E tabata desonrado den negoshi? Naturalmente cu no! ‘Pero,’ kisas bo ta puntra, ‘mi tin cu limpia mi bida di tur e cosnan ei?’ Pa e contesta, considerá Efesionan 4:17 te cu 5:5. E no ta bisa cu Dios lo aceptá nos sin importá kico nos ta haci. Mas bien, e ta bisa nos pa ser distinto for dje nacionnan di mundu cuanan a “yega di ser mas ayá di tur sentido moral,... pero boso no a siña cu Cristo ta asina... Kita e personalidad bieu cu ta conformá na boso moda di anda di ántes... Laga esun cu ta horta no horta mas... Laga ’fornicacion i impuresa di tur sorto of golosidad ni sikiera ser mencioná entre boso, net manera ta pas pa hende santu... Pasobra boso sa esaki, reconociend’e pa boso mes, cu ningun fornicador ni persona impuru ni persona golos—locual kier men ser un idólatra— tin cualkier herencia den e reino di Cristo i di Dios.”

Nos ta siguiendo Jesus si nos no ta ni purba di biba na armonia cu su ehempel? Nos no tin cu haci esfuerso pa haci nos bida mas manera di Cristo? E pregunta vital ei rara bes, of nunca mes, ta ser considerá dor di hende cu ta bisa, manera un tratado religioso: “Bini cerca Cristo awor—manera bo ta.”

Un dje disipelnan di Jesus a spierta cu hende malbado tabata “birando e bondad inmerecí di nos Dios den un excuus pa conducta inmoral i resultando di ser falsu na nos único Doño i Señor, Jesucristo.” (Hudas 4) Di ki manera nos, en efecto, por bira e misericordia di Dios “den un excuus pa conducta inmoral”? Nos lo por haci esei dor di asumí cu Cristo su sacrificio ta cubri picánan deliberá cu nos tin intencion di sigui cometé mas bien cu picánan di imperfeccion humano cu nos ta tratando na pone nos tras. Siguramente nos lo no kier bai di acuerdo cu un di Merca su evangelistanan mas conocí, kende a bisa cu bo no tin cu ‘limpia bo bida, bandoná mal custumbernan of conformá na normanan bíblico.’—Haci un contraste cu Echonan 17:30; Romanonan 3:25; Santiago 5:19, 20.

Creencia Ta Producí Accion

Hopi hende a ser bisá cu “keriendo den Jesus” ta un solo acto i cu nos fe no mester ta suficiente fuerte pa impulsá obedencia. Pero e Bijbel no ta di acuerdo cu esei. Jesus no a bisa cu hende cu cuminsá e curso cristian ta salbá. Mas bien, el a bisa: “Esun cu a perseverá te na fin ta esun cu lo ser salbá.” (Mateo 10:22) Bijbel ta compará nos curso cristian cu un careda, cu salbacion como e premio na final dje careda. I e ta insta: “Core di tal manera cu boso por alcans’é.”—1 Corintionan 9:24.

Pues, “aceptando Cristo” ta enbolbé hopi mas cu djis aceptá e bendicionnan cu Jesus su sacrificio superlativo ta ofrecé. Obedencia ta necesario. Apostel Pedro ta bisa cu huicio ta cuminsá “cu e cas di Dios,” i ta agregá: “Awor si e ta cuminsá promé cu nos, kico lo ser e fin di esnan cu no ta obediente na e bon nobo di Dios?” (1 Pedro 4:17) Pues nos mester haci mas cu simplemente tende i kere. Bijbel ta bisa cu nos mester “bira hacidornan dje palabra, i no tendedornan solamente, gañando [nos mes] cu razonamentu falsu.”—Santiago 1:22.

Jesus Su Propio Mensahenan

E buki bíblico di Revelacion ta contené mensahenan for di Jesus, transmití via Juan na siete congregacion cristian di promé. (Revelacion 1:1, 4) Jesus a bisa cu ya cu e hendenan den e congregacionnan aki ‘a acept’é’ caba, cu esei tabata basta? No. El a elogiá nan obranan, nan trabou i nan awante i a papia di nan amor, fe i ministerio. Pero el a bisa cu e Diabel lo pone nan na prueba i cu nan lo a ser recompensá “individualmente segun [nan] obranan.”—Revelacion 2:2, 10, 19, 23.

Pues Jesus a describí un compromiso hopi mas grandi di loke mayoria hende a comprendé ora nan a ser bisá cu nan salbacion tabata “obra finalisá” asina cu nan ‘a aceptá Jesus’ na un reunion religioso. Jesus a bisa: “Si cualkier hende kier bini tras di mi, lagu’é nenga su mes i coge su staca di tormento i siguí mi continuamente. Pasobra ken cu kier salba su alma lo perd’é, pero ken cu perde su alma pa causa di mi lo hañ’é.”—Mateo 16:24, 25.

Nenga nos mes? Sigui Jesus continuamente? Esei lo rekerí esfuerso. Esei lo cambia nos bida. Sin embargo, Jesus realmente a bisa cu algun di nos kisas asta lo tin cu ‘perde nos alma’—muri p’e? Sí, e clase di fe ei ta bini solamente cu conocimentu di e cosnan magnífico cu bo por siña dor di studia e Palabra di Dios. Esei tabata bisto riba e dia cu Esteban a ser piedrá dor di fanáticonan religioso kendenan “no por a para firme contra e sabiduria i e spiritu cu cua e tabata papia.” (Echonan 6:8-12; 7:57-60) I tal fe a ser demostrá den nos tempu dor di cientos di Testigonan di Jehova kendenan a preferá di muri den camponan di concentracion nazista cu violá nan concenshi bíblicamente entrená.a

Celo Cristian

Nos mester tene firmemente na nos fe cristian pasobra, distinto di loke kisas bo ta tende den algun iglesia of programanan religioso na television, Bijbel ta bisa cu nos por cai for dje fe. E ta conta di cristiannan kendenan a bandoná “e caminda recto.” (2 Pedro 2:1, 15) Pues nos mester ‘sigui traha pa alcansá nos propio salbacion cu temor i temblamentu.’—Filipensenan 2:12; 2 Pedro 2:20.

Esaki ta e manera cu cristiannan dje promé siglo, e hendenan cu realmente a tende Jesus i su apostelnan siña, a comprendé e asuntu? Sí. Nan tabata sa cu nan mester a haci algu. Jesus a bisa: “Bai, pues, i haci disipel di hende di tur nacion, ... siñando nan pa warda tur loke mi a manda boso.”—Mateo 28:19, 20.

Dos luna despues cu Jesus a bisa esei, 3.000 hende a ser bautisá den solamente un dia. E cantidad di creyentenan rápidamente a aumentá te na 5.000. Esnan cu a kere a siña otronan. Ora persecucion a plama nan, esei a sirbi solamente pa plama nan mensahe. Bijbel ta bisa cu no solamente un par di lider sino “esnan cu a ser plamá a pasa dor dje tera declarando e bon nobo dje palabra.” P’esei, rond di 30 aña despues, apostel Pablo por a skirbi cu e bon nobo a ser “predicá den tur creacion cu ta bou di cielu.”—Echonan 2:41; 4:4; 8:4; Colosensenan 1:23.

Pablo no a combertí hende dor di bisa, manera algun evangelista di television: ‘Aceptá Jesus awor aki mes i lo bo ser salbá pa semper.’ Tampoco e no tabatin e confiansa dje clero mericano cu a skirbi: “Como tiener,... ya mi tabata salbá caba.” Mas cu 20 aña despues cu Jesus personalmente a scoge Pablo pa hiba e mensahe cristian na hende dje nacionnan, e apostel trahando duru aki a skirbi: “Mi ta castigá mi curpa i ta hib’é como esclabo, pa, despues cu mi a predicá na otronan, mi mes no bira desaprobá di algun manera.”—1 Corintionan 9:27; Echonan 9:5, 6, 15.

Salbacion ta un don grátis di Dios. E no por ser ganá. Tog e ta rekerí esfuerso di nos parti. Si un persona a ofrecé bo un regalo masha balioso i bo no a demostrá suficiente aprecio pa recog’é i bai cuné, bo falta di gratitud kisas ta impulsá e dunador pa present’é na un otro hende. Wel, ki balioso e sanger di bida di Jesucristo ta? E ta un don grátis, pero nos mester demostrá aprecio profundo p’e.

Cristiannan berdadero ta den un condicion salbá den e sentido cu nan ta den un posicion aprobá dilanti Dios. Como grupo, nan salbacion ta sigur. Individualmente, nan mester cumpli cu e rekisitonan di Dios. Sin embargo, nos por faya, pasobra Jesus a bisa: “Si cualkier hende no keda den union cu mi, e ta ser tirá afó manera un rama i ta seca.”—Juan 15:6.

“E Palabra di Dios Ta Bibu”

E combersacion cu a ser mencioná na comienso dje artículo anterior a tuma lugá casi 60 aña pasá. Johnny ainda ta kere cu salbacion ta bini solamente mediante Jesucristo, pero e ta realisá cu nos tin cu haci esfuerso pa alcans’é. Ainda e ta convencí cu e Bijbel ta señalá na e único berdadero fuente di speransa pa humanidad i cu nos mester studia e buki maraviyoso ei, ser impulsá dor di dje i lagu’é motivá nos na obranan di amor, fe, bondad, obedencia i awante. Johnny a cria su yunan pa kere mescos i awor e ta alegrá di mira nan en buelta criando nan yunan den e mésun manera. E ta deseá cu tur hende tabatin e clase di fe ei i e ta haci loke e por pa inculcá esei den e curason i mente di otronan.

Apostel Pablo a ser inspirá pa skirbi cu “e palabra di Dios ta bibu i ta ehercé poder.” (Hebreonan 4:12) E por cambia bidanan. E por motivá bo na obranan sincero di amor, fe i obedencia. Pero bo mester haci mas cu djis “aceptá” mentalmente loke Bijbel ta bisa. Studi’é i laga bo curason ser motivá dor di dje. Laga e Bijbel su sabiduria guiá bo. Rond di 5,000.000 Testigo di Jehova dispuesto den mas cu 230 pais ta ofrecé studio di Bijbel grátis na cas. Pa wak kico bo por siña for di un studio asina, skirbi e publicadornan dje revista aki. Lo bo keda encantá cu e fe i fortalesa spiritual cu bo ta adkerí.

[Nota]

[Kuadro página 7]

Paciko “Hiba un Lucha Duru pa e Fe”?

E buki bíblico di Hudas ta ser dirigí na “esnan yamá..., conserbá pa Jesucristo.” E ta bisa cu pasobra nan ‘a aceptá Jesus,’ nan salbacion tabata sigur? No, Hudas a bisa tal personanan cristian pa “hiba un lucha duru pa e fe.” El a duna nan tres motibu pa haci esei. Promé, Dios “a salba un pueblo for dje tera di Egipto,” pero hopi di nan despues a bai perdí. Di dos, asta angelnan a rebelá i a bira demoñonan. Di tres, Dios a destruí Sódoma i Gomora debí na e inmoralidad sexual grosero cu a ser practicá den e stadnan ei. Hudas ta presentá e relatonan bíblico aki “como un ehempel spiertador.” Sí, asta creyentenan “conserbá pa Jesucristo” tin cu tene cuidou pa no cai for dje fe berdadero.—Hudas 1-7.

[Kuadro na página 8]

Cua Ta Corecto?

Bijbel ta bisa: “Un hende ta ser declará hustu mediante fe apart di obranan di ley.” Tambe e ta bisa: “Un hende mester ser declará hustu mediante obranan, i no mediante fe so.” Cua ta corecto? Nos ta ser declará hustu mediante fe of mediante obranan?—Romanonan 3:28; Santiago 2:24.

E contesta armonioso for dje Bijbel ta cu tur dos ta corecto.

Pa siglonan e Ley cu Dios a duna mediante Moises a rekerí dje adoradornan hudiu pa haci sacrificionan i ofrendanan specífico, pa warda dianan di fiesta i pa conformá na rekisitonan di loke nan por i no por a come i otro rekisitonan. Tal “obranan di ley,” of simplemente “obranan,” no tabata necesario mas, despues cu Jesus a percurá e sacrificio perfecto.—Romanonan 10:4.

Pero e echo cu e obranan aki efectuá bou dje Ley di Moises a ser reemplasá dor di Jesus su sacrificio superlativo no a nificá cu nos por ignorá e instruccionnan bíblico. Bijbel ta bisa: “Cuantu mas e sanger di Cristo,... lo haci nos consenshi limpi di obranan [anterior] morto pa nos por rindi sirbishi sagrado n’e Dios bibu?”—Hebreonan 9:14.

Con nos ta “rindi sirbishi sagrado n’e Dios bibu”? Entre otro cosnan, Bijbel ta bisa nos pa combatí e obranan di carni, pa resistí e mundu su inmoralidad i pa evitá su trampanan. E ta bisa: “Lucha e excelente lucha dje fe,” kita “e picá cu fácilmente ta entrampá nos,” i “core cu awante e careda cu tin poní dilanti nos, segun cu nos ta mira atentamente na e Agente Principal i Perfeccionador di nos fe, Jesus.” I Bijbel ta insta nos pa no ‘cansa i entregá den nos alma.’—1 Timoteo 6:12; Hebreonan 12:1-3; Galationan 5:19-21.

Nos no ta gana salbacion dor di haci e cosnan aki, pasobra ningun hende hamas lo por haci suficiente pa meresé un bendicion asina asombroso. Sin embargo, nos lo no ta digno di e don magnífico aki, si nos keda sin demostrá nos amor i obedencia dor di haci loke Bijbel ta bisa cu Dios i Cristo kier pa nos haci. Sin obranan pa demostrá nos fe, nos afirmacion di ta sigui Cristo lo ta deficiente, pasobra Bijbel ta declará claramente: “Fe, si e no tin obra, ta morto riba su mes.”—Santiago 2:17

[Plachi na página 7]

Studia e Bijbel i ser motivá dor di dje