Salmo
BUKI DOS
(Salmo 42-72)
Na e direktor musikal. Maskil* di e desendientenan di Kore.
2 Manera un hende ku tin set di awa, mi tin mester di* Dios, sí, di e Dios bibu.
Ki dia mi tin mag di bini i presentá dilanti di Dios?
3 Mi no por kome; di dia i anochi mi ta yora.
Henter dia, hende ta hasi bofon di mi i puntra mi: “Unda bo Dios a keda?”
4 Mi ta deshogá mi kurason* na bo, i mi ta kòrda riba e kosnan akí:
Un tempu mi tabata kana huntu ku un multitut di hende bai na e kas di Dios.
Ami tabata dirigí nan.*
Nos tabata grita di alegria na kaminda. Sí, nos tabata un multitut ku tabata kanta kantika di gradisimentu,
manera hende ku ta selebrá un fiesta.
5 Dikon mi* ta asina desesperá?
Dikon mi ta intrankil?
Lo mi warda riba Dios,
pasobra un dia lo mi bolbe alab’é komo mi Gran Salbador.
6 Mi Dios, mi* ta desesperá.
P’esei mi ta pensa riba bo,
sí, miéntras mi ta na e pais kaminda riu Yordan ta pasa, riba e kabesnan di seru Hèrmòn
i riba seru Mizar.*
7 Mi ta tende zonido di awa ku ta kore.
Ta zonido di bo watervalnan.
E problemanan ku a dominá mi ta meskos ku bo olanan brutu.
8 Den dia, Yehova ta demostrá mi su amor leal.
Anochi, mi ta kanta un kantika tokante dje, sí, mi ta hasi un orashon na e Dios ku ta duna mi bida.
9 Lo mi puntra Dios, mi baranka:
“Dikon bo a lubidá mi?
Dikon mi tin ku kana rònt tur tristu pa motibu ku mi enemigu ta oprimí mi?”
10 Mi enemigunan ta odia mi i hasi bofon di mi.*
Henter dia, nan ta hasi bofon di mi i puntra mi: “Unda bo Dios a keda?”
11 Dikon mi* ta asina desesperá?
Dikon mi ta intrankil?
Lo mi warda riba Dios,
pasobra un dia lo mi bolbe alab’é komo mi Gran Salbador i mi Dios.